ಜಗದ್ಗುರು XVIನೇ ಬೆನೆಡಿಕ್ಟ್ ರವರ ಶತಮಾನೋತ್ಸವ: ಜೋಸೆಫ್ ರಾಟ್ಸಿಂಗರ್ ರವರನ್ನು ಸ್ಮರಿಸಲು ಕೈಗೊಂಡ ಕಾರ್ಯಕ್ರಮಗಳು

ವ್ಯಾಟಿಕನ್ ವರದಿ

ಜಗದ್ಗುರು XVIನೇ ಬೆನೆಡಿಕ್ಟ್ ರವರ ಜನ್ಮ ಶತಮಾನೋತ್ಸವವನ್ನು ಆಚರಿಸಲು ಒಂದು ವಿಶಾಲ ಅಂತರರಾಷ್ಟ್ರೀಯ ಕಾರ್ಯಕ್ರಮ ಆರಂಭವಾಗಿದೆ. ಈ ಶತಮಾನೋತ್ಸವವು 2027 ಏಪ್ರಿಲ್ 16ರಂದು ನಡೆಯಲಿದೆ.

2026ರಲ್ಲಿ ನಾಲ್ಕು ಖಂಡಗಳಾದ್ಯಂತ ಹತ್ತಕ್ಕಿಂತ ಹೆಚ್ಚು ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದ್ದು, ಜೋಸೆಫ್ ರಾಟ್ಸಿಂಗರ್ ರವರ ವ್ಯಕ್ತಿತ್ವ ಮತ್ತು ಚಿಂತನೆಗಳನ್ನು ಸ್ಮರಿಸುವುದರ ಜೊತೆಗೆ ಅವುಗಳನ್ನು ಆಳವಾಗಿ ಅಧ್ಯಯನ ಮಾಡುವ ಉದ್ದೇಶ ಹೊಂದಿದೆ.

ಈ ಕಾರ್ಯಕ್ರಮಗಳನ್ನು ಅವರ ಹೆಸರಿನ ವ್ಯಾಟಿಕನ್ ಪ್ರತಿಷ್ಠಾನ ಪ್ರಾರಂಭಿಸಿದ್ದು, ಪ್ರತಿಷ್ಠಾನದ ಒಳಗೇ ಸ್ಥಾಪಿಸಲಾದ ಶತಮಾನೋತ್ಸವ ಅಂತರರಾಷ್ಟ್ರೀಯ ಸಮಿತಿಯು ಅವುಗಳನ್ನು ಸಂಯೋಜಿಸುತ್ತದೆ. ಆಸ್ಟ್ರಿಯಾ, ಫ್ರಾನ್ಸ್, ಇಟಲಿ, ಸ್ಪೇನ್, ಹಂಗೇರಿ, ಭಾರತ, ಕೊಲಂಬಿಯಾ, ಅಮೇರಿಕಾ ಮತ್ತು ಕೆನ್ಯಾದಲ್ಲಿ ಕಾರ್ಯಕ್ರಮಗಳು ನಡೆಯಲಿವೆ.

ರಾಟ್ಸಿಂಗರ್ ಪ್ರತಿಷ್ಠಾನದ ಅಧ್ಯಕ್ಷರು ಹಾಗೂ ಶತಮಾನೋತ್ಸವ ಸಮಿತಿಯ ಮುಖ್ಯಸ್ಥರಾದ ವಂ. ಸ್ವಾಮಿ ರೋಬೆರ್ಟೊ ರೆಗೋಲಿರವರ ಮಾತಿನಲ್ಲಿ, “ರಾಟ್ಸಿಂಗರ್ ರವರ ಜನ್ಮ ಶತಮಾನೋತ್ಸವವು ಅವರ ಚಿಂತನೆ ಹಾಗೂ ವಾಸ್ತವಿಕತೆಯ ಬಗ್ಗೆ ಅವರ ದೃಷ್ಟಿಕೋನವನ್ನು ಸಮಗ್ರವಾಗಿ ಪರಿಚಯಿಸಲು ಒಳ್ಳೆಯ ಅವಕಾಶವಾಗಿದೆ. ಇವು ಇಂದಿನ ಧರ್ಮ ಸಭೆ ಮತ್ತು ಸಾಂಸ್ಕೃತಿಕ ಚರ್ಚೆಗಳಿಗೆ ಮಹತ್ವದ ಕೊಡುಗೆಗಳಾಗಿವೆ. ಅವರ ಪರಂಪರೆ ಎರಡನೇ ವಾಟಿಕನ್ ಪರಿಷತ್ತಿನ ಅರ್ಥೈಸುವಿಕೆ, ಕ್ರಿಸ್ತನ ವೈಯಕ್ತಿಕ ಅನುಭವ, ಮತ್ತು ಮಾನವ ಚಿಂತನೆಗೆ ಆಧಾರವಾದ ಯುಕ್ತಿಸಹಿತತೆಗಳನ್ನು ಒಳಗೊಂಡಿದೆ.”

ಶತಮಾನೋತ್ಸವದ ಆರಂಭ ದಿನವಾದ ಏಪ್ರಿಲ್ 16ರಂದು, “ಭವಿಷ್ಯದ ನಂಬಿಕೆ ಧರ್ಮ ಸಭೆಯ ಭವಿಷ್ಯ” ಎಂಬ ಶೀರ್ಷಿಕೆಯ ಜೋಸೆಫ್ ರಾಟ್ಸಿಂಗರ್ XVIನೇ ಬೆನೆಡಿಕ್ಟ್  ಆಯ್ದ ಬರಹಗಳ ನಾಲ್ಕನೇ ಸಂಪುಟವನ್ನು ರೋಮಿನ ಜಗದ್ಗುರುಗಳ ಅಧಿಕಾರ ಸ್ಥಳಕ್ಕೆ ಇಟಾಲಿಯನ್ ರಾಯಭಾರ ಕಚೇರಿಯಲ್ಲಿ ಪರಿಚಯಿಸಲಾಗುತ್ತದೆ.

2026ರ ಕಾರ್ಯಕ್ರಮಗಳು ನವೆಂಬರ್ 18ರಿಂದ 21ರವರೆಗೆ ಕೆನ್ಯಾದ ನೈರೋಬಿಯ ಟಂಗಾಜಾ ವಿಶ್ವವಿದ್ಯಾಲಯದಲ್ಲಿ ನಡೆಯುವ ವಾರ್ಷಿಕ ಅಂತರರಾಷ್ಟ್ರೀಯ ಸಮ್ಮೇಳನದೊಂದಿಗೆ ಮುಕ್ತಾಯಗೊಳ್ಳಲಿವೆ. “ಭರವಸೆಯ ನಕ್ಷತ್ರಗುಚ್ಛಗಳು ಆಫ್ರಿಕಾ ಮತ್ತು XVI ನೇ ಬೆನೆಡಿಕ್ಟ್ ರವರ ದೃಷ್ಟಿಯಲ್ಲಿ ಧರ್ಮ ಸಭೆಯ ಪುನರುಜ್ಜೀವನ ಎಂಬ ವಿಷಯದ ಮೇಲೆ ಈ ಸಮ್ಮೇಳನ ನಡೆಯಲಿದೆ. ಇದು ಮಿನ್ನೆಸೋಟಾದ ಸೇಂಟ್ ಮೇರೀಸ್ ವಿಶ್ವವಿದ್ಯಾಲಯದ ಸಹಯೋಗದಲ್ಲಿ ನಡೆಯಲಿದ್ದು, ಟಂಗಾಜಾ ವಿಶ್ವವಿದ್ಯಾಲಯದ 40ನೇ ವಾರ್ಷಿಕೋತ್ಸವವನ್ನೂ ಗುರುತಿಸುತ್ತದೆ.

ಕೊನೆಗೆ, 2026 ಡಿಸೆಂಬರ್‌ನಲ್ಲಿ ರಾಟ್ಸಿಂಗರ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ. 2027ರ ಕಾರ್ಯಕ್ರಮಗಳ ದಿನಾಂಕಗಳನ್ನು ನಂತರ ಪ್ರಕಟಿಸಲಾಗುತ್ತದೆ.

2026ರ ಕಾರ್ಯಕ್ರಮಗಳ ಸಂಕ್ಷಿಪ್ತ ವಿವರ:

ಇಟಲಿಯ ರೋಮಿನಲ್ಲಿ ಏಪ್ರಿಲ್ 16ರಂದು ಶತಮಾನೋತ್ಸವದ ಉದ್ಘಾಟನೆ ನಡೆಯಲಿದೆ. ಆಸ್ಟ್ರಿಯಾದ ಹೈಲಿಗನ್‌ಕ್ರಾಯ್ಜ್‌ನಲ್ಲಿ ಮಾರ್ಚ್ 11ರಿಂದ ಮೇ 20ರವರೆಗೆ ಉಪನ್ಯಾಸ ಸರಣಿ ನಡೆಯಲಿದೆ. ಇಟಲಿಯ ಜೆಮೊನಿಯೋದಲ್ಲಿ ಜೂನ್ 23ರಂದು ಸಮ್ಮೇಳನ ನಡೆಯಲಿದೆ.

ಭಾರತದ ಬೆಂಗಳೂರಿನಲ್ಲಿ ಜುಲೈ 10-11ರಂದು ಧರ್ಮಗುರುಗಳು ಮತ್ತು ತತ್ವಜ್ಞಾನಿಗಳ ಸಂವಾದ ನಡೆಯಲಿದೆ. ಹಂಗೇರಿಯ ಬುಡಾಪೆಸ್ಟ್‌ನಲ್ಲಿ ಸೆಪ್ಟೆಂಬರ್ 10ರಂದು ಅಧ್ಯಯನ ದಿನ, ಕೊಲಂಬಿಯಾದ ಬೊಗೋಟಾದಲ್ಲಿ ಸೆಪ್ಟೆಂಬರ್ 24-26ರಂದು ಅಂತರರಾಷ್ಟ್ರೀಯ ಸಮ್ಮೇಳನ ನಡೆಯಲಿದೆ.

ಫ್ರಾನ್ಸ್‌ನ ಪ್ಯಾರಿಸ್‌ನಲ್ಲಿ ಅಕ್ಟೋಬರ್ 14ರಂದು, ಆಸ್ಟ್ರಿಯಾದ ವಿಯನ್ನಾದಲ್ಲಿ ಅಕ್ಟೋಬರ್ 22-24ರಂದು, ಸ್ಪೇನ್‌ನ ಅಲ್ಮೇರಿಯಾದಲ್ಲಿ ಅಕ್ಟೋಬರ್ 28-30ರಂದು ವಿಶೇಷ ಕಾರ್ಯಕ್ರಮಗಳು ನಡೆಯಲಿವೆ. ಅಮೇರಿಕಾದ ಮಿನ್ನೆಆಪೊಲಿಸ್‌ನಲ್ಲಿ ನವೆಂಬರ್ 3ರಂದು ಮತ್ತು ವಿನೋನಾ-ರೋಚೆಸ್ಟರ್ ಧರ್ಮಪ್ರಾಂತ್ಯದಲ್ಲಿ ನವೆಂಬರ್ 4-6ರಂದು ಕಾರ್ಯಕ್ರಮಗಳು ನಡೆಯಲಿವೆ.

ಕೊನೆಗೆ, ಕೆನ್ಯಾದ ನೈರೋಬಿಯಲ್ಲಿ ನವೆಂಬರ್ 18-21ರಂದು ಅಂತರರಾಷ್ಟ್ರೀಯ ಸಮ್ಮೇಳನ ನಡೆಯಲಿದೆ.