ಅನ್ನುವಾರಿಯೊ ಪಾಂಟಿಫಿಸಿಯೋ 2026ರ ಹೊಸ ಅಂಕಿಅಂಶಗಳು ಆಫ್ರಿಕಾದಲ್ಲಿ ಕಥೋಲಿಕರ ಸಂಖ್ಯೆ ಹೆಚ್ಚುತ್ತಿದೆ ಎಂಬುದನ್ನು ತೋರಿಸುತ್ತವೆ.

ವ್ಯಾಟಿಕನ್ ವರದಿ

ಧರ್ಮ ಸಭೆಯ ಅಂಕಿಅಂಶಗಳ ಕೇಂದ್ರ ಕಚೇರಿ ಸಿದ್ಧಪಡಿಸಿದ ಅನ್ನುವಾರಿಯೊ ಪಾಂಟಿಫಿಸಿಯೋ 2026 ಮತ್ತು ಅನ್ನುವಾರಿಯಮ್ ಸ್ಟಾಟಿಸ್ಟಿಕಮ್ ಎಕ್ಲೆಸಿಯೆ 2024 ಎಂಬ ಪ್ರಕಟಣೆಗಳು ಈಗ ಲಭ್ಯವಾಗಿವೆ. ಇವುಗಳಲ್ಲಿ ಜಗತ್ತಿನಾದ್ಯಂತ ಕಥೋಲಿಕ ಧರ್ಮ ಸಭೆಯ ಜೀವನ ಮತ್ತು ಚಟುವಟಿಕೆಗಳ ಕುರಿತು ಸಮಗ್ರ ಅಂಕಿಅಂಶಗಳು ನೀಡಲಾಗಿದೆ. 2025ರ ಅವಧಿಯಲ್ಲಿ ಆರು ಧರ್ಮಪ್ರಾಂತಗಳನ್ನು ಮಹಾಧರ್ಮಪ್ರಾಂತಗಳಾಗಿಸಲಾಯಿತು ಮತ್ತು ಎಂಟು ಹೊಸ ಧರ್ಮಪ್ರಾಂತಗಳನ್ನು ಸ್ಥಾಪಿಸಲಾಯಿತು.

ಕಳೆದ ಎರಡು ವರ್ಷಗಳಲ್ಲಿ ವಿಶ್ವದ ದೀಕ್ಷಿತ ಕಥೋಲಿಕರ ಸಂಖ್ಯೆ ಸ್ಥಿರವಾಗಿದ್ದು, 2024ರಲ್ಲಿ ಸುಮಾರು 1.422 ಬಿಲಿಯನ್ ಜನರು ಕಥೋಲಿಕರಾಗಿದ್ದಾರೆ, ಇದು 2023ರ 1.406 ಬಿಲಿಯನ್ ಸಂಖ್ಯೆಗೆ ಹೋಲಿಸಿದರೆ 1.14% ಏರಿಕೆಯಾಗಿದೆ. ಯುರೋಪಿನಲ್ಲಿ ಬೆಳವಣಿಗೆ ನಿಧಾನವಾಗಿದ್ದು ಕೇವಲ 0.8% ಏರಿಕೆಯಾಗಿದೆ. ಅಮೆರಿಕಾ ಮತ್ತು ಏಷ್ಯಾದಲ್ಲಿ ಕಥೋಲಿಕರ ಬೆಳವಣಿಗೆ ಸಾಮಾನ್ಯ ಜನಸಂಖ್ಯೆಗಿಂತ ಕಡಿಮೆ, ಆದರೆ ಓಷಿಯಾನಿಯಾದಲ್ಲಿ ಹೆಚ್ಚು ಬೆಳವಣಿಗೆ ಕಂಡುಬಂದಿದೆ.

ಆಫ್ರಿಕಾದಲ್ಲಿ ಕಥೋಲಿಕರ ಸಂಖ್ಯೆ ವಿಶೇಷವಾಗಿ ಗಮನಾರ್ಹವಾಗಿ ಹೆಚ್ಚಾಗಿದೆ. 2023ರಲ್ಲಿ ಸುಮಾರು 281 ಮಿಲಿಯನ್ ಇದ್ದ ಕಥೋಲಿಕರ ಸಂಖ್ಯೆ 2024ರಲ್ಲಿ 288 ಮಿಲಿಯನ್‌ಕ್ಕಿಂತ ಹೆಚ್ಚು ಆಗಿದೆ. ಇದರಿಂದ ಜಾಗತಿಕ ಕಥೋಲಿಕರಲ್ಲಿ ಆಫ್ರಿಕಾದ ಪಾಲು 19.9%ರಿಂದ 20.3%ಕ್ಕೆ ಏರಿಕೆಯಾಗಿದೆ, ಯುರೋಪಿನ ಪಾಲು ಸ್ವಲ್ಪ ಕುಸಿತ ಕಂಡಿದೆ. ಅಮೆರಿಕಾದಲ್ಲಿ ಇನ್ನೂ 47.7% ಕಥೋಲಿಕರು ಇದ್ದು, ಏಷ್ಯಾ ಮತ್ತು ಓಷಿಯಾನಿಯಾದಲ್ಲಿ ಕ್ರಮವಾಗಿ 11% ಮತ್ತು 0.9% ಪ್ರಮಾಣದಲ್ಲಿ ಸ್ಥಿರವಾಗಿದೆ.

ಧರ್ಮ ಸಭೆಯ ಪ್ರೇಷಿತರ ಕಾರ್ಯಗಳಲ್ಲಿ ತೊಡಗಿರುವವರ ಸಂಖ್ಯೆ 2024ರಲ್ಲಿ 44.6 ಲಕ್ಷಕ್ಕಿಂತ ಹೆಚ್ಚು ಇದ್ದು, ಇದು 0.7% ಏರಿಕೆಯಾಗಿದೆ. ಇದರಲ್ಲಿ ಬಿಷಪ್‌ಗಳು, ಯಾಜಕರು, ಉಪಯಾಜಕರು, ಧಾರ್ಮಿಕ ಸಹೋದರ-ಸಹೋದರಿಯರು, ಸಾಮಾನ್ಯ ಪ್ರಜೆಗಳು ಮಿಷನರಿಗಳು ಮತ್ತು ಧಾರ್ಮಿಕ ಶಿಕ್ಷಣ ಉಪದೇಶಿಗಳು ಸೇರಿದ್ದಾರೆ. ಒಟ್ಟಾರೆ, ಧಾರ್ಮಿಕ ಸೇವಕರಲ್ಲಿ 10.4% ಮಂದಿ ಯಾಜಕರಾಗಿದ್ದು, ಆಫ್ರಿಕಾ ಮತ್ತು ಅಮೆರಿಕಾದಲ್ಲಿ ಪ್ರಜೆಗಳ ಪಾತ್ರ ಹೆಚ್ಚು ಇರುವುದನ್ನು ಸೂಚಿಸುತ್ತದೆ.

2024ರಲ್ಲಿ ಜಗತ್ತಿನಲ್ಲಿ 465,000ಕ್ಕಿಂತ ಹೆಚ್ಚು ಧಾರ್ಮಿಕ ನಾಯಕರು ಇದ್ದರು, ಇದರಲ್ಲಿ 5,525 ಬಿಷಪ್‌ಗಳು ಮತ್ತು 407,000ಕ್ಕೂ ಹೆಚ್ಚು ಯಾಜಕರು ಸೇರಿದ್ದಾರೆ. ಯಾಜಕರ ಸಂಖ್ಯೆ ಸ್ವಲ್ಪ ಹೆಚ್ಚಳ ಕಂಡರೂ, ಅವರ ಹಂಚಿಕೆ ಖಂಡಗಳಾದ್ಯಂತ ವ್ಯತ್ಯಾಸವಾಗಿದ್ದು, ಪ್ರತಿ ಯಾಜಕರಿಗಿರುವ ಭಕ್ತರ ಸಂಖ್ಯೆ ಕೂಡ ಬಹಳ ಭಿನ್ನವಾಗಿದೆ ಯುರೋಪಿನಲ್ಲಿ ಸುಮಾರು 1,800 ಜನರು, ದಕ್ಷಿಣ ಅಮೆರಿಕಾದಲ್ಲಿ 7,600ಕ್ಕೂ ಹೆಚ್ಚು ಜನರನ್ನು ಕಾಣಬಹುದಾಗಿದೆ.

ಇತರವಾಗಿ, ಶಾಶ್ವತ ಉಪಯಾಜಕರ ಸಂಖ್ಯೆ ಮತ್ತು ಸಾಮಾನ್ಯ ಪ್ರಜೆ ಮಿಷನರಿಗಳ ಸಂಖ್ಯೆ ಹೆಚ್ಚಳ ಕಂಡಿದೆ, ಆದರೆ ಧಾರ್ಮಿಕ ಸಹೋದರಿಯರ ಸಂಖ್ಯೆ ಕೆಲವು ಖಂಡಗಳಲ್ಲಿ ಕಡಿಮೆಯಾಗಿದೆ. ಯಾಜಕತ್ವಕ್ಕೆ ಪ್ರವೇಶಿಸಲು ಸಿದ್ಧರಾಗಿರುವ ವಿದ್ಯಾರ್ಥಿಗಳ ಸಂಖ್ಯೆ ಜಾಗತಿಕವಾಗಿ ಕಡಿಮೆಯಾದರೂ, ಆಫ್ರಿಕಾದಲ್ಲಿ ಮಾತ್ರ ಹೆಚ್ಚಳ ಕಂಡಿದೆ. ಸಂಸ್ಕಾರಗಳ ಪಾಲ್ಗೊಳ್ಳುವಿಕೆಯಲ್ಲಿ, ದೀಕ್ಷೆಗಳು, ಮೊದಲ ಪರಮ ಪ್ರಸಾದ ಮತ್ತು ದೃಢೀಕರಣಗಳ ಸಂಖ್ಯೆಯಲ್ಲಿ ಸ್ವಲ್ಪ ಬದಲಾವಣೆಗಳಿದ್ದರೂ, ಅಮೆರಿಕಾದಲ್ಲಿ ಹೆಚ್ಚಿನ ಪಾಲು ಕಂಡುಬರುತ್ತಿದೆ.