ಜಗದ್ಗರುಗಳ ಅಧಿಕಾರ ಸ್ಥಳ : ಕ್ರೈಸ್ತರು ವಿಶ್ವದಲ್ಲಿ ಅತೀ ಹೆಚ್ಚು ಹಿಂಸೆಗೆ ಒಳಗಾಗುತ್ತಿರುವ ಧಾರ್ಮಿಕ ಸಮುದಾಯ

ವ್ಯಾಟಿಕನ್ ವರದಿ

ಜಿನೀವಾದಲ್ಲಿರುವ ವಿಶ್ವಸಂಸ್ಥೆ ಹಾಗೂ ಇತರ ಅಂತರರಾಷ್ಟ್ರೀಯ ಸಂಸ್ಥೆಗಳ ಬಳಿಯ ಜಗದ್ಗುರುಗಳ ಅಧಿಕಾರ ಸ್ಥಳದ ಶಾಶ್ವತ ವೀಕ್ಷಕರಾದ ಆರ್ಚ್‌ಬಿಷಪ್ ಎಟ್ಟೊರೆ ಬಾಲೆಸ್ಟ್ರೆರೊ ರವರು ಮಾರ್ಚ್ 3 ರಂದು ನಡೆದ ಹಿಂಸೆಗೆ ಒಳಗಾಗುತ್ತಿರುವ ಕ್ರೈಸ್ತರೊಂದಿಗೆ ನಿಲ್ಲುವುದು ನಂಬಿಕೆ ಮತ್ತು ಕ್ರೈಸ್ತ ಮೌಲ್ಯಗಳ ರಕ್ಷಣೆಯು ಎಂಬ ಕಾರ್ಯಕ್ರಮದಲ್ಲಿ ಮಾತನಾಡಿದರು. ರಾಷ್ಟ್ರಗಳಿಗೆ ಧಾರ್ಮಿಕ ಸ್ವಾತಂತ್ರ್ಯವನ್ನು ರಕ್ಷಿಸುವುದು, ಗೌರವಿಸುವುದು ಮತ್ತು ಖಚಿತಪಡಿಸುವುದು ಎಂಬ ಜವಾಬ್ದಾರಿ ಇದೆ ಎಂದು ಅವರು ಒತ್ತಿ ಹೇಳಿದರು.

ಅವರು ತಿಳಿಸಿದಂತೆ, ವಿಶ್ವದಾದ್ಯಂತ ಸುಮಾರು 400 ಮಿಲಿಯನ್ ಕ್ರೈಸ್ತರು ಹಿಂಸೆ ಅಥವಾ ಹಿಂಸಾಚಾರವನ್ನು ಎದುರಿಸುತ್ತಿದ್ದಾರೆ. ಇದರಿಂದ ಕ್ರೈಸ್ತರು ವಿಶ್ವದಲ್ಲೇ ಅತೀ ಹೆಚ್ಚು ಹಿಂಸೆಗೆ ಒಳಗಾಗುತ್ತಿರುವ ಧಾರ್ಮಿಕ ಸಮುದಾಯವಾಗಿದ್ದಾರೆ. ಅಂದರೆ ಪ್ರತಿಯೊಂದು ಏಳು ಕ್ರೈಸ್ತರಲ್ಲಿ ಒಬ್ಬರು ಯಾವುದೋ ರೂಪದಲ್ಲಿ ಹಿಂಸೆಯಿಂದ ಪ್ರಭಾವಿತರಾಗುತ್ತಿದ್ದಾರೆ. 2025ರಲ್ಲಿ ಮಾತ್ರವೇ ಸುಮಾರು 5,000 ಕ್ರೈಸ್ತರು ತಮ್ಮ ನಂಬಿಕೆಯ ಕಾರಣದಿಂದ ಕೊಲ್ಲಲ್ಪಟ್ಟಿದ್ದಾರೆ, ಇದು ಸರಾಸರಿ ದಿನಕ್ಕೆ 13 ಜನರಷ್ಟಾಗುತ್ತದೆ ಎಂದು ಅವರು ಹೇಳಿದರು.

ಕ್ರೈಸ್ತ ಪರಂಪರೆಯಲ್ಲಿ ನಂಬಿಕೆಗಾಗಿ ಪ್ರಾಣ ತ್ಯಾಗ ಮಾಡುವವರನ್ನು “ಶಹೀದರು” ಎಂದು ಕರೆಯಲಾಗುತ್ತದೆ ಎಂದು ಆರ್ಚ್‌ಬಿಷಪ್ ವಿವರಿಸಿದರು. ಅವರು ತಮ್ಮ ನಂಬಿಕೆಯ ಸಾಕ್ಷಿಗಳಾಗಿದ್ದು, ಅಧಿಕಾರದ ತರ್ಕವನ್ನು ಸವಾಲು ಮಾಡುವ ಮೌಲ್ಯಗಳನ್ನು ಜೀವಂತವಾಗಿಟ್ಟಿದ್ದಾರೆ. ಆದರೆ ಅಂತರರಾಷ್ಟ್ರೀಯ ಕಾನೂನಿನ ದೃಷ್ಟಿಯಿಂದ ಅವರು ಮಾನವ ಹಕ್ಕುಗಳ ಭಾರೀ ಉಲ್ಲಂಘನೆಯ ಬಲಿಗಳಾಗಿದ್ದಾರೆ ಎಂದು ಅವರು ಹೇಳಿದರು. ಈ ರೀತಿಯ ಘಟನೆಗಳು ಸಂಭವಿಸದಂತೆ ರಕ್ಷಿಸುವುದು ರಾಷ್ಟ್ರಗಳ ಮೂಲಭೂತ ಜವಾಬ್ದಾರಿಯಾಗಿದೆ ಎಂದು ಅವರು ನೆನಪಿಸಿದರು.

ಧಾರ್ಮಿಕ ಸ್ವಾತಂತ್ರ್ಯವು ಮೂಲಭೂತ ಮಾನವ ಹಕ್ಕು ಎಂದು ಅವರು ಸ್ಪಷ್ಟಪಡಿಸಿದರು. ರಾಜ್ಯವು ಈ ಹಕ್ಕನ್ನು ರಕ್ಷಿಸುವುದಷ್ಟೇ ಅಲ್ಲ, ಅದನ್ನು ಉಲ್ಲಂಘಿಸುವ ಯಾವುದೇ ವ್ಯಕ್ತಿ ಅಥವಾ ಗುಂಪನ್ನು ತಡೆಯುವ ಜವಾಬ್ದಾರಿಯೂ ಹೊಂದಿದೆ. ದಾಳಿ ನಡೆಯುವ ಮೊದಲು, ನಡೆಯುವ ಸಮಯದಲ್ಲಿ ಮತ್ತು ನಂತರವೂ ಭಕ್ತರನ್ನು ರಕ್ಷಿಸುವ ಕ್ರಮಗಳು ಅಗತ್ಯವೆಂದು ಅವರು ಹೇಳಿದರು. ಆದರೆ ಧಾರ್ಮಿಕ ಹಿಂಸಾಚಾರದ ಪ್ರಕರಣಗಳಲ್ಲಿ ಶಿಕ್ಷೆಯಿಲ್ಲದೆ ತಪ್ಪಿಸಿಕೊಳ್ಳುವಿಕೆ ಇನ್ನೂ ದೊಡ್ಡ ಸಮಸ್ಯೆಯಾಗಿದೆ ಎಂದು ಅವರು ಸೂಚಿಸಿದರು.

ಆರ್ಚ್‌ಬಿಷಪ್ ಬಾಲೆಸ್ಟ್ರೆರೊ ರವರು ಕ್ರೈಸ್ತರು ಎದುರಿಸುವ ಹಿಂಸಾಚಾರವು ಕೇವಲ ದೈಹಿಕ ದಾಳಿಗಳಷ್ಟೇ ಅಲ್ಲದೆ ಸೂಕ್ಷ್ಮ ಹಾಗೂ ಮೌನ ರೂಪದಲ್ಲಿಯೂ ನಡೆಯುತ್ತದೆ ಎಂದು ಹೇಳಿದರು. ಸಮಾಜ ಮತ್ತು ಉದ್ಯೋಗ ಕ್ಷೇತ್ರಗಳಲ್ಲಿ ನಿಧಾನವಾಗಿ ಅಂಚಿನತ್ತ ತಳ್ಳುವುದು, ಭೇದಭಾವ ತೋರಿಸುವುದು, ಕಾನೂನಿನಲ್ಲಿ ಒಪ್ಪಿಗೆಯಾದ ಹಕ್ಕುಗಳನ್ನು ಸೀಮಿತಗೊಳಿಸುವ ಕ್ರಮಗಳು ಇವುಗಳಲ್ಲಿ ಸೇರಿವೆ. ಯುರೋಪ್‌ನಲ್ಲೇ 2024ರಲ್ಲಿ ಕ್ರೈಸ್ತರ ವಿರುದ್ಧದ ಸಾವಿರಾರು ದ್ವೇಷ ಅಪರಾಧಗಳು ದಾಖಲಾಗಿವೆ ಎಂದು ಅವರು ಉಲ್ಲೇಖಿಸಿದರು.

ಕೊನೆಯಲ್ಲಿ, ಕ್ರೈಸ್ತರ ಮೇಲೆ ನಡೆಯುವ ದಾಳಿಗಳು ಕ್ರೈಸ್ತ ಧರ್ಮದ ಸಂಕೇತವಾದ ಶಿಲುಬೆಯ ಮೇಲಿನ ದಾಳಿಗಳೇ ಎಂದು ಅವರು ಹೇಳಿದರು. ಶಿಲುಬೆ ಲಂಬ ರೇಖೆ ಮಾನವನ ದೇವರ ಬಳಿಯ ಆಕರ್ಷಣೆಯನ್ನು ಸೂಚಿಸುತ್ತಿದ್ದರೆ, ಸಮತಟ್ಟಾದ ರೇಖೆ ಮಾನವರ ನಡುವೆ ಇರುವ ಸಂಬಂಧವನ್ನು ಪ್ರತಿನಿಧಿಸುತ್ತದೆ. ಈ ಎರಡನ್ನೂ ಹಾಳುಮಾಡುವ ಪ್ರಯತ್ನಗಳು ಮಾನವ ಸಮಾಜದ ಏಕತೆಯನ್ನು ದುರ್ಬಲಗೊಳಿಸುವುದಾಗಿ ಅವರು ಎಚ್ಚರಿಸಿದರು.