ಅಸ್ಸಿಸಿಗೆ ಜಗದ್ಗುರುಗಳ ಭೇಟಿಯ ವೇಳಾಪಟ್ಟಿ ಹಾಗೂ ಆಗಸ್ಟ್ ತಿಂಗಳ ಧಾರ್ಮಿಕ ಆಚರಣೆಗಳು.

ವ್ಯಾಟಿಕನ್ ವರದಿ

ಆಗಸ್ಟ್ 6, ಗುರುವಾರದಂದು, ಕ್ರಿಸ್ತನ ರೂಪಾಂತರದ ಹಬ್ಬದ ಸಂದರ್ಭದಲ್ಲಿ ಜಗದ್ಗುರು XIVನೇ ಲಿಯೋರವರು ಇಟಲಿಯ ಅಸ್ಸಿಸಿ ಪಟ್ಟಣಕ್ಕೆ ಧರ್ಮಪಾಲನಾ ಭೇಟಿಯನ್ನು ಕೈಗೊಳ್ಳಲಿದ್ದಾರೆ. ಅಲ್ಲಿ ಅವರು ನೂರಾರು ಯುವಜನರನ್ನು ಭೇಟಿಯಾಗಿ, ಪವಿತ್ರ ಬಲಿಪೂಜೆಯನ್ನು ನೆರವೇರಿಸುವುದರ ಜೊತೆಗೆ, ಸ್ಥಳೀಯ ನಾಗರಿಕ ಅಧಿಕಾರಿಗಳು ಹಾಗೂ ಧರ್ಮ ಸಭೆಯ ಪ್ರತಿನಿಧಿಗಳನ್ನು ಭೇಟಿಯಾಗಲಿದ್ದಾರೆ.

ಆಗಸ್ಟ್ 3ರಿಂದ 6ರವರೆಗೆ ಅಸ್ಸಿಸಿಯಲ್ಲಿ ನಡೆಯಲಿರುವ “ಗೋ! ಫ್ರಾನ್ಸಿಸ್ಕನ್ ಯುವಜನ ಸಮಾಗಮ”ದಲ್ಲಿ ಭಾಗವಹಿಸುವ ಯುವಜನರನ್ನು ಜಗದ್ಗುರುಗಳು ಭೇಟಿಯಾಗಲಿದ್ದಾರೆ.

ಜಗದ್ಗುರುಗಳ ಅಧಿಕಾರ ಸ್ಥಳದ ಪತ್ರಿಕಾ ಕಚೇರಿ ಗುರುವಾರ ಬಿಡುಗಡೆ ಮಾಡಿದ ವೇಳಾಪಟ್ಟಿಯ ಪ್ರಕಾರ, ಜಗದ್ಗುರು XIVನೇ ಲಿಯೋರವರು ಬೆಳಗ್ಗೆ 8:00 ಗಂಟೆಗೆ ಹೆಲಿಕಾಪ್ಟರ್ ಮೂಲಕ ವ್ಯಾಟಿಕನ್‌ನಿಂದ ಹೊರಟು, ಬೆಳಗ್ಗೆ 8:30ಕ್ಕೆ ಅಸ್ಸಿಸಿಗೆ ಆಗಮಿಸಲಿದ್ದಾರೆ. ಅಲ್ಲಿ ಅಸ್ಸಿಸಿಯ ಆರ್ಚ್‌ಬಿಷಪ್ ಫೆಲಿಚೆ ಅಕ್ರೊಕ್ಕಾ ಹಾಗೂ ಇಟಲಿಯ ನಾಗರಿಕ ಅಧಿಕಾರಿಗಳು ಅವರನ್ನು ಸ್ವಾಗತಿಸಲಿದ್ದಾರೆ.

ನಂತರ ಜಗದ್ಗುರುಗಳು ಸಂತ ಮೇರಿ ಆಫ್ ದಿ ಏಂಜಲ್ಸ್ ಬಸಿಲಿಕಾಗೆ ತೆರಳಿ, ಫ್ರಾನ್ಸಿಸ್ಕನ್ ಧಾರ್ಮಿಕ ಸಂಸ್ಥೆಗಳ ಪ್ರಧಾನ ಮಂತ್ರಿಗಳನ್ನು ಭೇಟಿಯಾಗಲಿದ್ದಾರೆ. ಬಳಿಕ ಬೆಳಗ್ಗೆ 8:45ಕ್ಕೆ ಸಂತ ಮೇರಿ ಆಫ್ ದಿ ಏಂಜಲ್ಸ್ ಚೌಕದಲ್ಲಿ ಯುವಜನರೊಂದಿಗೆ ಸಮಾಗಮ ನಡೆಸಿ, ಅವರು ಕೇಳುವ ಮೂರು ಪ್ರಶ್ನೆಗಳಿಗೆ ಉತ್ತರಿಸಲಿದ್ದಾರೆ.

ಈ ಕಾರ್ಯಕ್ರಮದ ನಂತರ, ಬೆಳಗ್ಗೆ 9:15ಕ್ಕೆ ಮಠದ ಆವರಣದಲ್ಲಿರುವ ಕ್ಲಾಯ್ಸ್ಟರ್‌ನಲ್ಲಿ ಫ್ರಾನ್ಸಿಸ್ಕನ್ ಧಾರ್ಮಿಕ ಸಂಸ್ಥೆಯ ಪ್ರತಿನಿಧಿಗಳನ್ನು ಜಗದ್ಗುರುಗಳು ಭೇಟಿಯಾಗಿ ಶುಭಾಶಯ ಕೋರಲಿದ್ದಾರೆ. ಇವರಲ್ಲಿ ಸಂತ ಫ್ರಾನ್ಸಿಸ್ ರವರ ಮರಣದ 800ನೇ ವಾರ್ಷಿಕೋತ್ಸವದ ಅಂಗವಾಗಿ ಕಾರ್ಯಕ್ರಮಗಳನ್ನು ಆಯೋಜಿಸಿದ ರಾಷ್ಟ್ರೀಯ ಸಮಿತಿಯ ಸದಸ್ಯರೂ ಸೇರಿದ್ದಾರೆ.

ನಂತರ ಬೆಳಗ್ಗೆ 10:30ಕ್ಕೆ ಜಗದ್ಗುರು XIVನೇ ಲಿಯೋರವರು ಸಂತ ಮೇರಿ ಆಫ್ ದಿ ಏಂಜಲ್ಸ್ ಬಸಿಲಿಕಾದಲ್ಲಿ ಪವಿತ್ರ ಬಲಿಪೂಜೆಯನ್ನು ನೆರವೇರಿಸಲಿದ್ದಾರೆ. ಬಲಿಪೂಜೆಯ ಅಂತ್ಯದಲ್ಲಿ ಒಬ್ಬ ಯುವಕ ಅಥವಾ ಯುವತಿ ಈ ಭೇಟಿಗಾಗಿ ಜಗದ್ಗುರುಗಳಿಗೆ ಕೃತಜ್ಞತೆ ಸಲ್ಲಿಸಲಿದ್ದಾರೆ. ಮಧ್ಯಾಹ್ನ ಸುಮಾರು 12:15ಕ್ಕೆ ಜಗದ್ಗುರುಗಳ ಹೆಲಿಕಾಪ್ಟರ್ ಅಸ್ಸಿಸಿಯಿಂದ ಹೊರಟು, 12:45ಕ್ಕೆ ವ್ಯಾಟಿಕನ್‌ನಲ್ಲಿ ಇಳಿಯಲಿದೆ.

ಯುವಜನರು ಸಂತ ಫ್ರಾನ್ಸಿಸ್ ಅವರನ್ನು ಭೇಟಿಯಾಗುವ ಸಮಾಗಮ

“ಗೋ! ಫ್ರಾನ್ಸಿಸ್ಕನ್ ಯುವಜನ ಸಮಾಗಮ”ವು ಯುರೋಪಿನ ವಿವಿಧ ಭಾಗಗಳಿಂದ ಆಗಮಿಸುವ 18ರಿಂದ 33 ವರ್ಷ ವಯಸ್ಸಿನ ಯುವಜನರನ್ನು—ವಿಶ್ವಾಸಿಗಳನ್ನೂ ಅವಿಶ್ವಾಸಿಗಳನ್ನೂ—ಒಟ್ಟುಗೂಡಿಸುವ ಅಂತರರಾಷ್ಟ್ರೀಯ ಸಮಾಗಮವಾಗಿದೆ. ಇದರಲ್ಲಿ ಕಾರ್ಯಾಗಾರಗಳು, ಪ್ರಾರ್ಥನಾ ಕಾರ್ಯಕ್ರಮಗಳು, ಸಂಗೀತ ಸ್ಪರ್ಧೆ ಸೇರಿದಂತೆ ವಿವಿಧ ಚಟುವಟಿಕೆಗಳು ನಡೆಯಲಿವೆ.

2026ನೇ ವರ್ಷವು ಸಂತ ಫ್ರಾನ್ಸಿಸ್ ಅಸ್ಸಿಸಿಯವರ ಮರಣದ 800ನೇ ವಾರ್ಷಿಕೋತ್ಸವವನ್ನು ಗುರುತಿಸುತ್ತದೆ. ಈ ಸ್ಮರಣಾರ್ಥವಾಗಿ ಅಸ್ಸಿಸಿಯಲ್ಲಿ ವರ್ಷವಿಡೀ ಅನೇಕ ಕಾರ್ಯಕ್ರಮಗಳು, ಧಾರ್ಮಿಕ ಆಚರಣೆಗಳು ಮತ್ತು ಸಮಾಗಮಗಳನ್ನು ಆಯೋಜಿಸಲಾಗುತ್ತಿದೆ.

ಆಗಸ್ಟ್ ತಿಂಗಳಲ್ಲಿ ಜಗದ್ಗುರುಗಳ ಇತರ ಧಾರ್ಮಿಕ ಕಾರ್ಯಕ್ರಮಗಳು

ಸರ್ವೋಚ್ಚ ಜಗದ್ಗುರುಗಳ ಧಾರ್ಮಿಕ ಆಚರಣೆಗಳ ಕಚೇರಿಯು ಆಗಸ್ಟ್ ತಿಂಗಳಲ್ಲಿ ಜಗದ್ಗುರು XIVನೇ ಲಿಯೋರವರು ಪಾಲ್ಗೊಳ್ಳಲಿರುವ ಇತರ ಧಾರ್ಮಿಕ ಕಾರ್ಯಕ್ರಮಗಳ ವೇಳಾಪಟ್ಟಿಯನ್ನೂ ಪ್ರಕಟಿಸಿದೆ.

ಅಸ್ಸಿಸಿಯ ಭೇಟಿಯ ಹೊರತಾಗಿ, ಆಗಸ್ಟ್ 15, ಶನಿವಾರದಂದು, ಪವಿತ್ರ ಕನ್ಯಾಮರಿಯ ಸ್ವರ್ಗಾರೋಹಣದ ಮಹೋತ್ಸವದ ಸಂದರ್ಭದಲ್ಲಿ ಬೆಳಗ್ಗೆ 10:00 ಗಂಟೆಗೆ ಕ್ಯಾಸ್ಟೆಲ್ ಗಾಂಡೋಲ್ಫೊದಲ್ಲಿರುವ ಸಂತ ಥಾಮಸ್ ಆಫ್ ವಿಲ್ಲನೋವಾ ಪಾಂಟಿಫಿಕಲ್ ಧರ್ಮ ಕೇಂದ್ರದಲ್ಲಿ ಜಗದ್ಗುರುಗಳು ಪವಿತ್ರ ಬಲಿಪೂಜೆಯನ್ನು ನೆರವೇರಿಸಲಿದ್ದಾರೆ.

ಆಗಸ್ಟ್ 22, ಶನಿವಾರದಂದು, ಜಗದ್ಗುರುಗಳು ಮಧ್ಯ ಇಟಲಿಯ ರಿಮಿನಿ ನಗರಕ್ಕೆ ಧರ್ಮಪಾಲನಾ ಭೇಟಿಯನ್ನು ಕೈಗೊಳ್ಳಲಿದ್ದಾರೆ. ಅಲ್ಲಿ ನಡೆಯಲಿರುವ ‘ಜನರ ನಡುವಿನ ಸ್ನೇಹಕ್ಕಾಗಿ ಸಮಾಗಮ’ದ 47ನೇ ಆವೃತ್ತಿಯಲ್ಲಿ ಅವರು ಭಾಗವಹಿಸಲಿದ್ದಾರೆ. ಸಂಜೆ 6:30ಕ್ಕೆ ನಗರದ ಬಂದರಿನಲ್ಲಿ ಪವಿತ್ರ ಬಲಿಪೂಜೆಯನ್ನು ನೆರವೇರಿಸಲಿದ್ದಾರೆ.

ನಂತರ ಆಗಸ್ಟ್ 29, ಶನಿವಾರದಂದು, ಸಂಜೆ 6:00 ಗಂಟೆಗೆ ಕ್ಯಾಸ್ಟೆಲ್ ಗಾಂಡೋಲ್ಫೊದಲ್ಲಿರುವ ಸರೋವರದ ಮಾತೆಯ ಧರ್ಮ ಸಭೆಯಲ್ಲಿ  ಪವಿತ್ರ ಬಲಿಪೂಜೆಯನ್ನು ನೆರವೇರಿಸಿ, ಬಳಿಕ ಮೆರವಣಿಗೆಗೆ ನೇತೃತ್ವ ನೀಡಲಿದ್ದಾರೆ.