ಕಾಸ್ಟೆಲ್ ಗಾಂಡೋಲ್ಫೋದಲ್ಲಿನ ವಿಶ್ರಾಂತಿ ಅವಧಿಗೆ ಜಗದ್ಗುರು XIVನೇ ಲಿಯೋರವರು ತೆರೆ ಎಳೆದರು.
ವ್ಯಾಟಿಕನ್ ವರದಿ
ಜುಲೈ 27ರ ಸೋಮವಾರ ಸಂಜೆ ರಾತ್ರಿ 8.30ರ ಬಳಿಕ ಜಗದ್ಗುರು XIVನೇ ಲಿಯೋರವರು ಕಾಸ್ಟೆಲ್ ಗಾಂಡೋಲ್ಫೋವನ್ನು ತೊರೆದು, ಜುಲೈ 5ರಂದು ಆರಂಭವಾಗಿದ್ದ ತಮ್ಮ ವಿಶ್ರಾಂತಿ ಅವಧಿಯನ್ನು ಪೂರ್ಣಗೊಳಿಸಿ ವ್ಯಾಟಿಕನ್ಗೆ ಮರಳಿದರು.
ಜಗದ್ಗುರುಗಳ ವಾಹನವು ಜಗದ್ಗುರುಗಳ ನಿವಾಸದಿಂದ ಹೊರಟಾಗ ಅವರನ್ನು ಬೀಳ್ಕೊಡಲು ನೆರೆದಿದ್ದ ಭಕ್ತರನ್ನು ಅವರು ಆತ್ಮೀಯವಾಗಿ ಅಭಿನಂದಿಸಿದರು. ಅಲ್ಲಿದ್ದ ತಮ್ಮ ಪೋಷಕರೊಂದಿಗೆ ಕಾಯುತ್ತಿದ್ದ ಹಲವಾರು ಮಕ್ಕಳಿಗೆ ಅವರು ಆಶೀರ್ವಾದ ನೀಡಿದರು.
ಜುಲೈ 29ರ ಬುಧವಾರ ಅವರು ಮತ್ತೊಮ್ಮೆ ಕಾಸ್ಟೆಲ್ ಗಾಂಡೋಲ್ಫೋಗೆ ತೆರಳಿ "ಶಾಂತಿಯ ಸ್ತುತಿಗೀತೆ" ಎಂಬ ಪ್ರಾರ್ಥನೆ ಮತ್ತು ಸಹೋದರತ್ವದ ಸಮಾವೇಶದಲ್ಲಿ ಭಾಗವಹಿಸಲಿದ್ದಾರೆ.
ಲೌದಾತೋ ಸಿ' ಉನ್ನತ ಶಿಕ್ಷಣ ಕೇಂದ್ರ ಹಾಗೂ ಆಂಡ್ರಿಯಾ ಬೊಚ್ಚೆಲ್ಲಿ ಪ್ರತಿಷ್ಠಾನದ ಆಶ್ರಯದಲ್ಲಿ ನಡೆಯುತ್ತಿರುವ ಈ ಕಾರ್ಯಕ್ರಮವು ಅಸ್ಸಿಸಿಯ ಸಂತ ಫ್ರಾನ್ಸಿಸ್ ಅವರ ನಿಧನದ 800ನೇ ಸ್ಮರಣೋತ್ಸವದ ಅಂಗವಾಗಿ ಆಯೋಜಿಸಲಾಗಿದೆ. ಈ ಕಾರ್ಯಕ್ರಮವು ಸಂಜೆ 7 ಗಂಟೆಗೆ ಪಾಂಟಿಫಿಕಲ್ ವಿಲ್ಲಾಗಳ ಉದ್ಯಾನದಲ್ಲಿ ಆರಂಭವಾಗಲಿದೆ.
ಕಾಸ್ಟೆಲ್ ಗಾಂಡೋಲ್ಫೋದಲ್ಲಿನ ದಿನಗಳು
ಕಾಸ್ಟೆಲ್ ಗಾಂಡೋಲ್ಫೋದಲ್ಲಿ 23 ದಿನಗಳ ವಾಸ್ತವ್ಯದ ಅವಧಿಯಲ್ಲಿ ಜಗದ್ಗುರು XIVನೇ ಲಿಯೋರವರು ಪ್ರಾರ್ಥನೆ, ಆಧ್ಯಾತ್ಮಿಕ ಓದು ಮತ್ತು ಸ್ವಲ್ಪ ಕ್ರೀಡಾ ಚಟುವಟಿಕೆಗಳಿಗೆ ಸಮಯ ಮೀಸಲಿಟ್ಟಿದ್ದರು.
ರೋಮ್ ನಗರದ ಹೊರವಲಯದಲ್ಲಿರುವ ಅಲ್ಬಾನ್ ಬೆಟ್ಟಗಳ ನಡುವೆ ಅಲ್ಬಾನೊ ಸರೋವರದ ಮೇಲ್ಭಾಗದಲ್ಲಿ ನೆಲೆಗೊಂಡಿರುವ ಈ ಪುಟ್ಟ ಪಟ್ಟಣವು ಇಟಲಿಯ ಅತ್ಯಂತ ಸುಂದರ ಗ್ರಾಮಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ.
ಜುಲೈ 5, 12, 19 ಮತ್ತು 26ರಂದು ನಡೆದ ನಾಲ್ಕು ಭಾನುವಾರದ ತ್ರಿಕಾಲ ಪ್ರಾರ್ಥನಾ ಕಾರ್ಯಕ್ರಮಗಳಲ್ಲಿ ಪ್ರೇಷಿತರ ಅರಮನೆಯ ಪ್ರವೇಶ ದ್ವಾರದಿಂದ ಭಕ್ತರನ್ನು ಉದ್ದೇಶಿಸಿ ಅವರು ಪ್ರಾರ್ಥನೆ ನಡೆಸಿದರಲ್ಲದೆ, ಇನ್ನೆರಡು ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿಯೂ ಭಾಗವಹಿಸಿದರು.
ಜುಲೈ 11ರಂದು ರೋಮಿನ ಧರ್ಮಪ್ರಾಂತ್ಯದ ಸಾಮಾಜಿಕವಾಗಿ ಸಂಕಷ್ಟದ ಪರಿಸ್ಥಿತಿಯಲ್ಲಿ ಬದುಕುತ್ತಿರುವ 200 ಮಂದಿಯೊಂದಿಗೆ, ಅವರಲ್ಲಿ 35 ಮಕ್ಕಳೂ ಸೇರಿ, ಪಾಂಟಿಫಿಕಲ್ ಉದ್ಯಾನದಲ್ಲಿ ಮಧ್ಯಾಹ್ನದ ಊಟವನ್ನು ಹಂಚಿಕೊಂಡರು.
ಒಂದು ವಾರದ ಬಳಿಕ, ಜುಲೈ 18ರಂದು, ಅಲ್ಬಾನೊ ಧರ್ಮಪ್ರಾಂತ್ಯವು ಪ್ರೇಷಿತರ ಅರಮನೆಯ ಪ್ರಾಂಗಣದಲ್ಲಿ ಆಯೋಜಿಸಿದ್ದ ಸಂಗೀತ ಕಚೇರಿಯಲ್ಲಿ ಅವರು ಪಾಲ್ಗೊಂಡರು.
ತಮ್ಮ ವಾಸ್ತವ್ಯದ ಕೊನೆಯ ವಾರದಲ್ಲಿ ಜಗದ್ಗುರುಗಳು ಎರಡು ಬಾರಿ ಹೊರಗೆ ತೆರಳಿ ಒಟ್ಟು ಮೂರು ಖಾಸಗಿ ಭೇಟಿಗಳನ್ನು ನಡೆಸಿದರು.
ಜುಲೈ 20ರಂದು ಅವರು ಮೋಂಟೆಕಾಸ್ಸಿನೊದ ಬೆನೆಡಿಕ್ಟಿನ್ ಅಬ್ಬೆಗೆ ಭೇಟಿ ನೀಡಿದರು. ಜುಲೈ 22ರಂದು ಅವರು ವಲ್ಲೆಪಿಯೆತ್ರಾದ ಪರಮಪವಿತ್ರ ತ್ರಿತ್ವದ ದೇವಾಲಯಕ್ಕೆ ತೆರಳಿ, ಬಳಿಕ ಸುಬಿಯಾಕೊದಲ್ಲಿರುವ ಸಂತ ಬೆನೆಡಿಕ್ಟ್ ಮತ್ತು ಸಂತ ಸ್ಕೋಲಾಸ್ತಿಕಾ ಮಠಗಳಿಗೆ ಭೇಟಿ ನೀಡಿದರು.
