ಜಗದ್ಗುರುಗಳು ವ್ಯಾಟಿಕನ್ ನಗರ-ರಾಜ್ಯದ ಹೊಸ ಮೂಲಭೂತ ಕಾನೂನಿಗೆ ಸಹಿ ಹಾಕಿದರು.

ವ್ಯಾಟಿಕನ್ ವರದಿ 

ಜುಲೈ 31, ಗುರುವಾರದಂದು, ಸಂತ ಇಗ್ನೇಷಿಯಸ್ ಆಫ್ ಲೊಯೊಲಾರವರ ಸ್ಮರಣೆಯ ದಿನವಾದ ಸಂದರ್ಭದಲ್ಲಿ, ಜಗದ್ಗುರು XIVನೇ ಲಿಯೋರವರು ವ್ಯಾಟಿಕನ್ ನಗರ-ರಾಜ್ಯದ ಹೊಸ ಮೂಲಭೂತ ಕಾನೂನಿಗೆ ಸಹಿ ಹಾಕಿದರು. ಇತ್ತೀಚಿನ ವರ್ಷಗಳಲ್ಲಿ ಆಡಳಿತದ ಹೊಸ ಅಗತ್ಯತೆಗಳು ಹಾಗೂ ಹಲವು ಪ್ರಮುಖ ಶಾಸನಾತ್ಮಕ ಬದಲಾವಣೆಗಳು ಉಂಟಾಗಿರುವ ಹಿನ್ನೆಲೆಯಲ್ಲಿ ಈ ಹೊಸ ಕಾನೂನನ್ನು ರೂಪಿಸಲಾಗಿದೆ. ಇದು ತಕ್ಷಣವೇ ಜಾರಿಗೆ ಬಂದಿದ್ದು, 2023ರ ಮೇ 13ರಿಂದ ಜಾರಿಯಲ್ಲಿದ್ದ ಹಿಂದಿನ ಮೂಲಭೂತ ಕಾನೂನನ್ನು ಬದಲಿಸಿದೆ.

ಹೊಸ ಕಾನೂನು ವ್ಯಾಟಿಕನ್ ನಗರ-ರಾಜ್ಯದ ಶಾಸನಾಂಗ, ಕಾರ್ಯಾಂಗ ಮತ್ತು ನ್ಯಾಯಾಂಗ ಕಾರ್ಯಗಳಿಗೆ ಸಂಬಂಧಿಸಿದ ಇತ್ತೀಚಿನ ತಿದ್ದುಪಡಿಗಳನ್ನು ಒಂದೇ ಶಾಸನಾತ್ಮಕ ಪಠ್ಯದಲ್ಲಿ ಒಳಗೊಂಡಿದೆ. ವಿಶೇಷವಾಗಿ, 2025ರ ನವೆಂಬರ್ 19ರಂದು ಹೊರಡಿಸಲಾದ ಮೋತು ಪ್ರೋಪ್ರಿಯೊ ಮೂಲಕ ಮಾಡಲಾಗಿದ್ದ ತಿದ್ದುಪಡಿಯನ್ನು ಇದು ದೃಢಪಡಿಸಿದೆ. ಆ ತಿದ್ದುಪಡಿಯು ಶಾಸನಾಂಗ ಮತ್ತು ಕಾರ್ಯಾಂಗ ಎರಡೂ ಕಾರ್ಯಗಳನ್ನು ನಿರ್ವಹಿಸುವ ವ್ಯಾಟಿಕನ್ ನಗರ-ರಾಜ್ಯದ ಪಾಂಟಿಫಿಕಲ್ ಕಮಿಷನ್‌ನ ಅಧ್ಯಕ್ಷ ಸ್ಥಾನಕ್ಕೆ ಸಂಬಂಧಿಸಿದೆ.

ಹಿಂದಿನ ಕಾನೂನಿನ ಪ್ರಕಾರ ಪಾಂಟಿಫಿಕಲ್ ಕಮಿಷನ್‌ನ ಅಧ್ಯಕ್ಷ ಸ್ಥಾನವು ಕಾರ್ಡಿನಲ್‌ಗಳಿಗೆ ಮಾತ್ರ ಮೀಸಲಾಗಿತ್ತು. 2025ರ ಮೋತು ಪ್ರೋಪ್ರಿಯೊ ಮೂಲಕ ಈ ನಿಯಮವನ್ನು ರದ್ದುಪಡಿಸಲಾಯಿತು. ಪ್ರಸ್ತುತ ಈ ಹುದ್ದೆಯನ್ನು ಸಿಸ್ಟರ್ ರಾಫೆಲ್ಲಾ ಪೆಟ್ರಿನಿ ನಿರ್ವಹಿಸುತ್ತಿದ್ದು, ಅವರು ಗವರ್ನರೇಟ್‌ನ ಅಧ್ಯಕ್ಷೆಯೂ ಆಗಿದ್ದಾರೆ. ಹೊಸ ಮೂಲಭೂತ ಕಾನೂನಿನ 8ನೇ ವಿಧಿಯ ಪ್ರಕಾರ, ಪಾಂಟಿಫಿಕಲ್ ಕಮಿಷನ್‌ನಲ್ಲಿ ಕಾರ್ಡಿನಲ್‌ಗಳ ಜೊತೆಗೆ ಇತರ ಸದಸ್ಯರೂ ಇರಬಹುದು ಮತ್ತು ಅಧ್ಯಕ್ಷರನ್ನು ಒಳಗೊಂಡಂತೆ ಅದರ ಸದಸ್ಯರನ್ನು ಪರಮೋನ್ನತ ಜಗದ್ಗುರುಗಳು ಐದು ವರ್ಷಗಳ ಅವಧಿಗೆ ನೇಮಿಸುತ್ತಾರೆ.

ಕಾರ್ಯಾಂಗದ ಕುರಿತು ಹೊಸ ಕಾನೂನು ಗವರ್ನರೇಟ್‌ನ ಪಾತ್ರವನ್ನು ಮತ್ತಷ್ಟು ಸ್ಪಷ್ಟಪಡಿಸುತ್ತದೆ. ಗವರ್ನರೇಟ್ ವ್ಯಾಟಿಕನ್ ನಗರ-ರಾಜ್ಯದ ಸಮರ್ಪಕ ಕಾರ್ಯನಿರ್ವಹಣೆಗೆ ನೆರವಾಗುವುದರ ಜೊತೆಗೆ, ನೇರವಾಗಿ ಪೇತ್ರನ ಉತ್ತರಾಧಿಕಾರಿಯಾದ ಜಗದ್ಗುರುಗಳ ಸೇವೆಯಲ್ಲಿ ಕಾರ್ಯನಿರ್ವಹಿಸುತ್ತದೆ ಮತ್ತು ಅವರಿಗೆ ನೇರವಾಗಿ ಜವಾಬ್ದಾರಿಯುತವಾಗಿದೆ. ಅಧ್ಯಕ್ಷರು ಮತ್ತು ಪ್ರಧಾನ ಕಾರ್ಯದರ್ಶಿಯವರ ಜವಾಬ್ದಾರಿಗಳನ್ನು ಹಾಗೂ ಅವರ ಪರಸ್ಪರ ಸಹಕಾರದ ಸಂಬಂಧವನ್ನೂ ಕಾನೂನು ಇನ್ನಷ್ಟು ಸ್ಪಷ್ಟವಾಗಿ ವಿವರಿಸುತ್ತದೆ.

ನ್ಯಾಯಾಂಗ ಕಾರ್ಯಕ್ಕೆ ಸಂಬಂಧಿಸಿದಂತೆ, ನ್ಯಾಯಾಂಗ ವ್ಯವಸ್ಥೆಯ ಅಂಗಸಂಸ್ಥೆಗಳನ್ನು ನಿಯಂತ್ರಿಸುವ ಕಾನೂನು ಚೌಕಟ್ಟನ್ನು ಮೂಲಭೂತ ಕಾನೂನು ಸ್ಪಷ್ಟವಾಗಿ ಪುನರುಚ್ಚರಿಸುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಜಾರಿಗೊಂಡಿರುವ ಮಹತ್ವದ ನ್ಯಾಯಾಂಗ ಸುಧಾರಣೆಗಳ ಮೂಲಕ ನ್ಯಾಯದ ಸಮರ್ಪಕ ಆಡಳಿತಕ್ಕೆ ಅಗತ್ಯವಾದ ಭದ್ರತೆಯನ್ನು ಈ ವ್ಯವಸ್ಥೆ ಒದಗಿಸುತ್ತದೆ.

ಹೊಸ ಮೂಲಭೂತ ಕಾನೂನು ವ್ಯಾಟಿಕನ್ ನಗರ-ರಾಜ್ಯಕ್ಕೆ ಅದರ “ಸಾಂವಿಧಾನಿಕ ಅಸ್ತಿತ್ವ”ವನ್ನು ನೀಡುವ ಪ್ರಮುಖ ಆಧಾರವಾಗಿದೆ. ರಾಜ್ಯದ ಅಧಿಕಾರಗಳು ಮತ್ತು ಅವುಗಳ ಅನುಷ್ಠಾನಕ್ಕೆ ಇದು ಮೂಲಭೂತ ಚೌಕಟ್ಟನ್ನು ಒದಗಿಸುವುದರ ಜೊತೆಗೆ, ರಾಜ್ಯದ ಇತರ ಎಲ್ಲ ಕಾನೂನುಗಳಿಗೆ ಪ್ರಮುಖ ಆಧಾರ ಮತ್ತು ಮಾರ್ಗದರ್ಶಕವಾಗಿ ಉಳಿಯುತ್ತದೆ. ಇದೇ ವೇಳೆ, ವ್ಯಾಟಿಕನ್‌ನ ಕಾನೂನು ವ್ಯವಸ್ಥೆಯ ವಿಶಿಷ್ಟತೆ ಮತ್ತು ಸ್ವಾಯತ್ತತೆಯನ್ನು ಇದು ಪುನರುಚ್ಚರಿಸುತ್ತದೆ. ಲ್ಯಾಟರನ್ ಒಪ್ಪಂದದ ಮೂಲಕ ನಿರ್ದಿಷ್ಟಗೊಂಡ ಪ್ರದೇಶ, ರಾಜ್ಯ ಅಥವಾ ಪವಿತ್ರ ಸಿಂಹಾಸನದ ಸಂಸ್ಥೆಗಳು ಕಾರ್ಯನಿರ್ವಹಿಸುವ ಕಟ್ಟಡಗಳು ಮತ್ತು ಪ್ರದೇಶಗಳಲ್ಲಿ ಸೇವೆ ಸಲ್ಲಿಸುವ ಜವಾಬ್ದಾರಿಯುತ ಅಧಿಕಾರಿಗಳು ಹಾಗೂ ಸಿಬ್ಬಂದಿಗೆ ಸಂಬಂಧಿಸಿದ ಅಧಿಕಾರಗಳು, ರಕ್ಷಣೆಗಳು ಮತ್ತು ವಿನಾಯಿತಿಗಳನ್ನೂ ಈ ಕಾನೂನು ಮಾನ್ಯಗೊಳಿಸುತ್ತದೆ.