ಜಗದ್ಗುರು ಲಿಯೋರವರು : ‘ನೋಸ್ತ್ರಾ ಏತಾತೆ ಯೆಹೂದಿ ವಿರೋಧಿ ಮನೋಭಾವ ಮತ್ತು ದ್ವೇಷದ ವಿರುದ್ಧ ಸ್ಪಷ್ಟ ಹಾಗೂ ದೃಢವಾದ ನಿಲುವು ವ್ಯಕ್ತಪಡಿಸಿತು.’

ವ್ಯಾಟಿಕನ್ ವರದಿ

“ಎಲ್ಲ ಪುರುಷರು ಮತ್ತು ಮಹಿಳೆಯರ ಸಹಜ ಮಾನವ ಘನತೆಯನ್ನು ಗುರುತಿಸಿದ ‘ನೋಸ್ತ್ರಾ ಏತಾತೆ’ ಘೋಷಣೆಯು, ಯೆಹೂದಿ ವಿರೋಧದ ವಿರುದ್ಧ ದೃಢವಾದ ನಿಲುವು ತಾಳಿತು ಹಾಗೂ ಜನಾಂಗ, ವರ್ಣ, ಜೀವನ ಪರಿಸ್ಥಿತಿ ಅಥವಾ ಧರ್ಮದ ಕಾರಣದಿಂದ ಉಂಟಾಗುವ ಎಲ್ಲ ರೀತಿಯ ತಾರತಮ್ಯ ಮತ್ತು ಕಿರುಕುಳಗಳನ್ನು ಧರ್ಮ ಸಭೆಯು ತಿರಸ್ಕರಿಸುತ್ತದೆ ಎಂದು ಘೋಷಿಸಿತು.”

ವ್ಯಾಟಿಕನ್‌ನಲ್ಲಿ ಸೋಮವಾರ ಬೆಳಿಗ್ಗೆ ನ್ಯೂಯಾರ್ಕ್‌ನ ಯುನೈಟೆಡ್ ಜ್ಯೂಯಿಷ್ ಅಪೀಲ್–ಫೆಡರೇಶನ್ ಪ್ರತಿನಿಧಿಗಳನ್ನು ಭೇಟಿಯಾದ ಸಂದರ್ಭದಲ್ಲಿ ಜಗದ್ಗುರು XIVನೇ ಲಿಯೋರವರು ಈ ವಿಷಯವನ್ನು ನೆನಪಿಸಿದರು.

ದುರ್ಬಲ ಜನರ ಸೇವೆಗಾಗಿ ಕೃತಜ್ಞತೆ

ತಮ್ಮ ಸ್ವಾಗತ ಭಾಷಣದಲ್ಲಿ ಜಗದ್ಗುರುಗಳು, ಈ ಸಂಸ್ಥೆಯು ಜಾಗತಿಕ ಯೆಹೂದಿ ದಾನಧರ್ಮದ ಪ್ರಮುಖ ಸಾಧನವಾಗಿ ಕಾರ್ಯನಿರ್ವಹಿಸುತ್ತಿದ್ದು, ನ್ಯೂಯಾರ್ಕ್, ಇಸ್ರೇಲ್ ಹಾಗೂ ಜಗತ್ತಿನ ಎಪ್ಪತ್ತಕ್ಕೂ ಹೆಚ್ಚು ದೇಶಗಳಲ್ಲಿ ಬಡವರು, ನಿರಾಶ್ರಿತರು, ವಯೋವೃದ್ಧರು ಮತ್ತು ವಿಶೇಷ ಚೇತನರು ಸೇರಿದಂತೆ ದುರ್ಬಲ ಜನರಿಗೆ ಮಾನವೀಯ ನೆರವು ಹಾಗೂ ಸಾಮಾಜಿಕ ಸೇವೆಗಳನ್ನು ಒದಗಿಸುತ್ತಿದೆ ಎಂದು ಸ್ಮರಿಸಿದರು.

“ಈ ಸೇವಾಕಾರ್ಯಗಳು ಮಾನವ ಘನತೆ ಮತ್ತು ಭ್ರಾತೃತ್ವದ ಸ್ಪಷ್ಟ ಅರಿವನ್ನು ಪ್ರತಿಬಿಂಬಿಸುತ್ತವೆ,” ಎಂದು ಜಗದ್ಗುರುಗಳು ಹೇಳಿದರು. “ಅವು ಸಮಗ್ರ ಮಾನವ ಅಭಿವೃದ್ಧಿಯ ಕುರಿತು ಧರ್ಮ ಸಭೆಯ ಬದ್ಧತೆ ಮತ್ತು ನೆರೆಯವರನ್ನು ಪ್ರೀತಿಸಬೇಕೆಂಬ ಸುವಾರ್ತೆಯ ಕರೆಯೊಂದಿಗೆ ಹೊಂದಿಕೆಯಾಗುತ್ತವೆ.”

ಕ್ರೈಸ್ತರು ಮತ್ತು ಯೆಹೂದಿಗಳ ಸಾಮಾನ್ಯ ಇತಿಹಾಸ ಹಾಗೂ ಅಬ್ರಹಾಮ, ಇಸಾಕ್, ಯಾಕೋಬ ಮತ್ತು ಜೋಸೆಫ್ ಅವರಲ್ಲಿರುವ ಆಧ್ಯಾತ್ಮಿಕ ಪರಂಪರೆಯನ್ನು ನೆನಪಿಸಿಕೊಂಡು, ಈ ಹಂಚಿಕೊಂಡ ಬದ್ಧತೆಗೆ ವಿಶೇಷ ಮಹತ್ವವಿದೆ ಎಂದು ಜಗದ್ಗುರುಗಳು ಹೇಳಿದರು.

‘ನೋಸ್ತ್ರಾ ಏತಾತೆ’

ಜಗದ್ಗುರುಗಳ ನಂತರ 1965ರಲ್ಲಿ ಪ್ರಕಟವಾದ ದ್ವಿತೀಯ ವ್ಯಾಟಿಕನ್ ಮಹಾಸಭೆಯ ಐತಿಹಾಸಿಕ ದಾಖಲೆ ‘ನೋಸ್ತ್ರಾ ಏತಾತೆ’, ಅಂದರೆ ಕ್ರೈಸ್ತೇತರ ಧರ್ಮಗಳೊಂದಿಗೆ ಧರ್ಮ ಸಭೆಯ ಸಂಬಂಧಗಳ ಕುರಿತ ಘೋಷಣೆಯನ್ನು ಉಲ್ಲೇಖಿಸಿದರು. ಅದರ 60ನೇ ವಾರ್ಷಿಕೋತ್ಸವವನ್ನು ಧರ್ಮ ಸಭೆ ಕಳೆದ ವರ್ಷ ಆಚರಿಸಿತು.

ಈ ಘೋಷಣೆಯು “ಭೇಟಿ, ಪರಸ್ಪರ ಗೌರವ ಮತ್ತು ಆಧ್ಯಾತ್ಮಿಕ ಆತಿಥ್ಯದ ಹೊಸ ದಿಗಂತವನ್ನು ತೆರೆದಿತು” ಎಂದು ಅವರು ಹೇಳಿದರು.

ಅದೇ ವೇಳೆ, “ನಾವೆಲ್ಲರೂ ಒಂದೇ ಮಾನವ ಕುಟುಂಬಕ್ಕೆ ಸೇರಿದವರು” ಎಂಬ ಸತ್ಯವನ್ನು ಅದು ದೃಢಪಡಿಸಿತು ಹಾಗೂ ಜನಾಂಗ, ವರ್ಣ, ಜೀವನ ಪರಿಸ್ಥಿತಿ ಅಥವಾ ಧರ್ಮದ ಕಾರಣದಿಂದ ಉಂಟಾಗುವ ಯೆಹೂದಿ ವಿರೋಧ ಮತ್ತು ಎಲ್ಲ ರೀತಿಯ ತಾರತಮ್ಯ ಹಾಗೂ ಕಿರುಕುಳಗಳನ್ನು ಖಂಡಿಸಿತು ಎಂದು ಜಗದ್ಗುರುಗಳು ನೆನಪಿಸಿದರು.

ಸಾಮಾನ್ಯ ಹಿತಕ್ಕಾಗಿ ಒಟ್ಟಾಗಿ ಕಾರ್ಯನಿರ್ವಹಿಸೋಣ

“ಇಂದಿಗೂ ವಿಭಜನೆ ಮತ್ತು ಸಂಘರ್ಷಗಳಿಂದ ಗಾಯಗೊಂಡಿರುವ ಜಗತ್ತಿನಲ್ಲಿ,” ಎಂದು ಜಗದ್ಗುರು ಲಿಯೋರವರು ಒತ್ತಿಹೇಳಿದರು, “ಈ ಘೋಷಣೆಯು ಹಿಂದಿನ ತಪ್ಪುಗ್ರಹಿಕೆಗಳನ್ನು ಮೀರಿ, ಸಾಮಾನ್ಯ ಹಿತಕ್ಕಾಗಿ ಪರಸ್ಪರ ಸಹಕಾರದ ದಾರಿಯಲ್ಲಿ ಸಾಗುವಂತೆ ನಮ್ಮನ್ನು ಕರೆಯುತ್ತದೆ.”

ಈ ಚಿಂತನೆಯೊಂದಿಗೆ, ಬಡವರು, ಸಮಾಜದ ಅಂಚಿಗೆ ತಳ್ಳಲ್ಪಟ್ಟವರು ಮತ್ತು ಶಕ್ತಿಹೀನರ ಸೇವೆಯನ್ನು “ದೈವಿಕತೆಯನ್ನು ಭೇಟಿಯಾಗುವ ಒಂದು ಮಾರ್ಗ” ಎಂದು ಪೋಪ್ ವಿವರಿಸಿದರು.

“ಅವರ ಮೂಲಕ ದೇವರ ಧ್ವನಿಯು ಇನ್ನೂ ನಮ್ಮೊಂದಿಗೆ ಮಾತನಾಡುತ್ತಲೇ ಇದೆ,” ಎಂದು ಅವರು ಹೇಳಿದರು.

ಶಾಂತಿಗಾಗಿ ಕಾರ್ಯನಿರ್ವಹಿಸುವಂತೆ ಕರೆ

ತಮ್ಮ ಭಾಷಣದ ಕೊನೆಯಲ್ಲಿ, ಬಡವರು ಮತ್ತು ಅಗತ್ಯವಿರುವವರಿಗೆ ನೆರವಾಗುವಲ್ಲಿ, ದ್ವೇಷ ಮತ್ತು ಅಸಹಿಷ್ಣುತೆಯನ್ನು ಎದುರಿಸುವಲ್ಲಿ ಹಾಗೂ ಎಲ್ಲರಿಗೂ ಉತ್ತಮ ಜಗತ್ತನ್ನು ನಿರ್ಮಿಸಲು ಶ್ರಮಿಸುವಲ್ಲಿ ತೋರಿದ ಸಮರ್ಪಣೆಗೆ ಜಗದ್ಗುರುಗಳು ಪ್ರತಿನಿಧಿಗಳಿಗೆ ಕೃತಜ್ಞತೆ ಸಲ್ಲಿಸಿದರು.

“ನಿಮ್ಮ ಧ್ಯೇಯವು,” ಎಂದು ಅವರು ಹೇಳಿದರು, “ಸಂವಾದವನ್ನು ಬಲಪಡಿಸಲಿ, ಪರಸ್ಪರ ಅರ್ಥೈಸಿಕೊಳ್ಳುವಿಕೆಯನ್ನು ಆಳಗೊಳಿಸಲಿ ಹಾಗೂ ನಮ್ಮ ಜಗತ್ತಿಗೆ ಅತ್ಯಂತ ಅಗತ್ಯವಾಗಿರುವ ಶಾಂತಿಯ ಸ್ಥಾಪನೆಗೆ ತನ್ನ ಕೊಡುಗೆಯನ್ನು ನೀಡಲಿ.”