ಜಗದ್ಗುರು XIVನೇ ಲಿಯೋರವರು ಸಂವಹನ ವಿಭಾಗದ (ಡಿಕಾಸ್ಟರಿ ಫಾರ್ ಕಮ್ಯುನಿಕೇಶನ್) ಪ್ರಿಫೆಕ್ಟ್ ಆಗಿ ಸಾಮಾನ್ಯ ಮಹಿಳೆಯನ್ನು ನೇಮಿಸಿದರು.

ವ್ಯಾಟಿಕನ್ ವರದಿ

ಜಗದ್ಗುರು XIVನೇ ಲಿಯೋರವರು ಡಿಕಾಸ್ಟರಿ ಫಾರ್ ಕಮ್ಯುನಿಕೇಶನ್‌ನ ಪ್ರಿಫೆಕ್ಟ್ ಆಗಿ ಮಾರಿಯಾ ಮೊಂಟ್ಸೆರಾತ್ ಅಲ್ವಾರಾಡೊ ರವರನ್ನು ನೇಮಿಸಿದರು

ಜಗದ್ಗುರು XIVನೇ ಲಿಯೋರವರು ಪ್ರಸ್ತುತ ಇಡಬ್ಲೂಟಿಎನ್ ನ್ಯೂಸ್‌ನ ಅಧ್ಯಕ್ಷೆ ಹಾಗೂ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಯಾಗಿರುವ ಮಾರಿಯಾ ಮೊಂಟ್ಸೆರಾತ್ ಅಲ್ವಾರಾಡೊರವರನ್ನು ಡಿಕಾಸ್ಟರಿ ಫಾರ್ ಕಮ್ಯುನಿಕೇಶನ್‌ನ ಪ್ರಿಫೆಕ್ಟ್ ಆಗಿ ನೇಮಕ ಮಾಡಿದ್ದು, ಈ ನೇಮಕಾತಿಯು 2026ರ ನವೆಂಬರ್ 1ರಿಂದ ಜಾರಿಗೆ ಬರಲಿದೆ.

ಮೆಕ್ಸಿಕೊ ನಗರದವರಾದ ಅಲ್ವಾರಾಡೊರವರು ಫ್ಲೋರಿಡಾ ಇಂಟರ್‌ನ್ಯಾಷನಲ್ ವಿಶ್ವವಿದ್ಯಾಲಯ ಮತ್ತು ಜಾರ್ಜ್ ವಾಷಿಂಗ್ಟನ್ ವಿಶ್ವವಿದ್ಯಾಲಯಗಳಿಂದ ಉನ್ನತ ಶಿಕ್ಷಣ ಪಡೆದಿದ್ದಾರೆ. 2009ರಿಂದ 2023ರವರೆಗೆ ಅವರು ಬೆಕೆಟ್ ಫಂಡ್ ಫಾರ್ ರಿಲಿಜಿಯಸ್ ಲಿಬರ್ಟಿ ಸಂಸ್ಥೆಯಲ್ಲಿ ವಿವಿಧ ನಾಯಕತ್ವ ಹುದ್ದೆಗಳನ್ನು ಅಲಂಕರಿಸಿದ್ದು, ಧಾರ್ಮಿಕ ಸ್ವಾತಂತ್ರ್ಯದ ರಕ್ಷಣೆ ಮತ್ತು ಮಾನವ ಘನತೆಯ ಪ್ರೋತ್ಸಾಹಕ್ಕಾಗಿ ಸಮರ್ಪಿತ ಅನೇಕ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರು.

2023ರಿಂದ ಅವರು ಎಟರ್ನಲ್ ವರ್ಡ್ ಟೆಲಿವಿಷನ್ ನೆಟ್ವರ್ಕ್ ನ ಸುದ್ದಿ ವಿಭಾಗವಾದ ಎಡಬ್ಲೂಟಿಎನ್ ನ್ಯೂಸ್‌ನ ಅಧ್ಯಕ್ಷೆ ಹಾಗೂ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಈ ಹೊಣೆಗಾರಿಕೆಯಲ್ಲಿ ಅವರು ದೂರದರ್ಶನ, ರೇಡಿಯೋ, ಮುದ್ರಣ, ಡಿಜಿಟಲ್ ಮತ್ತು ಸಾಮಾಜಿಕ ಮಾಧ್ಯಮಗಳ ಮೂಲಕ ಏಳು ಭಾಷೆಗಳಲ್ಲಿ ವಿಷಯಗಳನ್ನು ಪ್ರಸಾರ ಮಾಡುವ ಅಂತರರಾಷ್ಟ್ರೀಯ ಮಾಧ್ಯಮ ವೇದಿಕೆಗಳನ್ನು ಮೇಲ್ವಿಚಾರಣೆ ಮಾಡುತ್ತಿದ್ದಾರೆ.

ಅಲ್ವಾರಾಡೊರವರ ನೇಮಕದ ಮೂಲಕ, ಜಗದ್ಗುರು XIVನೇ ಲಿಯೋರವರು ಜಗದ್ಗುರು ಫ್ರಾನ್ಸಿಸ್ ಆರಂಭಿಸಿದ ರೋಮನ್ ಪ್ರಾಂತ್ಯದ ಸುಧಾರಣೆ ಮತ್ತು ನವೀಕರಣದ ಪಥವನ್ನು ಮುಂದುವರಿಸುತ್ತಿದ್ದಾರೆ. ಈ ಸುಧಾರಣೆಯ ಭಾಗವಾಗಿ, ವಿಶ್ವವ್ಯಾಪಿ ಧರ್ಮ ಸಭೆಯ ಸೇವೆಯಲ್ಲಿ ಸಾಮಾನ್ಯ ವಿಶ್ವಾಸಿಗಳಾದ ಪುರುಷರು ಮತ್ತು ಮಹಿಳೆಯರಿಗೆ ನಾಯಕತ್ವ ಹಾಗೂ ಜವಾಬ್ದಾರಿಯ ಹುದ್ದೆಗಳನ್ನು ವಹಿಸಲಾಗುತ್ತಿದೆ. ಅಲ್ವಾರಾಡೊರವರು ಜಗದ್ಗುರುಗಳ ಅಧಿಕಾರ ಸ್ಥಳದ ಡಿಕಾಸ್ಟರಿಯೊಂದರ ಪ್ರಿಫೆಕ್ಟ್ ಆಗಿ ನೇಮಕಗೊಂಡ ಮೊದಲ ಧಾರ್ಮಿಕ ಜೀವನಕ್ಕೆ ಸೇರದ ಮಹಿಳೆಯಾಗಿದ್ದಾರೆ.

ರೋಮನ್ ಪ್ರಾಂತ್ಯದ  ಸುಧಾರಣೆಯ ಅಂಗವಾಗಿ 2015ರ ಜೂನ್ 27ರಂದು ಜಗದ್ಗುರು ಫ್ರಾನ್ಸಿಸ್ ರವರು ಸ್ಥಾಪಿಸಿದ ಡಿಕಾಸ್ಟರಿ ಫಾರ್ ಕಮ್ಯುನಿಕೇಶನ್, ಜಗದ್ಗುರುಗಳ ಅಧಿಕಾರ ಸ್ಥಳ ಸಂಬಂಧಿಸಿದ ಎಲ್ಲಾ ಸಂವಹನ ವ್ಯವಸ್ಥೆಗಳ ಮೇಲ್ವಿಚಾರಣೆಯನ್ನು ವಹಿಸಿಕೊಂಡಿದೆ. ಇದರ ವ್ಯಾಪ್ತಿಯಲ್ಲಿ ವ್ಯಾಟಿಕನ್ ನ್ಯೂಸ್, ವ್ಯಾಟಿಕನ್ ರೇಡಿಯೋ, ಲ್'ಒಸ್ಸೆರ್ವಾತೊರೆ ರೊಮಾನೊ, ವ್ಯಾಟಿಕನ್ ಮೀಡಿಯಾ (ಫೋಟೋ, ಆಡಿಯೋ ಮತ್ತು ವಿಡಿಯೋ ಸೇವೆಗಳು), ಜಗದ್ಗುರುಗಳ ಅಧಿಕಾರ ಸ್ಥಳದ ಪತ್ರಿಕಾ ಕಚೇರಿ, ವ್ಯಾಟಿಕನ್ ಪ್ರಕಾಶನ ಸಂಸ್ಥೆ, ವ್ಯಾಟಿಕನ್ ಮುದ್ರಣಾಲಯ ಹಾಗೂ ಫಿಲ್ಮೊಟೆಕಾ ವ್ಯಾಟಿಕಾನಾ ಸೇರಿವೆ.

ಕಾರ್ಯನಿರ್ವಹಣಾ ಮತ್ತು ತಾಂತ್ರಿಕ ಜವಾಬ್ದಾರಿಗಳ ಜೊತೆಗೆ, ಸಂವಹನ ಕ್ಷೇತ್ರದಲ್ಲಿ ಧರ್ಮ ಸಭೆಯ ಕಾರ್ಯಚಟುವಟಿಕೆಗಳ ಧಾರ್ಮಿಕ ಹಾಗೂ ಧರ್ಮಾಧ್ಯಕ್ಷೀಯ ಆಯಾಮಗಳನ್ನು ಆಳವಾಗಿ ಅಭಿವೃದ್ಧಿಪಡಿಸುವ ಕಾರ್ಯವನ್ನೂ ಈ ಡಿಕಾಸ್ಟರಿ ನಿರ್ವಹಿಸುತ್ತದೆ.

ಅಲ್ವಾರಾಡೊರವರು ಪಾವೊಲೊ ರುಫಿನಿರವರ ಉತ್ತರಾಧಿಕಾರಿಯಾಗಲಿದ್ದಾರೆ. ಜಗದ್ಗುರು ಫ್ರಾನ್ಸಿಸ್ ರವರು 2018ರಲ್ಲಿ ರುಫಿನಿರವರನ್ನು ರೋಮನ್ ಪ್ರಾಂತ್ಯದ ಡಿಕಾಸ್ಟರಿಯ ಮೊದಲ ಸಾಮಾನ್ಯ (ಪ್ರಜೆ) ಪ್ರಿಫೆಕ್ಟ್ ಆಗಿ ನೇಮಿಸಿದ್ದರು. ಮುಂದಿನ ಅಕ್ಟೋಬರ್‌ನಲ್ಲಿ ಅವರು 70 ವರ್ಷ ವಯಸ್ಸನ್ನು ಪೂರ್ಣಗೊಳಿಸಲಿದ್ದಾರೆ.

ನೇಮಕಾತಿಯ ಘೋಷಣೆಯ ನಂತರ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ಅಲ್ವಾರಾಡೊರವರು ಹೀಗೆ ಹೇಳಿದರು

ಈ ನೇಮಕಾತಿ ನನಗೆ ಅನಿರೀಕ್ಷಿತವಾಗಿದ್ದರೂ, ತಮ್ಮ ಅಧಿಕಾರವಧಿಯ ಆರಂಭದಲ್ಲಿರುವ ಪವಿತ್ರ ತಂದೆಯವರಿಗೆ ಸೇವೆ ಸಲ್ಲಿಸುವ ಪ್ರಾಮಾಣಿಕ ಮನೋಭಾವದಿಂದ ನಾನು ಇದನ್ನು ಸ್ವೀಕರಿಸುತ್ತೇನೆ. ಕಳೆದ ಕೆಲವು ವರ್ಷಗಳಲ್ಲಿ ನೀಡಿದ ನಾಯಕತ್ವಕ್ಕಾಗಿ ಪಾವೊಲೊ ರುಫಿನಿರವರಿಗೆ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ. ಸ್ನೇಹ ಮತ್ತು ಭರವಸೆಯ ಮನೋಭಾವದಲ್ಲಿ, ಡಿಕಾಸ್ಟರಿಯನ್ನು ಇನ್ನಷ್ಟು ಬಲಪಡಿಸುವ ಮಹತ್ವದ ಕಾರ್ಯವನ್ನು ಮುಂದುವರಿಸಲು ನಾನು ಎದುರು ನೋಡುತ್ತಿದ್ದೇನೆ, ಇದರಿಂದ ಅದು ರೋಮಿನಲ್ಲಿಯೂ ಹಾಗೂ ವಿಶ್ವದಾದ್ಯಂತವೂ ಧರ್ಮ ಸಭೆಗೆ ಸೇವೆ ಸಲ್ಲಿಸುತ್ತಾ ಕ್ರಿಸ್ತನನ್ನು ಜಗತ್ತಿಗೆ ಸಾರಲು ಮುಂದುವರಿಯಲಿದೆ.

ಇದೇ ವೇಳೆ, ಪಾವೊಲೊ ರುಫಿನಿರವರು ಡಿಕಾಸ್ಟರಿ ಫಾರ್ ಕಮ್ಯುನಿಕೇಶನ್‌ನ ಸಿಬ್ಬಂದಿಗೆ ಬರೆದ ಪತ್ರದಲ್ಲಿ ಹೀಗೆ ಹೇಳಿದರು.

ವೇಗವಾಗಿ ಬದಲಾಗುತ್ತಿರುವ ಸಂವಹನ ಜಗತ್ತಿನೊಂದಿಗೆ ನಿರಂತರವಾಗಿ ಹೊಂದಿಕೊಳ್ಳುವುದು ನಮ್ಮ ಡಿಕಾಸ್ಟರಿಯ ಮೂಲಭೂತ ಧ್ಯೇಯವಾಗಿದೆ. ಸಂಸ್ಥೆಯಾಗಿ ಹುಟ್ಟಿದ ದಿನದಿಂದಲೇ ನಮ್ಮ ಮಾರ್ಗದರ್ಶಕ ತಾರೆಯು ಒಂದೇ ಆಗಿದೆ ಎಂದಿಗೂ ನಿಲ್ಲದಿರುವುದು, ಓಟವನ್ನು ಮುಂದುವರಿಸುತ್ತಾ ಜವಾಬ್ದಾರಿಯ ದಂಡವನ್ನು ಮುಂದಿನವರಿಗೆ ಹಸ್ತಾಂತರಿಸುವುದು, ಇಂದಿನ ಕ್ಷಣದಲ್ಲಿ ಸಕ್ರಿಯವಾಗಿ ಹಾಜರಿರುವುದು ಮತ್ತು ಕಾಲಕ್ರಮೇಣ ಬೆಳೆಯುವ ಏಕತೆಯ ಸಾಧನವಾಗಿರುವ ಸಂವಹನವನ್ನು ಬೆಳೆಸುವುದು.

ಅವರು ಮುಂದುವರಿಸಿ ಹೇಳಿದರು ನನ್ನ ವೃತ್ತಿಜೀವನದ ಈ ದೀರ್ಘ ಪಯಣದಲ್ಲಿ ಈಗ ನಾನು ಅಂತಿಮ ಹಂತವನ್ನು ಪ್ರವೇಶಿಸಿದ್ದೇನೆ. ನಿವೃತ್ತಿಗಾಗಿ ನಿಗದಿಪಡಿಸಿರುವ 70ನೇ ವಯಸ್ಸನ್ನು ತಲುಪಿದಾಗ, ಮುಂದಿನ ಪ್ರಿಫೆಕ್ಟ್ ಆಗಿರುವ ಮೊಂಟ್ಸೆರಾತ್ ಅಲ್ವಾರಾಡೊರವರಿಗೆ ನಾನು ಈ ಜವಾಬ್ದಾರಿಯನ್ನು ಹಸ್ತಾಂತರಿಸಲಿದ್ದೇನೆ. ನಾವು ಒಬ್ಬರನ್ನೊಬ್ಬರು ಚೆನ್ನಾಗಿ ತಿಳಿದಿದ್ದೇವೆ. ಮುಂದಿನ ಕೆಲವು ತಿಂಗಳುಗಳಲ್ಲಿ ಧರ್ಮ ಸಭೆಯಲ್ಲಿ ನಮ್ಮನ್ನು ಒಂದುಗೂಡಿಸುವ ಸಹಭಾಗಿತ್ವದ ಮನೋಭಾವದೊಂದಿಗೆ ನಾವು ಒಟ್ಟಾಗಿ ಕಾರ್ಯನಿರ್ವಹಿಸಲಿದ್ದೇವೆ.”

ಡಿಕಾಸ್ಟರಿಯ ಸಿಬ್ಬಂದಿಗೆ ಕೃತಜ್ಞತೆ ಸಲ್ಲಿಸಿದ ರುಫಿನಿರವರು ಹೀಗೆ ಹೇಳಿದರು

ಕಳೆದ ಎಂಟು ವರ್ಷಗಳಲ್ಲಿ ನಾವು ಒಟ್ಟಾಗಿ ನಡೆಸಿದ ಪಯಣಕ್ಕಾಗಿ ಡಿಕಾಸ್ಟರಿಯ ಈ ದೊಡ್ಡ ಕುಟುಂಬಕ್ಕೆ ನಾನು ಕೃತಜ್ಞನಾಗಿದ್ದೇನೆ. ಮುಂದಿನ ಕೆಲವು ತಿಂಗಳುಗಳಲ್ಲಿ ಸುಗಮವಾದ ಜವಾಬ್ದಾರಿ ವರ್ಗಾವಣೆಯ ಪ್ರಕ್ರಿಯೆಯನ್ನು ಆರಂಭಿಸುತ್ತಿದ್ದೇವೆ. ಇದರ ಮೂಲಕ ಡಿಕಾಸ್ಟರಿ ಜಗದ್ಗುರುಗಳ ಸೇವೆ ಸಲ್ಲಿಸುವಲ್ಲಿ ಹಾಗೂ ಏಕತೆ ಮತ್ತು ಮುಕ್ತತೆಯ ಮನೋಭಾವದೊಂದಿಗೆ ತನ್ನ ಧ್ಯೇಯವನ್ನು ಮುಂದುವರಿಸುವಲ್ಲಿ ಇನ್ನಷ್ಟು ಬೆಳೆಯಲು ಸಾಧ್ಯವಾಗಲಿದೆ.”

ಇದೇ ವೇಳೆ, ಇಡಬ್ಲೂಟಿಎನ್ ಸಂಸ್ಥೆಯ ನಿರ್ದೇಶಕ ಮಂಡಳಿಯ ಅಧ್ಯಕ್ಷ ಹಾಗೂ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮೈಕಲ್ ಪಿ. ವಾರ್ಸಾ ರವರು, ಅಲ್ವಾರಾಡೊರವರು ಸಂಸ್ಥೆಯಲ್ಲಿ ಕಳೆದ ವರ್ಷಗಳಲ್ಲಿ ತಮ್ಮೊಂದಿಗೆ ಕಾರ್ಯನಿರ್ವಹಿಸಿದ ಎಲ್ಲರ ವಿಶ್ವಾಸ ಮತ್ತು ಗೌರವವನ್ನು ಗಳಿಸಿದ್ದಾರೆ ಎಂದು ಹೇಳಿದರು.

ಜಗದ್ಗುರು  XIV ನೇ ಲಿಯೋರವರು ಮತ್ತು ಅವರ ಅಧಿಕಾರ ಸೇವೆಯಲ್ಲಿ ಈ ಮಹತ್ವದ ಕಾರ್ಯವನ್ನು ಆರಂಭಿಸುತ್ತಿರುವ ಅಲ್ವಾರಾಡೊರವರಿಗೆ ನಮ್ಮ ಪ್ರಾರ್ಥನೆಗಳು, ಪ್ರೋತ್ಸಾಹ ಹಾಗೂ ಇಡಬ್ಲೂಟಿಎನ್ ಕುಟುಂಬದ ಸಂಪೂರ್ಣ ಬೆಂಬಲವನ್ನು ನಾವು ಅರ್ಪಿಸುತ್ತೇವೆ.