ಜಗದ್ಗುರುಗಳ ಕರೆ: ರಕ್ಷಣೆ ಮತ್ತು ಆಶ್ರಯವನ್ನು ಹುಡುಕುವವರನ್ನು ರಾಷ್ಟ್ರಗಳು ತಿರಸ್ಕರಿಸಬಾರದು.

ವ್ಯಾಟಿಕನ್ ವರದಿ

ಜೂನ್ 21ರ ಭಾನುವಾರ ಸಂತ ಪೇತ್ರರ ಚೌಕದಲ್ಲಿ ತ್ರಿಕಾಲ ಪ್ರಾರ್ಥನೆಯ ಅಂತ್ಯದಲ್ಲಿ, ಜಗದ್ಗುರು ಲಿಯೋರವರು ಜೂನ್ 20ರಂದು ವಿಶ್ವಸಂಸ್ಥೆ ಆಚರಿಸಿದ ವಿಶ್ವ ನಿರಾಶ್ರಿತರ ದಿನವನ್ನು ಸ್ಮರಿಸಿ, ಹಿಂಸೆ, ದೌರ್ಜನ್ಯ ಮತ್ತು ಸಂಘರ್ಷಗಳಿಂದ ಪಲಾಯನಗೊಳ್ಳಬೇಕಾದವರ ರಕ್ಷಣೆಗೆ ಹೊಸ ಬದ್ಧತೆಯನ್ನು ತೋರಿಸುವಂತೆ ಮನವಿ ಮಾಡಿದರು.

1951ರ ನಿರಾಶ್ರಿತರ ಸ್ಥಾನಮಾನಕ್ಕೆ ಸಂಬಂಧಿಸಿದ ಒಪ್ಪಂದದ 75ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ ಮಾತನಾಡಿದ ಜಗದ್ಗುರುಗಳು, ದ್ವಿತೀಯ ವಿಶ್ವಯುದ್ಧದ ನಂತರ ನಿರಾಶ್ರಿತರ ಹಕ್ಕುಗಳನ್ನು ರಕ್ಷಿಸಲು ಮತ್ತು ತಮ್ಮ ಮನೆಗಳನ್ನು ತೊರೆಯಬೇಕಾದವರಿಗೆ ಕಾನೂನುಬದ್ಧ ರಕ್ಷಣೆ ಒದಗಿಸಲು ರೂಪಿಸಲಾದ ಈ ಅಂತರರಾಷ್ಟ್ರೀಯ ಒಪ್ಪಂದದ ಶಾಶ್ವತ ಮಹತ್ವವನ್ನು ಸ್ಮರಿಸಿದರು.

“ಈ ಮಹತ್ವದ ಅಂತರರಾಷ್ಟ್ರೀಯ ಸಾಧನದ ಕರಡು ರಚನೆಗೆ ಪ್ರೇರಣೆ ನೀಡಿದ ಮನೋಭಾವವು ಇಂದಿಗೂ ರಾಷ್ಟ್ರಗಳ ಜವಾಬ್ದಾರಿ ಹೊತ್ತವರ ಮನಸ್ಸುಗಳನ್ನು ಬೆಳಗಿಸುತ್ತಿರಲಿ ಎಂದು ನಾನು ಆಶಿಸುತ್ತೇನೆ” ಎಂದು ಅವರು ಹೇಳಿದರು.

ಮಾನವೀಯ ದುಃಖದ ಎದುರು ಉದಾಸೀನತೆ ತೋರಿಸುವುದು ಒಂದು ಆಯ್ಕೆಯಾಗಿರಬಾರದು ಎಂದು ಜಗದ್ಗುರು ಲಿಯೋರವರು ಒತ್ತಿಹೇಳಿದರು. “ರಕ್ಷಣೆ ಮತ್ತು ಸುರಕ್ಷತೆಯನ್ನು ಹುಡುಕುವವರಿಂದ ಯಾರೂ ಮುಖ ತಿರುಗಿಸಬಾರದು” ಎಂದು ಅವರು ಹೇಳಿದರು. ಹಿಂಸೆಗೆ ಒಳಗಾದವರನ್ನು ಸಮಾಜಗಳು ಆತ್ಮೀಯವಾಗಿ ಸ್ವಾಗತಿಸಬೇಕು, ಇದರಿಂದ ಅವರು “ಶಾಂತಿ ಮತ್ತು ಘನತೆಯಿಂದ” ಬದುಕಿ ಭವಿಷ್ಯವನ್ನು ಆಶಾಭಾವನೆಯಿಂದ ಎದುರುನೋಡಲು ಸಾಧ್ಯವಾಗುತ್ತದೆ ಎಂದು ಅವರು ಪ್ರೋತ್ಸಾಹಿಸಿದರು.

ಬ್ರೆಜಿಲ್‌ನ ಯುವ ಸಂತ್ರಸ್ತರಿಗಾಗಿ ಪ್ರಾರ್ಥನೆ

ಬ್ರೆಜಿಲ್‌ನಿಂದ ಬಂದಿದ್ದ ಯಾತ್ರಿಕರನ್ನು ಉದ್ದೇಶಿಸಿ ಮಾತನಾಡಿದ ಜಗದ್ಗುರುಗಳು, ದೇಶದ ಈಶಾನ್ಯ ಭಾಗದ ಸಿಯಾರಾ ರಾಜ್ಯದಲ್ಲಿ ಇತ್ತೀಚೆಗೆ ಸಂಭವಿಸಿದ ರಸ್ತೆ ಅಪಘಾತವನ್ನು ಸ್ಮರಿಸಿದರು. ಆ ದುರ್ಘಟನೆಯಲ್ಲಿ ಹಲವಾರು ಯುವಕರು ತಮ್ಮ ಪ್ರಾಣ ಕಳೆದುಕೊಂಡಿದ್ದರು.

“ಸಿಯಾರಾ ರಾಜ್ಯದಲ್ಲಿ ಕೆಲವು ದಿನಗಳ ಹಿಂದೆ ನಡೆದ ರಸ್ತೆ ಅಪಘಾತದಲ್ಲಿ ಮೃತರಾದ ಯುವಕರಿಗಾಗಿ ನಾನು ಪ್ರಾರ್ಥಿಸುತ್ತಿದ್ದೇನೆ” ಎಂದು ಅವರು ಹೇಳಿದರು.

ಈ ದುರಂತದಲ್ಲಿ ಬಾಸ್ಕೆಟ್‌ಬಾಲ್ ತಂಡದ ಏಳು ಸದಸ್ಯರು ಮೃತಪಟ್ಟಿದ್ದರು. 15ರಿಂದ 22 ವರ್ಷ ವಯಸ್ಸಿನವರಾಗಿದ್ದ ಅವರು ವಿದ್ಯಾರ್ಥಿಗಳಾಗಿಯೂ ಹಾಗೂ ವಿವಿಧ ಬ್ರೆಜಿಲಿಯನ್ ಶಿಕ್ಷಣ ಸಂಸ್ಥೆಗಳ ಹಳೆಯ ವಿದ್ಯಾರ್ಥಿಗಳಾಗಿಯೂ ಇದ್ದರು. ಅವರು ಜುವಜೆೈರೊ ಡೊ ನೋರ್ಟೆ ನಗರಕ್ಕೆ ಸೇರಿದವರಾಗಿದ್ದರು.

ಕಥೋಲಿಕ–ಪೆಂತೆಕೋಸ್ತ್ ಸಂವಾದ

ಜಗದ್ಗುರುಗಳು ಕಥೋಲಿಕ–ಪೆಂತೆಕೋಸ್ತ್ ಅಂತರರಾಷ್ಟ್ರೀಯ ಸಂವಾದದ ಸದಸ್ಯರನ್ನೂ ಅಭಿನಂದಿಸಿದರು. ಐದು ದಶಕಗಳಿಗೂ ಹೆಚ್ಚು ಕಾಲದಿಂದ ಈ ವೇದಿಕೆ ಕಥೋಲಿಕ ಧರ್ಮ ಸಭೆ ಮತ್ತು ಪೆಂತೆಕೋಸ್ತ್ ಸಮುದಾಯಗಳ ಪ್ರತಿನಿಧಿಗಳನ್ನು ಪರಸ್ಪರ ಅರ್ಥೈಸಿಕೆ ಮತ್ತು ಕ್ರೈಸ್ತ ಸಹೋದರತ್ವದ ಮನೋಭಾವದಲ್ಲಿ ಒಟ್ಟುಗೂಡಿಸುತ್ತಿದೆ.

“ಪ್ರಾರ್ಥನೆಯ ನಿಯಮವೇ ನಂಬಿಕೆಯ ನಿಯಮ” ಎಂಬ ಪ್ರಾಚೀನ ತತ್ತ್ವವನ್ನು ಉಲ್ಲೇಖಿಸಿದ ಜಗದ್ಗುರುಗಳು, ಪ್ರಾರ್ಥನೆ ಮತ್ತು ನಂಬಿಕೆಯ ನಡುವಿನ ಸಂಬಂಧದ ಬಗ್ಗೆ ಒಟ್ಟಾಗಿ ಚಿಂತಿಸುವುದು ಇಂದಿನ ಜಗತ್ತಿನಲ್ಲಿ ವಿಶೇಷ ಮಹತ್ವವನ್ನು ಹೊಂದಿದೆ ಎಂದು ಹೇಳಿದರು.

ಈ ಸಂವಾದವು ಕ್ರೈಸ್ತರ ನಡುವೆ ಹೆಚ್ಚಿನ ಪರಸ್ಪರ ಅರ್ಥೈಸಿಕೆಯನ್ನು ಬೆಳೆಸುವುದರ ಜೊತೆಗೆ, ಸಾಕ್ಷ್ಯ ಮತ್ತು ಸೇವೆಯ ಕಾರ್ಯಗಳಲ್ಲಿ ಸಹಕಾರವನ್ನು ಉತ್ತೇಜಿಸುವ ಉದ್ದೇಶವನ್ನು ಹೊಂದಿದೆ ಎಂದು ಜಗದ್ಗುರು XIVನೇ ಲಿಯೋರವರು ವಿವರಿಸಿದರು.