"ಪೋಲೆಂಡ್ನಲ್ಲಿ ನಡೆಯುವ ‘ಒಂದು ಹೃದಯ, ಒಂದು ಆತ್ಮ’ ಸಂಗೀತ ಕಾರ್ಯಕ್ರಮಕ್ಕೆ ಜಗದ್ಗುರು ಲಿಯೋರವರ ಆಶೀರ್ವಾದ ಕಳುಹಿಸಿದರು."
ವ್ಯಾಟಿಕನ್ ವರದಿ
ಪೋಲೆಂಡ್ನ ರ್ಜೆಶೂವ್ ನಗರದಲ್ಲಿ ಜೂನ್ 4ರಂದು ನಡೆದ 24ನೇ ‘ಒಂದು ಹೃದಯ, ಒಂದು ಆತ್ಮ’ ಆರಾಧನಾ ಸಂಗೀತ ಕಾರ್ಯಕ್ರಮದಲ್ಲಿ 20,000ಕ್ಕೂ ಹೆಚ್ಚು ಜನರು ಭಾಗವಹಿಸಿದರು. ಕ್ರಿಸ್ತನ ಪವಿತ್ರ ಶರೀರ ಮತ್ತು ರಕ್ತದ ಮಹಾಪರ್ವದ ಅಂಗವಾಗಿ ಪ್ರತಿವರ್ಷ ನಡೆಯುವ ಈ ಕಾರ್ಯಕ್ರಮವು ಸಾಮೂಹಿಕ ಪ್ರಾರ್ಥನೆ, ಆರಾಧನೆ ಮತ್ತು ಸಾರ್ವಜನಿಕ ನಂಬಿಕೆಯ ಸಾಕ್ಷಿಯಾಗಿ ರೂಪುಗೊಂಡಿದೆ. ಈ ಸಂದರ್ಭದಲ್ಲಿ ಭಾಗವಹಿಸಿದ ಎಲ್ಲರಿಗೂ ಜಗದ್ಗುರು XIVನೇ ಲಿಯೋರವರ ಪ್ರೇಷಿತರ ಆಶೀರ್ವಾದವನ್ನು ನೀಡಲಾಯಿತು.
ರಾಜ್ಯ ಕಾರ್ಯದರ್ಶಿಗಳ ಇಲಾಖೆಯ ಪರ್ಯಾಯ ಕಾರ್ಯದರ್ಶಿಯಾಗಿರುವ ಆರ್ಚ್ಬಿಷಪ್ ಪಾವ್ಲೊ ರುಡೆಲ್ಲಿ ರವರ ಮೂಲಕ ಜಗದ್ಗುರು XIVನೇ ಲಿಯೋರವರ ಸಂದೇಶವನ್ನು ಕಾರ್ಯಕ್ರಮದ ಆಯೋಜಕರು ಮತ್ತು ಭಾಗವಹಿಸುವವರಿಗೆ ತಲುಪಿಸಲಾಯಿತು. ರ್ಜೆಶೂವ್ ಧರ್ಮಕ್ಷೇತ್ರದ ಬಿಷಪ್ ಜಾನ್ ವಾತ್ರೋಬರವರಿಗೆ ಕಳುಹಿಸಿದ ವಿಶೇಷ ಪತ್ರದಲ್ಲಿ, ಜಗದ್ಗುರುಗಳು ಕಾರ್ಯಕ್ರಮದಲ್ಲಿ ನೇರವಾಗಿ ಹಾಗೂ ಆನ್ಲೈನ್ ಮೂಲಕ ಭಾಗವಹಿಸಿದ ಎಲ್ಲರಿಗೂ ತಮ್ಮ ಆತ್ಮೀಯತೆ ಮತ್ತು ಪ್ರಾರ್ಥನಾ ಬೆಂಬಲವನ್ನು ವ್ಯಕ್ತಪಡಿಸಿದರು.
ಪ್ರಾರ್ಥನೆ, ಪವಿತ್ರ ಯೂಕರಿಸ್ಟಿಕ್ ಮೆರವಣಿಗೆಗಳು, ಸಂಗೀತ ಮತ್ತು ಗೀತೆಗಳು ಯೂಕರಿಸ್ಟ್ ಎಂಬ ಅಮೂಲ್ಯ ವರವನ್ನು ಇನ್ನಷ್ಟು ಆಳವಾಗಿ ಅರಿತುಕೊಳ್ಳಲು ವಿಶ್ವಾಸಿಗಳಿಗೆ ಸಹಾಯ ಮಾಡುತ್ತವೆ ಎಂದು ಜಗದ್ಗುರುಗಳು ಹೇಳಿದರು. "ನಮ್ಮ ಕೈಗಳಿಗೆ ಒಪ್ಪಿಸಲ್ಪಟ್ಟಿರುವ ಈ ಅಮೂಲ್ಯ ನಿಧಿಯಿಂದ ನಾವು ಆಗಾಗ್ಗೆ ಶಕ್ತಿ ಪಡೆಯಬೇಕು. ಪವಿತ್ರ ಪ್ರಸಾದದಲ್ಲಿ ಅಡಗಿರುವ ಯೇಸುವನ್ನು ಆರಾಧಿಸಬೇಕು ಮತ್ತು ಪ್ರತಿ ಭಾನುವಾರ ಪವಿತ್ರ ಬಲಿಪೂಜೆಯಲ್ಲಿ ಭಾಗವಹಿಸಬೇಕು" ಎಂದು ಅವರು ನೆನಪಿಸಿದರು.
ಯುವಕರ ಮಹಾಜುಬಿಲಿಯ ಸಂದರ್ಭದಲ್ಲಿ ಟೋರ್ ವರ್ಗಾತಾದಲ್ಲಿ ತಾವು ನೀಡಿದ ಸಂದೇಶವನ್ನು ಉಲ್ಲೇಖಿಸಿದ ಜಗದ್ಗುರು ಲಿಯೋರವರು, ಸಂಸ್ಕಾರಗಳ ಮೂಲಕ ಮತ್ತು ಪರಮಪ್ರಸಾದ ಆರಾಧನೆಯ ಮೂಲಕ ಕ್ರಿಸ್ತನೊಂದಿಗೆ ತಮ್ಮ ಸಂಬಂಧವನ್ನು ಇನ್ನಷ್ಟು ಗಾಢಗೊಳಿಸಬೇಕೆಂದು ಯುವಜನರನ್ನು ಪ್ರೋತ್ಸಾಹಿಸಿದರು.
ಕಾರ್ಯಕ್ರಮದಲ್ಲಿ ಪ್ರಾರ್ಥನೆಯಲ್ಲಿ ಒಂದಾದ ಎಲ್ಲರಿಗೂ ಪ್ರೇಷಿತರ ಆಶೀರ್ವಾದವನ್ನು ನೀಡಿದ ಜಗದ್ಗುರುಗಳು, ಅವರು "ಒಂದು ಹೃದಯವಾಗಿ ಮತ್ತು ಒಂದೇ ಆತ್ಮದಲ್ಲಿ ತಮ್ಮ ದೈನಂದಿನ ಜೀವನದ ಮೂಲಕ ಪ್ರಭುವಿಗೆ ಹೊಸ ಗೀತೆಯನ್ನು ಹಾಡುವವರಾಗಲಿ" ಎಂದು ಹಾರೈಸಿದರು. ಯೂಕರಿಸ್ಟ್ ಭಕ್ತಿಗೆ ಹೆಸರುವಾಸಿಯಾದ ಧನ್ಯ ಕಾರ್ಲೊ ಅಕುತಿಸ್, ಸಂತ ಜೊಸೆಫ್ ಸೆಬಾಸ್ಟಿಯನ್ ಪೆಲ್ಚಾರ್ ಮತ್ತು ಧನ್ಯ ಕರೋಲಿನಾ ಕೊಝ್ಕೂವ್ನಾ ಅವರ ಮಧ್ಯಸ್ಥಿಕೆಗೆ ಅವರನ್ನು ಸಮರ್ಪಿಸಿದರು.
ಇಪ್ಪತ್ತಕ್ಕೂ ಹೆಚ್ಚು ವರ್ಷಗಳಿಂದ ನಡೆಯುತ್ತಿರುವ ‘ಒಂದು ಹೃದಯ, ಒಂದು ಆತ್ಮ’ ಕಾರ್ಯಕ್ರಮವು ಪೋಲೆಂಡ್ನ ಅತ್ಯಂತ ದೊಡ್ಡ ಹಾಗೂ ಜನಪ್ರಿಯ ಸುವಾರ್ತಾಪ್ರಚಾರದ ಉಪಕ್ರಮಗಳಲ್ಲಿ ಒಂದಾಗಿ ಬೆಳೆದಿದೆ. ಪ್ರತಿವರ್ಷ ಸಾವಿರಾರು ವಿಶ್ವಾಸಿಗಳನ್ನು ಒಂದೆಡೆ ಸೇರಿಸುವ ಈ ಕಾರ್ಯಕ್ರಮವು ಸಂಗೀತ, ಪ್ರಾರ್ಥನೆ ಮತ್ತು ಆರಾಧನೆಯ ಮೂಲಕ ನಂಬಿಕೆಯನ್ನು ಸಂಭ್ರಮಿಸುವ ವೇದಿಕೆಯಾಗಿದ್ದು, ಪೋಲೆಂಡ್ ಮಾತ್ರವಲ್ಲದೆ ವಿದೇಶಗಳಿಂದಲೂ ಭಕ್ತರನ್ನು ಆಕರ್ಷಿಸುತ್ತಿದೆ.
