ಜಗದ್ಗುರುಗಳು ಒಲಿಂಪಿಕ್ ಕ್ರೀಡಾಪಟುಗಳಿಗೆ: ಕ್ರೀಡೆ ಮಾನವ ವ್ಯಕ್ತಿಯನ್ನು ಅದರ ಕೇಂದ್ರದಲ್ಲೇ ಇಟ್ಟುಕೊಳ್ಳಬೇಕು

ವ್ಯಾಟಿಕನ್ ವರದಿ

ಜಗದ್ಗುರು XIVನೇ ಲಿಯೋರವರು ಮಿಲಾನ್ ಕೋರ್ಟಿನಾ ಚಳಿಗಾಲದ ಒಲಿಂಪಿಕ್ ಮತ್ತು ಪ್ಯಾರಾಲಿಂಪಿಕ್ ಕ್ರೀಡಾಕೂಟಗಳ ನಂತರ, ಇಟಾಲಿಯನ್ ಕ್ರೀಡಾಪಟುಗಳನ್ನು ಭೇಟಿ ಮಾಡಿ ಕ್ರೀಡೆಯ ಮಹತ್ವವನ್ನು ಆಳವಾಗಿ ವಿವರಿಸಿದರು. ಅವರು ಕ್ರೀಡೆ ಕೇವಲ ಸ್ಪರ್ಧೆಯಲ್ಲ, ಅದು ಮಾನವೀಯ, ಸಾಂಸ್ಕೃತಿಕ ಮತ್ತು ಆಧ್ಯಾತ್ಮಿಕ ಸಂದೇಶವನ್ನು ವಿಶ್ವದಾದ್ಯಂತ ಹರಡುವ ಒಂದು ಮಹತ್ವದ ವೇದಿಕೆಯಾಗಿದೆ ಎಂದು ಹೇಳಿದರು.

ಜಗದ್ಗುರುಗಳು ತಮ್ಮ ಭಾಷಣದಲ್ಲಿ, ಕ್ರೀಡೆಯನ್ನು ಒಂದು ಜೀವಂತ ಭಾಷೆಯಂತೆ ವಿವರಿಸಿದರು ಅದು ಪ್ರಯತ್ನ, ನಿರೀಕ್ಷೆ, ವಿಫಲತೆ ಮತ್ತು ಹೊಸ ಆರಂಭಗಳ ಕಥೆಯನ್ನು ಹೇಳುತ್ತದೆ. ಕ್ರೀಡಾಪಟುಗಳು ತಮ್ಮ ದೇಹದ ಸಾಮರ್ಥ್ಯವನ್ನು ಮಾತ್ರವಲ್ಲ, ತ್ಯಾಗ, ಶಿಸ್ತು ಮತ್ತು ಧೈರ್ಯದ ಜೀವನ ಕಥೆಗಳನ್ನೂ ಪ್ರದರ್ಶಿಸುತ್ತಾರೆ ಎಂದು ಅವರು ತಿಳಿಸಿದರು.

ವಿಶೇಷವಾಗಿ ಪ್ಯಾರಾಲಿಂಪಿಕ್ ಸ್ಪರ್ಧೆಗಳ ಕುರಿತು ಮಾತನಾಡಿದ ಜಗದ್ಗುರುಗಳು , ಮಿತಿಗಳು ವ್ಯಕ್ತಿಗೆ ಅಡೆತಡೆಯಾಗುವುದಿಲ್ಲ, ಬದಲಾಗಿ ಅವು ಹೊಸ ಶಕ್ತಿಗಳ ಅನಾವರಣವಾಗಬಹುದು ಎಂದು ಹೇಳಿದರು. ಕ್ರೀಡೆಯಲ್ಲಿ ಕಾಣುವ ಈ ಪರಿವರ್ತನೆ, ಮಾನವೀಯ ಸಾಮರ್ಥ್ಯದ ಮಹತ್ವವನ್ನು ಸ್ಪಷ್ಟಪಡಿಸುತ್ತದೆ ಎಂದು ಅವರು ಹೇಳಿದರು.

ಅವರು ಕ್ರೀಡಾಪಟುಗಳ ಕುಟುಂಬಗಳು ಮತ್ತು ತಂಡಗಳ ಸಹಕಾರವನ್ನು ಮೆಚ್ಚಿ, ಕ್ರೀಡೆ ವ್ಯಕ್ತಿತ್ವವನ್ನು ಬೆಳೆಸುವ ಜೊತೆಗೆ ಆತ್ಮನಿಯಂತ್ರಣ ಮತ್ತು ಆತ್ಮಶಿಸ್ತನ್ನು ಕಲಿಸುತ್ತದೆ ಎಂದು ಹೇಳಿದರು. ದೇಹ ಮತ್ತು ಮನಸ್ಸಿನ ಸಮತೋಲನವನ್ನು ಕಾಯ್ದುಕೊಳ್ಳುವುದು, ಹಾಗೂ ಭಾವನೆಗಳನ್ನು ನಿಯಂತ್ರಿಸುವುದು ಕ್ರೀಡೆಯ ಪ್ರಮುಖ ಪಾಠಗಳಾಗಿವೆ ಎಂದು ಅವರು ಒತ್ತಿ ಹೇಳಿದರು.

ಜಗದ್ಗುರು XIVನೇ ಲಿಯೋರವರು ಕ್ರೀಡೆಯ ಮೂಲಕ ಶಾಂತಿ ಮತ್ತು ಏಕತೆಯನ್ನು ಉತ್ತೇಜಿಸಬಹುದೆಂದು ಹೇಳಿದರು. ಪ್ರಾಚೀನ ಒಲಿಂಪಿಕ್ ವಿರಾಮದ ಪರಂಪರೆಯನ್ನು ನೆನಪಿಸಿಕೊಂಡು, ಇಂದಿನ ಸಂಘರ್ಷಭರಿತ ಜಗತ್ತಿನಲ್ಲಿ ಕ್ರೀಡೆ ಶಾಂತಿಯ ಸಂಕೇತವಾಗಬಹುದು ಎಂದು ತಿಳಿಸಿದರು. ಜೊತೆಗೆ, ಡೋಪಿಂಗ್ ಮತ್ತು ವಾಣಿಜ್ಯೀಕರಣದಂತಹ ಅಪಾಯಗಳನ್ನು ತಪ್ಪಿಸಲು ಕ್ರೀಡಾಪಟುಗಳು ಎಚ್ಚರಿಕೆಯಿಂದ ಇರಬೇಕು ಎಂದು ಎಚ್ಚರಿಸಿದರು.

ಕೊನೆಯಲ್ಲಿ, ಜಗದ್ಗುರುಗಳು ಕ್ರೀಡೆಯು ಮಾನವೀಯತೆ ಮತ್ತು ಸಮನ್ವಯತೆಯ ಪ್ರಯೋಗಾಲಯವಾಗಬೇಕು ಎಂದು ಹೇಳಿದರು. ದ್ವೇಷವಿಲ್ಲದೆ ಸ್ಪರ್ಧಿಸುವುದು, ಗೌರವದಿಂದ ಗೆಲ್ಲುವುದು ಮತ್ತು ಸೋಲಿನಲ್ಲಿಯೂ ಸ್ವಾಭಿಮಾನವನ್ನು ಕಾಪಾಡುವುದು ಕ್ರೀಡೆಯ ಸತ್ಯವಾದ ಮೌಲ್ಯಗಳು ಎಂದು ಅವರು ತಿಳಿಸಿದರು. ಎಲ್ಲಾ ರೀತಿಯ ಕ್ರೀಡೆಯಲ್ಲಿ ಮಾನವ ವ್ಯಕ್ತಿಯೇ ಕೇಂದ್ರವಾಗಿರಬೇಕು ಎಂಬ ಜವಾಬ್ದಾರಿಯನ್ನು ಅವರು ಕ್ರೀಡಾಪಟುಗಳಿಗೆ ಒಪ್ಪಿಸಿದರು.