ಅಂತರ ಯುದ್ಧದ ಸಮಯದಲ್ಲಿ 49 ಸ್ಪೇನ್ ನಾಗರಿಕರ ಹುತಾತ್ಮತೆಯನ್ನು ಜಗದ್ಗುರುಗಳು ಮಾನ್ಯಗೊಳಿಸುತ್ತಾರೆ.

ವ್ಯಾಟಿಕನ್ ವರದಿ

ಸೋಮವಾರ ಪವಿತ್ರರ ಕಾರಣಗಳ ಡಿಕಾಸ್ಟರಿಯ ಪ್ರಿಫೆಕ್ಟ್ ಕಾರ್ಡಿನಲ್ ಮಾರ್ಚೆಲ್ಲೊ ಸೆಮೆರಾರೊ ರವರೊಂದಿಗೆ ನಡೆದ ಭೇಟಿಯಲ್ಲಿ, ಜಗದ್ಗುರು XIVನೇ ಲಿಯೋರವರು ಹುತಾತ್ಮತೆ, ಜೀವನ ಸಮರ್ಪಣೆ ಮತ್ತು ಹಲವಾರು ಪುರುಷರು ಹಾಗೂ ಮಹಿಳೆಯರ ವೀರಗುಣಗಳನ್ನು ಮಾನ್ಯಗೊಳಿಸುವ ಹಲವು ಡಿಕ್ರಿಗಳನ್ನು ಪ್ರಕಟಿಸಲು ಅನುಮತಿ ನೀಡಿದರು.

ಈ ಡಿಕ್ರಿಗಳಲ್ಲಿ “ದೇವರ ಸೇವಕರಾದ” ಸ್ಟಾನಿಸ್ಲಾವೊ ಒರ್ಟೇಗಾ ಗಾರ್ಸಿಯಾ (ಜನನ ಹೆಸರು ಲೊರೆನ್ಸೊ) ಹಾಗೂ ಅವರ 48 ಸಹಚರರು ಸಂತ ಗ್ಯಾಬ್ರಿಯೆಲ್ ಕ್ರೈಸ್ತ ಬೋಧನೆಯ ಸಹೋದರರ ಸಂಸ್ಥೆಯ ಸದಸ್ಯರು ಮತ್ತು ಧರ್ಮಪ್ರಾಂತ್ಯದ ಯಾಜಕ ಎಮಾನುವೇಲ್ ಬೆರೆಂಗ್ವರ್ ಕ್ಲುಸೆಲ್ಲಾ ರವರ ಹುತಾತ್ಮತೆಯನ್ನು ಮಾನ್ಯಗೊಳಿಸಲಾಗಿದೆ.

ಅವರು 1936ರ ಜುಲೈದಿಂದ ನವೆಂಬರ್ ವರೆಗೆ ಸ್ಪೇನ್‌ನ ಕಟಲೋನಿಯಾ ಪ್ರದೇಶದ ವಿವಿಧ ಸ್ಥಳಗಳಲ್ಲಿ, ಧಾರ್ಮಿಕ ಹಿಂಸೆ ನಡೆಯುತ್ತಿದ್ದ ಕಾಲದಲ್ಲಿ, ನಂಬಿಕೆಯ ಮೇಲಿನ ದ್ವೇಷದಿಂದ ಹತ್ಯೆಗೀಡಾದರು.

ಜಗದ್ಗುರುಗಳು “ಹೋಗಾರ್ ಡೆ ನಜರೇತ್” ಸಂಘದ ಸಾಮಾನ್ಯ ಸದಸ್ಯರಾದ ದೇವರ ಸೇವಕ ಪಿಯೆಟ್ರೊ ಎಮಾನುವೇಲ್ ಸಲಾಡೊ ಅಲ್ಬಾರವರ ಜೀವನ ಸಮರ್ಪಣೆಯನ್ನೂ ಮಾನ್ಯಗೊಳಿಸಿದರು. ಅವರು 1968ರಲ್ಲಿ ಸ್ಪೇನ್‌ನ ಚಿಕ್ಲಾನಾ ದೆ ಲಾ ಫ್ರೊಂಟೇರಾದಲ್ಲಿ ಜನಿಸಿ, 2012ರಲ್ಲಿ ಈಕ್ವಡಾರ್‌ನ ಪ್ಲಾಯಾ ದೆ ಟೋನ್ಸುಪಾದಲ್ಲಿ ನಿಧನರಾದರು.

ಇದರ ಜೊತೆಗೆ, ಜಗದ್ಗುರುಗಳು ಮೂವರು ದೇವರ ಸೇವಕರ ವೀರಗುಣಗಳನ್ನು ಮಾನ್ಯಗೊಳಿಸುವ ಡಿಕ್ರಿಗಳನ್ನೂ ಅಂಗೀಕರಿಸಿದರು.

ಯೇಸುವಿನ ಮಾರಿಯಾ ಎಲೆಟ್ಟಾ (ಜನನ ಹೆಸರು ಕ್ಯಾಟೆರಿನಾ ಟ್ರಮಾಜೋಲಿ), ಡಿಸ್ಕಾಲ್ಸ್ಡ್ ಕಾರ್ಮೆಲೈಟ್ ಸನ್ಯಾಸಿನಿ, 1605ರಲ್ಲಿ ಇಟಲಿಯ ಟೆರ್ನಿಯಲ್ಲಿ ಜನಿಸಿ, 1663ರಲ್ಲಿ ಪ್ರಾಗ್‌ನಲ್ಲಿ ನಿಧನರಾದರು.

ಅತ್ಯಂತ ಪವಿತ್ರ ತ್ರಿತ್ವದ ಮಾರಿಯಾ ತೆರೆಸಾ (ಜನನ ಹೆಸರು ತೆರೆಸಾ ಇಸ್ಸೆಲ್ಡೈಕ್), ಡಿವೈನ್ ಹಾರ್ಟ್ ಆಫ್ ಜೀಸಸ್ ಕಾರ್ಮೆಲೈಟ್ ಸಹೋದರಿಯರ ಸಂಘದ ಸದಸ್ಯೆ, 1897ರಲ್ಲಿ ನೆದರ್‌ಲ್ಯಾಂಡ್ಸ್‌ನ ಅಪೆಲ್ಡೋರ್ಣ್‌ನಲ್ಲಿ ಜನಿಸಿ, 1926ರಲ್ಲಿ ಅಮೇರಿಕಾದ ಸಂತ ಲೂಯಿಸ್‌ನಲ್ಲಿ ನಿಧನರಾದರು.

ಮಾರಿಯಾ ರಫಾಏಲ್ಲಾ ಡೆ ಜಿಯೋವನ್ನಾ, ಸೇಂಟ್ ಫ್ರಾನ್ಸಿಸ್ ಆಫ್ ಪೌಲಾರವರ ತೃತೀಯ ಮಿನಿಮ್ ಸಹೋದರಿಯರ ಸಂಘದ ಸ್ಥಾಪಕಿ, 1870ರಲ್ಲಿ ಇಟಲಿಯ ಜೆನೋವಾದಲ್ಲಿ ಜನಿಸಿ, ಅಲ್ಲಿ 1933ರಲ್ಲಿ ನಿಧನರಾದರು.

ಈ ಡಿಕ್ರಿಗಳ ಪ್ರಕಟಣೆ, ಇವರ ಪವಿತ್ರೀಕರಣ ಪ್ರಕ್ರಿಯೆಯಲ್ಲಿನ ಮಹತ್ವದ ಮುಂದಿನ ಹೆಜ್ಜೆಯಾಗಿದೆ.