ಜಗದ್ಗುರು ಲಿಯೋರವರು ಅಲ್ಜೀರಿಯಾದ ಅನ್ನಾಬಾದಲ್ಲಿರುವ ಹಿಪ್ಪೋ ಪುರಾತತ್ವ ತಾಣಕ್ಕೆ ಭೇಟಿ ನೀಡಿದರು.
ವ್ಯಾಟಿಕನ್ ವರದಿ
ಸಂತ ಆಗಸ್ಟಿನ್ ರವರ ಹೆಜ್ಜೆ ಗುರುತುಗಳನ್ನು ಅನುಸರಿಸುತ್ತಾ, ಜಗದ್ಗುರು XIVನೇ ಲಿಯೋರವರು ತಮ್ಮ ಪ್ರೇಷಿತರ ಪ್ರವಾಸದ ಎರಡನೇ ದಿನವಾದ ಏಪ್ರಿಲ್ 14 ಮಂಗಳವಾರ, ಆಧುನಿಕ ಅನ್ನಾಬಾ ನಗರದಲ್ಲಿರುವ ಹಿಪ್ಪೋ ಪುರಾತತ್ವ ತಾಣಕ್ಕೆ ಭೇಟಿ ನೀಡಿದರು.
ಪ್ರಾಚೀನ ಹಿಪ್ಪೋ, ಅಥವಾ ಹಿಪ್ಪೋ ರೆಜಿಯಸ್ (ಇಂದಿನ ಅನ್ನಾಬಾ), ರೋಮನ್ ಸಾಮ್ರಾಜ್ಯದ ಪ್ರಮುಖ ಕರಾವಳಿ ನಗರವಾಗಿದ್ದು ಆರ್ಥಿಕ ಕೇಂದ್ರವಾಗಿತ್ತು. ಸಂತ ಆಗಸ್ಟಿನ್ ರವರು ಕ್ರಿ.ಶ. 396ರಿಂದ 430ರವರೆಗೆ, ತಮ್ಮ 75ನೇ ವಯಸ್ಸಿನಲ್ಲಿ ನಿಧನರಾಗುವವರೆಗೂ, ಈ ನಗರದ ಬಿಷಪ್ ಆಗಿ ಸೇವೆ ಸಲ್ಲಿಸಿದರು. ಆ ಸಮಯದಲ್ಲಿ ನಗರವು ವಾಂಡಲ್ಗಳ ಆಕ್ರಮಣಕ್ಕೆ ಒಳಗಾಗಿತ್ತು.
ಇಂದು, ಆ ರೋಮನ್ ನಗರದ ಅನೇಕ ಅವಶೇಷಗಳು ಸಂರಕ್ಷಿಸಲ್ಪಟ್ಟಿವೆ ಉದಾಹರಣೆಗೆ, ಕಲ್ಲು ಹಾಸಿದ ಫೋರಮ್, ರಂಗಮಂದಿರ, ಮಾರುಕಟ್ಟೆ, ಸ್ನಾನಗೃಹಗಳು, ನೀರಿನ ಸಂಗ್ರಹಣಾ ಕೊಳಗಳು ಹಾಗೂ ಚಿತ್ರಮಯ ಮೋಸಾಯಿಕ್ಗಳು. ಅದೇ ರೀತಿ, ಆ ಕಾಲದ ಕ್ರೈಸ್ತ ಧಾರ್ಮಿಕ ಗುರುತುಗಳೂ ಉಳಿದಿವೆ, ವಿಶೇಷವಾಗಿ ಸಂತ ಆಗಸ್ಟಿನ್ ರವರು ತಮ್ಮ ಸೇವೆಯನ್ನು ನಡೆಸಿದ ಬಸಿಲಿಕಾ ಪಾಕಿಸ್ ಮತ್ತು ಒಂದು ದೀಕ್ಷಾಸ್ನಾನ ಗೃಹ.
ಮಳೆಗಾಳಿ ತುಂಬಿದ ಆಕಾಶದಡಿ, ಜಗದ್ಗುರು ಲಿಯೋರವರನ್ನು ಪುರಾತತ್ವ ತಾಣದಲ್ಲಿ ಪ್ರತಿನಿಧಿಯೊಬ್ಬರು ಸ್ವಾಗತಿಸಿದರು. ದೂರದಲ್ಲಿ, ಪರ್ವತದ ಮೇಲೆ ನೆಲೆಸಿರುವ ಸಂತ ಆಗಸ್ಟಿನ್ ಬಸಿಲಿಕಾ ಕಾಣಿಸುತ್ತಿತ್ತು, ಅಲ್ಲಿ ಜಗದ್ಗುರುಗಳು ನಂತರ ಪವಿತ್ರ ಬಲಿಪೂಜೆಯನ್ನು ಅರ್ಪಿಸಲಿದ್ದಾರೆ.
ಜಗದ್ಗುರುಗಳು ನಂತರ ಹೂವಿನ ಹಾರವನ್ನು ಸಮರ್ಪಿಸಿ, ತಮ್ಮ ಆಧ್ಯಾತ್ಮಿಕ ಪಿತೃ ನಡೆದ ಭೂಮಿಯಲ್ಲಿರುವ ಆ ಪ್ರಾಚೀನ ಕಲ್ಲುಗಳ ನಡುವೆ ಕ್ಷಣಕಾಲ ಪ್ರಾರ್ಥನೆ ಮಾಡಿದರು. ಬಳಿಕ ಅವರು ಒಂದು ಆಲಿವ್ ಮರವನ್ನು ನೆಟ್ಟು, ಅನ್ನಾಬಾ ಸಂಗೀತ ಸಂಸ್ಥೆಯ ಗಾಯನ ಬಳಗವು ಸಂತ ಆಗಸ್ಟಿನ್ ರವರ ಶಾಂತಿ ಮತ್ತು ಸಹೋದರತ್ವದ ಬರಹಗಳ ಆಧಾರದ ಮೇಲೆ ಹಾಡಿದ ಗೀತೆಗಳನ್ನು ಆಲಿಸಿದರು.
ಜಗದ್ಗುರು ಲಿಯೋರವರು ಅಲ್ಜೀರಿಯಾಗೆ ಭೇಟಿ ನೀಡಿದ ಮೊದಲ ಜಗದ್ಗುರುಗಳಾಗಿದ್ದರೂ, ಏಪ್ರಿಲ್ 13ರಂದು ದೇಶದ ಅಧಿಕಾರಿಗಳಿಗೆ ನೀಡಿದ ಭಾಷಣದಲ್ಲಿ, “ನಾನು ಸಂತ ಆಗಸ್ಟಿನ್ ಅವರ ಆಧ್ಯಾತ್ಮಿಕ ಪುತ್ರನಾಗಿ 2004 ಮತ್ತು 2013ರಲ್ಲಿ ಈಗಾಗಲೇ ಅನ್ನಾಬಾಗೆ ಭೇಟಿ ನೀಡಿದ್ದೇನೆ ಎಂದು ಅವರು ನೆನಪಿಸಿಕೊಂಡರು. “ನನ್ನನ್ನು ಪೇತ್ರನ ಉತ್ತರಾಧಿಕಾರಿಯಾಗಿ ಮತ್ತೆ ಇಲ್ಲಿ ಬರಲು ದೇವರ ದಿವ್ಯ ಯೋಜನೆ ಅವಕಾಶ ನೀಡಿರುವುದಕ್ಕೆ ನಾನು ಕೃತಜ್ಞನಾಗಿದ್ದೇನೆ” ಎಂದು ಹೇಳಿದರು.
ರೋಮಿನಿಂದ ಅಲ್ಜೀರಿಯಾಗೆ ಪ್ರಯಾಣಿಸುವ ವಿಮಾನದಲ್ಲಿ, ಸಂತ ಆಗಸ್ಟಿನ್ ಅಂತರ್ಧಾರ್ಮಿಕ ಸಂವಾದದಲ್ಲಿ ಮಹತ್ವದ ಸೇತುವೆಯಾಗಿದ್ದಾರೆ ಮತ್ತು ತಮ್ಮ ತಾಯ್ನಾಡಿನಲ್ಲಿ ಅತ್ಯಂತ ಪ್ರೀತಿಸಲ್ಪಟ್ಟಿದ್ದಾರೆ ಎಂದು ಜಗದ್ಗುರುಗಳು ಹೇಳಿದರು. “ಸಂತ ಆಗಸ್ಟಿನ್ ರವರ ಜೀವನಕ್ಕೆ ಸಂಬಂಧಿಸಿದ ಸ್ಥಳಗಳಿಗೆ ಭೇಟಿ ನೀಡುವ ಅವಕಾಶ ನನಗೆ ವೈಯಕ್ತಿಕವಾಗಿ ಆಶೀರ್ವಾದವಾಗಿದೆ. ಇದು ಧರ್ಮ ಸಭೆಗೂ ಹಾಗೂ ಜಗತ್ತಿಗೂ ಆಶೀರ್ವಾದ, ಏಕೆಂದರೆ ನಾವು ಸದಾ ಶಾಂತಿ ಮತ್ತು ಸೌಹಾರ್ದಕ್ಕಾಗಿ ಸೇತುವೆಗಳನ್ನು ನಿರ್ಮಿಸಬೇಕು” ಎಂದು ಅವರು ಹೇಳಿದರು.
ಮುಂದಿನ ಕಾರ್ಯಕ್ರಮಗಳಲ್ಲಿ, ಜಗದ್ಗುರು ಲಿಯೋರವರು ಲಿಟಲ್ ಸಿಸ್ಟರ್ಸ್ ಆಫ್ ದಿ ಪೂರ್ ನಡೆಸುವ ವೃದ್ಧಾಶ್ರಮಕ್ಕೆ ಭೇಟಿ ನೀಡಲಿದ್ದಾರೆ. ನಂತರ ಆಗಸ್ಟಿನಿಯನ್ ಸಂಘದ ಸದಸ್ಯರೊಂದಿಗೆ ಖಾಸಗಿ ಭೇಟಿಯನ್ನು ನಡೆಸಿ, ಸಂತ ಆಗಸ್ಟಿನ್ ಬಸಿಲಿಕಾದಲ್ಲಿ ಪವಿತ್ರ ಬಲಿಪೂಜೆಯನ್ನು ಅರ್ಪಿಸಲಿದ್ದಾರೆ. ದಿನದ ಕೊನೆಯಲ್ಲಿ ಅವರು ಅಲ್ಜೀರಿಯಾಗೆ ಹಿಂತಿರುಗುವ ವಿಮಾನವನ್ನು ಹಿಡಿಯಲಿದ್ದಾರೆ. ಮುಂದಿನ ದಿನವಾದ ಏಪ್ರಿಲ್ 15ರಂದು, ತಮ್ಮ ಪ್ರೇಷಿತರ ಪ್ರವಾಸದ ಎರಡನೇ ಹಂತವಾಗಿ ಅವರು ಕ್ಯಾಮರೂನ್ಗೆ ಪ್ರಯಾಣಿಸಲಿದ್ದು, ನಂತರ ಅಂಗೋಲಾ ಮತ್ತು ಈಕ್ವಟೋರಿಯಲ್ ಗಿನಿಯಾಗೆ ಭೇಟಿ ನೀಡಲಿದ್ದಾರೆ.
