“ಮಕ್ಕಳ ಆರೋಗ್ಯ ಸೇವೆಗಾಗಿ ಅಭಿವೃದ್ಧಿಪಡಿಸಿದ ದೂರವೈದ್ಯಕೀಯ ಸಾಧನವನ್ನು ಜಗದ್ಗುರುಗಳು ಸ್ವೀಕರಿಸಿದರು.”

ವ್ಯಾಟಿಕನ್ ವರದಿ

ಮುಂದಿನ ಪೀಳಿಗೆಯ ಸುಧಾರಿತ ದೂರವೈದ್ಯಕೀಯ ತಂತ್ರಜ್ಞಾನ ವ್ಯವಸ್ಥೆಯಾದ ಟೆಲಾಡಾಕ್ ಲೈಟ್ ಅನ್ನು ಅಗತ್ಯವಿರುವ ಮಕ್ಕಳ ಆರೋಗ್ಯಸೇವೆ ಒದಗಿಸಲು ಬಳಸುವ ಉದ್ದೇಶದಿಂದ “ವಿಶ್ವ ಮಕ್ಕಳ ಆಸ್ಪತ್ರೆಯ ಪೋಷಕರ” ಪ್ರತಿನಿಧಿ ಮಂಡಳಿಯವರು ಜಗದ್ಗುರು XIVನೇ ಲಿಯೋರವರಿಗೆ ದಾನವಾಗಿ ನೀಡಿದ್ದಾರೆ.

ಬುಧವಾರ, ಮಾರ್ಚ್ 4ರಂದು ಬೆಳಿಗ್ಗೆ, ವ್ಯಾಟಿಕನ್‌ನ VI ನೇ ಪಾಲ್  ಸಭಾಂಗಣದಲ್ಲಿ ಸಾಮಾನ್ಯ ಸಭೆ ಆರಂಭವಾಗುವ ಮೊದಲು, ಜಗದ್ಗುರುಗಳು ಈ ಪ್ರತಿನಿಧಿ ಮಂಡಳಿಯನ್ನು ಭೇಟಿಯಾದ ಸಂದರ್ಭದಲ್ಲಿ ಟೆಲಾಡಾಕ್ ಲೈಟ್ ವ್ಯವಸ್ಥೆಯನ್ನು ಅವರಿಗೆ ಹಸ್ತಾಂತರಿಸಲಾಯಿತು.

“ವಿಶ್ವ ಮಕ್ಕಳ ಆಸ್ಪತ್ರೆಯ ಪೋಷಕರ” ಎಂಬುದು ಅಮೆರಿಕಾದ ಲಾಭರಹಿತ ಸಂಸ್ಥೆಯಾಗಿದ್ದು, ಜಗದ್ಗುರುಗಳು ಮಕ್ಕಳ ಆರೋಗ್ಯ ಮತ್ತು ಮಾನವೀಯ ಆರೈಕೆಗೆ ಜಾಗತಿಕ ಮೈತ್ರಿಯನ್ನು ಸಂಯೋಜಿಸುತ್ತದೆ. ಈ ಜಾಲತಾಣವು ವಿಶ್ವದ ವಿವಿಧ ಭಾಗಗಳ ಆಸ್ಪತ್ರೆಗಳನ್ನೊಂದುಗೂಡಿಸುತ್ತದೆ ಇದರಲ್ಲಿ ವ್ಯಾಟಿಕನ್‌ನ ಬಾಲಯೇಸುವಿನ ಮಕ್ಕಳ ಆಸ್ಪತ್ರೆಯೂ ಸೇರಿದೆ.

ಈ ಜಾಲತಾಣದ ಉದ್ದೇಶವು ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಅಥವಾ ಮಕ್ಕಳ ಆರೋಗ್ಯಸೇವೆ ಸಮರ್ಪಕವಾಗಿ ಲಭ್ಯವಿಲ್ಲದ ಪ್ರದೇಶಗಳಲ್ಲಿ ವಾಸಿಸುವ ಸುಮಾರು ಒಂದು ಮಿಲಿಯನ್ ಚಿಕ್ಕ ಮಕ್ಕಳಿಗೆ ವೈದ್ಯಕೀಯ ಆರೈಕೆ ಒದಗಿಸಲು ಸಹಾಯ ಮಾಡುವುದು. ಈ ಕಾರ್ಯವನ್ನು ಜಗದ್ಗುರು ಫ್ರಾನ್ಸಿಸ್ ರವರು ಮೇ 2024ರಲ್ಲಿ ಈ ಜಾಲತಾಣಕ್ಕೆ ಒಪ್ಪಿಸಿದ್ದರು.

ಪೋಷಕ ಸಂಸ್ಥೆಯ ಅಧ್ಯಕ್ಷರಾದ ಫಾಬ್ರಿಜಿಯೋ ಅರೆಂಗಿ ಬೆಂತಿವೊಲಿಯೋ ರವರು ಮಕ್ಕಳ ಕಲ್ಯಾಣದತ್ತ ಸಂಸ್ಥೆಯ ಬದ್ಧತೆಯನ್ನು ಪುನರುಚ್ಚರಿಸಿ, ಅಗತ್ಯವಿರುವ ಮಕ್ಕಳಿಗಾಗಿ ಆರೈಕೆ ಮತ್ತು ಕರುಣೆಯ ಈ ಅದ್ಭುತ ಸೇವೆಯನ್ನು ಜಗದ್ಗುರು XIVನೇ ಲಿಯೋರವರೊಂದಿಗೆ ಮುಂದುವರಿಸಲು ತಮ್ಮ ನಿಷ್ಠೆಯನ್ನು ಮತ್ತೊಮ್ಮೆ ದೃಢಪಡಿಸಿದರು.

 ಟೆಲಾಡಾಕ್ ಲೈಟ್ ಎಂಬುದು ಮುಂದಿನ ಪೀಳಿಗೆಯ ತಂತ್ರಜ್ಞಾನ ವ್ಯವಸ್ಥೆಯಾಗಿದ್ದು, ಟೆಲಿಹೆಲ್ತ್ ಸಾಧನಗಳ ಮೂಲಕ ರೋಗಿಗಳು ಮತ್ತು ವೈದ್ಯಕೀಯ ತಂಡಗಳನ್ನು ಸಂಪರ್ಕಿಸುತ್ತದೆ. ಇದರಿಂದ ಸ್ಥಳದಲ್ಲೇ ಚಿಕಿತ್ಸೆ ನೀಡುವ ಭೇಟಿಗಳು  ಮತ್ತು ವೈದ್ಯಕೀಯ ಸಹಯೋಗ  ಸುಲಭವಾಗುತ್ತದೆ.

ಬುಧವಾರ ಬೆಳಿಗ್ಗೆ ಈ ವ್ಯವಸ್ಥೆಯನ್ನು ಜಗದ್ಗುರು ಲಿಯೋರವರಿಗೆ ಪರಿಚಯಿಸುವ ವೇಳೆ, ದೂರವೈದ್ಯಕೀಯ ಕ್ಷೇತ್ರದಲ್ಲಿ ಈ ಸಾಧನವು ನೀಡಬಹುದಾದ ಸಾಧ್ಯತೆಗಳನ್ನು ಪ್ರದರ್ಶಿಸಲು ಅರ್ಜೆಂಟಿನಾದಲ್ಲಿರುವ ಒಂದು ಕೇಂದ್ರದೊಂದಿಗೆ ನೇರ ಟೆಲಿಹೆಲ್ತ್ ಸಂಪರ್ಕವನ್ನು ಸ್ಥಾಪಿಸಲಾಯಿತು.