ಜಗದ್ಗುರು ಲಿಯೋರವರು ಸ್ಪೇನ್ನ ರಾಜ ಮತ್ತು ರಾಣಿಯನ್ನು ರೋಮಿಗೆ ಆತ್ಮೀಯವಾಗಿ ಸ್ವಾಗತಿಸಿದರು.
ವ್ಯಾಟಿಕನ್ ವರದಿ
ಜಗದ್ಗುರು XIVನೇ ಲಿಯೋರವರು ಶುಕ್ರವಾರ ರಾಜ VIನೇ ಫೆಲಿಪೆ ಮತ್ತು ರಾಣಿ ಲೆಟಿಜಿಯಾರವರನ್ನು ಪ್ರೇಷಿತರ ಅರಮನೆಯಲ್ಲಿ ಖಾಸಗಿ ಭೇಟಿಗೆ ಸ್ವಾಗತಿಸಿದರು. ನಂತರ, ಪವಿತ್ರ ಸಭೆಯ ಪತ್ರಿಕಾ ಕಚೇರಿಯ ಹೇಳಿಕೆಯ ಪ್ರಕಾರ, ಆ ರಾಜ ದಂಪತಿಗಳು ಪಿಯೆಟ್ರೋ ಪರೋಲಿನ್ ಮತ್ತು ಪಾಲ್ ರಿಚರ್ಡ್ ಗಲ್ಲಾಘರ್ ರವರನ್ನು ಕೂಡ ಭೇಟಿ ಮಾಡಿದರು.
ಈ ಮಾತುಕತೆಯ ಮುಖ್ಯ ಕೇಂದ್ರವಾಗಿ ಪವಿತ್ರ ಸಭೆ ಮತ್ತು ಸ್ಪೇನ್ ದೇಶದ ನಡುವಿನ ಉತ್ತಮ ಸಂಬಂಧಗಳ ಬಗ್ಗೆ ಚರ್ಚಿಸಲಾಯಿತು. ವಿಶೇಷವಾಗಿ, ಜಗದ್ಗುರುಗಳ ಮುಂಬರುವ ಪ್ರೇಷಿತರ ಪ್ರಯಾಣದ ಸಂದರ್ಭದಲ್ಲಿ ಈ ಸಂಬಂಧಗಳು ಇನ್ನಷ್ಟು ಮಹತ್ವ ಪಡೆದುಕೊಳ್ಳಲಿವೆ ಎಂದು ಉಲ್ಲೇಖಿಸಲಾಯಿತು. ಜೊತೆಗೆ, ದೇಶದ ಪ್ರಸ್ತುತ ಪರಿಸ್ಥಿತಿ ಮತ್ತು ಸಮಾಜದಲ್ಲಿ ಧರ್ಮ ಸಭೆಯ ಪಾತ್ರದ ಕುರಿತಾದ ವಿಚಾರಗಳಿಗೂ ಗಮನ ಹರಿಸಲಾಯಿತು.
ಚರ್ಚೆಯಲ್ಲಿ ಶಾಂತಿಯನ್ನು ಬೆಂಬಲಿಸುವ ನಿರಂತರ ಬದ್ಧತೆಯ ಮಹತ್ವವನ್ನು ಒತ್ತಿಹೇಳಲಾಯಿತು. ಅಂತರರಾಷ್ಟ್ರೀಯ ಸಹವಾಸದ ಮೂಲಭೂತ ಮೌಲ್ಯಗಳು ಮತ್ತು ತತ್ವಗಳನ್ನು ಬಲಪಡಿಸುವ ಅಗತ್ಯವನ್ನೂ ಅವರು ಹಂಚಿಕೊಂಡರು.
ವ್ಯಾಟಿಕನ್ ಭೇಟಿಯ ನಂತರ, ರಾಜ ದಂಪತಿಗಳು ಸಂತ ಮೇರಿ ಮೇಜರ್ ಬಸಿಲಿಕಾಗೆ ತೆರಳಿದರು. ಅಲ್ಲಿ ರಾಜ VIನೇ ಫೆಲಿಪೆ ರವರಿಗೆ ಲಿಬೇರಿಯನ್ ಬಸಿಲಿಕಾ ಅಧ್ಯಾಯದ “ಪ್ರೋಟೋಕ್ಯಾನನ್” ಎಂಬ ವಿಶೇಷ ಪಟ್ಟವನ್ನು ನೀಡಲಾಯಿತು. ಈ ಸಮಾರಂಭವನ್ನು ಲಿಥುವೇನಿಯಾದ ಕಾರ್ಡಿನಲ್ ರೋಲಂಡಾಸ್ ಮಕ್ರಿಕಾಸ್ ನೇತೃತ್ವದಲ್ಲಿ ನಡೆಸಲಾಯಿತು, ಜೊತೆಗೆ ಸ್ಪೇನ್ನ ಕ್ಯಾನನ್ ಜೈಮ್ ಬ್ರೋಸೆಲ್ ಸಹ ಭಾಗವಹಿಸಿದರು.
ಈ ಬಸಿಲಿಕಾ ಮತ್ತು ಸ್ಪೇನ್ ರಾಜವಂಶದ ನಡುವಿನ ಸಂಬಂಧವು ಬಹಳ ಪುರಾತನವಾಗಿದೆ. ಶತಮಾನಗಳ ಕಾಲ ಸ್ಪೇನ್ನ ರಾಜರು, ಧರ್ಮಗುರುಗಳು ಮತ್ತು ಭಕ್ತರು ಈ ಬಸಿಲಿಕಾವನ್ನು ಬೆಂಬಲಿಸುತ್ತಾ ಬಂದಿದ್ದಾರೆ. 1603ರಲ್ಲಿ ರಾಜ III ನೇ ಫಿಲಿಪ್ ರವರಿಗೆ ಈ ಬಸಿಲಿಕಾದ ರಕ್ಷಕರಾಗಿ ಮತ್ತು ಪ್ರೋಟೋಕ್ಯಾನನ್ ಆಗಿ ಆಹ್ವಾನ ನೀಡುವುದರ ಮೂಲಕ ಈ ಸಂಬಂಧವನ್ನು ಅಧಿಕೃತಗೊಳಿಸಲಾಯಿತು.
ನಂತರದ ವರ್ಷಗಳಲ್ಲಿ ಹಲವಾರು ಉಡುಗೊರೆಗಳು ಮತ್ತು ಸೇವೆಗಳು ಈ ಸಂಬಂಧವನ್ನು ಮತ್ತಷ್ಟು ಬಲಪಡಿಸಿವೆ. 1953ರಲ್ಲಿ ಜಗದ್ಗುರು XII ನೇ ಪಯಸ್ ರವರು ಹಿಸ್ಪಾನಿಯರಮ್ ಫಿಡೆಲಿಟಾಸ್ ಎಂಬ ಜಗದ್ಗುರುಗಳ ದಸ್ತಾವೇಜಿನ ಮೂಲಕ ಈ ಬಾಂಧವ್ಯವನ್ನು ಪುನಃ ದೃಢಪಡಿಸಿದರು. ಇಂದಿಗೂ, ಲಿಬೇರಿಯನ್ ಅಧ್ಯಾಯವು ಸ್ಪೇನ್ ಜನತೆ ಮತ್ತು ಅವರ ರಾಷ್ಟ್ರಪ್ರಮುಖರ ಕಲ್ಯಾಣಕ್ಕಾಗಿ ವರ್ಷಕ್ಕೆ ಮೂರು ವಿಶೇಷ ಪವಿತ್ರ ಬಲಿ ಪೂಜೆಗಳನ್ನು ಆಚರಿಸುತ್ತಿದೆ.
