ಗರ್ಭಪಾತದ ಮಾತ್ರೆಗಳ ವ್ಯಾಪಕ ಬಳಕೆಯ ವಿರುದ್ಧ ಪ್ರಾರ್ಥನೆ ಮತ್ತು ಕಾರ್ಯಾಚರಣೆಯ ಅಭಿಯಾನ ಆರಂಭಿಸಿದ ಅಮೆರಿಕದ ಧರ್ಮಾಧ್ಯಕ್ಷರು
ವ್ಯಾಟಿಕನ್ ವರದಿ
ಅಮೆರಿಕ ಸಂಯುಕ್ತ ಸಂಸ್ಥಾನದ ಕಥೋಲಿಕ ಧರ್ಮಾಧ್ಯಕ್ಷರ ಸಮ್ಮೇಳನದ (USCCB) ಜೀವಪರ ಚಟುವಟಿಕೆಗಳ ಸಮಿತಿ, ಗರ್ಭಪಾತದ ಮಾತ್ರೆಗಳ ವ್ಯಾಪಕ ಬಳಕೆಯ ವಿರುದ್ಧ ಪ್ರಾರ್ಥನೆ ಮತ್ತು ಕಾರ್ಯಾಚರಣೆಯ ಕೇಂದ್ರೀಕೃತ ಪ್ರಯತ್ನದಲ್ಲಿ ಪಾಲ್ಗೊಳ್ಳುವಂತೆ ಕಥೋಲಿಕ ವಿಶ್ವಾಸಿಗಳಿಗೆ ಆಹ್ವಾನ ನೀಡಿದೆ. ಈ ಅಭಿಯಾನವು ಆಗಸ್ಟ್ 18ರಂದು ಆರಂಭವಾಗಿ ಅಕ್ಟೋಬರ್ ತಿಂಗಳವರೆಗೆ ಮುಂದುವರಿಯಲಿದೆ.
“ಪ್ರತಿಯೊಂದು ಗರ್ಭಪಾತವೂ ಒಂದು ಮಗುವಿನ ಮರಣಕ್ಕೂ ತಾಯಿಗೆ ಉಂಟಾಗುವ ಹಾನಿಗೂ ಕಾರಣವಾಗುತ್ತದೆ. ಈಗ ಗರ್ಭಪಾತದ ಮಾತ್ರೆಗಳು ಸುಲಭವಾಗಿ ದೊರೆಯುತ್ತಿರುವುದರಿಂದ, ಗರ್ಭಪಾತದ ಪ್ರಮಾಣವು ದುರಂತಕರವಾಗಿ ಹೆಚ್ಚುತ್ತಿದೆ; ಇದರೊಂದಿಗೆ ಆರೋಗ್ಯದ ಅಪಾಯಗಳೂ ಹೆಚ್ಚುತ್ತಿವೆ,” ಎಂದು USCCB ಅಧ್ಯಕ್ಷರಾದ ಮಹಾಧರ್ಮಾಧ್ಯಕ್ಷರಾದ ಪಾಲ್ ಕೋಕ್ಲಿ ಮತ್ತು ಸಮ್ಮೇಳನದ ಜೀವಪರ ಸಮಿತಿಯ ಅಧ್ಯಕ್ಷರಾದ ಧರ್ಮಾಧ್ಯಕ್ಷ ಡ್ಯಾನಿಯಲ್ ಥಾಮಸ್ ಅವರು ಆಗಸ್ಟ್ 18ರಂದು ಬಿಡುಗಡೆ ಮಾಡಿದ ಜಂಟಿ ಆಹ್ವಾನದಲ್ಲಿ ತಿಳಿಸಿದ್ದಾರೆ.
ಈ ಆಹ್ವಾನದಲ್ಲಿ ಜೀವದ ರಕ್ಷಕರಾದ ಸಂತ ಜೋಸೆಫ್ ಅವರ ಮಧ್ಯಸ್ಥಿಕೆಗಾಗಿ ಇಂಗ್ಲಿಷ್ ಮತ್ತು ಸ್ಪ್ಯಾನಿಷ್ ಭಾಷೆಗಳಲ್ಲಿ ಪ್ರಾರ್ಥನೆಯನ್ನು ನೀಡಲಾಗಿದೆ. ಗರ್ಭಪಾತದ ಮಾತ್ರೆಗಳಿಂದ ಉಂಟಾಗಬಹುದಾದ ಅಪಾಯಗಳ ಕುರಿತು ತಿಳಿದುಕೊಳ್ಳಲು ಹಾಗೂ ಅವುಗಳಲ್ಲಿ ತೊಡಗಿರುವ ಔಷಧಾಲಯಗಳು ಮತ್ತು ಔಷಧೀಯ ಸಂಸ್ಥೆಗಳಿಗೆ ತಮ್ಮ ಸಂದೇಶಗಳನ್ನು ಕಳುಹಿಸಲು USCCBಯ ಜೀವವನ್ನು ಗೌರವಿಸುವ ಪ್ರಾರ್ಥನೆ ಮತ್ತು ಕಾರ್ಯಾಚರಣೆ ಅಂತರ್ಜಾಲ ತಾಣಕ್ಕೆ ಭೇಟಿ ನೀಡುವಂತೆ ಕಥೋಲಿಕರಿಗೆ ಪ್ರೋತ್ಸಾಹಿಸಲಾಗಿದೆ.
ಅಮೆರಿಕ ಸಂಯುಕ್ತ ಸಂಸ್ಥಾನದ ಕಥೋಲಿಕ ಧರ್ಮಸಭೆಯು ಪ್ರತಿವರ್ಷ ಅಕ್ಟೋಬರ್ನಲ್ಲಿ ಆಚರಿಸುವ ಜೀವವನ್ನು ಗೌರವಿಸುವ ತಿಂಗಳ ಅವಧಿಯೊಂದಿಗೆ ಈ ಅಭಿಯಾನವನ್ನು ಹೊಂದಿಕೊಳ್ಳುವಂತೆ ಆರಂಭಿಸಲಾಗಿದೆ.
ಮಹಿಳೆಯರನ್ನು ಅಸುರಕ್ಷಿತ ಸ್ಥಿತಿಗೆ ತಳ್ಳುವ ವ್ಯವಸ್ಥೆ
“ಆಹಾರ ಮತ್ತು ಔಷಧ ಆಡಳಿತ ಸಂಸ್ಥೆಯು ದೂರವೈದ್ಯಕೀಯ ಸಮಾಲೋಚನೆಗಳ ಮೂಲಕ ಗರ್ಭಪಾತದ ಮಾತ್ರೆಗಳನ್ನು ಶಿಫಾರಸು ಮಾಡಲು ಹಾಗೂ ಅವುಗಳನ್ನು ಸ್ಥಳೀಯ ಔಷಧಾಲಯಗಳಲ್ಲಿಯೂ ಅಂತರ್ಜಾಲದ ಮೂಲಕವೂ ಮಾರಾಟ ಮಾಡಲು ಅವಕಾಶ ನೀಡುವ ಮೂಲಕ ದೇಶವ್ಯಾಪಿ ಅಂಚೆ ಮೂಲಕ ಗರ್ಭಪಾತದ ವ್ಯವಸ್ಥೆಗೆ ದಾರಿ ಮಾಡಿಕೊಟ್ಟಿದೆ. ಇದರಿಂದ ಗರ್ಭದಲ್ಲಿರುವ ಜೀವವನ್ನು ರಕ್ಷಿಸುವ ರಾಜ್ಯ ಕಾನೂನುಗಳನ್ನು ತಪ್ಪಿಸುವ ಪರಿಸ್ಥಿತಿ ಉಂಟಾಗಿದೆ,” ಎಂದು ಧರ್ಮಾಧ್ಯಕ್ಷರ ಆಹ್ವಾನದಲ್ಲಿ ವಿವರಿಸಲಾಗಿದೆ.
“ಇದರಿಂದ ಮಹಿಳೆಯರು ಯಾವುದೇ ವೈದ್ಯಕೀಯ ಮೇಲ್ವಿಚಾರಣೆಯಿಲ್ಲದೆ ಮನೆಯಲ್ಲಿ ಒಂಟಿಯಾಗಿ ಗರ್ಭಪಾತವನ್ನು ಅನುಭವಿಸುವ ಅಪಾಯಕ್ಕೆ ಒಳಗಾಗುತ್ತಾರೆ. ಹಿಂಸಾತ್ಮಕ ಸಂಗಾತಿಗಳು ಅಥವಾ ಮಾನವ ಕಳ್ಳಸಾಗಣೆದಾರರಿಂದ ಶೋಷಣೆಗೆ ಒಳಗಾಗುವ ಹೆಚ್ಚುವರಿ ಅವಕಾಶಗಳನ್ನೂ ಇದು ಸೃಷ್ಟಿಸುತ್ತದೆ,” ಎಂದು ಅವರು ಎಚ್ಚರಿಸಿದ್ದಾರೆ.
ಮೇ ತಿಂಗಳಲ್ಲಿ, ಅಮೆರಿಕ ಸಂಯುಕ್ತ ಸಂಸ್ಥಾನದ ಸುಪ್ರೀಂ ಕೋರ್ಟ್ ಒಂದು ಆದೇಶವನ್ನು ವಿಸ್ತರಿಸಿತು. ಇದರ ಮೂಲಕ ದೂರವೈದ್ಯಕೀಯದ ಮೂಲಕ ಗರ್ಭಪಾತದ ಮಾತ್ರೆಗಳನ್ನು ಶಿಫಾರಸು ಮಾಡುವುದಕ್ಕೂ ಅವುಗಳನ್ನು ಅಂಚೆ ಮೂಲಕ ಕಳುಹಿಸುವುದಕ್ಕೂ ತಾತ್ಕಾಲಿಕವಾಗಿ ಅವಕಾಶ ಮುಂದುವರಿಯಿತು. ಈ ವಿಷಯಕ್ಕೆ ಸಂಬಂಧಿಸಿದ ಕಾನೂನು ವಿವಾದವು ಕೆಳ ಹಂತದ ನ್ಯಾಯಾಲಯದಲ್ಲಿ ಮುಂದುವರಿಯುತ್ತಿದೆ.
ಅಮೆರಿಕ ಸಂಯುಕ್ತ ಸಂಸ್ಥಾನದ ಫೆಡರಲ್ ಸಾರ್ವಜನಿಕ ಆರೋಗ್ಯ ಸಂಸ್ಥೆಯಾದ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರಗಳ (CDC) ಮಾಹಿತಿಯ ಪ್ರಕಾರ, 2022ರಲ್ಲಿ ಅಮೆರಿಕದಲ್ಲಿ ನಡೆದ ಗರ್ಭಪಾತಗಳಲ್ಲಿ 58 ಪ್ರತಿಶತವು ಮಾತ್ರೆಗಳ ಮೂಲಕ ನಡೆದವು.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
