ಡಿಆರ್ ಕಾಂಗೋ: ಎಬೋಲಾ ಆತಂಕದ ನಡುವೆ ಹೊಸ ಶೈಕ್ಷಣಿಕ ವರ್ಷಕ್ಕೆ ಕಥೋಲಿಕ ಶಾಲೆಗಳ ಸಿದ್ಧತೆ

ಲೇಖಕರು: ಸೆವೆರಿನ್ ಮೌಸ್ಸಾವು

ವಿಶ್ವ ಆರೋಗ್ಯ ಸಂಸ್ಥೆ (WHO) ಪ್ರಕಾರ, ಪ್ರಸ್ತುತ ಎಬೋಲಾ ವೈರಸ್ ಸೋಂಕು ಹಿಂದಿನ ಯಾವುದೇ ಸೋಂಕಿಗಿಂತ   ವೇಗವಾಗಿ ಹರಡುತ್ತಿದೆ. ತಾತ್ಕಾಲಿಕ ಅಂಕಿಅಂಶಗಳ ಪ್ರಕಾರ 4,449 ದೃಢಪಟ್ಟ ಪ್ರಕರಣಗಳು ಮತ್ತು 2,061 ಸಾವುಗಳು ದಾಖಲಾಗಿವೆ. ಈ ಆರೋಗ್ಯ ಬಿಕ್ಕಟ್ಟಿನ ನಡುವೆ, ಕಾಂಗೋ ರಾಷ್ಟ್ರೀಯ ಶಿಕ್ಷಣ ಸಚಿವಾಲಯವು 2026–2027ನೇ ಶೈಕ್ಷಣಿಕ ವರ್ಷದ ವೇಳಾಪಟ್ಟಿಯನ್ನು ಅಧಿಕೃತವಾಗಿ ಪ್ರಕಟಿಸಿದೆ. ದೇಶಾದ್ಯಂತ ತರಗತಿಗಳು ಸೆಪ್ಟೆಂಬರ್ 1, ಮಂಗಳವಾರದಂದು ಪುನರಾರಂಭಗೊಳ್ಳಲಿವೆ.

ಇಟುರಿ ಪ್ರಾಂತ್ಯದ ಬುನ್ಯಾ ಧರ್ಮಕ್ಷೇತ್ರದಲ್ಲಿ, ದೇಶವು ತನ್ನ 17ನೇ ಎಬೋಲಾ ಸೋಂಕಿನ ಅಲೆಯನ್ನು ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ ಅತ್ಯಂತ ಕಠಿಣ ಪರಿಸ್ಥಿತಿಗಳಲ್ಲಿ ಸಿದ್ಧತೆಗಳು ನಡೆಯುತ್ತಿವೆ. ವ್ಯಾಟಿಕನ್ ನ್ಯೂಸ್‌ನೊಂದಿಗೆ ಮಾತನಾಡಿದ ಬುನ್ಯಾ ಧರ್ಮಕ್ಷೇತ್ರದ ಕಥೋಲಿಕ ಶಾಲೆಗಳ ಸಂಯೋಜಕರಾದ ವಂ.ಗುರು ವಿಲ್ಲಿ-ರೊಗಾತಿಯನ್ ಜರಿಂಗಾ, ವಿದ್ಯಾರ್ಥಿಗಳು ಸುರಕ್ಷಿತವಾಗಿ ಶಾಲೆಗೆ ಮರಳಲು ಕೈಗೊಳ್ಳಲಾಗುತ್ತಿರುವ ಕ್ರಮಗಳನ್ನು ವಿವರಿಸಿದರು.

ಬಲಪಡಿಸಿದ ಆರೋಗ್ಯ ಮುನ್ನೆಚ್ಚರಿಕೆ ಕ್ರಮಗಳು, ಆದರೆ ಸಂಪನ್ಮೂಲಗಳ ಕೊರತೆ

“ನಾವು ನಿರ್ವಹಿಸುತ್ತಿರುವ ಇತರ ಎಲ್ಲ ಶಾಲೆಗಳಂತೆ, ಬುನ್ಯಾ ಧರ್ಮಕ್ಷೇತ್ರದ ಕಥೋಲಿಕ ಶಾಲೆಗಳೂ ನಿಗದಿತ ದಿನಾಂಕದಂದು ತಮ್ಮ ಬಾಗಿಲುಗಳನ್ನು ತೆರೆಯಲು ಸಿದ್ಧತೆ ನಡೆಸುತ್ತಿವೆ,” ಎಂದು ವಂ.ಗುರು ಜರಿಂಗಾ ಹೇಳಿದರು. ಸಿದ್ಧತೆಗಳಲ್ಲಿ ತಡೆಗಟ್ಟುವ ಕ್ರಮಗಳನ್ನು ಬಲಪಡಿಸುವುದು, ಶಿಕ್ಷಣ ಕ್ಷೇತ್ರದಲ್ಲಿ ತೊಡಗಿರುವ ಎಲ್ಲರಲ್ಲಿಯೂ ಜಾಗೃತಿ ಮೂಡಿಸುವುದು ಮತ್ತು ಸಾಕಷ್ಟು ಕಟ್ಟುನಿಟ್ಟಾದ ಮೇಲ್ವಿಚಾರಣೆ ಖಚಿತಪಡಿಸಿಕೊಳ್ಳುವುದು ಸೇರಿವೆ.

ಪ್ರಾಯೋಗಿಕವಾಗಿ, ಎಲ್ಲಾ ಶಾಲೆಗಳಲ್ಲಿರುವ ಕೈತೊಳೆಯುವ ಕೇಂದ್ರಗಳನ್ನು ಪುನಃ ಸಕ್ರಿಯಗೊಳಿಸಿ ಅವುಗಳ ಸಂಖ್ಯೆಯನ್ನು ಹೆಚ್ಚಿಸುವುದು, ಹಾಗೂ ಪ್ರತಿಯೊಂದು ಶಾಲೆಯಲ್ಲಿಯೂ ಸಂಪರ್ಕವಿಲ್ಲದೆ ಹಣೆಯ ತಾಪಮಾನವನ್ನು ಅಳೆಯುವ ಥರ್ಮಾಮೀಟರ್‌ಗಳನ್ನು ಒದಗಿಸುವುದು ಇದರಲ್ಲಿ ಸೇರಿವೆ. ಸ್ಥಳೀಯವಾಗಿ ಇವುಗಳನ್ನು ಸಾಮಾನ್ಯವಾಗಿ “ಥರ್ಮೋಫ್ಲ್ಯಾಶ್” ಎಂದು ಕರೆಯಲಾಗುತ್ತದೆ.

ಹಿಂದಿನ ಶೈಕ್ಷಣಿಕ ವರ್ಷದ ಅಂತ್ಯದಲ್ಲಿ ಪ್ರತಿಯೊಂದು ಶಾಲೆಯಲ್ಲಿಯೂ ಸ್ಥಾಪಿಸಲಾಗಿರುವ “ಆರೋಗ್ಯ ಸಂಪರ್ಕ ಕೇಂದ್ರಗಳು”, ಆರೋಗ್ಯಕ್ಕೆ ಸಂಬಂಧಿಸಿದ ಮಾಹಿತಿಯನ್ನು ಪ್ರತಿದಿನ ವರದಿ ಮಾಡುವ ಜವಾಬ್ದಾರಿಯನ್ನು ಹೊಂದಿರುತ್ತವೆ. ಆದರೆ ಈ ವ್ಯವಸ್ಥೆಗೆ ಗಣನೀಯ ಮಿತಿಗಳಿವೆ ಎಂದು ಧರ್ಮಕ್ಷೇತ್ರದ ಸಂಯೋಜಕರು ಒಪ್ಪಿಕೊಂಡರು.

“ಈ ಕೈತೊಳೆಯುವ ವ್ಯವಸ್ಥೆಗಳಿಗೆ ಮತ್ತು ವಿಶೇಷವಾಗಿ ಥರ್ಮೋಫ್ಲ್ಯಾಶ್ ಹಣೆಯ ತಾಪಮಾನಮಾಪಕಗಳಿಗೆ ಅಗತ್ಯವಿರುವ ಹಣಕಾಸು ಸಂಪನ್ಮೂಲಗಳು ತೀವ್ರವಾಗಿ ಸಾಕಾಗುತ್ತಿಲ್ಲ,” ಎಂದು ಅವರು ವಿಷಾದಿಸಿದರು. ಕೆಲವು ಶಾಲೆಗಳು ಈಗಾಗಲೇ ಸಾಧನಗಳನ್ನು ಹೊಂದಿವೆ. ವಿಶೇಷವಾಗಿ ಮಾನವೀಯ ನೆರವು ನೀಡುವ ಸಹಭಾಗಿಗಳ ದೇಣಿಗೆಗಳ ಮೂಲಕ ಅವುಗಳನ್ನು ಪಡೆದುಕೊಳ್ಳಲಾಗಿದೆ. ಆದರೆ “ಲಭ್ಯವಿರುವ ಸಾಮಗ್ರಿಗಳು ಶಾಲೆಗಳ ನಿಜವಾದ ಅಗತ್ಯಗಳಿಗೆ, ವಿಶೇಷವಾಗಿ ಗ್ರಾಮೀಣ ಪ್ರದೇಶಗಳಲ್ಲಿರುವ ಶಾಲೆಗಳ ಅಗತ್ಯಗಳಿಗೆ, ಬಹಳ ಕಡಿಮೆಯಾಗಿವೆ.”

ಧರ್ಮಕೇಂದ್ರಗಳ ಕುಟುಂಬಗಳಿಗೆ ಧೈರ್ಯ ತುಂಬುವ ಕಾರ್ಯ

ಆರೋಗ್ಯ ಮುನ್ನೆಚ್ಚರಿಕೆ ಕ್ರಮಗಳ ಜೊತೆಗೆ, ಪೋಷಕರ ವಿಶ್ವಾಸವನ್ನು ಗಳಿಸುವುದೂ ಮತ್ತೊಂದು ಪ್ರಮುಖ ಸವಾಲಾಗಿದೆ. “ಎಬೋಲಾ ವೈರಸ್ ಸೋಂಕಿನಿಂದ ತಮ್ಮ ಮಕ್ಕಳನ್ನು ರಕ್ಷಿಸಲು ಶಾಲೆಗಳಲ್ಲಿ ನಾವು ಕೈಗೊಳ್ಳುತ್ತಿರುವ ಕ್ರಮಗಳ ಕುರಿತು ಸ್ಪಷ್ಟ ಮಾಹಿತಿಯನ್ನು ನೀಡುವ ಮೂಲಕ ಪೋಷಕರಿಗೆ ಧೈರ್ಯ ತುಂಬಲು ನಾವು ಈಗಾಗಲೇ ಕಾರ್ಯನಿರ್ವಹಿಸುತ್ತಿದ್ದೇವೆ,” ಎಂದು ವಂ.ಗುರು ಜರಿಂಗಾ ವಿವರಿಸಿದರು. ಈ ಜಾಗೃತಿ ಕಾರ್ಯದಲ್ಲಿ ಕಥೋಲಿಕ ಶಾಲಾ ವಿದ್ಯಾರ್ಥಿಗಳ ಪೋಷಕರ ಸಂಘ (APEC) ಪ್ರಮುಖ ಪಾತ್ರ ವಹಿಸುತ್ತಿದೆ. ವಿವಿಧ ಶಾಲಾ ಪೋಷಕರ ಸಮಿತಿಗಳ ಮೂಲಕ ಈ ಸಂದೇಶಗಳನ್ನು ತಲುಪಿಸಲಾಗುತ್ತಿದೆ. ಶಾಲೆಗಳು ಇರುವ ಧರ್ಮಕೇಂದ್ರಗಳು, ಧರ್ಮಕ್ಷೇತ್ರದ ರೇಡಿಯೋ ಕೇಂದ್ರ ಮತ್ತು ಇತರ ಸ್ಥಳೀಯ ಮಾಧ್ಯಮಗಳೂ ಕುಟುಂಬಗಳಿಗೆ ಮಾಹಿತಿ ನೀಡಲು ಸಹಕರಿಸುತ್ತಿವೆ.

ಸೋಂಕಿನಿಂದ ಮತ್ತಷ್ಟು ಗಂಭೀರವಾಗಿರುವ ನಿರಂತರ ಅಸುರಕ್ಷತೆ

ಆರೋಗ್ಯ ಬಿಕ್ಕಟ್ಟು ಬಹಳ ಹಿಂದಿನಿಂದಲೂ ಇರುವ ಮತ್ತೊಂದು ಗಂಭೀರ ಸಮಸ್ಯೆಯ ಮೇಲೆ ಹೆಚ್ಚುವರಿ ಭಾರವನ್ನು ಉಂಟುಮಾಡಿದೆ. “ನಾವು ಅನುಭವಿಸಿರುವ ನಿರಂತರ ಹಿಂಸಾಚಾರದ ಅಲೆಗಳಿಂದ ಉಂಟಾದ ಅಸುರಕ್ಷತೆಯು ಈಗಾಗಲೇ ಸುಮಾರು ಎಂಟು ವರ್ಷಗಳಿಂದ ಶಾಲೆಗಳ ಕಾರ್ಯವನ್ನು ಅಸ್ತವ್ಯಸ್ತಗೊಳಿಸುತ್ತಿದೆ,” ಎಂದು ವಂ.ಗುರು ಜರಿಂಗಾ ನೆನಪಿಸಿಕೊಂಡರು. ಈ ಬಿಕ್ಕಟ್ಟು ಸುಮಾರು 2018ರಿಂದ ಆರಂಭವಾಗಿದೆ ಎಂದು ಅವರು ಹೇಳಿದರು.

ಪ್ರತಿ ವರ್ಷ ಧರ್ಮಕ್ಷೇತ್ರದ ಕಥೋಲಿಕ ಶಾಲೆಗಳ ಸಮನ್ವಯ ಕಚೇರಿ ಹಿಂಸಾಚಾರದಿಂದ ಸ್ಥಳಾಂತರಗೊಂಡ ಮಕ್ಕಳನ್ನು ಶಿಕ್ಷಣ ವ್ಯವಸ್ಥೆಯಲ್ಲಿ ಸೇರಿಸಿಕೊಳ್ಳಲು ಪ್ರಯತ್ನಿಸುತ್ತದೆ. ಈ ಕಾರ್ಯವನ್ನು ಅವರು “ಅತ್ಯಂತ ಕಷ್ಟಕರ” ಎಂದು ವಿವರಿಸಿದರು. “ಈ ಮಕ್ಕಳಲ್ಲಿ ಗಮನಾರ್ಹ ಸಂಖ್ಯೆಯನ್ನು ನಮ್ಮ ಶಾಲಾ ವ್ಯವಸ್ಥೆಯಲ್ಲಿ ಸೇರಿಸಿಕೊಳ್ಳಲು ನಾವು ಯಶಸ್ವಿಯಾದಾಗಲೆಲ್ಲ, ಮತ್ತೆ ಉಂಟಾಗುವ ಹಿಂಸಾಚಾರವು ವಿದ್ಯಾರ್ಥಿಗಳನ್ನು ಮತ್ತೊಮ್ಮೆ ಓಡಿಹೋಗುವಂತೆ ಮಾಡುತ್ತದೆ,” ಎಂದು ಅವರು ವಿವರಿಸಿದರು.

ನಿರಂತರ ಅಸುರಕ್ಷತೆ ಮತ್ತು ಎಬೋಲಾ ಸೋಂಕಿನ ಎರಡೂ ಸವಾಲುಗಳ ನಡುವೆಯೂ, ಸ್ಥಳಾಂತರಗೊಂಡ ವಿದ್ಯಾರ್ಥಿಗಳನ್ನು ಸ್ವಾಗತಿಸುವುದನ್ನು ಮುಂದುವರಿಸುವ ದೃಢನಿಶ್ಚಯವನ್ನು ವಂ.ಗುರು ಜರಿಂಗಾ ವ್ಯಕ್ತಪಡಿಸಿದರು. “ಪ್ರಸ್ತುತ ಅಗತ್ಯವಿರುವ ಆರೋಗ್ಯ ಕ್ರಮಗಳನ್ನು ಪಾಲಿಸುತ್ತಾ, ವಿದ್ಯಾರ್ಥಿಗಳನ್ನು ಸ್ವೀಕರಿಸುವ ಸಾಮರ್ಥ್ಯವಿರುವ ಶಾಲೆಗಳಲ್ಲಿ ಅವರನ್ನು ದಾಖಲಿಸುವುದನ್ನು ನಾವು ಮುಂದುವರಿಸುತ್ತೇವೆ,” ಎಂದು ಹೇಳಿದರು. ಸ್ಥಳಾಂತರಗೊಂಡ ಶಾಲೆಗಳ ಕಾರ್ಯವನ್ನೂ ಮುಂದುವರಿಸಿ, ವಿದ್ಯಾರ್ಥಿಗಳನ್ನು ಸ್ವೀಕರಿಸಲು ಸಾಧ್ಯವಿರುವ ಶಾಲಾ ಕಟ್ಟಡಗಳನ್ನು ಬಳಸಿಕೊಳ್ಳುವ ಮೂಲಕ ತರಗತಿಗಳನ್ನು ಶೀಘ್ರವಾಗಿ ಪುನರಾರಂಭಿಸುವ ಉದ್ದೇಶವೂ ಧರ್ಮಕ್ಷೇತ್ರಕ್ಕಿದೆ.

ಒಂದು ವರ್ಷಕ್ಕೂ ಹೆಚ್ಚು ಕಾಲದಿಂದ ಶಿಕ್ಷಕರ ತರಬೇತಿ

ಸೋಂಕು ತಡೆಗಟ್ಟುವ ಕುರಿತು ಶಿಕ್ಷಕರು ಮತ್ತು ಇತರ ಶಿಕ್ಷಣ ಸಿಬ್ಬಂದಿಗೆ ನೀಡಲಾಗುತ್ತಿರುವ ತರಬೇತಿ “ಈಗಷ್ಟೇ ಆರಂಭವಾಗುತ್ತಿಲ್ಲ” ಎಂದು ಧರ್ಮಕ್ಷೇತ್ರದ ಸಂಯೋಜಕರು ವಿವರಿಸಿದರು. ಹಿಂದಿನ ವರ್ಷದ ಮೇ ಮತ್ತು ಜೂನ್ ತಿಂಗಳಲ್ಲಿಯೇ ತರಬೇತಿ ಆರಂಭವಾಗಿತ್ತು. ಆಗ ಸೋಂಕಿನ ಮೊದಲ ಲಕ್ಷಣಗಳು ಗೋಚರಿಸಲು ಆರಂಭಿಸಿದ್ದವು. ಶಾಲಾ ರಜಾದಿನಗಳಲ್ಲಿಯೂ ತರಬೇತಿ ಮುಂದುವರಿದಿದೆ.

ಸಂಪರ್ಕವಿಲ್ಲದ ಮತ್ತು ಸಾಮಾನ್ಯ ತಾಪಮಾನಮಾಪಕಗಳಂತಹ ಪ್ರಾಯೋಗಿಕ ಸಾಧನಗಳನ್ನು ಬಳಸುವ ಕುರಿತು ತರಬೇತಿ ನೀಡುವುದರ ಜೊತೆಗೆ, ಪೋಸ್ಟರ್‌ಗಳು, ರೇಡಿಯೋ ಕಾರ್ಯಕ್ರಮಗಳು ಮತ್ತು ಸಾರ್ವಜನಿಕ ಸೇವಾ ಪ್ರಕಟಣೆಗಳ ಮೂಲಕ ಮಾಹಿತಿಯನ್ನು ಪ್ರಸಾರ ಮಾಡಲಾಗುತ್ತಿದೆ. ಈ ಕಾರ್ಯಕ್ಕಾಗಿ ಧರ್ಮಕ್ಷೇತ್ರವು ಧರ್ಮಕ್ಷೇತ್ರೀಯ ಕಾರಿತಾಸ್, ವಿಶೇಷವಾಗಿ ಅದರ ವೈದ್ಯಕೀಯ ಸೇವಾ ಕಚೇರಿ ಮತ್ತು ಅದರ ಸಹಭಾಗಿಗಳ ನೆರವನ್ನು ಪಡೆಯುತ್ತಿದೆ.

ಲಸಿಕೆ ಪ್ರಯೋಗಗಳ ಕುರಿತು ನಿರೀಕ್ಷೆ

ಬುಂಡಿಬುಗ್ಯೊ ತಳಿಯ ವಿರುದ್ಧ ಪ್ರಸ್ತುತ ನಡೆಯುತ್ತಿರುವ ವೈದ್ಯಕೀಯ ಲಸಿಕೆ ಪ್ರಯೋಗಗಳ ಕುರಿತು ಕೇಳಿದಾಗ, ವಂ.ಗುರು ಜರಿಂಗಾ ಸ್ಪಷ್ಟವಾಗಿ ಪ್ರತಿಕ್ರಿಯಿಸಿದರು. “ಈ ಲಸಿಕೆ ಅಭಿಯಾನಗಳು ಈಗಾಗಲೇ ಈ ಸೋಂಕಿನಿಂದ ತೀವ್ರವಾಗಿ ಬಾಧಿತವಾಗಿರುವ ಇಟುರಿ ಪ್ರಾಂತ್ಯದ ಸಂಪೂರ್ಣ ಜನಸಂಖ್ಯೆಯಲ್ಲಿ ನಿಜಕ್ಕೂ ದೊಡ್ಡ ನಿರೀಕ್ಷೆಯನ್ನು ಮೂಡಿಸುತ್ತಿವೆ,” ಎಂದು ಅವರು ಹೇಳಿದರು. ಸಾಮಾನ್ಯ ಜನರಂತೆ, ಶಾಲಾ ಸಮುದಾಯವೂ “ಈ ಲಸಿಕೆ ಅಭಿಯಾನಗಳ ಫಲಿತಾಂಶಗಳು ಅನೇಕ ಜೀವಗಳನ್ನು ಬಲಿತೆಗೆದುಕೊಂಡಿರುವ ಈ ಸೋಂಕಿನ ಹರಡುವಿಕೆಯನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಸಾಧ್ಯವಾಗಲಿ” ಎಂದು ಆಶಿಸುತ್ತಿದೆ.

ಅಂತರರಾಷ್ಟ್ರೀಯ ಸಮುದಾಯಕ್ಕೆ ತುರ್ತು ಮನವಿ

ಕಾಂಗೋ ಸರ್ಕಾರವು ಮೇ 15ರಂದು ದೇಶದ 17ನೇ ಎಬೋಲಾ ಸೋಂಕಿನ ಅಲೆಯನ್ನು ಅಧಿಕೃತವಾಗಿ ಘೋಷಿಸಿದ ಬಳಿಕದ ಬಿಕ್ಕಟ್ಟಿನ ಬೆಳವಣಿಗೆಗಳನ್ನು ಧರ್ಮಕ್ಷೇತ್ರದ ಸಂಯೋಜಕರು ನೆನಪಿಸಿಕೊಂಡರು. ಎರಡು ದಿನಗಳ ನಂತರ ವಿಶ್ವ ಆರೋಗ್ಯ ಸಂಸ್ಥೆಯು ಇದನ್ನು ಅಂತರರಾಷ್ಟ್ರೀಯ ಕಾಳಜಿಯ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ ಎಂದು ಘೋಷಿಸಿತು. “ಆ ಘೋಷಣೆಯಾಗಿ ಎರಡು ತಿಂಗಳಿಗಿಂತ ಹೆಚ್ಚು ಸಮಯ ಕಳೆದ ನಂತರ, ನಾವು ಸಾಕಷ್ಟು ಚಟುವಟಿಕೆಗಳನ್ನು ನೋಡುತ್ತಿದ್ದೇವೆ,” ಎಂದು ಅವರು ಹೇಳಿದರು. ಕಾಂಗೋ ಅಧಿಕಾರಿಗಳು ಮತ್ತು ಅಂತರರಾಷ್ಟ್ರೀಯ ಮಾನವೀಯ ನೆರವು ಸಹಭಾಗಿಗಳು ನಡೆಸುತ್ತಿರುವ ವ್ಯಾಪಕ ಪ್ರಯತ್ನಗಳನ್ನು ಅವರು ಉಲ್ಲೇಖಿಸಿದರು. ಆದರೆ “ನೆಲಮಟ್ಟದಲ್ಲಿ ಸ್ಪಷ್ಟವಾದ ಫಲಿತಾಂಶಗಳನ್ನು ಸಾಧಿಸಲು ಈ ವಿವಿಧ ಉಪಕ್ರಮಗಳ ಪರಿಣಾಮಕಾರಿ ಸಮನ್ವಯ ಅಥವಾ, ನಾನು ಹೇಳುವುದಾದರೆ, ಕೇಂದ್ರೀಕರಣ ಇನ್ನೂ ಕೊರತೆಯಾಗಿದೆ,” ಎಂದು ಅವರು ಹೇಳಿದರು.

ಕಾಂಗೋ ಆರೋಗ್ಯ ಸಚಿವರು ಕನಿಷ್ಠ ಮೂರು ಬಾರಿ ಬುನ್ಯಾಗೆ ಭೇಟಿ ನೀಡಿದ್ದಾರೆ ಎಂದು ಅವರು ನೆನಪಿಸಿದರು. ಪ್ರಧಾನಮಂತ್ರಿಯವರೂ ಸೇರಿದಂತೆ ಸರ್ಕಾರದ ಇತರ ಸದಸ್ಯರೂ ಅಲ್ಲಿಗೆ ಭೇಟಿ ನೀಡಿದ್ದಾರೆ. “ಪ್ರತಿ ಸಂದರ್ಭದಲ್ಲಿಯೂ, ಸೋಂಕಿನ ವಿರುದ್ಧ ಪ್ರತಿಕ್ರಿಯಿಸಲು ಕೋಟ್ಯಂತರ ಡಾಲರ್‌ಗಳನ್ನು ಒಗ್ಗೂಡಿಸಲಾಗಿದೆ ಎಂದು ಅವರು ತಮ್ಮ ಭಾಷಣಗಳಲ್ಲಿ ಘೋಷಿಸಿದರು,” ಎಂದು ವಂ.ಗುರು ಜರಿಂಗಾ ಹೇಳಿದರು. “ಆದರೆ ಪ್ರಾಯೋಗಿಕವಾಗಿ, ಹೆಚ್ಚಿನ ಪ್ರಗತಿ ಕಂಡುಬರುತ್ತಿಲ್ಲ ಮತ್ತು ಜನರು ಇನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ಸಾವನ್ನಪ್ಪುತ್ತಿದ್ದಾರೆ.”

“ಈ ಸೋಂಕನ್ನು ನಿರ್ವಹಿಸಲು ಮತ್ತು ಪರಿಣಾಮಕಾರಿಯಾಗಿ ಅಂತ್ಯಗೊಳಿಸಲು ಪ್ರಯತ್ನಗಳನ್ನು ಮತ್ತಷ್ಟು ಬಲಪಡಿಸಬೇಕು,  ಇದು ಬುನ್ಯಾದ ಯುವಜನರ 2026–2027ನೇ ಶೈಕ್ಷಣಿಕ ವರ್ಷವನ್ನು ಉಳಿಸಲು ಸಹಾಯ ಮಾಡುತ್ತದೆ ಎಂದು ನಾನು ನಂಬುತ್ತೇನೆ" ಎಂದು ವಿಶ್ವ ಆರೋಗ್ಯ ಸಂಸ್ಥೆ, ಕಾಂಗೋ ಸರ್ಕಾರ ಮತ್ತು UNICEF ಸೇರಿದಂತೆ ಅಂತರರಾಷ್ಟ್ರೀಯ ಮಾನವೀಯ ನೆರವು ಸಹಭಾಗಿಗಳಿಗೂ ವಂ.ಗುರು ಜರಿಂಗಾ ಮನವಿ ಮಾಡಿದರು.

ಆಗಸ್ಟ್ 12, ಬುಧವಾರದಂದು, ವಿಶ್ವ ಆರೋಗ್ಯ ಸಂಸ್ಥೆಯ ತುರ್ತು ಎಚ್ಚರಿಕೆ ಮತ್ತು ಪ್ರತಿಕ್ರಿಯಾ ಕಾರ್ಯಕ್ರಮದ ನಿರ್ದೇಶಕರು ಮೂರು ತಿಂಗಳೊಳಗೆ ವೈರಸ್‌ನ ಹರಡುವಿಕೆಯನ್ನು ಹಿಮ್ಮೆಟ್ಟಿಸಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ತಿಳಿಸಿದ್ದಾರೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).