ಪೆರುವಿನಲ್ಲಿ ಪೂಜ್ಯ ಜಗದ್ಗುರು 14ನೇ ಲಿಯೋ ಅವರನ್ನು ಸ್ವಾಗತಿಸಲು ಯುವ ಸ್ವಯಂಸೇವಕರ ಸಿದ್ಧತೆ
ವ್ಯಾಟಿಕನ್ ವರದಿ
ಪೆರು ಧರ್ಮಾಧ್ಯಕ್ಷರ 130ನೇ ಸಾಧಾರಣ ಪೂರ್ಣಸಭೆಯು ದೇಶಕ್ಕೆ ಪೂಜ್ಯ ಜಗದ್ಗುರು 14ನೇ ಲಿಯೋ ಅವರ ಭೇಟಿಗೆ ನೆರವು ನೀಡಲಿರುವ ಅಧಿಕೃತ ಸ್ವಯಂಸೇವಕ ಗುಂಪಾದ “ಲಿಯೋ ಅವರ ಸ್ನೇಹಿತರು” ಎಂಬ ಉಪಕ್ರಮದ ಆರಂಭದೊಂದಿಗೆ ಮುಕ್ತಾಯಗೊಂಡಿತು. ನವೆಂಬರ್ 11ರಿಂದ 17, 2026ರವರೆಗೆ ನಡೆಯಲಿರುವ ಪೂಜ್ಯ ಜಗದ್ಗುರು ಅವರ ಭೇಟಿಯ ಸಂದರ್ಭದಲ್ಲಿ ಯಾತ್ರಿಕರನ್ನು ಸ್ವಾಗತಿಸಲು ಮತ್ತು ಅವರಿಗೆ ನೆರವು ನೀಡಲು ಯುವಜನರು ಹಾಗೂ ಸಾಮಾನ್ಯ ವಿಶ್ವಾಸಿಗಳು ಈ ಉಪಕ್ರಮದ ಮೂಲಕ ಒಟ್ಟುಗೂಡಲಿದ್ದಾರೆ.
ಪೆರು ಧರ್ಮಾಧ್ಯಕ್ಷರ ಸಮ್ಮೇಳನದ ಪೂರ್ಣಸಭೆಯಲ್ಲಿ ಪೂಜ್ಯ ಜಗದ್ಗುರು ಅವರ ಭೇಟಿಯ ಸಿದ್ಧತೆಯಲ್ಲಿ ತೊಡಗಿರುವ ಧರ್ಮಸಭೆ ಮತ್ತು ವಿವಿಧ ಸಂಸ್ಥೆಗಳ ಪ್ರತಿನಿಧಿಗಳು ಭಾಗವಹಿಸಿದ್ದರು. ಸಭೆಯ ಸಂದರ್ಭದಲ್ಲಿ ಧರ್ಮಾಧ್ಯಕ್ಷರು ಪೂಜ್ಯ ಜಗದ್ಗುರು ಅವರ ಮುಂಬರುವ ಭೇಟಿಯ ಕುರಿತು ತಮ್ಮ ಸಂತೋಷವನ್ನು ವ್ಯಕ್ತಪಡಿಸಿದರು. ವಿಶೇಷವಾಗಿ ಪೆರುವಿನೊಂದಿಗೆ ಅವರಿಗಿರುವ ನಂಟನ್ನು ಮತ್ತು ಅವರು ಚಿಕ್ಲಾಯೊದಲ್ಲಿ ಧರ್ಮಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ ವರ್ಷಗಳನ್ನು ಸ್ಮರಿಸಿದರು.
ಸೇವೆಗಾಗಿ ಕರೆ
“ಲಿಯೋ ಅವರ ಸ್ನೇಹಿತರು” ಎಂಬ ಉಪಕ್ರಮವು 18ರಿಂದ 45 ವರ್ಷದೊಳಗಿನ, ತಮ್ಮ ಕೌಶಲ್ಯ ಮತ್ತು ಪ್ರತಿಭೆಗಳನ್ನು ಈ ಮಹತ್ವದ ಕಾರ್ಯಕ್ರಮದ ಸೇವೆಗೆ ಸಮರ್ಪಿಸಲು ಬಯಸುವ ಎಲ್ಲರಿಗೂ ಮುಕ್ತವಾಗಿದೆ. ಸ್ವಯಂಸೇವಕರು ಸ್ವಾಗತ ಮತ್ತು ಆತಿಥ್ಯ, ಸಂವಹನ, ವ್ಯವಸ್ಥಾಪನೆ, ಸಂಘಟನೆ ಮತ್ತು ಭದ್ರತೆ, ಪ್ರಥಮ ಚಿಕಿತ್ಸೆ, ಅನುವಾದ ಮತ್ತು ಭಾಷಾಂತರ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಲಿದ್ದಾರೆ.
“ಸೇವೆ, ಕಾಳಜಿ ವಹಿಸಿ ಮತ್ತು ಜೊತೆಗಾರಿಕೆ” ಎಂಬ ಧ್ಯೇಯವಾಕ್ಯದೊಂದಿಗೆ ಆರಂಭವಾಗಿರುವ ಈ ಉಪಕ್ರಮವು, ಪೂಜ್ಯ ಜಗದ್ಗುರು ಅವರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವವರಿಗೆ ಸ್ವಯಂಸೇವಕರು ಆತ್ಮೀಯ ಹಾಗೂ ಸುಲಭವಾಗಿ ಸಂಪರ್ಕಿಸಬಹುದಾದ ಉಪಸ್ಥಿತಿಯಾಗುವಂತೆ ಮಾಡುವ ಉದ್ದೇಶ ಹೊಂದಿದೆ. “ಲಿಯೋ ಅವರ ಸ್ನೇಹಿತರು” ಗುಂಪಿನ ಸದಸ್ಯರಿಗೆ ಆಧ್ಯಾತ್ಮಿಕ, ಧರ್ಮಪಾಲನಾ ಮತ್ತು ಕಾರ್ಯಾಚರಣಾ ತರಬೇತಿ ನೀಡಲಾಗುತ್ತದೆ. ಅವರು ನಡವಳಿಕೆಯ ನಿಯಮಾವಳಿಯನ್ನು ಪಾಲಿಸುವುದರ ಜೊತೆಗೆ, ರಕ್ಷಣಾ ಕ್ರಮಗಳು ಮತ್ತು ಸುರಕ್ಷಿತ ಪರಿಸರಕ್ಕೆ ಸಂಬಂಧಿಸಿದ ಮಾರ್ಗಸೂಚಿಗಳನ್ನೂ ಅನುಸರಿಸಬೇಕಾಗುತ್ತದೆ.
ಸ್ವಯಂಸೇವಕರ ಸೇವೆ ಕೇವಲ ಸಂಘಟನಾ ಜವಾಬ್ದಾರಿಯನ್ನು ನಿರ್ವಹಿಸುವುದಕ್ಕೆ ಸೀಮಿತವಾಗಿರುವುದಿಲ್ಲ. ಆತ್ಮೀಯತೆ ಮತ್ತು ಭ್ರಾತೃತ್ವದ ಮನೋಭಾವದಿಂದ ಯಾತ್ರಿಕರಿಗೆ ಮಾರ್ಗದರ್ಶನ ನೀಡುವುದು, ಅವರ ಮಾತುಗಳನ್ನು ಆಲಿಸುವುದು ಮತ್ತು ಅವರೊಂದಿಗೆ ಜೊತೆಯಾಗಿ ನಡೆಯುವುದೂ ಅವರ ಕರ್ತವ್ಯವಾಗಿರುತ್ತದೆ.
ನೋಂದಣಿ ಮತ್ತು ಭೇಟಿಯ ಸಿದ್ಧತೆ
ಉಪಕ್ರಮದ ಉದ್ಘಾಟನೆಯ ಸಂದರ್ಭದಲ್ಲಿ ಪೂಜ್ಯ ಜಗದ್ಗುರು ಅವರ ಭೇಟಿಗಾಗಿ ಅಧಿಕೃತ ಜಾಲತಾಣವನ್ನೂ ಪರಿಚಯಿಸಲಾಯಿತು. ಸ್ವಯಂಸೇವಕರ ನೋಂದಣಿ ಈಗಾಗಲೇ ಆರಂಭವಾಗಿದೆ. ನಂತರ ಭಾಗವಹಿಸುವವರಿಗೆ ತರಬೇತಿ ಅವಧಿಗಳು, ಗುರುತಿನ ಚೀಟಿಗಳು ಮತ್ತು ಅವರಿಗೆ ವಹಿಸಲಾಗುವ ಜವಾಬ್ದಾರಿಗಳ ಕುರಿತು ಮಾಹಿತಿ ನೀಡಲಾಗುತ್ತದೆ. ಮುಂಬರುವ ತಿಂಗಳುಗಳಲ್ಲಿ ಸಿದ್ಧತೆಗಳು ಮುಂದುವರಿಯಲಿದ್ದು, ಭೇಟಿಯ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ಇನ್ನಷ್ಟು ಉಪಕ್ರಮಗಳು ಮತ್ತು ಮಾಹಿತಿಯನ್ನು ಪ್ರಕಟಿಸಲಾಗುವುದು ಎಂದು ಆಯೋಜಕರು ತಿಳಿಸಿದ್ದಾರೆ.
ಆಧ್ಯಾತ್ಮಿಕ ಸಿದ್ಧತೆಯ ಭಾಗವಾಗಿ, ಪೂಜ್ಯ ಜಗದ್ಗುರು 14ನೇ ಲಿಯೋ ಅವರ ಭೇಟಿಗಾಗಿ ಅಧಿಕೃತ ಪ್ರಾರ್ಥನೆಯನ್ನೂ ಪರಿಚಯಿಸಲಾಯಿತು. ದೇಶದಾದ್ಯಂತ ಇರುವ ವಿವಿಧ ಸಮುದಾಯಗಳನ್ನು ತಲುಪುವ ಉದ್ದೇಶದಿಂದ ಈ ಪ್ರಾರ್ಥನೆಯನ್ನು ಕ್ವೆಚುವಾ, ಐಮಾರಾ ಮತ್ತು ಅವಾಜೂನ್ ಭಾಷೆಗಳಿಗೆ ಅನುವಾದಿಸಲಾಗುವುದು.
ಭೇಟಿಯ ಅಧಿಕೃತ ಗೀತೆ “ “Leo, Brother on the Journey” ಕೂಡ ಮೊದಲ ಬಾರಿಗೆ ಹಾಡಲಾಯಿತು. ಪೆರು ಧರ್ಮಾಧ್ಯಕ್ಷರ ಸಮ್ಮೇಳನ ಮತ್ತು ಲಿಮಾ ಧರ್ಮಕ್ಷೇತ್ರ ಜಂಟಿಯಾಗಿ ಆಯೋಜಿಸಿದ್ದ ಸ್ಪರ್ಧೆಯ ಮೂಲಕ ಈ ಗೀತೆಯನ್ನು ಆಯ್ಕೆ ಮಾಡಲಾಗಿತ್ತು.
ಭರವಸೆಯಿಂದ ಗುರುತಿಸಲ್ಪಟ್ಟ ಭೇಟಿ
ಪೆರುವಿನ ಧರ್ಮಸಭೆಯು ಪೂಜ್ಯ ಜಗದ್ಗುರು 14ನೇ ಲಿಯೋ ಅವರ ಆಗಮನವನ್ನು ನಂಬಿಕೆಯನ್ನು ಬಲಪಡಿಸುವ ಮತ್ತು ಏಕತೆ, ಶಾಂತಿ, ಭರವಸೆ ಹಾಗೂ ಒಗ್ಗಟ್ಟಿನಂತಹ ಮೌಲ್ಯಗಳನ್ನು ಉತ್ತೇಜಿಸುವ ಒಂದು ಅವಕಾಶವಾಗಿ ನೋಡುತ್ತಿದೆ. “ಲಿಯೋ ಅವರ ಸ್ನೇಹಿತರು” ಎಂಬ ಗುಂಪಿನ ರಚನೆಯ ಮೂಲಕ ಯುವಕರು ಮತ್ತು ಸಾಮಾನ್ಯ ವಿಶ್ವಾಸಿಗಳು ಈ ಮಹತ್ವದ ಕಾರ್ಯಕ್ರಮದ ಸಿದ್ಧತೆ ಹಾಗೂ ಅನುಷ್ಠಾನದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವ ಅವಕಾಶವನ್ನು ಪಡೆಯಲಿದ್ದಾರೆ. ಅವರ ಸೇವೆಯು ಪೂಜ್ಯ ಜಗದ್ಗುರು ಅವರನ್ನು ಸ್ವಾಗತಿಸಲು ಪೆರು ದೇಶ ಹೊಂದಿರುವ ಬದ್ಧತೆಯ ಒಂದು ಸ್ಪಷ್ಟ ಮತ್ತು ಜೀವಂತ ಅಭಿವ್ಯಕ್ತಿಯಾಗಬೇಕು ಎಂಬುದೇ ಈ ಉಪಕ್ರಮದ ಉದ್ದೇಶ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
