ಮಯನ್ಮಾರ್ನ ಪ್ರಧಾನ ಗುರು ಬೋ: ‘ಈ ಬಿರುಗಾಳಿಯಲ್ಲಿ ನಾವು ಒಂಟಿಯಲ್ಲ’
ಲೇಖಕರು: ದೆಬೋರ ಕ್ಯಾಸ್ತೆಲ್ಲಾನೋ ಲುಬೋವ್
“ಕೆಲವೊಮ್ಮೆ ನಾವು ಹೀಗೆ ಪ್ರಾರ್ಥಿಸುತ್ತೇವೆ: ‘ಪ್ರಭುವೇ, ಈ ಬಿರುಗಾಳಿಯನ್ನು ದೂರಮಾಡು.’ ಆದರೆ ಯೇಸು ಮೊದಲು ಹೀಗೆ ಹೇಳಬಹುದು: ‘ನನ್ನ ಮಗುವೇ, ಈ ಬಿರುಗಾಳಿಯಲ್ಲಿಯೂ ನಾನು ನಿನ್ನೊಂದಿಗಿದ್ದೇನೆ.’ ಈ ಎರಡರ ನಡುವೆ ಮಹತ್ವದ ವ್ಯತ್ಯಾಸವಿದೆ. ವಿಶ್ವಾಸ ಎಂದರೆ ನಮ್ಮ ಜೀವನದಲ್ಲಿ ಯಾವುದೇ ಬಿರುಗಾಳಿಗಳು ಇರುವುದಿಲ್ಲ ಎಂದಲ್ಲ. ವಿಶ್ವಾಸ ಎಂದರೆ, ನಾವು ಬಿರುಗಾಳಿಗಳನ್ನು ಒಂಟಿಯಾಗಿ ಎದುರಿಸುವುದಿಲ್ಲ ಎಂಬುದು.”
ಸಾಧಾರಣ ಕಾಲದ 19ನೇ ಭಾನುವಾರದ ಪವಿತ್ರ ಬಲಿಪೂಜೆಯ ತಮ್ಮ ಉಪದೇಶದಲ್ಲಿ, ಮಯನ್ಮಾರ್ನ ಯಾಂಗೋನ್ನ ಪ್ರಧಾನ ಗುರು ಚಾರ್ಲ್ಸ್ ಮೌಂಗ್ ಬೋ ಅವರು ಸಂತ ಮತ್ತಾಯರ ಶುಭಸಂದೇಶದಲ್ಲಿ ಬಿರುಗಾಳಿಯ ನಡುವೆ ಭಯಗೊಂಡಿದ್ದ ಶಿಷ್ಯರಂತೆ, ವಿಶ್ವಾಸಿಗಳು ತಮ್ಮ ಭಯವನ್ನು ತೊರೆದು ಧೈರ್ಯವನ್ನು ಹೊಂದಬೇಕು; ಏಕೆಂದರೆ ಪ್ರಭು ತಮ್ಮ ಪಕ್ಕದಲ್ಲಿದ್ದಾರೆ ಎಂದು ನೆನಪಿಸಿದರು.
ಮಯನ್ಮಾರ್ ಜನರು ಅಪಾರ ಸಂಕಷ್ಟವನ್ನು ಅನುಭವಿಸಿದ್ದಾರೆ, ಆದರೆ ಪ್ರತಿದಿನ ಇತರರು ಮಾಡುವ ಪ್ರೀತಿಯ ಕಾರ್ಯಗಳ ಮೂಲಕ ದೇವರ ಸಾನ್ನಿಧ್ಯವನ್ನು ಕಾಣುವಂತೆ ಅವರು ವಿಶ್ವಾಸಿಗಳಿಗೆ ಕರೆ ನೀಡಿದರು.
ಮಯನ್ಮಾರ್ ಅನೇಕ ಬಿರುಗಾಳಿಗಳನ್ನು ಕಂಡಿದೆ
ಇಂದಿನ ದೇಶದ ಪರಿಸ್ಥಿತಿಗೆ ಅಂದಿನ ವಾಚನಗಳು ಅತ್ಯಂತ ಆಳವಾಗಿ ಸಂಬಂಧಿಸುತ್ತವೆ ಎಂದು ಪ್ರಧಾನ ಗುರು ಬೋ ಹೇಳಿದರು. ಏಕೆಂದರೆ, “ಮಯನ್ಮಾರ್ ಅನೇಕ ಬಿರುಗಾಳಿಗಳನ್ನು ಕಂಡಿದೆ.” ವಿಶೇಷವಾಗಿ, ಸಂಘರ್ಷ ಮತ್ತು ಹಿಂಸೆಯ ಬಿರುಗಾಳಿಗಳು, ಸ್ಥಳಾಂತರ ಮತ್ತು ಬಡತನದ ಬಿರುಗಾಳಿಗಳು, ಭಯ ಮತ್ತು ಅನಿಶ್ಚಿತತೆಯ ಬಿರುಗಾಳಿಗಳು, ದುಃಖ ಮತ್ತು ನಷ್ಟದ ಬಿರುಗಾಳಿಗಳು ಜನರನ್ನು ಕಾಡಿವೆ ಎಂದು ಅವರು ತಿಳಿಸಿದರು. ಇವು “ಮನೆಗಳು, ಶಾಲೆಗಳು, ಜೀವನೋಪಾಯಗಳು ಮತ್ತು ಕೆಲವೊಮ್ಮೆ ಪ್ರೀತಿಪಾತ್ರರ ಜೀವಗಳನ್ನೂ ಕಸಿದುಕೊಂಡಿವೆ.”
“ಅನೇಕ ಕುಟುಂಬಗಳು, ‘ಈ ಬಿರುಗಾಳಿ ಯಾವಾಗ ಕೊನೆಗೊಳ್ಳುತ್ತದೆ?’ ಎಂದು ಕೇಳುತ್ತಿವೆ. ಅನೇಕ ಯುವಜನರು, ‘ನನ್ನ ಭವಿಷ್ಯ ಹೇಗಿರಲಿದೆ?’ ಎಂದು ಪ್ರಶ್ನಿಸುತ್ತಿದ್ದಾರೆ. ಅನೇಕ ಪೋಷಕರು, ‘ನನ್ನ ಮಕ್ಕಳು ಸುರಕ್ಷಿತವಾಗಿರುತ್ತಾರೆಯೇ?’ ಎಂದು ಚಿಂತಿಸುತ್ತಿದ್ದಾರೆ.ಕೆಲವರು, “ದೇವರು ಎಲ್ಲಿದ್ದಾರೆ?” ಎಂದೂ ಪ್ರಶ್ನಿಸಬಹುದು ಎಂದು ಅವರು ಒಪ್ಪಿಕೊಂಡರು.
ಈ ಸಂದರ್ಭದಲ್ಲಿ, ದೇವರು ಎಲೀಯನನ್ನು ಕೈಬಿಡಲಿಲ್ಲ ಎಂಬುದನ್ನು ತಿಳಿಸುವ ಮೊದಲ ವಾಚನವು “ನಮಗೆ ಉತ್ತರವನ್ನು ನೀಡುತ್ತದೆ” ಎಂದು ಪ್ರಧಾನ ಗುರು ಬೋ ಹೇಳಿದರು. ದೇವರು ಅಲ್ಲಿಯೇ ಇದ್ದರು ಎಂದು ಅವರು ಒತ್ತಿಹೇಳಿದರು. ಆದರೆ ಎಲೀಯನು ದೇವರ ಸಾನ್ನಿಧ್ಯವನ್ನು ಗುರುತಿಸಲು ಕಲಿಯಬೇಕಾಗಿತ್ತು. ಎಲೀಯನು ನಿರೀಕ್ಷಿಸಿದಂತೆ ದೇವರು ಮಹತ್ತರವಾದ ಅಥವಾ ಅದ್ಭುತವಾದ ಘಟನೆಗಳಲ್ಲಿ ಕಾಣಿಸಿಕೊಳ್ಳಲಿಲ್ಲ; ಬದಲಾಗಿ, ಅವರು “ನಿಶ್ಶಬ್ದವಾದ” ರೀತಿಯಲ್ಲಿ ಸಾನ್ನಿಧ್ಯ ತೋರಿಸಿದರು.
ದೇವರು ತಮ್ಮ ಜನರೊಂದಿಗೆ ನಿಶ್ಶಬ್ದವಾಗಿ ಸಾಗುತ್ತಾರೆ
“ತಾಯಿ ತನ್ನ ಮಗುವನ್ನು ಸಂತೈಸುವಾಗ, ತಂದೆ ತನ್ನ ಕುಟುಂಬವನ್ನು ರಕ್ಷಿಸುವಾಗ, ಕಷ್ಟದ ಸಮಯದಲ್ಲಿಯೂ ಒಬ್ಬ ಧರ್ಮಗುರು ತನ್ನ ಜನರೊಂದಿಗೆ ಉಳಿಯುವಾಗ ಅಥವಾ ಧಾರ್ಮಿಕ ಸಹೋದರಿಯರು ಸ್ಥಳಾಂತರಗೊಂಡ ಕುಟುಂಬಗಳಿಗೆ ಸೇವೆ ಸಲ್ಲಿಸುವಾಗ” ದೇವರ ಸಾನ್ನಿಧ್ಯವನ್ನು ಕಾಣಬಹುದು ಎಂದು ಪ್ರಧಾನ ಗುರು ಬೋ ಗಮನಿಸಿದರು.
ಕೆಲವೊಮ್ಮೆ ದೇವರು “ಹಸಿದ ವ್ಯಕ್ತಿಯೊಂದಿಗೆ ಯಾರಾದರೂ ಸ್ವಲ್ಪ ಆಹಾರವನ್ನು ಹಂಚಿಕೊಳ್ಳುವ ಮೂಲಕ; ‘ನಾನು ದ್ವೇಷಿಸುವುದಿಲ್ಲ’ ಎಂದು ಒಬ್ಬ ಕ್ರೈಸ್ತನು ಹೇಳುವ ಮೂಲಕ; ‘ನಾನು ಶಾಂತಿಯನ್ನು ಆರಿಸಿಕೊಳ್ಳುತ್ತೇನೆ’ ಎಂದು ಒಬ್ಬ ವ್ಯಕ್ತಿ ಹೇಳುವ ಮೂಲಕ; ‘ನಾವು ಸಮಾಧಾನ ಮಾಡಿಕೊಳ್ಳೋಣ’ ಎಂದು ಯಾರಾದರೂ ಹೇಳುವ ಮೂಲಕ” ಸಾನ್ನಿಧ್ಯ ತೋರುತ್ತಾರೆ. ಇವು ಸಣ್ಣ ಸಂಗತಿಗಳಂತೆ ಕಾಣಬಹುದು. “ಆದರೆ ಕೆಲವೊಮ್ಮೆ ದೇವರ ಮೃದುವಾದ ಗಾಳಿಯು ಇಂತಹ ಸಣ್ಣ ಪ್ರೀತಿಯ ಕಾರ್ಯಗಳಲ್ಲಿ ಅಡಗಿರುತ್ತದೆ,” ಎಂದು ಪ್ರಧಾನ ಗುರುಗಳು ಹೇಳಿದರು.
ಯುವಜನರ ಮೇಲೆ ಅಪಾರವಾದ ಹೊರೆಗಳು
ಇಂದು ಅಪಾರವಾದ ಹೊರೆಗಳನ್ನು ಹೊತ್ತಿರುವ ಯುವಜನರಿಗೂ ಅವರು ವಿಶ್ವಾಸ ಮತ್ತು ಪ್ರೋತ್ಸಾಹದ ಮಾತುಗಳನ್ನು ಹೇಳಿದರು. ಕೆಲವರ ಶಿಕ್ಷಣ ಸ್ಥಗಿತಗೊಂಡಿದೆ. ಕೆಲವರು ತಮ್ಮ ಕುಟುಂಬಗಳಿಂದ ದೂರವಾಗಿದ್ದಾರೆ. ಕೆಲವರು ಸ್ನೇಹಿತರನ್ನು ಕಳೆದುಕೊಂಡಿದ್ದಾರೆ. ಇನ್ನು ಕೆಲವರು ತಮ್ಮ ಭವಿಷ್ಯದ ಕುರಿತು ಅನಿಶ್ಚಿತರಾಗಿದ್ದಾರೆ ಎಂದು ಅವರು ಹೇಳಿದರು. ಮತ್ತೊಂದೆಡೆ, “ತಮ್ಮ ಪೀಳಿಗೆಗೆ ಯಾವುದೇ ಭವಿಷ್ಯವಿಲ್ಲ” ಎಂದು ನಂಬುವ ಪ್ರಲೋಭನೆ ಕೆಲವರನ್ನು ಕಾಡಬಹುದು. ಈ ಸಂದರ್ಭದಲ್ಲಿ, ಯುವಜನರು ತಮ್ಮ ಭವಿಷ್ಯವನ್ನು ದ್ವೇಷಕ್ಕೆ ಒಪ್ಪಿಸಬಾರದು ಎಂದು ಅವರು ಕರೆ ನೀಡಿದರು. “ಇಂದಿನ ಗಾಯಗಳು ನಿಮ್ಮ ಇಡೀ ಜೀವನದ ಕಥೆಯನ್ನು ನಿರ್ಧರಿಸಲು ಅವಕಾಶ ನೀಡಬೇಡಿ,” ಎಂದು ಅವರು ಹೇಳಿದರು.
ವಿವೇಕವುಳ್ಳ ಸ್ತ್ರೀ-ಪುರುಷರಾಗಿರಿ
ಯುವಜನರು ಕೇವಲ ಇತಿಹಾಸದ ಬಲಿಪಶುಗಳಲ್ಲ; ಅವರು ಹೊಸ ಇತಿಹಾಸದ ಮತ್ತು ಶಾಂತಿಯ ನಿರ್ಮಾತೃಗಳಾಗಬಹುದು ಎಂದು ಅವರು ಹೇಳಿದರು. ಅವರು ಶಿಕ್ಷಕರು, ವೈದ್ಯರು, ಇಂಜಿನಿಯರ್ಗಳು, ರೈತರು, ಪತ್ರಕರ್ತರು, ಧಾರ್ಮಿಕ ಸೇವಕ-ಸೇವಕಿಯರು, ಧರ್ಮಗುರುಗಳು, ಪೋಷಕರು ಮತ್ತು ಸಮುದಾಯದ ನಾಯಕರಾಗಬಹುದು ಎಂದು ನೆನಪಿಸಿದ ಪ್ರಧಾನ ಗುರು ಬೋ, ಎಲ್ಲಕ್ಕಿಂತ ಮುಖ್ಯವಾಗಿ ಅವರು “ವಿವೇಕವುಳ್ಳ ಸ್ತ್ರೀ-ಪುರುಷರಾಗಬೇಕು” ಎಂದು ಹೇಳಿದರು.
ಮಯನ್ಮಾರ್ಗೆ ಅವರೂ ಅವರ ಪ್ರತಿಭೆಗಳೂ ಎಷ್ಟು ಮಹತ್ವದ್ದಾಗಿವೆ ಎಂಬುದನ್ನು ತಿಳಿಸಿದ ಪ್ರಧಾನ ಗುರುಗಳು, “ಯೇಸು ಇಂದು ನಿಮಗೆ ಹೇಳುತ್ತಾರೆ: ‘ಧೈರ್ಯವಾಗಿರಿ. ನಾನೇ. ಭಯಪಡಬೇಡಿ’” ಎಂದು ಒತ್ತಿಹೇಳಿದರು.
ಇಂದಿನ “ಗದ್ದಲದ ಜಗತ್ತಿನಲ್ಲಿ,” ವಿಶೇಷವಾಗಿ ರಾಜಕೀಯ ಗದ್ದಲ ಮತ್ತು ಸಾಮಾಜಿಕ ಮಾಧ್ಯಮಗಳ ಮೂಲಕ ಭಯ, ಕೋಪ, ಪ್ರಚಾರ ಮತ್ತು ವದಂತಿಗಳು ಹರಡುತ್ತಿರುವ ಸಂದರ್ಭದಲ್ಲಿ, ದೇವರ ಧ್ವನಿಯನ್ನು ಆಲಿಸುವುದು ಕಷ್ಟವಾಗಬಹುದು ಎಂದು ಅವರು ಹೇಳಿದರು. ಆದರೂ ಆ ಧ್ವನಿ ಸದಾ ಅಲ್ಲಿಯೇ ಇದೆ; ನಾವು ಅದನ್ನು ಪುನಃ ಕಂಡುಕೊಳ್ಳಬೇಕು ಎಂದು ಅವರು ಕರೆ ನೀಡಿದರು.
ನಿಮ್ಮ ದೃಷ್ಟಿಯನ್ನು ಯೇಸುವಿನ ಮೇಲೆ ಇರಿಸಿಕೊಳ್ಳಿರಿ
ಕ್ರಿಸ್ತರು ನಮ್ಮೊಂದಿಗೆ ಇದ್ದಾರೆ ಮತ್ತು ಅಂತಿಮವಾಗಿ ವಿಶ್ವಾಸವೇ ಜಯಶಾಲಿಯಾಗುತ್ತದೆ ಎಂದು ಪ್ರಧಾನ ಗುರುಗಳು ವಿಶ್ವಾಸಿಗಳಿಗೆ ನೆನಪಿಸಿದರು. ಸದಾ ತಮ್ಮ ದೃಷ್ಟಿಯನ್ನು ಯೇಸುವಿನ ಮೇಲೆ ಇರಿಸಿಕೊಳ್ಳುವಂತೆ ಅವರು ಕರೆ ನೀಡಿದರು. ಮಯನ್ಮಾರ್ನ ಸಮಸ್ತ ಜನರೊಂದಿಗೆ ಯೇಸು ಇರಲಿ, ಅವರಿಗೆ ಧೈರ್ಯ ಮತ್ತು ಜ್ಞಾನವನ್ನು ನೀಡಲಿ, ಸಮಾಧಾನ ಮತ್ತು ಸೌಹಾರ್ದಕ್ಕಾಗಿ ಸಿದ್ಧವಾದ ಹೃದಯಗಳನ್ನು ಕರುಣಿಸಲಿ ಎಂದು ಪ್ರಧಾನ ಗುರುಗಳೊಂದಿಗೆ ಪ್ರಾರ್ಥಿಸುವಂತೆ ಅವರು ವಿಶ್ವಾಸಿಗಳನ್ನು ಆಹ್ವಾನಿಸಿದರು.
“ಬಿರುಗಾಳಿಗಳು ಕೊನೆಗೊಳ್ಳುವ, ಕಣ್ಣೀರು ಒರೆಸಲ್ಪಡುವ, ಕುಟುಂಬಗಳು ತಮ್ಮ ಮನೆಗಳಿಗೆ ಮರಳುವ, ಮಕ್ಕಳು ಮತ್ತೆ ಶಾಲೆಗೆ ಹೋಗುವ, ಸಮುದಾಯಗಳು ಪುನರ್ನಿರ್ಮಾಣಗೊಳ್ಳುವ ಮತ್ತು ಮ್ಯಾನ್ಮಾರ್ನ ಜನರು ಮತ್ತೊಮ್ಮೆ ಶಾಂತಿ, ಘನತೆ, ನ್ಯಾಯ ಮತ್ತು ಸೌಹಾರ್ದದಲ್ಲಿ ಒಟ್ಟಾಗಿ ಬದುಕುವ ದಿನ ಬರಲಿ” ಎಂದು ಪ್ರಾರ್ಥಿಸುತ್ತಾ ಪ್ರಧಾನ ಗುರು ಬೋ ತಮ್ಮ ಉಪದೇಶವನ್ನು ಮುಕ್ತಾಯಗೊಳಿಸಿದರು.
ಆಮೆನ್.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
