ಕೊಲಂಬಿಯಾದ ಮಹಾಧರ್ಮಾಧ್ಯಕ್ಷರು: ‘ಭೂಕಂಪ ಅತ್ಯಂತ ಭೀಕರವಾಗಿತ್ತು’
ಲೇಖಕರು: ಜೋಹಾನ್ ಪಚೆಕೋ
“ಈ ಸಂಪೂರ್ಣ ಪರಿಸ್ಥಿತಿಯ ಪ್ರತೀಕಾತ್ಮಕ ಚಿತ್ರಣವೆಂದರೆ ಮನಿಸಾಲೆಸ್ ಮಹಾದೇವಾಲಯ. ಇದು ದೇಶದ ಈ ಪ್ರದೇಶದ ಅತ್ಯಂತ ಪ್ರಮುಖ ಸಂಕೇತವಾಗಿದೆ. ನವ-ಗೋಥಿಕ್ ಶೈಲಿಯಲ್ಲಿ ನಿರ್ಮಿಸಲಾದ ಈ ಕಟ್ಟಡಕ್ಕೆ ಗಂಭೀರ ಹಾನಿಯಾಗಿದೆ. ಅದರ ಒಂದು ಸಹಾಯಕ ಗೋಪುರ ಕುಸಿದಿದೆ,” ಎಂದು ಕೊಲಂಬಿಯಾದ ಮನಿಸಾಲೆಸ್ನ ಮಹಾಧರ್ಮಾಧ್ಯಕ್ಷ ಜೋಸೆ ಮಿಗೇಲ್ ಗೊಮೆಸ್ ರೊಡ್ರಿಗ್ವೆಸ್ ಅವರು ವ್ಯಾಟಿಕನ್ ನ್ಯೂಸ್ಗೆ ನೀಡಿದ ಸಂದರ್ಶನದಲ್ಲಿ ಹೇಳಿದರು.
ಆಗಸ್ಟ್ 10ರಂದು ಸಂಭವಿಸಿದ 7.4 ತೀವ್ರತೆಯ ಭೂಕಂಪದ ಬಳಿಕ ಅವರು ಮಾತನಾಡಿದರು. ಇತ್ತೀಚಿನ ಅಧಿಕೃತ ವರದಿಗಳ ಪ್ರಕಾರ, ಭೂಕಂಪದಲ್ಲಿ 200ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ನೂರಾರು ಮಂದಿ ಗಾಯಗೊಂಡಿದ್ದಾರೆ.
“ಭೂಕಂಪದ ಸಂದರ್ಭದಲ್ಲಿ ನಾವು ಅನುಭವಿಸಿದ ನೋವು ಅತ್ಯಂತ ಆಘಾತಕಾರಿಯಾಗಿತ್ತು. ಇದು ಭೂಕಂಪ ಸಂಭವಿಸುವ ವಲಯವಾಗಿರುವುದರಿಂದ, ಕಾಲಕಾಲಕ್ಕೆ ಭೂಮಿ ಕಂಪಿಸುವುದು ಅಸಾಮಾನ್ಯವೇನಲ್ಲ. ಆದರೆ ಈ ಭೂಕಂಪ ಅಸಾಧಾರಣವಾಗಿ ತೀವ್ರವಾಗಿತ್ತು; ನೆಲದ ಮೇಲೆ ನಿರ್ಮಿಸಲಾಗಿದ್ದ ಪ್ರತಿಯೊಂದನ್ನೂ ಅದು ಸಂಪೂರ್ಣವಾಗಿ ನೆಲಸಮಗೊಳಿಸಲಿದೆ ಎನ್ನುವಂತಿತ್ತು,” ಎಂದು ಮಹಾಧರ್ಮಾಧ್ಯಕ್ಷ ಗೊಮೆಸ್ ಹೇಳಿದರು.
ಭೂಕಂಪದಿಂದ ಹಾನಿಗೊಳಗಾದ ದೇವಾಲಯಗಳು
ಭೂಕಂಪದಿಂದ ಉಂಟಾದ ಹಾನಿಯ ಕುರಿತು ಮಾತನಾಡಿದ ಮಹಾಧರ್ಮಾಧ್ಯಕ್ಷ ಗೊಮೆಸ್ ರೊಡ್ರಿಗ್ವೆಸ್, “ಈ ಪ್ರದೇಶದಲ್ಲಿ ಮನೆಗಳಿಗೆ ಗಂಭೀರ ಹಾನಿಯಾಗಿದೆ” ಎಂದು ಹೇಳಿದರು. ಇದರ ಪರಿಣಾಮವಾಗಿ ಅನೇಕ ಜನರು ಮನೆಗಳನ್ನು ಕಳೆದುಕೊಂಡಿದ್ದಾರೆ.
ದೇವಾಲಯಗಳು ಮತ್ತು ಇತರ ಧರ್ಮಸಭೆಯ ಕಟ್ಟಡಗಳ ಕುರಿತು ಮಾತನಾಡಿದ ಅವರು, “ಅವುಗಳಲ್ಲಿ ಅರ್ಧದಷ್ಟು ಗಂಭೀರ ಹಾನಿಗೊಳಗಾಗಿವೆ” ಎಂದು ಅಂದಾಜಿಸಿದರು. “ವಿಶೇಷವಾಗಿ, ಈ ಎಲ್ಲದರ ಪ್ರತೀಕಾತ್ಮಕ ಚಿತ್ರಣವೆಂದರೆ ಮನಿಸಾಲೆಸ್ ಮಹಾದೇವಾಲಯ. ಇದು ದೇಶದ ಈ ಪ್ರದೇಶದ ಅತ್ಯಂತ ಪ್ರಮುಖ ಸಂಕೇತವಾಗಿದೆ. ನವ-ಗೋಥಿಕ್ ಶೈಲಿಯ ಈ ಕಟ್ಟಡಕ್ಕೆ ತೀವ್ರ ಹಾನಿಯಾಗಿದೆ. ಅದರ ಒಂದು ಸಹಾಯಕ ಗೋಪುರ — ಅದರ ದ್ವಿತೀಯ ಗೋಪುರಗಳಲ್ಲಿ ಒಂದಾದದ್ದು — ಕುಸಿದು ಮಹಾದೇವಾಲಯದ ಮುಖ್ಯ ರಚನೆಯ ಮೇಲೆ ಬಂದು ಬಿದ್ದಿದೆ. ಸದ್ಯಕ್ಕೆ ಆ ಪ್ರದೇಶವನ್ನು ಸಾರ್ವಜನಿಕರಿಗೆ ಮಾತ್ರವಲ್ಲ, ಧರ್ಮಗುರುಗಳಿಗೂ ಮುಚ್ಚಲಾಗಿದೆ. ಆದ್ದರಿಂದ ತಜ್ಞರು ನಡೆಸುವ ಪರಿಶೀಲನೆಯ ವರದಿಗಾಗಿ ನಾವು ಕಾಯುತ್ತಿದ್ದೇವೆ,” ಎಂದು ಮಹಾಧರ್ಮಾಧ್ಯಕ್ಷರು ವಿವರಿಸಿದರು,
ದಾನಧರ್ಮ ಮತ್ತು ಒಗ್ಗಟ್ಟಿನ ಮನೋಭಾವ
ಭೂಕಂಪದ ಬಳಿಕ ತಕ್ಷಣವೇ ನೆರವು ಕಾರ್ಯಗಳು ಆರಂಭವಾದವು. “ಧರ್ಮಸಭೆಯು ತಕ್ಷಣವೇ ಆಹಾರ ಬ್ಯಾಂಕ್ ಮೂಲಕ ನೆರವು ಒದಗಿಸಿತು.“ಕರೈಸ್ತ ದಾನಧರ್ಮ ಮತ್ತು ಒಗ್ಗಟ್ಟಿನ ಮನೋಭಾವದಿಂದ ಪ್ರೇರಿತರಾಗಿ ಅನೇಕ ಜನರು ಸಹಾಯ ಮಾಡಲು ಸಿದ್ಧರಾದರು. ವಾಸ್ತವವಾಗಿ, ತುರ್ತು ಮತ್ತು ತಕ್ಷಣದ ನೆರವಿಗಾಗಿ ಜನರು ಈಗಾಗಲೇ ಆಹಾರ ಬ್ಯಾಂಕ್ಗೆ ತೆರಳಿ ದೇಣಿಗೆಗಳನ್ನು ನೀಡುತ್ತಿದ್ದಾರೆ,” ಎಂದು ಅವರು ಹೇಳಿದರು.
ಮನಿಸಾಲೆಸ್ನ ಮಹಾಧರ್ಮಾಧ್ಯಕ್ಷರ ಪ್ರಕಾರ, ಜನರ ಅತ್ಯಂತ ತುರ್ತು ಅಗತ್ಯವೆಂದರೆ ವಸತಿ. ಕೆಲವರು ತಮ್ಮಲ್ಲಿದ್ದ ಎಲ್ಲವನ್ನೂ ಕಳೆದುಕೊಂಡಿದ್ದಾರೆ. ಇನ್ನು ಕೆಲವರು ಕಟ್ಟಡಗಳ ಸುರಕ್ಷತೆಯ ಪರಿಶೀಲನೆ ಮುಗಿಯುವವರೆಗೆ ತಮ್ಮ ಮನೆಗಳಿಗೆ ಮರಳಲು ಸಾಧ್ಯವಾಗುವುದಿಲ್ಲ.
“ಎರಡನೆಯ ಪ್ರಮುಖ ಅಗತ್ಯವೆಂದರೆ, ಖಂಡಿತವಾಗಿಯೂ, ಈ ಮೊದಲ ಕೆಲವು ದಿನಗಳಿಗೆ ಬೇಕಾಗಿರುವ ಆಹಾರ. ಏಕೆಂದರೆ ಆಹಾರದ ಕೊರತೆ ಉಂಟಾಗುವ ಸಾಧ್ಯತೆಯಿದೆ,” ಎಂದು ಮಹಾಧರ್ಮಾಧ್ಯಕ್ಷರು ಹೇಳಿದರು. ಮುಂದಿನ ಹಂತದಲ್ಲಿ, “ಎಲ್ಲವನ್ನೂ ಕಳೆದುಕೊಂಡವರಿಗೆ ಗೃಹೋಪಯೋಗಿ ವಸ್ತುಗಳು ಮತ್ತು ಮೂಲಭೂತ ಅಗತ್ಯ ಸಾಮಗ್ರಿಗಳ” ಅಗತ್ಯವೂ ಎದುರಾಗಲಿದೆ ಎಂದು ಅವರು ಹೇಳಿದರು.
ಜಗದ್ಗುರುಗಳ ಸಾನ್ನಿಧ್ಯಕ್ಕೆ ಕೃತಜ್ಞತೆ
ಜಗದ್ಗುರುಗಳಾದ 14ನೇ ಲಿಯೋ ಅವರು ವ್ಯಕ್ತಪಡಿಸಿದ ಒಗ್ಗಟ್ಟಿನ ಸಂದೇಶಕ್ಕೆ ಮಹಾಧರ್ಮಾಧ್ಯಕ್ಷ ಜೋಸೆ ಮಿಗೇಲ್ ಗೊಮೆಸ್ ರೊಡ್ರಿಗ್ವೆಸ್ ಕೃತಜ್ಞತೆ ಸಲ್ಲಿಸಿದರು. “ಇದು ಪಿತೃಸಹಜವಾದ ದಯೆ ಮತ್ತು ಸಾನ್ನಿಧ್ಯವನ್ನು ವ್ಯಕ್ತಪಡಿಸುತ್ತದೆ. ಇಲ್ಲಿ, ವಿಶೇಷವಾಗಿ ಕೊಲಂಬಿಯಾದ ಜನರಲ್ಲಿ ಮತ್ತು ಈ ದೇಶದ ಈ ಪ್ರದೇಶದಲ್ಲಿ, ಅದನ್ನು ಪ್ರಭು ಯೇಸು ಕ್ರಿಸ್ತನೇ — ತಮ್ಮ ಧರ್ಮಸಭೆಯ ಕುರುಬನಾಗಿ — ನೀಡುತ್ತಿರುವ ನೆರವು ಮತ್ತು ಸಾಂಗತ್ಯವೆಂದು ಅನುಭವಿಸಲಾಗುತ್ತಿದೆ. ಇದು ನಾವು ಮುನ್ನಡೆಯುತ್ತಲೇ ಇರಬೇಕೆಂಬ ಪ್ರೋತ್ಸಾಹವೂ ಆಗಿದೆ,” ಎಂದು ಅವರು ಹೇಳಿದರು.
ಪುನರ್ನಿರ್ಮಾಣದ ಸಂಕಲ್ಪ
ಕೊನೆಯಲ್ಲಿ, ಮನಿಸಾಲೆಸ್ನ ಮಹಾಧರ್ಮಾಧ್ಯಕ್ಷರು ಭರವಸೆಯ ಸಂದೇಶವನ್ನು ನೀಡಿದರು: “ನಿಜಕ್ಕೂ ಭಯಾನಕವಾದ ಪರಿಸ್ಥಿತಿಗಳು ಮತ್ತು ಕ್ಷಣಗಳಲ್ಲಿ, ಇಂತಹ ಘಟನೆಯ ತಕ್ಷಣವೇ ಆತ್ಮದಲ್ಲಿ ಉಳಿಯುವುದು, ದೇಹದಲ್ಲಿ, ಆಸ್ತಿಯಲ್ಲಿ ಅಥವಾ ಕುಟುಂಬದಲ್ಲಿ ಸಂಕಷ್ಟ ಅನುಭವಿಸುತ್ತಿರುವವರಿಗೆ ತಕ್ಷಣದ ನೆರವು ದೊರಕಬೇಕೆಂಬ ಬಯಕೆ. ಇಲ್ಲಿ ಅಪಾರವಾದ ನೋವಿದೆ.”
“ಎರಡನೆಯದಾಗಿ, ತಕ್ಷಣವೇ ಪುನರ್ನಿರ್ಮಾಣವನ್ನು ಆರಂಭಿಸಬೇಕೆಂಬ ಬಯಕೆ ಮೂಡುತ್ತದೆ. ಅವಶೇಷಗಳನ್ನು ಇನ್ನೂ ತೆರವುಗೊಳಿಸುತ್ತಿರುವಾಗಲೇ, ಮುಂದೆ ಸಾಗಬೇಕು, ಎಲ್ಲವನ್ನೂ ಮತ್ತೆ ಸರಿಪಡಿಸಬೇಕು ಮತ್ತು ಇನ್ನಷ್ಟು ಬಲಪಡಿಸಬೇಕು ಎಂಬ ದೃಢಸಂಕಲ್ಪ ನಮ್ಮಲ್ಲಿದೆ. ಈ ಪರಿಸ್ಥಿತಿಗಳಲ್ಲಿಯೂ ನಾವು ಪ್ರಭುವನ್ನು ಸ್ತುತಿಸಲು ಮತ್ತು ಆಶೀರ್ವದಿಸಲು ಪ್ರಯತ್ನಿಸುತ್ತಿದ್ದೇವೆ,” ಎಂದು ಅವರು ಅಂತಿಮವಾಗಿ ಹೇಳಿದರು.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
