ಅಮೆರಿಕಕ್ಕೆ 250 ವರ್ಷ: ಸಂತರು ಹಾಗೂ ರಾಷ್ಟ್ರವ್ಯಾಪಿ ನವದಿನಗಳ ಪ್ರಾರ್ಥನೆಯೊಂದಿಗೆ ಆಚರಿಸಿ
ಲೇಖಕರು: ಕೀಲ್ ಗಸ್ಸಿ
ಪಟಾಕಿಗಳ ಸಿಡಿತ, ಹಾಟ್ಡಾಗ್ಗಳು ಮತ್ತು ದೇಶಭಕ್ತಿಯ ಗೀತೆಗಳ ನಡುವೆ ಈ ವಾರಾಂತ್ಯದಲ್ಲಿ ಅಮೆರಿಕ ತನ್ನ ಸ್ಥಾಪನೆಯ 250ನೇ ವಾರ್ಷಿಕೋತ್ಸವವನ್ನು ಸಂಭ್ರಮಿಸುತ್ತಿದೆ. ಆದರೆ ಈ ಎಲ್ಲ ಸಂಭ್ರಮಾಚರಣೆಗಳ ನಡುವೆಯೇ, ಒಬ್ಬ ಧರ್ಮಗುರು ಎಲ್ಲರ ಗಮನವನ್ನು ಪ್ರಾರ್ಥನೆ ಮತ್ತು ಐಕ್ಯತೆಯ ಕಡೆಗೆ ಕೇಂದ್ರೀಕರಿಸುತ್ತಿದ್ದಾರೆ.
ಅಮೆರಿಕದ ವಿಸ್ಕಾನ್ಸಿನ್ ರಾಜ್ಯದಲ್ಲಿರುವ ಅವರ್ ಲೇಡಿ ಆಫ್ ಚಾಂಪಿಯನ್ ರಾಷ್ಟ್ರೀಯ ದೇವಾಲಯದ ಮುಖ್ಯಸ್ಥರಾದ ವಂ. ಗುರು ಆಂಥೋನಿ ಸ್ಟೀಫನ್ಸ್, CPM, "ನಮ್ಮ ರಾಷ್ಟ್ರಕ್ಕಾಗಿ ನವದಿನಗಳ ಪ್ರಾರ್ಥನೆ"ಯನ್ನು ರಚಿಸಿದ್ದಾರೆ. ಜುಲೈ 1ರಿಂದ 9ರವರೆಗೆ ನಡೆಯುವ ಈ ಒಂಬತ್ತು ದಿನಗಳ ಪ್ರಾರ್ಥನೆಯು ಅಮೆರಿಕ ರಾಷ್ಟ್ರಕ್ಕಾಗಿ ಪ್ರಾರ್ಥಿಸುವುದಕ್ಕೂ, ದೇಶದಲ್ಲಿ ಐಕ್ಯತೆ, ಪಾವಿತ್ರ್ಯ ಮತ್ತು ನವೀಕರಣಕ್ಕಾಗಿ ಕನ್ಯಾ ಮರಿಯಮ್ಮನವರ ಮಧ್ಯಸ್ಥಿಕೆಯನ್ನು ಬೇಡುವುದಕ್ಕೂ ಮೀಸಲಾಗಿದೆ.
ಈ ಪ್ರಾರ್ಥನೆಗಾಗಿ 50,000ಕ್ಕೂ ಹೆಚ್ಚು ಪ್ರಾರ್ಥನಾ ಕಾರ್ಡ್ಗಳನ್ನು ಮುದ್ರಿಸಲಾಗಿದ್ದು, ಹಲವಾರು ಲೇಖನಗಳನ್ನೂ ಪ್ರಕಟಿಸಲಾಗಿದೆ. ಇದರ ಜೊತೆಗೆ, ಅಮೆರಿಕದ ಸಂತರು, ಧನ್ಯರು, ಹಾಗೂ ದೇವರ ಸೇವಕ-ಸೇವಕಿಯರಿಗೆ ಸಮರ್ಪಿತವಾದ ವಿಶೇಷ ಪ್ರದರ್ಶನವನ್ನೂ ರಾಷ್ಟ್ರೀಯ ದೇವಾಲಯವು ಆಯೋಜಿಸಿದೆ.
ಆಚರಣೆಯ ಒಂದು ವಿಶಿಷ್ಟ ವಿಧಾನ
ಅಮೆರಿಕದಲ್ಲಿ ಅಧಿಕೃತವಾಗಿ ಅಂಗೀಕರಿಸಲ್ಪಟ್ಟಿರುವ ಏಕೈಕ ಮರಿಯಮ್ಮನವರ ದರ್ಶನ ಸ್ಥಳವಾದ ಅವರ್ ಲೇಡಿ ಆಫ್ ಚಾಂಪಿಯನ್ ರಾಷ್ಟ್ರೀಯ ದೇವಾಲಯದಲ್ಲಿ "ಅಮೆರಿಕದ ಕಥೋಲಿಕ ಸಂತರು" ಎಂಬ ವಿಶೇಷ ಪ್ರದರ್ಶನ ನಡೆಯುತ್ತಿದೆ. ಈ ದೇವಾಲಯವು "ಭಕ್ತವಿಶ್ವಾಸಿಗಳಲ್ಲಿ ಭಕ್ತಿಯನ್ನು ಇನ್ನಷ್ಟು ಬೆಳೆಸುವ ಸ್ಥಳವಾಗಿದೆ" ಎಂದು ವಂ. ಗುರು ಸ್ಟೀಫನ್ಸ್ ಹೇಳಿದರು.
ಇದಲ್ಲದೆ, ಇದು ಶಿಕ್ಷಣದ ಕೇಂದ್ರವೂ ಆಗಿದೆ ಎಂದು ಅವರು ವಿವರಿಸಿದರು. ಇಲ್ಲಿಗೆ ದೇಶದ ವಿವಿಧ ಭಾಗಗಳಿಂದ ಆಗಮಿಸುವ ಯಾತ್ರಿಕರು ದೇವಾಲಯದ ಇತಿಹಾಸ ಹಾಗೂ ಇಲ್ಲಿ ನಡೆದ ಘಟನೆಗಳ ಬಗ್ಗೆ ತಿಳಿದುಕೊಳ್ಳುತ್ತಾರೆ. 1859ರಲ್ಲಿ ಬೆಲ್ಜಿಯಂ ಮೂಲದ ವಲಸಿಗ ಮಹಿಳೆ ಅಡೆಲ್ ಬ್ರೈಸ್ ಅವರಿಗೆ ಕನ್ಯಾ ಮರಿಯಮ್ಮನವರು ಮೂರು ಬಾರಿ ದರ್ಶನ ನೀಡಿದರು. ಕೊನೆಯ ದರ್ಶನದಲ್ಲಿ ಮರಿಯಮ್ಮನವರು, "ಈ ಕಾಡುಪ್ರದೇಶದಲ್ಲಿರುವ ಮಕ್ಕಳನ್ನು ಒಟ್ಟುಗೂಡಿಸಿ, ಅವರ ರಕ್ಷಣೆಗೆ ಅಗತ್ಯವಾದುದನ್ನು ಅವರಿಗೆ ಕಲಿಸು" ಎಂದು ಸೂಚಿಸಿದರು.
ಈ ಆಧಾರದ ಮೇಲೆ ಕಳೆದ ವರ್ಷ ನಡೆದ ಒಂದು ಸಭೆಯಲ್ಲಿಯೇ ಈ ಪ್ರದರ್ಶನದ ಕಲ್ಪನೆ ಹುಟ್ಟಿಕೊಂಡಿತು. "ಅಮೆರಿಕದ 250ನೇ ವಾರ್ಷಿಕೋತ್ಸವದ ಅಂಗವಾಗಿ ನಾವು ವಿಶಿಷ್ಟವಾಗಿ ಏನು ಮಾಡಬಹುದು?" ಎಂಬ ಪ್ರಶ್ನೆ ಉದ್ಭವಿಸಿತು. ಅನೇಕ ಆಲೋಚನೆಗಳು ಬಂದವು. ಕೊನೆಗೆ, "ಅಮೆರಿಕದ ಕಥೋಲಿಕರ ಜೀವನವನ್ನು ಆಧರಿಸಿ ಏನಾದರೂ ಮಾಡೋಣ" ಎಂಬ ಸಲಹೆ ಮೂಡಿಬಂತು.
ಅಲ್ಲಿಂದ ಆರಂಭವಾದ ಈ ಯೋಜನೆಯು ಅಮೆರಿಕದ 76 ದೇವಾಲಯಗಳಿಂದ ಸಂತ ಪುರುಷರು ಮತ್ತು ಮಹಿಳೆಯರ ಚಿತ್ರಗಳು, ಪವಿತ್ರ ಅವಶೇಷಗಳು ಹಾಗೂ ಜೀವನ ಪರಿಚಯಗಳನ್ನು ಒಂದೇ ಸ್ಥಳದಲ್ಲಿ ಪ್ರದರ್ಶಿಸುವ ಮಟ್ಟಕ್ಕೆ ಬೆಳೆಯಿತು. ಇದರ ಉದ್ದೇಶ, ಅಮೆರಿಕದ ಇತಿಹಾಸದುದ್ದಕ್ಕೂ ಹರಿದುಬಂದಿರುವ ಕಥೋಲಿಕ ಧರ್ಮದ ಕೊಡುಗೆಯನ್ನು ಎತ್ತಿ ತೋರಿಸುವುದಾಗಿದೆ.
"ಕಥೋಲಿಕ ಧರ್ಮವು ಈ ರಾಷ್ಟ್ರದ ಮೇಲೆ ಆಳವಾದ ಗುರುತು ಮೂಡಿಸಿದೆ. ಮುಂದಿನ ವರ್ಷಗಳಲ್ಲಿಯೂ ನಮ್ಮ ದೇಶಕ್ಕೆ ನಾವು ಕಥೋಲಿಕರು ನೀಡಬಹುದಾದ ಕೊಡುಗೆ ಬಹಳಷ್ಟಿದೆ" ಎಂದು ದೇವಾಲಯದ ಮುಖ್ಯಸ್ಥರು ಒತ್ತಿ ಹೇಳಿದರು.
ಸಮಾಜದ ಎಲ್ಲ ವರ್ಗಗಳಿಂದ ಬಂದವರು
ಹಿಂದಿನ ಗುಲಾಮೆಯಾಗಿದ್ದ ಜೂಲಿಯಾ ಗ್ರೀಲಿ, ಸಿಯೂ ಮೂಲನಿವಾಸಿ ಸಮುದಾಯದ ಔಷಧ ತಜ್ಞ ನಿಕೊಲಸ್ ಬ್ಲ್ಯಾಕ್, ಅಪಾರ ಆಸ್ತಿಯ ಉತ್ತರಾಧಿಕಾರಿಯಾಗಿದ್ದ ಸಂತ ಕ್ಯಾಥರಿನ್ ಡ್ರೆಕ್ಸೆಲ್ ಸೇರಿದಂತೆ, ಈ ಪ್ರದರ್ಶನದಲ್ಲಿ ಸ್ಥಾನ ಪಡೆದಿರುವ ಪುರುಷರು ಮತ್ತು ಮಹಿಳೆಯರು ವಿವಿಧ ಸಂಸ್ಕೃತಿಗಳು ಹಾಗೂ ಸಾಮಾಜಿಕ ಹಿನ್ನೆಲೆಗಳಿಂದ ಬಂದವರಾಗಿದ್ದಾರೆ.
ಇದೇ ಈ ಪ್ರದರ್ಶನದ ಅತ್ಯಂತ ಗಮನಾರ್ಹ ಅಂಶ ಎಂದು ವಂ. ಗುರು ಸ್ಟೀಫನ್ಸ್ ಹೇಳಿದರು. "ಇದು ಸಾರ್ವತ್ರಿಕವಾಗಿದೆ; ಇದು ಕಥೋಲಿಕವಾಗಿದೆ. ಅಮೆರಿಕ ಸಂಯುಕ್ತ ಸಂಸ್ಥಾನದ ಅಡಿಪಾಯವನ್ನು ನಿರ್ಮಿಸುವಲ್ಲಿ ಮತ್ತು ಅದರ ಬೆಳವಣಿಗೆಯಲ್ಲಿ ನಾವು ಕಥೋಲಿಕರು ಎಷ್ಟೊಂದು ದೊಡ್ಡ ಪ್ರಭಾವ ಬೀರಿದ್ದೇವೆ ಎಂಬುದನ್ನು ಅನೇಕ ಕಥೋಲಿಕರು ಅರಿತಿಲ್ಲ" ಎಂದು ಅವರು ಹೇಳಿದರು.
ಇದು ಒಳ್ಳೆಯ ಸಂಗತಿಯೇ ಆಗಿದ್ದರೂ, "ಇದು ನಮ್ಮ ಕೆಲಸವಲ್ಲ; ದೇವರ ಕೃಪೆಯೊಂದಿಗೆ ನಾವು ಸಹಕರಿಸಿದ ಫಲ" ಎಂದು ಅವರು ಹೇಳಿದರು. ಅದೇ ಸಮಯದಲ್ಲಿ, ಪ್ರತಿಯೊಬ್ಬರೂ ಸಂತರಾಗಬಹುದು ಹಾಗೂ ಇಂದಿನ ಸಮಾಜದ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಬಹುದು ಎಂದು ಅವರು ಅಭಿಪ್ರಾಯಪಟ್ಟರು.
"ಜೀವನ ಸಂಸ್ಕೃತಿಯನ್ನು ಉತ್ತೇಜಿಸುವುದು ಹಾಗೂ ನಮ್ಮ ವಿಶ್ವಾಸ ನೀಡುವ ಸ್ಥಿರತೆಯನ್ನು ಸಮಾಜಕ್ಕೆ ತಲುಪಿಸುವುದಕ್ಕಾಗಿ ನಾವು ಇನ್ನೂ ಸಾಕಷ್ಟು ಕೆಲಸ ಮಾಡಬೇಕಿದೆ" ಎಂದು ವಂ. ಗುರು ಸ್ಟೀಫನ್ಸ್ ಹೇಳಿದರು.
ವಿಸ್ಕಾನ್ಸಿನ್ನ ಈ ರಾಷ್ಟ್ರೀಯ ದೇವಾಲಯದಲ್ಲಿ ಪ್ರದರ್ಶನದಲ್ಲಿರುವ 76 ಸಂತರಲ್ಲಿ 14 ಮಂದಿಯ ಅವಶೇಷಗಳಿವೆ. ಅವುಗಳಲ್ಲಿ ಸಂತ ಫ್ರಾನ್ಸಿಸ್ ಜೇವಿಯರ್ ಕಬ್ರಿನಿ, ಸಂತ ಜಾನ್ ಹೆನ್ರಿ ನ್ಯೂಮನ್, ಧನ್ಯ ಸ್ಟಾನ್ಲಿ ರೋಥರ್, ಸಂತ ಕಟೇರಿ ಟೆಕಕ್ವಿತಾ ಹಾಗೂ ಧನ್ಯ ಮೈಕಲ್ ಮ್ಯಾಕ್ಗಿವ್ನಿ ಅವರ ಅವಶೇಷಗಳೂ ಸೇರಿವೆ.
ಇಂದು ವಿಶ್ವಾಸ ಮತ್ತು ಧರ್ಮದ ಬಗ್ಗೆ ಆಸಕ್ತಿ ಕುಗ್ಗುತ್ತಿದೆ ಎಂಬ ಅಭಿಪ್ರಾಯವಿದ್ದರೂ, ರಾಷ್ಟ್ರೀಯ ದೇವಾಲಯದ ಮುಖ್ಯಸ್ಥರು ಭರವಸೆ ಮತ್ತು ನವೀಕರಣದ ಕಿರಣವನ್ನು ಕಾಣುತ್ತಿದ್ದಾರೆ. ಕಥೋಲಿಕ ಧರ್ಮವು ದೇಶದಲ್ಲಿ ವೇಗವಾಗಿ ಬೆಳೆಯುತ್ತಿಲ್ಲವಾದರೂ, ಧರ್ಮದ ಬಗ್ಗೆ ಆಸಕ್ತಿ ತೋರುವವರು, ಧರ್ಮಸಭೆಗೆ ಸೇರುವವರು ಹಾಗೂ ಮತ್ತೆ ವಿಶ್ವಾಸದ ಬದುಕಿಗೆ ಮರಳುವವರ ಸಂಖ್ಯೆ ಹೆಚ್ಚುತ್ತಿದೆ ಎಂದು ಅವರು ಹೇಳಿದರು.
"ಕಥೋಲಿಕ ಧರ್ಮದ ಬಗ್ಗೆ ಹೊಸ ಆಸಕ್ತಿ ಹಾಗೂ ವಿಶ್ವಾಸಕ್ಕೆ ಮತಾಂತರಗೊಳ್ಳುವವರ ಸಂಖ್ಯೆಯಲ್ಲಿ ನವಚೈತನ್ಯವನ್ನು ನಾನು ಕಾಣುತ್ತಿದ್ದೇನೆ" ಎಂದು ವಂ. ಗುರು ಸ್ಟೀಫನ್ಸ್ ಹೇಳಿದರು. ಜನರನ್ನು ಕಥೋಲಿಕ ಧರ್ಮದತ್ತ ಆಕರ್ಷಿಸುವಲ್ಲಿ ಈ ದೇವಾಲಯವು ಪ್ರಮುಖ ಪಾತ್ರ ವಹಿಸುತ್ತಿದೆ ಎಂದೂ ಅವರು ತಿಳಿಸಿದರು.
"ಕಥೋಲಿಕರು, ಕಥೋಲಿಕರಲ್ಲದವರು, ಕ್ರೈಸ್ತರಲ್ಲದವರು, ದೀಕ್ಷಾಸ್ನಾನವನ್ನೂ ಪಡೆಯದವರು ಸಹ ಇಲ್ಲಿಗೆ ಆಕರ್ಷಿತರಾಗಿ ಬರುತ್ತಿರುವುದನ್ನು ನಾನು ಕಂಡಿದ್ದೇನೆ." ವಿವಿಧ ಹಿನ್ನೆಲೆಯ ಜನರನ್ನು ಒಂದೆಡೆ ಸೇರಿಸುವ ಈ ದೇವಾಲಯದಿಂದ, ದೇಶದ 250ನೇ ವಾರ್ಷಿಕೋತ್ಸವವನ್ನು ಕೇವಲ ಬಾರ್ಬೆಕ್ಯೂ ಮತ್ತು ಆಟಗಳೊಂದಿಗೆ ಮಾತ್ರವಲ್ಲದೆ, ಸಾವಿರಾರು ಜನರೊಂದಿಗೆ ಸೇರಿ ನವದಿನಗಳ ಪ್ರಾರ್ಥನೆ, ಧ್ಯಾನ ಮತ್ತು ಆತ್ಮಾವಲೋಕನದ ಮೂಲಕವೂ ಆಚರಿಸುವಂತೆ ವಂ. ಗುರು ಸ್ಟೀಫನ್ಸ್ ಎಲ್ಲರಿಗೂ ಆಹ್ವಾನ ನೀಡಿದರು.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
