ಉಕ್ರೇನ್ನ ಲ್ವೀವ್ ಮಹಾಧರ್ಮಾಧ್ಯಕ್ಷರು: “ಜನರು ದಣಿದಿದ್ದಾರೆ; ನಮ್ಮ ಭರವಸೆ
ಲೇಖಕರು: ರೊಬೆರ್ಟೊ ಪಾಗ್ಲಿಯಾಲೊಂಗಾ, ಲ್ವೀವ್
“ಉಕ್ರೇನ್ನ ಇಡೀ ಜನತೆ ತುಂಬಾ ದಣಿದಿದ್ದಾರೆ. ದುರದೃಷ್ಟವಶಾತ್, ಈ ಯುದ್ಧವು ಕೊನೆಗೊಳ್ಳುವ ಯಾವುದೇ ಭರವಸೆ ಸದ್ಯಕ್ಕೆ ಕಾಣುತ್ತಿಲ್ಲ.” ಲ್ವೀವ್ನ ಲ್ಯಾಟಿನ್ ಕಥೋಲಿಕ ಮಹಾಧರ್ಮಾಧ್ಯಕ್ಷರಾದ ಮಿಯೆಚಿಸ್ವಾವ್ ಮೊಕ್ರ್ಶಿಜ್ಕಿ ಅವರು ವ್ಯಾಟಿಕನ್ ವಾರ್ತೆಗೆ ನೀಡಿದ ಸಂದರ್ಶನದಲ್ಲಿ ಹೀಗೆ ಹೇಳಿದರು. ಪೂಜ್ಯ ಪಿತಾಮಹರ ಜಗದ್ಗುರುಗಳ ಅಧಿಕಾರ ಪೀಠದ ರಾಷ್ಟ್ರಗಳು ಮತ್ತು ಅಂತರರಾಷ್ಟ್ರೀಯ ಸಂಸ್ಥೆಗಳೊಂದಿಗಿನ ಸಂಬಂಧಗಳ ಕಾರ್ಯದರ್ಶಿಯಾದ ಮಹಾಧರ್ಮಾಧ್ಯಕ್ಷ ಪಾಲ್ ರಿಚರ್ಡ್ ಗ್ಯಾಲಘರ್ ಅವರ ಉಕ್ರೇನ್ ಭೇಟಿಯ ಸಂದರ್ಭದಲ್ಲಿ ಅವರು ಜೊತೆಯಾಗಿ ಇದ್ದಾರೆ. ಲ್ಯಾಟಿನ್ ಸಂಪ್ರದಾಯದ ಕಥೋಲಿಕ ಧರ್ಮಸಭೆಯ ರಚನೆಗಳು ಪುನಃ ಸ್ಥಾಪನೆಯಾಗಿ 35 ವರ್ಷಗಳು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ನಡೆಯುತ್ತಿರುವ ಆಚರಣೆಗಳಲ್ಲಿ ಪಾಲ್ಗೊಳ್ಳಲು, ಪೂಜ್ಯ ಜಗದ್ಗುರುಗಳಾದ 14ನೇ ಲಿಯೋ ಅವರ ವಿಶೇಷ ಪ್ರತಿನಿಧಿಯಾಗಿ ಮಹಾಧರ್ಮಾಧ್ಯಕ್ಷ ಗ್ಯಾಲಘರ್ ಉಕ್ರೇನ್ಗೆ ಭೇಟಿ ನೀಡುತ್ತಿದ್ದಾರೆ. ಈ ಭೇಟಿಯ ಮೊದಲ ಹಂತವು ಪೋಲೆಂಡ್ ಗಡಿಯ ಸಮೀಪದ ಲ್ವೀವ್ ನಗರವಾಗಿದೆ.
ಮಹಾಧರ್ಮಾಧ್ಯಕ್ಷರೇ, ಸಂಘರ್ಷ ಆರಂಭವಾಗಿ ಸುಮಾರು ನಾಲ್ಕೂವರೆ ವರ್ಷಗಳು ಕಳೆದಿವೆ. ಇಂದು ಉಕ್ರೇನ್ ಜನರ ಪರಿಸ್ಥಿತಿ ಹೇಗಿದೆ?
ದುರದೃಷ್ಟವಶಾತ್ ಯುದ್ಧ ಇನ್ನೂ ಮುಂದುವರಿಯುತ್ತಿದೆ. ಸದ್ಯಕ್ಕೆ ಅದು ಕೊನೆಗೊಳ್ಳುವ ಯಾವುದೇ ಭರವಸೆ ಕಾಣುತ್ತಿಲ್ಲ. ಉಕ್ರೇನ್ನ ಇಡೀ ಜನತೆ ತುಂಬಾ ದಣಿದಿದ್ದಾರೆ. ಏಕೆಂದರೆ ಪ್ರತಿಯೊಂದು ಕುಟುಂಬವೂ ಈ ಯುದ್ಧದ ನೋವನ್ನು ಅನುಭವಿಸಿದೆ. ಅವರ ಕುಟುಂಬದ ಸದಸ್ಯರು, ನೆರೆಹೊರೆಯವರು ಅಥವಾ ಸಹೋದ್ಯೋಗಿಗಳು ಯುದ್ಧದಲ್ಲಿ ಭಾಗಿಯಾಗಿದ್ದಾರೆ. ಅನೇಕರು ಪ್ರಾಣ ಕಳೆದುಕೊಂಡಿದ್ದಾರೆ. ಯುದ್ಧಭೂಮಿಯಿಂದ ಪ್ರತಿದಿನವೂ ದಾರುಣ ಸುದ್ದಿಗಳು ಬರುತ್ತಿವೆ. ಜನರು ಭರವಸೆಯನ್ನೂ ಕಳೆದುಕೊಳ್ಳುತ್ತಿದ್ದಾರೆ. ಎಲ್ಲರಿಗೂ ಉದ್ಯೋಗ ಸಿಗುತ್ತಿಲ್ಲ. ನಾಲ್ಕು ಅಥವಾ ಐದು ವರ್ಷಗಳ ಹಿಂದೆ ಯುರೋಪಿಗೆ ತೆರಳಿದ್ದ ತಮ್ಮ ಪತಿ ಅಥವಾ ಪತ್ನಿಯರನ್ನು ಸೇರಿಕೊಳ್ಳಲು ಅನೇಕರು ತಮ್ಮ ಮನೆಗಳನ್ನು ತೊರೆದು ವಲಸೆ ಹೋಗುತ್ತಿದ್ದಾರೆ. ಲ್ವೀವ್ನಲ್ಲಿಯೂ ಪ್ರತಿದಿನ ಯುದ್ಧ ನಡೆಯದಿದ್ದರೂ, ಆಗಾಗ್ಗೆ ವೈಮಾನಿಕ ದಾಳಿಯ ಎಚ್ಚರಿಕೆ ಸೈರನ್ಗಳು ಮೊಳಗುತ್ತವೆ. ಜನರು ಆಶ್ರಯ ಕೇಂದ್ರಗಳಿಗೆ ತೆರಳಬೇಕಾಗುತ್ತದೆ. ಕೆಲಸಗಳು ಸ್ಥಗಿತಗೊಳ್ಳುತ್ತವೆ. ಶಾಲಾ ಪಾಠಗಳಿಗೂ ಅಡ್ಡಿಯಾಗುತ್ತದೆ. ಆದರೂ ಜನರು ದೇವಾಲಯಕ್ಕೆ ಬರುತ್ತಾರೆ. ಅವರು ಪ್ರಾರ್ಥಿಸುತ್ತಾರೆ. ತಮ್ಮ ಭರವಸೆಯನ್ನು ದೇವರಲ್ಲಿ ಮಾತ್ರ ಇಡುತ್ತಾರೆ. ಈ ಭಯಾನಕ ಯುದ್ಧವನ್ನು ಕೊನೆಗಾಣಿಸಬಲ್ಲವರು ದೇವರು ಮಾತ್ರ.
ಈ ಸಂಘರ್ಷದ ಅವಧಿಯಲ್ಲಿ ಲ್ವೀವ್ ಮೇಲೂ ಹಲವಾರು ಬಾರಿ ದಾಳಿಗಳು ನಡೆದಿವೆ. ಬಾಂಬ್ ದಾಳಿಯ ನಂತರ ಜನರು ಮತ್ತೆ ಸಾಮಾನ್ಯ ಜೀವನಕ್ಕೆ ಮರಳುವುದು ಹೇಗೆ ಸಾಧ್ಯವಾಗುತ್ತಿದೆ?
ಇದು ಸುಲಭದ ಸಂಗತಿಯಲ್ಲ. ಪ್ರತಿಯೊಂದು ದಾಳಿಯೂ ಗಾಯಾಳುಗಳನ್ನು ಮತ್ತು ಸಾವನ್ನುಂಟುಮಾಡುತ್ತದೆ. ಮನೆಗಳು ಹಾಗೂ ಆಸ್ತಿಪಾಸ್ತಿಗಳು ನಾಶವಾಗುತ್ತವೆ. ಆದರೆ ಈ ವರ್ಷ ನಾವು ಸಂತ ಎರಡನೇ ಜಾನ್ ಪಾಲ್ ಅವರ ಉಕ್ರೇನ್ ಭೇಟಿಯ 25ನೇ ವಾರ್ಷಿಕೋತ್ಸವವನ್ನು ಆಚರಿಸಿದ್ದೇವೆ. ಆ ಸಂದರ್ಭದಲ್ಲಿ ಅವರು ನಮಗೆ ಹೇಳಿದ ಮಾತುಗಳು ಇಂದಿಗೂ ನೆನಪಿವೆ: “ಭಯಪಡಬೇಡಿ. ಈ ಕಾಲದಲ್ಲಿಯೂ ನೀವು ಸಂಕಷ್ಟಗಳನ್ನು ಎದುರಿಸುತ್ತೀರಿ. ಆದರೆ ಕ್ರಿಸ್ತರೊಂದಿಗೆ ನೀವು ಅವುಗಳನ್ನು ಜಯಿಸುತ್ತೀರಿ.” ಆದ್ದರಿಂದ ನಮ್ಮ ಏಕೈಕ ಭರವಸೆ ಪ್ರಾರ್ಥನೆಯಾಗಿದೆ. ಜನರು ದೇವಾಲಯಕ್ಕೆ ಬರುತ್ತಾರೆ. ಅವರು ಪ್ರಾರ್ಥಿಸುತ್ತಾರೆ. ಪ್ರತಿದಿನ ಪವಿತ್ರ ಬಲಿ ಪೂಜೆಯ ನಂತರ ನಾವು ವಿನಂತಿಯ ಪ್ರಾರ್ಥನೆಗಳನ್ನು ಹಾಡುತ್ತೇವೆ. ದೇವರ ಕರುಣೆ ಹಾಗೂ ನಮ್ಮ ದೇಶಕ್ಕೆ ಶಾಂತಿ ದೊರಕಲೆಂದು ವಿಶೇಷ ಪ್ರಾರ್ಥನಾ ಕೂಟಗಳನ್ನು ನಡೆಸುತ್ತೇವೆ.
ಭಾನುವಾರ ಮಹಾಧರ್ಮಾಧ್ಯಕ್ಷ ಗ್ಯಾಲಘರ್ ಅವರು ಬೆರ್ಡಿಚಿವ್ಗೆ ಭೇಟಿ ನೀಡಲಿದ್ದಾರೆ. ಅವರ್ ಲೇಡಿ ಆಫ್ ಮೌಂಟ್ ಕಾರ್ಮೆಲ್ ಪುಣ್ಯಕ್ಷೇತ್ರದಲ್ಲಿ ನಡೆಯಲಿರುವ ಈ ಆಚರಣೆಯ ಮಹತ್ವವೇನು? ಈ ಸಾಮೂಹಿಕ ಸಮಾಗಮದಿಂದ ಯಾವ ಫಲ ದೊರೆಯಬಹುದು?
ಬೆರ್ಡಿಚಿವ್ ನಮ್ಮ ರಾಷ್ಟ್ರೀಯ ಪುಣ್ಯಕ್ಷೇತ್ರವಾಗಿದೆ. ಉಕ್ರೇನ್ನ ಎಲ್ಲ ಭಾಗಗಳಿಂದ ಜನರು ಅಲ್ಲಿಗೆ ಬಂದು ಕನ್ಯಾಮರಿಯಮ್ಮನವರ ಮಧ್ಯಸ್ಥಿಕೆಯನ್ನು ಬೇಡುತ್ತಾರೆ. ಎಲ್ಲಕ್ಕಿಂತ ಹೆಚ್ಚಾಗಿ ನಮಗೆ ಬೇಕಾಗಿರುವುದು ಏಕತೆ. ಪ್ರಾರ್ಥನೆಯಿಂದ, ಒಗ್ಗಟ್ಟಿನಿಂದ ಮತ್ತು ಭರವಸೆಯ ಮಾತುಗಳಿಂದ ದೊರೆಯುವ ಶಕ್ತಿ ನಮಗೆ ಅಗತ್ಯವಾಗಿದೆ. ಮಹಾಧರ್ಮಾಧ್ಯಕ್ಷ ಗ್ಯಾಲಘರ್ ಅವರು ಎರಡನೇ ಬಾರಿ ನಮ್ಮ ದೇಶಕ್ಕೆ ಬಂದಿದ್ದಾರೆ. (ಮೊದಲ ಬಾರಿಗೆ ಅವರು 2022ರ ಮೇ ತಿಂಗಳಲ್ಲಿ, ಯುದ್ಧ ಆರಂಭವಾದ ಕೆಲವೇ ವಾರಗಳ ನಂತರ ಉಕ್ರೇನ್ಗೆ ಭೇಟಿ ನೀಡಿದ್ದರು.) ಅವರು ನಮ್ಮ ಹೃದಯಗಳನ್ನು ಶಾಂತಿ, ಸಂತೋಷ ಮತ್ತು ಭರವಸೆಯಿಂದ ತುಂಬುವರು ಎಂಬ ವಿಶ್ವಾಸ ನನಗಿದೆ. ಏಕೆಂದರೆ ಅವರು, ತಮ್ಮ ಪ್ರಾರ್ಥನೆಗಳು ಮತ್ತು ಶಾಂತಿಗಾಗಿ ಮಾಡುವ ನಿರಂತರ ಮನವಿಗಳ ಮೂಲಕ ನಮ್ಮ ದೇಶದೊಂದಿಗೆ ನಿಕಟವಾಗಿರುವ ಪೂಜ್ಯ ಜಗದ್ಗುರುಗಳಾದ 14ನೇ ಲಿಯೋ ಅವರ ಪ್ರತಿನಿಧಿಯಾಗಿದ್ದಾರೆ. ಏಂಜಲಸ್ ಪ್ರಾರ್ಥನೆಯ ಸಮಯದಲ್ಲಿಯೂ ಪೂಜ್ಯ ಜಗದ್ಗುರುಗಳು ನಮ್ಮನ್ನು ನೆನಪಿಸಿಕೊಳ್ಳುತ್ತಾರೆ ಮತ್ತು ತಮ್ಮ ಆಶೀರ್ವಾದವನ್ನು ನೀಡುತ್ತಾರೆ. ಉಕ್ರೇನ್ ಸರ್ಕಾರದೊಂದಿಗೆ ನಡೆಯಲಿರುವ ಅಧಿಕೃತ ಸಭೆಗಳನ್ನೂ ಒಳಗೊಂಡಿರುವ ಈ ಭೇಟಿಯು ನಮ್ಮ ದೇಶದಲ್ಲಿ ಶಾಂತಿ ಸ್ಥಾಪನೆಗೆ ಫಲಪ್ರದವಾಗಲಿ ಎಂದು ನಾವು ಆಶಿಸುತ್ತೇವೆ.
ಮಹಾಧರ್ಮಾಧ್ಯಕ್ಷರೇ, ಪಾಶ್ಚಾತ್ಯ ದೇಶಗಳ ಅನೇಕ ಜನರು ಈ ಯುದ್ಧಕ್ಕೆ ಈಗ ಹೊಂದಿಕೊಂಡಂತಾಗಿದೆ. ಇದು ಹೊಸ ಸಾಮಾನ್ಯ ಸ್ಥಿತಿಯಂತಾಗಿದೆ. ಶಾಂತಿಯ ಮಹತ್ವದ ಬಗ್ಗೆ ಜನರ ಮನಸ್ಸಾಕ್ಷಿಯನ್ನು ಜಾಗೃತಗೊಳಿಸಲು ಉಕ್ರೇನ್ನ ಧರ್ಮಸಭೆ ಏನು ಮಾಡಬಹುದು?
ಧರ್ಮಾಧ್ಯಕ್ಷರ ಸಮ್ಮೇಳನಗಳು, ನಮ್ಮ ಧರ್ಮಗುರುಗಳು ಮತ್ತು ಧರ್ಮಾಧ್ಯಕ್ಷರು ನಿರಂತರವಾಗಿ ಶಾಂತಿಗಾಗಿ ಮನವಿ ಮಾಡುತ್ತಿದ್ದಾರೆ. ಕಾಲಕಾಲಕ್ಕೆ ನಾವು ವಿದೇಶಗಳಿಗೆ ತೆರಳಿ ನಮ್ಮ ಸಹೋದರ ಧರ್ಮಾಧ್ಯಕ್ಷರು, ಧರ್ಮಗುರುಗಳು ಹಾಗೂ ಸ್ನೇಹಿತರನ್ನು ಭೇಟಿ ಮಾಡುತ್ತೇವೆ. ಅವರು ಯಾವಾಗಲೂ ನಮ್ಮನ್ನು ಆತ್ಮೀಯವಾಗಿ ಸ್ವಾಗತಿಸುತ್ತಾರೆ ಮತ್ತು ತಮ್ಮ ಧರ್ಮಕೇಂದ್ರದ ವಿಶ್ವಾಸಿಗಳೊಂದಿಗೆ ಮಾತನಾಡಲು ಅವಕಾಶ ನೀಡುತ್ತಾರೆ. ಉಕ್ರೇನ್ ಮಾತ್ರವಲ್ಲ, ಪವಿತ್ರ ಭೂಮಿ ಸೇರಿದಂತೆ ಯಾವುದೇ ದೇಶದ ಜನರು ಅನುಭವಿಸುವ ನೋವಿನ ಬಗ್ಗೆ ನಾವು ಎಂದಿಗೂ ನಿರಾಸಕ್ತರಾಗಬಾರದು ಎಂದು ನಾನು ನಂಬುತ್ತೇನೆ. ಮುಖ್ಯವಾಗಿ, ನಾವು ಕ್ರೈಸ್ತ ಸಹೋದರ-ಸಹೋದರಿಯರಾಗಿ ನಮ್ಮ ಏಕತೆಯನ್ನು ತೋರಿಸಬೇಕು ಮತ್ತು ಸದಾ ಒಬ್ಬರನ್ನೊಬ್ಬರು ನೆನಪಿಸಿಕೊಳ್ಳಬೇಕು. ನಮಗಾಗಿ ಪ್ರಾರ್ಥಿಸಬೇಕೆಂದು ಹಾಗೂ ಉಕ್ರೇನ್ಗೆ ಇನ್ನೂ ಅತ್ಯಂತ ಅಗತ್ಯವಾಗಿರುವ ಮಾನವೀಯ ನೆರವನ್ನು ಮುಂದುವರಿಸಬೇಕೆಂದು ನಾವು ಎಲ್ಲರನ್ನೂ ವಿನಂತಿಸುತ್ತೇವೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
