2027ರ ಸೋಲ್ ವಿಶ್ವ ಯುವಜನ ದಿನಕ್ಕೆ ಭರದ ಸಿದ್ಧತೆಗಳು

ಲೇಖಕರು: ಇಸಬೆಲ್ಲಾ ಎಚ್. ಡಿ ಕಾರ್ವಾಲ್ಹೊ

2027ರ ಸೋಲ್ ವಿಶ್ವ ಯುವಜನ ದಿನಕ್ಕೆ ಇನ್ನೂ ಒಂದು ವರ್ಷ ಬಾಕಿ ಇರುವ ಹಿನ್ನೆಲೆಯಲ್ಲಿ, ಸ್ಥಳೀಯ ಆಯೋಜನಾ ಸಮಿತಿಯು (LOC) ಆರಂಭಿಕ ಯೋಜನೆಗಳನ್ನು ಪೂರ್ಣಗೊಳಿಸಿ, ಈಗ ಸಂಪೂರ್ಣ ಅನುಷ್ಠಾನದ ಹಂತಕ್ಕೆ ಕಾಲಿಟ್ಟಿದೆ. ಅಂತರರಾಷ್ಟ್ರೀಯ ಸಹಕಾರ, ಯಾತ್ರಾರ್ಥಿಗಳ ಸೇವೆಗಳು, ವಸತಿ, ಸಾರಿಗೆ, ಸುರಕ್ಷತೆ, ವೈದ್ಯಕೀಯ ಸೇವೆ ಹಾಗೂ ಸಂವಹನ ಸೇರಿದಂತೆ ಎಲ್ಲಾ ವಿಭಾಗಗಳಲ್ಲಿ ಸಿದ್ಧತೆಗಳು ಭರದಿಂದ ಸಾಗುತ್ತಿವೆ.

ವಿಶ್ವ ಯುವಜನ ದಿನ (WYD) ಪ್ರತಿ ಕೆಲವು ವರ್ಷಗಳಿಗೊಮ್ಮೆ ನಡೆಯುವ ಜಾಗತಿಕ ಕಾರ್ಯಕ್ರಮವಾಗಿದ್ದು, ಲಕ್ಷಾಂತರ ಕಥೋಲಿಕ ಯುವಜನರನ್ನು ಒಟ್ಟುಗೂಡಿಸುತ್ತದೆ. 2027ರ ವಿಶ್ವ ಯುವಜನ ದಿನವು ಆಗಸ್ಟ್ 3ರಿಂದ 8ರವರೆಗೆ ದಕ್ಷಿಣ ಕೊರಿಯಾದ ರಾಜಧಾನಿ ಸೋಲ್‌ನಲ್ಲಿ ನಡೆಯಲಿದೆ. ಇದು ಏಷ್ಯಾದಲ್ಲಿ ನಡೆಯುವ ಎರಡನೇ ವಿಶ್ವ ಯುವಜನ ದಿನವಾಗಿದ್ದು, ಮೊದಲನೆಯದು 1995ರಲ್ಲಿ ಫಿಲಿಪ್ಪೀನ್ಸ್‌ನ ಮನಿಲಾದಲ್ಲಿ ನಡೆದಿತ್ತು. ಅಲ್ಲದೆ, ಕ್ರೈಸ್ತ ಧರ್ಮವು ಅಲ್ಪಸಂಖ್ಯಾತ ಧರ್ಮವಾಗಿರುವ ದೇಶದಲ್ಲಿ ನಡೆಯುತ್ತಿರುವ ಮೊದಲ ವಿಶ್ವ ಯುವಜನ ದಿನ ಇದಾಗಿದೆ.

“ಕಳೆದ ಮೂರು ವರ್ಷಗಳಲ್ಲಿ ನಾವು ಈ ಕಾರ್ಯಕ್ರಮಕ್ಕೆ ಭದ್ರವಾದ ಅಡಿಪಾಯ ಹಾಕುವ ಕೆಲಸದಲ್ಲಿ ಗಮನಹರಿಸಿದ್ದೇವೆ” ಎಂದು ಸ್ಥಳೀಯ ಆಯೋಜನಾ ಸಮಿತಿಯ ಅಧ್ಯಕ್ಷರೂ ಆದ ಸೋಲ್ ಮಹಾಧರ್ಮಾಧ್ಯಕ್ಷ ಪೀಟರ್ ಸೂನ್-ತೈಕ್ ಚುಂಗ್ ಹೇಳಿದರು. “ಮುಂಬರುವ ಒಂದು ವರ್ಷದಲ್ಲಿ ಎಲ್ಲಾ ಸಿದ್ಧತೆಗಳನ್ನು ಪೂರ್ಣಗೊಳಿಸಿ, ವಿಶ್ವದ ಎಲ್ಲ ಭಾಗಗಳಿಂದ ಆಗಮಿಸುವ ಯುವಜನರನ್ನು ಸ್ವಾಗತಿಸುತ್ತೇವೆ. 2027ರ ಸೋಲ್ ವಿಶ್ವ ಯುವಜನ ದಿನವನ್ನು ಭರವಸೆಯ ಹಬ್ಬವನ್ನಾಗಿ ಹಾಗೂ ಕೊರಿಯಾ ಮತ್ತು ಸೋಲ್‌ನ ಆತಿಥ್ಯ ಮತ್ತು ಐಕ್ಯತೆಯ ಸಾಕ್ಷಿಯನ್ನಾಗಿ ಮಾಡಲು ನಾವು ಎಲ್ಲ ಪ್ರಯತ್ನಗಳನ್ನೂ ಮಾಡುತ್ತೇವೆ” ಎಂದು ಅವರು ಹೇಳಿದರು.

2027ರ ಸೋಲ್ ವಿಶ್ವ ಯುವಜನ ದಿನದತ್ತ ಯುವಜನರೊಂದಿಗೆ ಜೊತೆಯಾಗಿ ಹೆಜ್ಜೆ ಹಾಕಿ

“2027ರ ಸಿಯೋಲ್ ವಿಶ್ವ ಯುವಜನ ದಿನ ಆರಂಭವಾಗಲು ಇನ್ನೂ ಒಂದು ವರ್ಷ ಬಾಕಿ ಇದೆ” ಎಂದು ಧರ್ಮಕ್ಷೇತ್ರದ ಸಾಮಾನ್ಯರು, ಕುಟುಂಬ ಮತ್ತು ಜೀವನ ವಿಭಾಗದ ಆಡಳಿತಾಧಿಕಾರಿಯಾದ ಕಾರ್ಡಿನಲ್ ಕೆವಿನ್ ಫಾರೆಲ್ ಹೇಳಿದರು. “ತಮ್ಮ ಧರ್ಮಗುರುಗಳೊಂದಿಗೆ ಕೊರಿಯಾಕ್ಕೆ ಪ್ರಯಾಣಿಸಲಿರುವ ಯುವಜನರು ಈಗ ಈ ಕಾರ್ಯಕ್ರಮದ ಸಿದ್ಧತೆಗಳ ಕೇಂದ್ರಬಿಂದುವಾಗಿದ್ದಾರೆ. ಕಳೆದ ನಲವತ್ತು ವರ್ಷಗಳ ಇತಿಹಾಸದಲ್ಲಿ, ವಿಶ್ವ ಯುವಜನ ದಿನವು ಯುವಜನರ ವಿಶ್ವಾಸ, ಉತ್ಸಾಹ ಹಾಗೂ ಸಕ್ರಿಯ ಭಾಗವಹಿಸುವಿಕೆ ಮತ್ತು ಸ್ಥಳೀಯ ಧರ್ಮಸಭೆಗಳ ಸಹಕಾರದಿಂದ ನಿರಂತರವಾಗಿ ಸಮೃದ್ಧಗೊಂಡಿದೆ” ಎಂದು ಅವರು ಒತ್ತಿಹೇಳಿದರು.

“ಆದ್ದರಿಂದ, ವಿಶ್ವದಾದ್ಯಂತದ ಧರ್ಮಾಧ್ಯಕ್ಷರು ಹಾಗೂ ಯುವಜನ ಸೇವೆಯ ಜವಾಬ್ದಾರಿಯಲ್ಲಿರುವ ಎಲ್ಲರಿಗೂ ನಾನು ಮತ್ತೊಮ್ಮೆ ಮನವಿ ಮಾಡುತ್ತೇನೆ. 2027ರ ಸೋಲ್ ವಿಶ್ವ ಯುವಜನ ದಿನದತ್ತ ಯುವಜನರೊಂದಿಗೆ ಜೊತೆಯಾಗಿ ಹೆಜ್ಜೆ ಹಾಕಿ. ಈ ಸಿದ್ಧತಾ ಸಂಪನ್ಮೂಲಗಳನ್ನು ಸಮರ್ಪಕವಾಗಿ ಬಳಸಿಕೊಂಡು, ಯಾತ್ರೆಯನ್ನು ನಿಜವಾದ ವಿಶ್ವಾಸದ ಅನುಭವವಾಗಿ, ಧರ್ಮಸಭೆಯ ಐಕ್ಯತೆಯ ಅನುಭವವಾಗಿ ಹಾಗೂ ಯೇಸು ಕ್ರಿಸ್ತರೊಂದಿಗಿನ ವೈಯಕ್ತಿಕ ಭೇಟಿಯಾಗಿ ಅನುಭವಿಸಲು ಅವರಿಗೆ ನೆರವಾಗಿರಿ” ಎಂದು ಅವರು ಹೇಳಿದರು.

ಅಧಿಕೃತ ಗೀತೆ ಮತ್ತು ಮರ ನೆಡುವ ಅಭಿಯಾನ

2026ರ ಆಗಸ್ಟ್ 3ರ ಸೋಮವಾರ, ವಿಶ್ವ ಯುವಜನ ದಿನಕ್ಕೆ ಇನ್ನೂ ಒಂದು ವರ್ಷ ಬಾಕಿ ಇರುವ ಸಂದರ್ಭವನ್ನು WYD Seoul 2027 ಯೂಟ್ಯೂಬ್ ವಾಹಿನಿಯಲ್ಲಿ ಅಧಿಕೃತ ಗೀತೆಯನ್ನು ಬಿಡುಗಡೆ ಮಾಡುವ ಮೂಲಕ ಆಚರಿಸಲಾಗುತ್ತದೆ. ಈ ಗೀತೆಯನ್ನು 434 ಸ್ಪರ್ಧಾತ್ಮಕ ಕೃತಿಗಳಲ್ಲಿ ಆಯ್ಕೆ ಮಾಡಲಾಗಿದೆ. ಅವುಗಳಲ್ಲಿ 294 ಕೃತಿಗಳು ಕೊರಿಯಾದ ಹೊರಗಿನ ದೇಶಗಳಿಂದ ಬಂದಿದ್ದವು.

ವಿಜೇತ ಗೀತೆಯ ಹೆಸರು “Confidite, Ego Vici Mundum”, ಇದರ ಲ್ಯಾಟಿನ್ ಅರ್ಥ “ಧೈರ್ಯವಾಗಿರಿ! ನಾನು ಲೋಕವನ್ನು ಜಯಿಸಿದ್ದೇನೆ.” ಇದೇ ಸಂತ ಯೋವಾನ್ನರ ಶುಭಸಂದೇಶದ ವಾಕ್ಯಭಾಗವು ಈ ವಿಶ್ವ ಯುವಜನ ದಿನದ ಧ್ಯೇಯವಾಕ್ಯವಾಗಿಯೂ ಆಯ್ಕೆಯಾಗಿದೆ. ಈ ಗೀತೆಯನ್ನು ಕೊರಿಯಾದ ಸಂಗೀತ ಸಂಯೋಜಕ ಫ್ರಾನ್ಸಿಸ್ ಜಿಯೂನ್ ಕಿಮ್ ರಚಿಸಿದ್ದಾರೆ.

ಕಾರ್ಡಿನಲ್ ಫಾರೆಲ್ ಅವರು, ಈಗಾಗಲೇ ಬಿಡುಗಡೆಯಾಗಿರುವ ಅಧಿಕೃತ ಪ್ರಾರ್ಥನೆ ಹಾಗೂ ಕಾರ್ಯಕ್ರಮದ ಐದು ಪೋಷಕ ಸಂತರೊಂದಿಗೆ ಈ ಅಧಿಕೃತ ಗೀತೆಯೂ “2027ರ ಕಾರ್ಯಕ್ರಮಕ್ಕೆ ಯುವಜನರು ಆಧ್ಯಾತ್ಮಿಕವಾಗಿ ಸಿದ್ಧರಾಗಲು ಸಹಾಯ ಮಾಡುವ ಪ್ರಮುಖ ಧಾರ್ಮಿಕ ಸಾಧನಗಳಾಗಿವೆ” ಎಂದು ಹೇಳಿದರು.

ಆಗಸ್ಟ್ 3ರಂದು, ಸ್ಥಳೀಯ ಆಯೋಜನಾ ಸಮಿತಿಯು “ಬ್ರೆತ್ ಆಫ್ ಲೈಫ್” ಎಂಬ ಮರ ನೆಡುವ ಅಭಿಯಾನಕ್ಕೂ ಚಾಲನೆ ನೀಡಲಿದೆ. ಈ ಅಭಿಯಾನದ ಮೂಲಕ ಯುವಜನರು ತಮ್ಮ ತಮ್ಮ ದೇಶಗಳಲ್ಲಿ ಮರಗಳನ್ನು ನೆಟ್ಟು, ಅದರ ಚಿತ್ರಗಳನ್ನು ಆನ್‌ಲೈನ್‌ನಲ್ಲಿ ಹಂಚಿಕೊಳ್ಳಲು ಪ್ರೋತ್ಸಾಹಿಸಲಾಗುತ್ತದೆ. ಇದು 2025ರಲ್ಲಿ ಕೊರಿಯಾ ಅರಣ್ಯ ಸೇವೆ ಹಾಗೂ ಸೋಲ್ ಮಹಾನಗರ ಪಾಲಿಕೆಯ ಸಹಯೋಗದಲ್ಲಿ ಆರಂಭವಾದ ಸ್ಥಳೀಯ ಯೋಜನೆಯ ಮುಂದುವರಿಕೆಯಾಗಿದೆ. ಈ ಅಭಿಯಾನವು ಪೂಜ್ಯ ಜಗದ್ಗುರುಗಳಾದ ಫ್ರಾನ್ಸಿಸ್ ಅವರ “ಲೌದಾತೋ ಸಿ'” ವಿಶ್ವಪತ್ರಿಕೆಯಿಂದ ಸ್ಫೂರ್ತಿ ಪಡೆದಿದೆ. ಇದೇ ರೀತಿಯ ಅಭಿಯಾನವನ್ನು 2023ರಲ್ಲಿ ಪೋರ್ಚುಗಲ್‌ನ ಲಿಸ್ಬನ್‌ನಲ್ಲಿ ನಡೆದ ವಿಶ್ವ ಯುವಜನ ದಿನದ ಸಂದರ್ಭದಲ್ಲಿಯೂ ನಡೆಸಲಾಗಿತ್ತು. 2023ರ ಆಗಸ್ಟ್ 1ರಂದು ವಿಶ್ವ ಯುವಜನ ದಿನ ಆರಂಭವಾಗುವ ವೇಳೆಗೆ ಸುಮಾರು 18,000 ಮರಗಳನ್ನು ನೆಡಲಾಗಿತ್ತು.

ನೋಂದಣಿ ಶೀಘ್ರದಲ್ಲೇ ಆರಂಭ

ಯಾತ್ರಾರ್ಥಿಗಳ ಅಧಿಕೃತ ನೋಂದಣಿ 2026ರ ದ್ವಿತೀಯಾರ್ಧದಲ್ಲಿ ಆರಂಭವಾಗಲಿದೆ. ಪ್ರಯಾಣದ ಪ್ಯಾಕೇಜುಗಳು ಹಾಗೂ ಯಾತ್ರೆಯ ಯೋಜನೆಗೆ ಸಂಬಂಧಿಸಿದ ಎಲ್ಲಾ ಮಾಹಿತಿಯು ಅಧಿಕೃತ ಜಾಲತಾಣದಲ್ಲಿ ಲಭ್ಯವಾಗಲಿದೆ. ಸ್ವಯಂಸೇವಕರ ನೋಂದಣಿಯೂ 2026ರ ದ್ವಿತೀಯಾರ್ಧದಲ್ಲಿ ಆರಂಭವಾಗಲಿದೆ. ಈಗಾಗಲೇ 378 ಸ್ವಯಂಸೇವಕರು ಸಿದ್ಧತಾ ಕಾರ್ಯಗಳಲ್ಲಿ ಭಾಗವಹಿಸುತ್ತಿದ್ದಾರೆ. ಕೊರಿಯಾ ಮತ್ತು ವಿದೇಶಗಳಿಂದ ಸ್ವಯಂಸೇವಕರ ನೇಮಕಾತಿಯು ಯಾತ್ರಾರ್ಥಿಗಳ ನೋಂದಣಿಯೊಂದಿಗೆ ಆರಂಭವಾಗಲಿದ್ದು, ಅವರಿಗೆ ತರಬೇತಿ, ಆಧ್ಯಾತ್ಮಿಕ ರೂಪುಗೊಳಿಸುವಿಕೆ ಹಾಗೂ ಮಾನಸಿಕ ಆರೈಕೆಯ ವ್ಯವಸ್ಥೆಯೂ ಇರಲಿದೆ. 2023ರಲ್ಲಿ ಲಿಸ್ಬನ್‌ನಲ್ಲಿ ನಡೆದ ವಿಶ್ವ ಯುವಜನ ದಿನದಲ್ಲಿ 25,000ಕ್ಕೂ ಹೆಚ್ಚು ಸ್ವಯಂಸೇವಕರು ಸೇವೆ ಸಲ್ಲಿಸಿದ್ದರು.

ಸೋಲ್‌ನಲ್ಲಿ ನಡೆಯುವ ಮುಖ್ಯ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ಮೊದಲು, ಯುವಜನರು ಜುಲೈ 29ರಿಂದ ಆಗಸ್ಟ್ 2ರವರೆಗೆ ಕೊರಿಯಾದ 15 ಧರ್ಮಪ್ರಾಂತ್ಯಗಳಲ್ಲಿ ನಡೆಯುವ “ಧರ್ಮಕ್ಷೇತ್ರಗಳ ದಿನಗಳು” ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿದ್ದಾರೆ. ಈ ಅವಧಿಯಲ್ಲಿ ಅವರು ಸ್ಥಳೀಯ ಸಮುದಾಯಗಳೊಂದಿಗೆ ವಾಸವಿದ್ದು, ಕೊರಿಯಾದ ಧರ್ಮಸಭೆಯ ವಿಶ್ವಾಸ ಹಾಗೂ ಸಂಸ್ಕೃತಿಯನ್ನು ನೇರವಾಗಿ ಅನುಭವಿಸಲಿದ್ದಾರೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).