ಸಾಂತಾ ಮೊನಿಕಾ: ವ್ಯಸನದೊಂದಿಗೆ ಹೋರಾಡುವವರಿಗೆ ಭರವಸೆಯ ಪಯಣ

ವ್ಯಾಟಿಕನ್ ವರದಿ

ಯೇಸುವಿನ ಶಿಷ್ಯೆಯರ ಸಭೆಯ ಧಾರ್ಮಿಕ ಸಹೋದರಿಯರು (Hermanas Discípulas de Jesús) ತಾಯಂದಿರಿಗಾಗಿ ತಮ್ಮ ಮಕ್ಕಳಿಗೆ ನೆರವಾಗುವ ಉದ್ದೇಶದಿಂದ ಆರಂಭಿಸಿದ್ದ ಪ್ರಾರ್ಥನಾ ಗುಂಪು, ಇಂದು ವ್ಯಸನದೊಂದಿಗೆ ಹೋರಾಡುತ್ತಿರುವ ಯುವಜನರಿಗೆ ಬೆಂಬಲ ನೀಡುವ ಸಂಸ್ಥೆಯಾಗಿ ರೂಪುಗೊಂಡಿದೆ.

ರಿಯೋ ಗ್ರಾಂಡೆ ಕೈಗಾರಿಕಾ ನಗರವು ದಕ್ಷಿಣ ಅಮೆರಿಕ ಖಂಡದ ದಕ್ಷಿಣ ತುದಿಯಲ್ಲಿದೆ. ಉದ್ಯೋಗಾವಕಾಶಗಳು ಮತ್ತು ಉತ್ತಮ ಆರ್ಥಿಕ ಜೀವನದ ನಿರೀಕ್ಷೆಯಲ್ಲಿ ಅರ್ಜೆಂಟೀನಾದ ವಿವಿಧ ಭಾಗಗಳಿಂದ ಜನರು ಈ ನಗರಕ್ಕೆ ಬರುತ್ತಾರೆ. ಆದರೆ ಈ ಚಟುವಟಿಕೆಗಳ ಹಿಂದೆ, ತೀವ್ರ ಚಳಿ, ಬಲವಾದ ಗಾಳಿ ಮತ್ತು ಏಕಾಂತತೆ ಖಿನ್ನತೆ, ದುಃಖ ಹಾಗೂ ವ್ಯಸನದಂತಹ ಸಮಸ್ಯೆಗಳಿಗೆ ಕಾರಣವಾಗುತ್ತವೆ. ಇಂತಹ ಪರಿಸ್ಥಿತಿಯಲ್ಲಿಯೇ ಯೇಸುವಿನ ಶಿಷ್ಯೆಯರು ತಮ್ಮ ಧರ್ಮಪ್ರಚಾರವನ್ನು ಆರಂಭಿಸಿದರು. ಮೊದಲ ಸಹೋದರಿಯರು 2012ರಲ್ಲಿ ಈ ದ್ವೀಪಕ್ಕೆ ಆಗಮಿಸಿದರು.

ಸಂಸ್ಥೆಯ ಪ್ರಧಾನ ಮೇಲಾಧಿಕಾರಿಣಿ ಸಿಸ್ಟರ್ ವರ್ಜಿನಿಯಾ ಮಿಶೆಲ್ ಹಾಗೂ ಸಿಸ್ಟರ್ ರೊಸಿಯೊ ಪಾರ್ಮಿಜಿಯಾನಿ, ಯೇಸುವಿನ ದಿವ್ಯ ಕರುಣೆಯ ಧಾರ್ಮಿಕ ಸೇವಾ ಕೇಂದ್ರದ ಸಂಸ್ಥಾಪಕರಾದ ವಂ. ಗುರು ಫೆಲಿಸಿಸಿಮೊ ವಿಸೆಂಟೆ, SDB ಅವರ ಆಹ್ವಾನದ ಮೇರೆಗೆ ಈ ಧಾರ್ಮಿಕ ಸೇವೆಯನ್ನು ಆರಂಭಿಸಿದರು. ಈ ಕೇಂದ್ರವನ್ನು ವಿಶೇಷವಾಗಿ ಏಕಾಂತತೆ, ಖಿನ್ನತೆ ಮತ್ತು ವ್ಯಸನದಿಂದ ಬಳಲುವ ಅತ್ಯಂತ ದುರ್ಬಲರನ್ನು ಸ್ವಾಗತಿಸುವ ಸ್ಥಳವಾಗಿ ರೂಪಿಸಲಾಗಿತ್ತು. "ನಮ್ಮ ಧರ್ಮಸಭೆಯ ವಿಶೇಷ ಕರೆಯು ಒಂದು ತುರ್ತು ಅಗತ್ಯಕ್ಕೆ ಹೊಂದಿಕೊಳ್ಳಬೇಕಾಗಿದೆ ಎಂಬುದನ್ನು ನಾವು ಅರಿತುಕೊಂಡೆವು—ಆ ಗಾಯಗಳನ್ನು ಗುಣಪಡಿಸುವುದೇ ನಮ್ಮ ಕರೆಯಾಗಿದೆ" ಎಂದು ಮದರ್ ವಿಕ್ಕಿ ನೆನಪಿಸಿಕೊಳ್ಳುತ್ತಾರೆ.

ಸಾಂತಾ ಮೊನಿಕಾ ಆರಂಭದಲ್ಲಿ ವ್ಯಸನದ ಚಕ್ರದಲ್ಲಿ ಸಿಲುಕಿದ್ದ ಮಕ್ಕಳ ತಾಯಂದಿರಿಗಾಗಿ ಸ್ವ-ಸಹಾಯ ಗುಂಪಾಗಿತ್ತು. ತಮ್ಮ ಅಪಾರ ನೋವನ್ನು ಹೊತ್ತುಕೊಂಡು, ಸಾಂತ್ವನ ಮತ್ತು ಆಧ್ಯಾತ್ಮಿಕ ಸಹಾಯಕ್ಕಾಗಿ ತಾಯಂದಿರು ಈ ಕೇಂದ್ರಕ್ಕೆ ಬರುತ್ತಿದ್ದರು. ಆರಂಭದಲ್ಲಿ ಅವರಿಗೆ ಆಧ್ಯಾತ್ಮಿಕ ಸಹಪ್ರಯಾಣವನ್ನು ನೀಡಲಾಯಿತು. ಆದರೆ ಶೀಘ್ರದಲ್ಲೇ ಪ್ರಾರ್ಥನೆಯ ಜೊತೆಗೆ ಸ್ಪಷ್ಟವಾದ ನೆರವೂ ಅಗತ್ಯ ಎಂಬುದು ತಿಳಿಯಿತು. ಹೀಗೆ ಒಂದು ಸಣ್ಣ ಪ್ರಾರ್ಥನಾ ಗುಂಪಾಗಿ ಆರಂಭವಾದುದು, ಇಂದು ಜನರ ಜೀವನವನ್ನು ಪರಿವರ್ತಿಸುವ ಪ್ರತಿಷ್ಠಾನವಾಗಿ ಬೆಳೆದಿದೆ. ಕಾಲಕ್ರಮೇಣ, ಕೇವಲ ತಾಯಂದಿರಿಗೆ ಮಾತ್ರವಲ್ಲದೆ ಅವರ ಮಕ್ಕಳಿಗೂ ನೆರವಾಗಲು ಬಯಸಿದ ಸ್ವಯಂಸೇವಕರು ಸೇರತೊಡಗಿದರು. ಇದರಿಂದ ಸಮಗ್ರ ಬೆಂಬಲ ನೀಡುವ ವ್ಯವಸ್ಥೆ ರೂಪುಗೊಂಡಿತು. ಈ ಸೇವೆಯು ಸಂಪೂರ್ಣ ಉಚಿತವಾಗಿದ್ದು, ಇಡೀ ಕುಟುಂಬಕ್ಕೆ ಉಚಿತ ಧಾರ್ಮಿಕ ಹಾಗೂ ಚಿಕಿತ್ಸಾ ಸಹಾಯವನ್ನು ನೀಡುವ ಈ ಪ್ರದೇಶದ ಏಕೈಕ ಸಂಸ್ಥೆಯಾಗಿದೆ.

ಈ ಪಯಣ ಸುಲಭವಾಗಿರಲಿಲ್ಲ ಎಂದು ಸಹೋದರಿಯರು ಒಪ್ಪಿಕೊಳ್ಳುತ್ತಾರೆ. ಯುವಜನರು ಎದುರಿಸುವ ಸಂಕಷ್ಟಗಳನ್ನು ಅರ್ಥಮಾಡಿಕೊಳ್ಳಲು ಹಾಗೂ ಅವುಗಳನ್ನು ಎದುರಿಸಲು ಅವರು ಅಧ್ಯಯನ ನಡೆಸಬೇಕಾಯಿತು, ಸಂಶೋಧನೆ ಮಾಡಬೇಕಾಯಿತು ಮತ್ತು ಹೊಸ ವಿಧಾನಗಳನ್ನು ಕಲಿಯಬೇಕಾಯಿತು. “ಪವಿತ್ರ ಗ್ರಂಥ, ಪವಿತ್ರ ಸಂಸ್ಕಾರ ಹಾಗೂ ಮರಿಯಮ್ಮನವರ ಆಧ್ಯಾತ್ಮಿಕತೆಯೊಂದಿಗೆ ತಾಂತ್ರಿಕ ಪರಿಣತಿಯನ್ನು ಸಂಯೋಜಿಸಲು ನಾವು ಕಲಿತೆವು. ಅದುವೇ ಸಾಂತಾ ಮೊನಿಕಾದಲ್ಲಿ ಬದಲಾವಣೆಯನ್ನು ತಂದಿತು" ಎಂದು ಮಾತೆ ವಿಕ್ಕಿ ಹೇಳಿದರು.

ತಾಯಂದಿರ ದೃಢತೆಯಿಂದ ಪ್ರೇರಿತವಾದ ಧರ್ಮಪ್ರಚಾರ

ಆರಂಭದಲ್ಲಿ ಈ ಪ್ರತಿಷ್ಠಾನಕ್ಕೆ "ಒಳ್ಳೆಯ ಸಮಾರಿತ" ಎಂದು ಹೆಸರಿಡುವ ಯೋಚನೆ ಇತ್ತು. ದಾರಿಯಲ್ಲಿ ಗಾಯಗೊಂಡು ಸಹಾಯದ ಅಗತ್ಯವಿರುವವರನ್ನು ಕಾಳಜಿ ವಹಿಸುವ ಭಾವನೆಯನ್ನು ವ್ಯಕ್ತಪಡಿಸಲು ಈ ಹೆಸರನ್ನು ಆಯ್ಕೆ ಮಾಡಲಾಗಿತ್ತು. ಆದರೆ ಯೋಜನೆಯ ಮೂಲವನ್ನು ನೆನಪಿಸಿಕೊಂಡಾಗ, ತಮ್ಮ ಮಕ್ಕಳಿಗಾಗಿ ದಣಿವರಿಯದೆ ಹೋರಾಡಿದ ಧೈರ್ಯಶಾಲಿ ತಾಯಂದಿರನ್ನು ಸಹೋದರಿಯರು ಸ್ಮರಿಸಿದರು. ಅನೇಕ ವರ್ಷಗಳ ಕಾಲ ತಮ್ಮ ಮಗ ಸಂತ ಆಗಸ್ಟಿನ್ ಅವರ ಮನಪರಿವರ್ತನೆಗಾಗಿ ಪ್ರಾರ್ಥಿಸಿದ ದೃಢ ವಿಶ್ವಾಸದ ಮಾದರಿಯಾದ ಸಂತ ಮೊನಿಕಾ ಅವರ ಹೆಸರನ್ನು ಪ್ರತಿಷ್ಠಾನಕ್ಕೆ ಇಡಲು ಅವರು ನಿರ್ಧರಿಸಿದರು. ಈ ಹೆಸರು ಯುವಜನರಿಗೆ ನೀಡುವ ಬೆಂಬಲವನ್ನಷ್ಟೇ ಅಲ್ಲ, ಪುನರ್ವಸತಿ ಮತ್ತು ಆಶಾಭರವಿನಲ್ಲಿ ತಾಯಂದಿರ ಮೂಲಭೂತ ಪಾತ್ರವನ್ನೂ ಪ್ರತಿಬಿಂಬಿಸುತ್ತದೆ. ಸಾಂತಾ ಮೊನಿಕಾದ ಪಯಣದಲ್ಲಿ ಅನೇಕ ಜೀವನ ಕಥೆಗಳು ಅಚ್ಚಳಿಯದೆ ಉಳಿದಿವೆ. ಅವುಗಳಲ್ಲಿ ಒಂದಾಗಿದೆ ಮಾರಿಸೆಲ್ ಎಂಬ ಯುವತಿಯ ಕಥೆ. ಆಕೆಯ ಜೀವನದಲ್ಲಿ ನೆಮ್ಮದಿಗೆ ಸ್ಥಳವೇ ಇರಲಿಲ್ಲ.

ಮಾರಿಸೆಲ್ ಅವರ ಕಥೆ

ಹುಟ್ಟಿದ ಕೂಡಲೇ ಪೋಷಕರನ್ನು ತೊರೆದುಹೋಗಿದ್ದ ಮಾರಿಸೆಲ್ ವಿವಿಧ ಆಶ್ರಯಗೃಹಗಳಲ್ಲಿ ಬೆಳೆದಳು. ಬಾಲ್ಯದಲ್ಲಿ ಅನುಭವಿಸಿದ ಆಳವಾದ ಪ್ರೀತಿಯ ಕೊರತೆಯು ಆಕೆಯನ್ನು ಮಾದಕ ವಸ್ತುಗಳ ವ್ಯಸನದತ್ತ ತಳ್ಳಿತು. ವರ್ಷಗಳ ಕಾಲ ವಿವಿಧ ಪುನರ್ವಸತಿ ಚಿಕಿತ್ಸೆಯನ್ನು ಪಡೆದಿದ್ದರೂ, ಸರ್ಕಾರವು ಆಕೆಯ ಮಕ್ಕಳ ಪಾಲನೆಯನ್ನು ತನ್ನ ವಶಕ್ಕೆ ತೆಗೆದುಕೊಂಡಾಗ ಆಕೆಯ ಜೀವನದ ಅತ್ಯಂತ ನೋವಿನ ಕ್ಷಣ ಎದುರಾಯಿತು. ತನ್ನ ಮಕ್ಕಳನ್ನು ಮರಳಿ ಪಡೆಯಲು ಚಿಕಿತ್ಸೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸುವುದೇ ಏಕೈಕ ಮಾರ್ಗವಾಗಿತ್ತು. ಆದರೆ ಅದು ಆಕೆಗೆ ಅಸಾಧ್ಯವೆನಿಸಿತು. ಸಾಂತಾ ಮೊನಿಕಾಗೆ ಬಂದ ಅದೇ ದಿನ ಆತ್ಮಹತ್ಯೆ ಮಾಡಿಕೊಳ್ಳಲು ಆಕೆ ನಿರ್ಧರಿಸಿದ್ದಳು. ಆದರೆ ಅನಿರೀಕ್ಷಿತ ಘಟನೆಯೊಂದು ಆಕೆಯನ್ನು ಅಲ್ಲೇ ಉಳಿಯುವಂತೆ ಮಾಡಿತು. ಮದರ್ ವಿಕ್ಕಿಯವರ ಮೆಕ್ಸಿಕನ್ ಉಚ್ಚಾರಣೆಯ ಮಾತಿನ ಶೈಲಿಯು ಆಕೆಯನ್ನು ಆಕರ್ಷಿಸಿತು. ಆ ಸಣ್ಣ ವಿಷಯವೇ ಆಕೆಯ ರಕ್ಷಣಾತ್ಮಕ ಮನೋಭಾವವನ್ನು ಕರಗಿಸಿ, ದೀರ್ಘ ಮತ್ತು ಕಠಿಣ ಪರಿವರ್ತನೆಯ ಪಯಣಕ್ಕೆ ಬಾಗಿಲು ತೆರೆಯಿತು. ಆ ಪಯಣದಲ್ಲಿ ಹಿನ್ನಡೆಗಳಿದ್ದವು, ನಿರುತ್ಸಾಹದ ಕ್ಷಣಗಳಿದ್ದವು ಮತ್ತು ಸಹೋದರಿಯರಿಗೆ ಆತಂಕದಿಂದ ಕೂಡಿದ ರಾತ್ರಿಗಳೂ ಇದ್ದವು. ಆದರೂ ನಿರಂತರ ಸಹಪ್ರಯಾಣ, ಸಹಾನುಭೂತಿಯುತ ಆಲಿಸುವಿಕೆ ಮತ್ತು ವೃತ್ತಿಪರ ಬೆಂಬಲದಿಂದ ಮಾರಿಸೆಲ್ ಹೊಸ ಜೀವನದ ಸಾಧ್ಯತೆಯನ್ನು ಅನುಭವಿಸಲು ಆರಂಭಿಸಿದಳು.

ಒಂದು ದಿನ ಪ್ರಾರ್ಥನಾ ಮಂದಿರದಲ್ಲಿ ಪ್ರಾರ್ಥಿಸುತ್ತಿದ್ದಾಗ, ದಾರಿಯಲ್ಲಿ ಗಾಯಗೊಂಡವನನ್ನು ಎಂದಿಗೂ ಕೈಬಿಡದ ಒಳ್ಳೆಯ ಸಮಾರ್ಯದವನಂತೆ, ಮಾರಿಸೆಲ್ ಅವರನ್ನು ದೇವರು ವೈಯಕ್ತಿಕವಾಗಿ ತನ್ನ ಜವಾಬ್ದಾರಿಗೆ ಒಪ್ಪಿಸುತ್ತಿದ್ದಾರೆ ಎಂಬ ಅನುಭವವಾದುದನ್ನು ಮಾತೆ ವಿಕ್ಕಿ ವಿಶೇಷವಾಗಿ ನೆನಪಿಸಿಕೊಳ್ಳುತ್ತಾರೆ. ಆ ಅನುಭವವು ಪ್ರತಿಯೊಬ್ಬರ ಜೊತೆಗೆ ಆಶೆಯನ್ನು ಕಳೆದುಕೊಳ್ಳದೆ ಸಹಪ್ರಯಾಣ ಮಾಡುವ ಅವರ ತಾಳ್ಮೆ ಮತ್ತು ಬದ್ಧತೆಯನ್ನು ಮತ್ತಷ್ಟು ಬಲಪಡಿಸಿತು. ಸ್ವಲ್ಪ ಸಮಯದ ನಂತರ, ಮಾರಿಸೆಲ್ ವಿಶೇಷ ಪುನರ್ವಸತಿ ಕೇಂದ್ರದಲ್ಲಿ ಚಿಕಿತ್ಸೆ ಪಡೆಯಲು ಒಪ್ಪಿಕೊಂಡಳು. ಮೊದಲು ಪಡೆದಿದ್ದ ಆಧ್ಯಾತ್ಮಿಕ ಸಹಪ್ರಯಾಣವೂ ಆಕೆಯ ಚಿಕಿತ್ಸೆಗೆ ಫಲ ನೀಡಿತು. ಚೇತರಿಕೆ ಮತ್ತು ಸ್ಥಿರತೆಯನ್ನು ಸಾಬೀತುಪಡಿಸಿದ ಬಳಿಕ, ಆಕೆಗೆ ತನ್ನ ಮಕ್ಕಳ ಪಾಲನಾ ಹಕ್ಕು ಮತ್ತೆ ದೊರೆಯಿತು.

ಇಂದು ಟಿಯೆರಾ ಡೆಲ್ ಫ್ಯೂಗೊದಲ್ಲಿ ಯೇಸುವಿನ ಶಿಷ್ಯೆಯರ ಧರ್ಮಪ್ರಚಾರವು ನಿಸ್ವಾರ್ಥ ಸೇವೆ ಮತ್ತು ಭರವಸೆಯ ಸಾಕ್ಷಿಯಾಗಿ ಮುಂದುವರಿಯುತ್ತಿದೆ. ಸಾಂತಾ ಮೊನಿಕಾ ಇಂದು ಅನೇಕ ಜನರಿಗೆ ತಾವು ಏಕಾಂಗಿಗಳಲ್ಲ ಮತ್ತು ಜೀವನವನ್ನು ಮರುನಿರ್ಮಿಸಿಕೊಳ್ಳುವುದು ಯಾವಾಗಲೂ ಸಾಧ್ಯ ಎಂಬುದನ್ನು ಅರಿಯುವ ಸ್ಥಳವಾಗಿದೆ.

ಮದರ್ ವಿಕ್ಕಿಯವರ ಮಾತುಗಳಲ್ಲಿ ಹೇಳುವುದಾದರೆ, "ಇಲ್ಲಿ ಬರುವ ಪ್ರತಿಯೊಬ್ಬ ಯುವಕ-ಯುವತಿಯೂ ಸಮಾಜ ಹೇರಿರುವ ಏಕಾಂತದ ನಡುವೆಯೂ ಸಹಪ್ರಯಾಣದ ಅನುಭವವನ್ನು ಪಡೆಯಬಹುದು. ನೀವು ಈ ಬಾಗಿಲನ್ನು ದಾಟಿ ಇಲ್ಲಿ ಕುಳಿತುಕೊಳ್ಳುವ ಕ್ಷಣದಿಂದಲೇ ನೀವು ಇನ್ನು ಮುಂದೆ ಏಕಾಂಗಿಯಲ್ಲ.”

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).