ಗಾಜಾದ ಮಾನವೀಯ ಬಿಕ್ಕಟ್ಟು ‘ದುರಂತ’ ಎಂಬ ಪದಕ್ಕೂ ಮೀರಿದೆ: ವಂ. ಗುರು ರೊಮಾನೆಲ್ಲಿ

ವ್ಯಾಟಿಕನ್ ವರದಿ

ಗಾಜಾದ ಪವಿತ್ರ ಕುಟುಂಬ ಧರ್ಮಕೇಂದ್ರದ ಧರ್ಮಗುರು ವಂ. ಗುರು ಗ್ಯಾಬ್ರಿಯೆಲ್ ರೊಮಾನೆಲ್ಲಿ ಅವರು ತುರ್ತು ಮಾನವೀಯ ನೆರವಿಗಾಗಿ ತಮ್ಮ ಮನವಿಯನ್ನು ಪುನರುಚ್ಚರಿಸಿದ್ದು, ಗಾಜಾದ ಪರಿಸ್ಥಿತಿ ಎಷ್ಟರ ಮಟ್ಟಿಗೆ ಹದಗೆಟ್ಟಿದೆಯೆಂದರೆ ಅದನ್ನು ವಿವರಿಸಲು "ದುರಂತ" ಎಂಬ ಪದವೂ ಸಾಕಾಗುವುದಿಲ್ಲ ಎಂದು ಎಚ್ಚರಿಸಿದ್ದಾರೆ.

ಧರ್ಮಕೇಂದ್ರದ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾದ ವೀಡಿಯೊ ಸಂದೇಶದಲ್ಲಿ ಹಾಗೂ ಇಟಲಿಯ ಕಥೋಲಿಕ ಸುದ್ದಿಸಂಸ್ಥೆ SIRಗೆ ನೀಡಿದ ಸಂದರ್ಶನದಲ್ಲಿ ಅರ್ಜೆಂಟೀನಾದ ಮೂಲದ ಈ ಧರ್ಮಗುರು, "ಇಲ್ಲಿನ ಪರಿಸ್ಥಿತಿ ದುರಂತವಾಗಿದೆ ಎಂದು ಜನರು ಹೇಳುವಾಗ, ನನ್ನನ್ನು ನಂಬಿ—ಅದು ನಿಜವಾಗಿಯೂ ದುರಂತವೇ. ವಾಸ್ತವವಾಗಿ ಅದನ್ನು ವಿವರಿಸಲು ಇನ್ನೂ ಪ್ರಬಲವಾದ ಪದದ ಅಗತ್ಯವಿದೆ" ಎಂದು ಹೇಳಿದ್ದಾರೆ.

ವಂ. ಗುರು ರೊಮಾನೆಲ್ಲಿ ಪ್ರತಿದಿನದ ಬದುಕಿನ ಕಠಿಣ ಹೋರಾಟವನ್ನು ವಿವರಿಸುತ್ತಾ, ಈಗ ಸಣ್ಣ ದೂರದ ಪ್ರಯಾಣಗಳೂ ಬಹಳ ಕಷ್ಟಕರವಾಗಿವೆ ಎಂದು ಹೇಳಿದ್ದಾರೆ. ಬಿಡಿಭಾಗಗಳು ಲಭ್ಯವಿಲ್ಲದ ಕಾರಣ ಧರ್ಮಕೇಂದ್ರದ ಹೆಚ್ಚಿನ ವಾಹನಗಳು ಬಳಕೆಗೆ ಯೋಗ್ಯವಾಗಿಲ್ಲ.

"ಒಂದು ಕಾರನ್ನು ಓಡಿಸಲು ಮತ್ತೊಂದು ಕಾರಿನ ಬ್ಯಾಟರಿಯನ್ನೇ ತೆಗೆದು ಬಳಸಬೇಕಾಯಿತು" ಎಂದು ಅವರು ವಿವರಿಸಿದ್ದಾರೆ. ಧರ್ಮಗುರುಗಳು ಬಳಸುತ್ತಿರುವ ಏಕೈಕ ವಾಹನವೂ ಇತ್ತೀಚೆಗೆ ಎಂಜಿನ್ ಎಣ್ಣೆಯ ಗುಣಮಟ್ಟ ಕುಸಿದಿರುವುದು ಹಾಗೂ ಡೀಸೆಲ್ ಇಂಧನ ವ್ಯವಸ್ಥೆ ಸಂಪೂರ್ಣವಾಗಿ ಮುಚ್ಚಿಹೋಗಿದ್ದರಿಂದ ಬಹುತೇಕ ಸ್ಥಗಿತಗೊಳ್ಳುವ ಹಂತಕ್ಕೆ ತಲುಪಿತ್ತು. ಇಂಧನ ಅತ್ಯಂತ ಅಪರೂಪವಾಗಿದ್ದು, ಅದರ ಬೆಲೆಯೂ ಅತಿಯಾಗಿ ಏರಿಕೆಯಾಗಿದೆ ಎಂದು ಅವರು ತಿಳಿಸಿದ್ದಾರೆ. ಒಂದು ಲೀಟರ್ ಡೀಸೆಲ್‌ಗೆ ಸುಮಾರು 13 ಅಮೆರಿಕನ್ ಡಾಲರ್ ಬೆಲೆ ಇದೆ.

ಇದೇ ವೇಳೆ, ಅನೇಕ ಜನರು ಮರುಬಳಕೆಯ ಪ್ಲಾಸ್ಟಿಕ್ ಮತ್ತು ನೈಲಾನ್ ಅನ್ನು ಸಂಸ್ಕರಿಸಿ ತಯಾರಿಸಿದ ತಾತ್ಕಾಲಿಕ ಇಂಧನವನ್ನು ಬಳಸಲು ಆರಂಭಿಸಿದ್ದಾರೆ. "ಆ ಪ್ರಕ್ರಿಯೆ ಹೇಗೆ ನಡೆಯುತ್ತದೆ ಎಂಬುದು ನನಗೆ ನಿಖರವಾಗಿ ತಿಳಿದಿಲ್ಲ. ಆದರೆ ಮರುಬಳಕೆಯ ಪ್ಲಾಸ್ಟಿಕ್‌ನಿಂದ ಡೀಸೆಲ್ ತಯಾರಿಸುತ್ತಿದ್ದಾರೆ ಎಂದು ಅನೇಕರು ಹೇಳುತ್ತಿದ್ದಾರೆ. ಸಮಸ್ಯೆಯೆಂದರೆ ಅದು ಅತ್ಯಂತ ಕಳಪೆ ಗುಣಮಟ್ಟದ ಇಂಧನವಾಗಿದ್ದು, ವಾಹನಗಳು ಮತ್ತು ಜನರೇಟರ್‌ಗಳಿಗೆ ಗಂಭೀರ ಹಾನಿಯನ್ನುಂಟುಮಾಡುವ ಅಪಾಯವಿದೆ" ಎಂದು ಅವರು ಹೇಳಿದರು.

ಈ ಬಿಕ್ಕಟ್ಟು ಎಷ್ಟರ ಮಟ್ಟಿಗೆ ತೀವ್ರವಾಗಿದೆಯೆಂದರೆ, ಧರ್ಮಕೇಂದ್ರದ ವಾಹನಗಳ ಬದಲಿಗೆ ಕತ್ತೆಗಾಡಿಯನ್ನು ಬಳಸುವ ಯೋಚನೆಯನ್ನೂ ವಂ. ಗುರು ರೊಮಾನೆಲ್ಲಿ ಮಾಡಿದ್ದರು. ಆದರೆ ಆ ಆಯ್ಕೆಯೂ ಈಗ ಸಾಧ್ಯವಿಲ್ಲ. "ಈಗ ಒಂದು ಕತ್ತೆಯ ಬೆಲೆ ಸುಮಾರು 50,000 ಶೆಕೆಲ್‌ಗಳು, ಅಂದರೆ ಸುಮಾರು 16,000 ರಿಂದ 17,000 ಅಮೆರಿಕನ್ ಡಾಲರ್‌ಗಳು ಎಂದು ನನಗೆ ತಿಳಿಸಲಾಯಿತು. ಯುದ್ಧಕ್ಕೂ ಮೊದಲು ಅದರ ಬೆಲೆ ಕೇವಲ 1,000 ರಿಂದ 2,000 ಶೆಕೆಲ್‌ಗಳಷ್ಟಿತ್ತು" ಎಂದು ಅವರು ಹೇಳಿದರು. ದೈನಂದಿನ ಜೀವನಕ್ಕೆ ಸಾರಿಗೆ ಅತ್ಯಗತ್ಯವಾಗಿದೆ ಎಂದು ಧರ್ಮಗುರು ಒತ್ತಿಹೇಳಿದರು. ಆಸ್ಪತ್ರೆಗಳು, ಶಾಲೆಗಳು ಮತ್ತು ಉದ್ಯೋಗ ಸ್ಥಳಗಳಿಗೆ ತಲುಪಲು, ರೋಗಿಗಳನ್ನು ಭೇಟಿ ಮಾಡಲು ಹಾಗೂ ಮಾನವೀಯ ನೆರವನ್ನು ತಲುಪಿಸಲು ಅದು ಅನಿವಾರ್ಯವಾಗಿದೆ.

"ಗಾಜಾ ಅಷ್ಟು ಚಿಕ್ಕ ಪ್ರದೇಶವಲ್ಲ; ಎಲ್ಲವನ್ನೂ ಕಾಲ್ನಡಿಗೆಯಲ್ಲೇ ಮಾಡಲು ಸಾಧ್ಯವಿಲ್ಲ" ಎಂದು ಅವರು ಹೇಳುತ್ತಾ, ಸಂಘರ್ಷದ ಸಂದರ್ಭದಲ್ಲಿ ಅನೇಕ ರಸ್ತೆಗಳು ಸಂಪೂರ್ಣವಾಗಿ ನಾಶವಾಗಿವೆ ಎಂದು ನೆನಪಿಸಿದರು.

ಕೆಲವೇ ಕೆಲವು ಆಶಾದಾಯಕ ಬೆಳವಣಿಗೆಗಳಲ್ಲಿ, ಶಾಂತಿ ಮಂಡಳಿಗೆ ಸಂಬಂಧಿಸಿದ ಅಂತರರಾಷ್ಟ್ರೀಯ ಪಡೆ ರಫಾ ಪ್ರದೇಶವನ್ನು ಪ್ರವೇಶಿಸಲು ಇಸ್ರಾಯೇಲ್ ಸರ್ಕಾರವು ಪ್ರಾಥಮಿಕ ಅನುಮೋದನೆ ನೀಡಿರುವ ವರದಿಯನ್ನು ವಂ. ಗುರು ರೊಮಾನೆಲ್ಲಿ ಉಲ್ಲೇಖಿಸಿದರು. "ಕನಿಷ್ಠ ಅದು ಮೊದಲ ಹೆಜ್ಜೆಯಾಗಲಿದೆ.”

ಆದಾಗ್ಯೂ, ಗಾಜಾದ ನಾಗರಿಕರಿಗೆ ಬೆಂಬಲ ನೀಡುವುದೇ ಈಗಿನ ಅತ್ಯಂತ ತುರ್ತು ಅಗತ್ಯವಾಗಿದೆ ಎಂದು ಅವರು ಒತ್ತಿಹೇಳಿದರು. "ಜನರು ಯಾವುದೂ ಇಲ್ಲದ ಸ್ಥಿತಿಯಲ್ಲಿ ಬದುಕುತ್ತಿದ್ದಾರೆ. ಪುನರ್‌ನಿರ್ಮಾಣ ಖಂಡಿತವಾಗಿಯೂ ಅಗತ್ಯ. ಆದರೆ ಅದೇ ಸಮಯದಲ್ಲಿ ದೈನಂದಿನ ಜೀವನಕ್ಕೆ ಬೇಕಾಗುವ ಎಲ್ಲಾ ಮೂಲಭೂತ ಅಗತ್ಯಗಳೂ ಅಷ್ಟೇ ಮುಖ್ಯವಾಗಿವೆ" ಎಂದು ವಂ. ಗುರು ಗ್ಯಾಬ್ರಿಯೆಲ್ ರೊಮಾನೆಲ್ಲಿ ಹೇಳಿದರು.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).