ಪೂಜ್ಯ ಜಗದ್ಗುರುಗಳ ಸ್ಪೇನ್ ಭೇಟಿಗಾಗಿ ರಚಿಸಲಾದ ಗೀತೆಯಲ್ಲಿ ಒಂದಾದ 1,700ಕ್ಕೂ ಹೆಚ್ಚು ಧ್ವನಿಗಳು
ಲೇಖಕರು: ಕೀಲ್ ಗಸ್ಸಿ-ಗ್ರ್ಯಾನ್ ಕೆನರಿಯಾ
ಮೊದಲು ಪೂಜ್ಯ ಜಗದ್ಗುರು 2ನೇ ಜಾನ್ ಪಾಲ್ ಅವರೊಂದಿಗೆ “Jesus Christ, You Are My Life”, ನಂತರ “Firm in the Faith”, ಮತ್ತು ಪೋಲೆಂಡ್ನಲ್ಲಿ ಪೂಜ್ಯ ಜಗದ್ಗುರು ಫ್ರಾನ್ಸಿಸ್ ಅವರೊಂದಿಗೆ “Blessed Are the Merciful” ಗೀತೆಗಳು ಬಂದವು. ಈಗ ಪೂಜ್ಯ ಜಗದ್ಗುರು 14ನೇ ಲಿಯೋ ಅವರ ಸ್ಪೇನ್ ಅಪೋಸ್ತೋಲಿಕ ಪ್ರವಾಸವು ನಮಗೆ ಮತ್ತೊಂದು ಸುಂದರ ಗೀತೆಯನ್ನು ನೀಡಿದೆ: “ಅಲ್ಸಾ ಲಾ ಮಿರಾದಾ” (“ಮೇಲಕ್ಕೆ ನೋಡು”).
ದೇಶದ ವಿವಿಧ ದೇವಾಲಯಗಳಲ್ಲಿ ಚಿತ್ರೀಕರಿಸಲಾದ 1,700ಕ್ಕೂ ಹೆಚ್ಚು ವಿಭಿನ್ನ ಧ್ವನಿಗಳು ಈ ಪ್ರವಾಸದ ಅಧಿಕೃತ ಗೀತೆಯಲ್ಲಿ ಒಂದಾಗಿವೆ. ಈ ಗೀತೆ ಉತ್ಸಾಹಭರಿತ, ಸಂತೋಷದಾಯಕ, ಮನಮುಟ್ಟುವ ಮತ್ತು ಸುಲಭವಾಗಿ ನೆನಪಿನಲ್ಲಿ ಉಳಿಯುವಂತಿದೆ. ಇದು ಕೇವಲ ಒಂದು ಹಾಡಲ್ಲ; ಕ್ರೈಸ್ತರು ನಂಬುವ ಸತ್ಯವನ್ನು ನೆನಪಿಸುವ ಒಂದು ಸಂದೇಶವಾಗಿದೆ: “ನಾನು ನನ್ನ ದೃಷ್ಟಿಯನ್ನು ಮೇಲಕ್ಕೆ ಎತ್ತುತ್ತೇನೆ, ನನ್ನ ಕಣ್ಣುಗಳು ಯೇಸುವಿನ ಮೇಲೆ ನೆಟ್ಟಿವೆ. ನಾನು ನನ್ನ ದೃಷ್ಟಿಯನ್ನು ಮೇಲಕ್ಕೆ ಎತ್ತುತ್ತೇನೆ, ಶಿಲುಬೆಯ ಮೇಲೆ ಕೇಂದ್ರೀಕರಿಸುತ್ತೇನೆ. ನಾನು ಸ್ವರ್ಗದ ಕಡೆಗೆ ನೋಡಿದಾಗ, ಅದರ ಬೆಳಕಿನಲ್ಲಿ ಎಲ್ಲವೂ ಹೊಸದಾಗುತ್ತದೆ.”
ಕ್ಷಣಿಕ ಸಂತೋಷಗಳನ್ನು ಹೊಗಳುವ ಮತ್ತು ಭೌತಿಕತೆಯನ್ನು ಉತ್ತೇಜಿಸುವ ಇಂದಿನ ಜಗತ್ತಿನಲ್ಲಿ, “ಅಲ್ಸಾ ಲಾ ಮಿರಾದಾ” ನಮ್ಮ ಗಮನವನ್ನು ನಾವು ಕರೆಯಲ್ಪಟ್ಟಿರುವ ಉನ್ನತ ಜೀವನದತ್ತ ಕೊಂಡೊಯ್ಯುತ್ತದೆ: “ನಾನು ನೆಲದ ಕಡೆಗೆ ನೋಡಲು ಸೃಷ್ಟಿಸಲ್ಪಟ್ಟವನಲ್ಲ. ನಾನು ನಿನ್ನ ಕಡೆಗೆ ನೋಡಲು ಜನಿಸಿದ್ದೇನೆ... ನಿನ್ನಲ್ಲಿ ವಿಶ್ರಾಂತಿ ಪಡೆಯುವ ತನಕ ನನ್ನ ಹೃದಯಕ್ಕೆ ಶಾಂತಿ ಇಲ್ಲ.”
ಕ್ಯಾಟಲೋನಿಯಾದ ಉತ್ತರ ಭಾಗದಿಂದ ಬಂದ ಒಂದು ಧ್ವನಿ
ಗೀತೆಯ ಸಾಹಿತ್ಯ ರಚನೆಯಾಗಿ, ಸಂಗೀತ ಸಂಯೋಜನೆಯೂ ಪೂರ್ಣಗೊಂಡ ನಂತರ, ಆ ಪದಗಳಿಗೆ ಧ್ವನಿ ಮತ್ತು ಜೀವ ತುಂಬುವ ಗಾಯಕರ ಹುಡುಕಾಟ ಆರಂಭವಾಯಿತು. ಪೆರೆ ಪರೇಡಸ್ ಇಝರ್ ಅವರಿಗಾಗಿ, ಈ ಪ್ರಕ್ರಿಯೆ ಕೇವಲ ಒಂದು ವಾರದೊಳಗೆ ನಡೆಯಿತು.ಬಾರ್ಸಿಲೋನಾದ ಧರ್ಮಕೇಂದ್ರದ ಯುವಜನರ ತಂಡವು ಗೀತೆಯನ್ನು ಧ್ವನಿಮುದ್ರಿಸಲು ಶೀಘ್ರವಾಗಿ ಒಂದು ತಂಡವನ್ನು ರಚಿಸಬೇಕಾಗಿದ್ದ ಕಾರಣ, ವಿವಿಧ ಕಡೆಗಳಿಗೆ ಮಾಹಿತಿ ಕಳುಹಿಸಲು ಆರಂಭಿಸಿತು.
“ಅವರು ನನ್ನನ್ನು ಸಂಪರ್ಕಿಸಿದ್ದು ಹೀಗೆ. ನಾನು ವಾಸ್ತವವಾಗಿ ಬೇರೆ ನಗರದಿಂದ ಬಂದವನು, ಆದರೆ ಈ ಯೋಜನೆಯಲ್ಲಿ ಭಾಗವಹಿಸಲು ಅವರು ನನ್ನನ್ನು ಆಹ್ವಾನಿಸಿದರು,” ಎಂದು ಅವರು ವ್ಯಾಟಿಕನ್ ಸುದ್ದಿ ಸಂಸ್ಥೆಗೆ ತಿಳಿಸಿದರು. ಹೆಚ್ಚಿನ ಜನರ ಅಗತ್ಯವಿದ್ದ ಕಾರಣ, ತಂಡವು ಕ್ಯಾಟಲೋನಿಯಾದ ಇತರ ಭಾಗಗಳಲ್ಲಿಯೂ ಗಾಯಕರನ್ನು ಹುಡುಕಿತು.
ತಂಡದ ಭಾಗವಾದ ನಂತರ, ಪೆರೆ ಅವರ ಪ್ರಕಾರ, ಇಡೀ ಅನುಭವವೇ ಅವಾಸ್ತವಿಕವಾಗಿ ಭಾಸವಾಯಿತು. ವಿಶೇಷವಾಗಿ, ಕೆಲವೇ ಗಂಟೆಗಳಲ್ಲಿ ಪ್ರವಾಸಿಗರಿಂದ ತುಂಬಿ ಹೋಗಲಿದ್ದ ಪ್ರಸಿದ್ಧ ಸಾಗ್ರಾದ ಫಮಿಲಿಯಾ ಮಹಾಗಿರಿಜಾಘರದಲ್ಲಿ ಬೆಳಿಗ್ಗೆ 7 ಗಂಟೆಗೆ ಹಾಜರಾಗಬೇಕಾಗಿದ್ದ ಅನುಭವ ಅವರಿಗೆ ಮರೆಯಲಾಗದಂತಾಯಿತು. “ಅದು ಅತ್ಯಂತ ವಿಶೇಷವಾದ ಅನುಭವವಾಗಿತ್ತು, ಏಕೆಂದರೆ ನಾವು ಮುಂಜಾನೆಲೇ ಎದ್ದಿದ್ದೆವು, ಸಾಗ್ರಾದ ಫಮಿಲಿಯಾ ಸಂಪೂರ್ಣವಾಗಿ ಖಾಲಿಯಾಗಿತ್ತು.” ಗೌಡಿಯ ಅದ್ಭುತ ಕಲಾಕೃತಿಯ ಬಣ್ಣದ ಗಾಜಿನ ಕಿಟಕಿಗಳ ಮೇಲೆ ಸೂರ್ಯನ ಕಿರಣಗಳು ಬೀಳಲು ಆರಂಭಿಸುತ್ತಿದ್ದಂತೆ, ಪೆರೆ ಅವರ ಧ್ವನಿಯೂ ಇತರ ಗಾಯಕರ ಧ್ವನಿಗಳೊಂದಿಗೆ ಒಂದಾಯಿತು.
“ನನ್ನ ಜೀವನದಲ್ಲಿ ಇಂತಹ ಅನುಭವ ಮತ್ತೊಮ್ಮೆ ಸಿಗುತ್ತದೆ ಎಂದು ನಾನು ಭಾವಿಸುವುದಿಲ್ಲ,” ಎಂದು ಅವರು ಹೇಳಿದರು. ಈ ಸ್ಥಳವು ತನ್ನ ವಿಶಿಷ್ಟ ಕಲಾತ್ಮಕ ಮತ್ತು ವಾಸ್ತುಶಿಲ್ಪ ಶೈಲಿಗಳ ಸಂಯೋಜನೆಯಿಂದ ಜಗತ್ತಿನಾದ್ಯಂತ ಗುರುತಿಸಲ್ಪಟ್ಟಿದೆ. ಕ್ಯಾಟಲನ್ ಮಾಡರ್ನಿಸ್ಮೆ (ಸ್ಪ್ಯಾನಿಷ್ ಆರ್ಟ್ ನುವೋ ಶೈಲಿಯ ಒಂದು ರೂಪ), ಆರ್ಟ್ ನುವೋ ಮತ್ತು ಗೋಥಿಕ್ ಪುನರುಜ್ಜೀವನ ಶೈಲಿಗಳ ಸಂಗಮವನ್ನು ಇಲ್ಲಿ ಕಾಣಬಹುದು. ಅಲ್ಲದೆ, ಇದು ಸ್ಥಳೀಯರಿಗೆ ಅಪಾರ ಹೆಮ್ಮೆಯ ಸಂಕೇತವೂ ಆಗಿದೆ.ಬಾರ್ಸಿಲೋನಾದ ಹೊರವಲಯದಲ್ಲಿರುವ ಗ್ರನೊಲರ್ಸ್ ಪಟ್ಟಣದವರಾದ ಪೆರೆ, ಈ ಮಹಾಗಿರಿಜಾಘರವು ನಗರದ ಪಾಲಿಗೆ ಎಷ್ಟು ಸಾಂಕೇತಿಕ ಮಹತ್ವವನ್ನು ಹೊಂದಿದೆ ಎಂಬುದನ್ನು ಒತ್ತಿಹೇಳಿದರು. ಈ ಆಕಾಶಮುಟ್ಟುವ ದೇವಾಲಯವು ಗೀತೆಯ ಸಂದೇಶಕ್ಕೂ ಪರಿಪೂರ್ಣವಾಗಿ ಹೊಂದಿಕೆಯಾಗುತ್ತದೆ. “ವಾರದ ಯಾವುದೇ ದಿನ ನೀವು ಬಾರ್ಸಿಲೋನಾಕ್ಕೆ ಹೋದರೂ, ನಗರದ ಅನೇಕ ಸ್ಥಳಗಳಿಂದ ಸಾಗ್ರಾದ ಫಮಿಲಿಯಾವನ್ನು ನೋಡಬಹುದು. ಆದ್ದರಿಂದ ಇದು ನಿಮ್ಮ ದೈನಂದಿನ ಜೀವನದಲ್ಲಿಯೇ ಅನುಭವಿಸಬಹುದಾದ ಒಂದು ವಾಸ್ತವಿಕ ಅನುಭವವಾಗಿದೆ,” ಎಂದು ಅವರು ಹೇಳಿದರು.
ಸಾಹಿತ್ಯದ ಹಿಂದಿರುವ ಅರ್ಥ
ಪೆರೆ ಅವರ ಪಾಲಿಗೆ, “ಅಲ್ಸಾ ಲಾ ಮಿರಾದಾ” ಗೀತೆಯ ಸಾಹಿತ್ಯವು ದೇವರು ತಮ್ಮ ತಪ್ಪುಗಳ ಮೇಲೆ ಅಥವಾ ತಮ್ಮ ಜೀವನದ ಸಮಸ್ಯೆಗಳ ಮೇಲೆ ಮಾತ್ರ ಗಮನಹರಿಸುವುದಿಲ್ಲ ಎಂಬ ಸಂದೇಶವನ್ನು ನೀಡುತ್ತದೆ. ಈ ಗೀತೆ ಎಂದರೆ “ಸ್ವರ್ಗದಲ್ಲಿರುವುದನ್ನು, ಇಲ್ಲಿ ಇರುವ ಎಲ್ಲ ವಿಷಯಗಳಿಗಿಂತ ಮೇಲಿರುವುದನ್ನು ನೋಡುವುದು” ಎಂದು ಅವರು ಹೇಳಿದರು. ಸ್ಪೇನ್ನಾದ್ಯಂತ ನಡೆದ ಪೂಜ್ಯ ಜಗದ್ಗುರುಗಳ ಭೇಟಿಗಾಗಿ ವಿಶೇಷವಾಗಿ ರಚಿಸಲಾದ ಈ ಗೀತೆಯನ್ನು ಕೇವಲ ಸ್ಪ್ಯಾನಿಷ್ ಭಾಷೆಯಲ್ಲಿ ಮಾತ್ರವಲ್ಲ, ಕ್ಯಾಟಲನ್ ಭಾಷೆಯಲ್ಲಿಯೂ ಹಾಡಲಾಗಿದೆ. ಕ್ಯಾಟಲೋನಿಯಾದ ಜನರಿಗೆ ಇದು ಅತ್ಯಂತ ಮಹತ್ವದ ಆಯ್ಕೆಯಾಗಿತ್ತು.
ಪೆರೆ ಅವರ ಪ್ರಕಾರ, ಕ್ಯಾಟಲನ್ ಭಾಷೆಯು ಅವರ ಗುರುತಿನೊಂದಿಗೆ ಆಳವಾಗಿ ಸಂಬಂಧ ಹೊಂದಿದೆ. “ಕ್ಯಾಟಲನ್ ಭಾಷೆಯಲ್ಲಿ ದೇವರನ್ನು ಸ್ತುತಿಸುವುದು ಎಂದರೆ, ನಮ್ಮ ಗುರುತಿನ ಈ ಭಾಗದೊಂದಿಗೆ ದೇವರನ್ನು ಸ್ತುತಿಸುವುದಾಗಿದೆ,” ಎಂದು ಅವರು ಒತ್ತಿಹೇಳಿದರು.
ಧಾರ್ಮಿಕ ಅನುಭವದ ಮಹತ್ವವನ್ನು, ಅಂದರೆ ವ್ಯಕ್ತಿಯ ದೇವರೊಂದಿಗಿನ ಸಂಬಂಧವನ್ನು, ವಿಶೇಷವಾಗಿ ಉಲ್ಲೇಖಿಸಿ, “ಇದು ರಾಜಕಾರಣದ ಮೇಲೆ ಅವಲಂಬಿತವಾಗಿರುವುದಿಲ್ಲ; ಇದು ಸಾಂಸ್ಕೃತಿಕ ಅಥವಾ ರಾಜಕೀಯ ಗುರುತಿನ ಮೇಲೆಯೂ ಅವಲಂಬಿತವಾಗಿರುವುದಿಲ್ಲ,” ಎಂದು ಪೆರೆ ಹೇಳಿದರು. “ಇದು ಆತ್ಮದ ಒಂದು ಭಾಗವಾಗಿದೆ.”
ನಿರೀಕ್ಷೆಗಳು ಮತ್ತು ಗುಂಪುಗಳನ್ನು ಮೀರಿದ ಸಂದೇಶ
ಸ್ಪೇನ್ನಲ್ಲಿ ಕಳೆದ ಏಳು ದಿನಗಳ ನಂತರ, ಈ ಗೀತೆಯು ಅಪೋಸ್ತೋಲಿಕ ಪ್ರವಾಸದ ಸಂದೇಶ, ದೃಶ್ಯಗಳು ಮತ್ತು ಅನುಭವಗಳೊಂದಿಗೆ ಸಂಪೂರ್ಣವಾಗಿ ಹೊಂದಿಕೆಯಾಗಿತ್ತು. ಪೆರೆ ಅವರ ಅಭಿಪ್ರಾಯದಲ್ಲಿ, ಪೂಜ್ಯ ಜಗದ್ಗುರುಗಳ ಸಂದೇಶಗಳು “ಯಾರೊಬ್ಬರ ನಿರೀಕ್ಷೆಗಳಿಗೆ ಅಥವಾ ಯಾವುದೇ ನಿರ್ದಿಷ್ಟ ಗುಂಪಿನ ಚೌಕಟ್ಟಿಗೆ ಸೀಮಿತವಾಗಿಲ್ಲ. ಅವರು ನಿಜವಾಗಿಯೂ ನಮ್ಮ ನಡುವಿನ ಎಲ್ಲ ಭಿನ್ನತೆಗಳನ್ನು ಮೀರಿದ ಸಂದೇಶವನ್ನು ನೀಡುತ್ತಿದ್ದಾರೆ.” ಯಾವುದೇ ರಾಜಕೀಯ ಪಕ್ಷ ಅಥವಾ ಗುಂಪಿನ ಪರವಾಗಿ ನಿಲ್ಲದಿದ್ದರೂ, ಪೂಜ್ಯ ಜಗದ್ಗುರು 14ನೇ ಲಿಯೋ ಅವರು ಒಂದು ವಿಷಯದ ಬಗ್ಗೆ ಸ್ಪಷ್ಟ ನಿಲುವು ತಾಳಿದರು: ಐಕ್ಯತೆ.
“ಅಲ್ಸಾ ಲಾ ಮಿರಾದಾ” ಜನರನ್ನು ಒಗ್ಗೂಡಿಸುವ ಉದ್ದೇಶದಿಂದ ರಚಿಸಲಾದ ಗೀತೆಯಾಗಿದೆ. ಇದು ಇಂದಿನ ಜಾಗತಿಕ ಸಮಸ್ಯೆಗಳ ಬಗ್ಗೆ ಮಾತನಾಡುವುದರ ಜೊತೆಗೆ, ದೇವರೊಂದಿಗೆ ಸಂಬಂಧವನ್ನು ಬೆಳೆಸಿಕೊಳ್ಳುವ ಮಹತ್ವವನ್ನೂ ಒತ್ತಿಹೇಳುತ್ತದೆ. ಈ ಗೀತೆಯು ಕ್ರೈಸ್ತ ಸಂದೇಶವನ್ನು ಇನ್ನಷ್ಟು ಜನರ ಬಳಿಗೆ ಕೊಂಡೊಯ್ಯಲಿ ಅಥವಾ ಇತರರು ಅದನ್ನು ಹೊಸ ದೃಷ್ಟಿಕೋನದಿಂದ ಕಾಣಲು ಸಹಾಯ ಮಾಡಲಿ ಎಂಬುದು ಪೆರೆ ಅವರ ಆಶಯವಾಗಿದೆ.
ಇದಲ್ಲದೆ, “ಅಲ್ಸಾ ಲಾ ಮಿರಾದಾ” ಎಲ್ಲರೊಂದಿಗೂ ಮಾತನಾಡುವ ಗೀತೆಯಾಗಿದೆ—“ಶಾಂತಿ ಮತ್ತು ಸ್ವಾತಂತ್ರ್ಯವನ್ನು ಹುಡುಕುತ್ತಿರುವವರಿಂದ” ಹಿಡಿದು “ಒಂದು ನೆಲೆಯನ್ನು ಹುಡುಕುತ್ತಾ ಸಮುದ್ರವನ್ನು ದಾಟುತ್ತಿರುವವರಿಗೂ.”
ನಾವು ಯಾವ ರಾಜಕೀಯ ಪಕ್ಷವನ್ನು ಬೆಂಬಲಿಸುತ್ತೇವೆಯೋ, ಯಾವ ಭಾಷೆಯನ್ನು ಮಾತನಾಡುತ್ತೇವೆಯೋ, ಅಥವಾ ಯಾವ ಸ್ಥಳವನ್ನು ನಮ್ಮ ಮನೆಯೆಂದು ಕರೆಯುತ್ತೇವೆಯೋ ಎಂಬುದನ್ನು ಮೀರಿ, ಈ ಗೀತೆ ನಮಗೆ ಒಂದು ನೆನಪನ್ನು ನೀಡುತ್ತದೆ: “ನಿನ್ನ ಕಣ್ಣುಗಳಲ್ಲಿ ವಿಶ್ರಾಂತಿ ಪಡೆಯುವ ಸ್ಥಳವನ್ನು ಕಂಡುಕೊಳ್ಳಲು ನಾವು ಕರೆಯಲ್ಪಟ್ಟಿದ್ದೇವೆ.”
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
