ಹನೋಯಿಯ ಪವಿತ್ರ ಶಿಲುಬೆಯ ಪ್ರೇಮಿಗಳ ಸಭೆ: ಮಾನವ ಘನತೆಗೆ ಶುಭಸಂದೇಶದ ಸಾಕ್ಷಿ

ಲೇಖಕರು: ನ್ಗೋಕ್ ನ್ಗುಯೆನ್

ಇಂದಿನ ವಿಯೆಟ್ನಾಂ ಸಮಾಜದಲ್ಲಿ, ಜನರು ಭೌತಿಕ ಮೌಲ್ಯಗಳು ಮತ್ತು ಶೀಘ್ರವಾಗಿ ಸಂಪತ್ತನ್ನು ಗಳಿಸುವ ಬಯಕೆಯತ್ತ ಹೆಚ್ಚಾಗಿ ಗಮನ ಹರಿಸುತ್ತಿದ್ದಾರೆ. ಇದರ ಪರಿಣಾಮವಾಗಿ ಸಾಮಾನ್ಯ ಹಿತದ ಬಗ್ಗೆ ಇರುವ ಕಾಳಜಿ ಮತ್ತು ಮಾನವ ಘನತೆಯ ಗೌರವವು ಕುಸಿಯುತ್ತಿದೆ. ಸ್ವಾರ್ಥಪರ ವ್ಯಕ್ತಿವಾದವು ಈ ಗುರಿಗಳಿಗೆ ಅಡ್ಡಿಯಾಗುವವರನ್ನು ಸಮಾಜದ ಅಂಚಿಗೆ ತಳ್ಳುತ್ತಿದೆ. 

ಅತ್ಯಂತ ದುರ್ಬಲ ವರ್ಗದಲ್ಲಿರುವವರು ಅಂಗವಿಕಲರು ಮತ್ತು ವೃದ್ಧರು. ಅವರನ್ನು ಸಮಾಜಕ್ಕೆ ಯಾವುದೇ ಉಪಯೋಗವಿಲ್ಲದ ಹೊರೆಯೆಂದು ಪರಿಗಣಿಸಲಾಗುತ್ತದೆ. ಅದೇ ರೀತಿ, ವಿಶೇಷವಾಗಿ ಗಂಡು ಮಕ್ಕಳಿಗೆ ಹೆಚ್ಚಿನ ಮಹತ್ವ ನೀಡುವ ಸಮಾಜದಲ್ಲಿ ಹೆಣ್ಣು ಶಿಶುಗಳನ್ನು ಅನಗತ್ಯವೆಂದು ಕಾಣಲಾಗುತ್ತದೆ. ವಿಯೆಟ್ನಾಂನ ದೂರದ ಪ್ರದೇಶಗಳಲ್ಲಿ ವಾಸಿಸುವ ಬಡ ಜನಾಂಗೀಯ ಅಲ್ಪಸಂಖ್ಯಾತ ಸಮುದಾಯಗಳೂ ಇದೇ ನಿರ್ಲಕ್ಷ್ಯಕ್ಕೆ ಒಳಗಾಗುತ್ತಿದ್ದಾರೆ.

ಆದರೆ, ಹನೋಯಿಯ ಪವಿತ್ರ ಶಿಲುಬೆಯ ಪ್ರೇಮಿಗಳ ಧಾರ್ಮಿಕ ಸಹೋದರಿಯರು (LHC) ಸಮಾಜದಲ್ಲಿ ವ್ಯಕ್ತಿಯ ಸ್ಥಾನಮಾನ ಅಥವಾ ಪರಿಸ್ಥಿತಿ ಏನೇ ಇರಲಿ, ಪ್ರತಿಯೊಬ್ಬ ಮಾನವನೂ ಸಹಜವಾದ ಘನತೆಯನ್ನು ಹೊಂದಿದ್ದಾನೆ ಎಂದು ಗುರುತಿಸುತ್ತಾರೆ. ಆದ್ದರಿಂದ, ಬಡವರು, ಅಂಚಿನಲ್ಲಿರುವವರು, ವೃದ್ಧರು ಮತ್ತು ರಕ್ಷಣೆಯಿಲ್ಲದವರ ಘನತೆಯನ್ನು ಗುರುತಿಸಿ ಗೌರವಿಸುವ ಕಾರ್ಯದಲ್ಲಿ ಈ ಧಾರ್ಮಿಕ ಸಹೋದರಿಯರು ದಣಿವರಿಯದೆ ಸೇವೆ ಸಲ್ಲಿಸುತ್ತಿದ್ದಾರೆ.

ಸ್ವಯಂ ಕಾಳಜಿಯ ಪಾಠ

LHC ಧಾರ್ಮಿಕ ಸಹೋದರಿಯರು, “ಪ್ರೇಮದ ಮನೆ” (House of Love) ಎಂಬ ವಿಶೇಷ ಸಮುದಾಯವನ್ನು ಸ್ಥಾಪಿಸುವ ಮೂಲಕ ಅಂಚಿನಲ್ಲಿರುವ ಜನರ ನೋವನ್ನು ನಿವಾರಿಸಲು ಮತ್ತು ಮಾನವ ಘನತೆಯನ್ನು ಗೌರವಿಸಲು ತಮ್ಮ ಕೊಡುಗೆಯನ್ನು ನೀಡುತ್ತಿದ್ದಾರೆ. ಈ ಮನೆಯಲ್ಲಿ, ಅಸಹಾಯಕರಾದ ವೃದ್ಧರು, ಕುರುಡುತನ, ನರವೈಜ್ಞಾನಿಕ ಸಮಸ್ಯೆಗಳು ಹಾಗೂ ವಿಶೇಷ ಸಂದರ್ಭಗಳಲ್ಲಿ ಪಾರ್ಶ್ವವಾಯುವಿನಂತಹ ಅಂಗವೈಕಲ್ಯಗಳನ್ನು ಹೊಂದಿರುವವರು ಸೇರಿದಂತೆ, ಕಠಿಣ ಜೀವನ ಪರಿಸ್ಥಿತಿಗಳನ್ನು ಎದುರಿಸುತ್ತಿರುವ ಜನರನ್ನು ಧಾರ್ಮಿಕ ಸಹೋದರಿಯರು ಸ್ವಾಗತಿಸುತ್ತಾರೆ.

ಪ್ರೇಮದ ಮನೆಯಲ್ಲಿ ಸ್ವಾಗತಿಸಲ್ಪಟ್ಟವರನ್ನು ಧಾರ್ಮಿಕ ಸಹೋದರಿಯರು ಪ್ರೀತಿಯಿಂದ ನೋಡಿಕೊಳ್ಳುತ್ತಾರೆ. ಕೆ ನ್ಘೆ ಪ್ರೇಮದ ಮನೆಯಲ್ಲಿ ಸೇವೆ ಸಲ್ಲಿಸುತ್ತಿರುವ ಧಾರ್ಮಿಕ ಸಹೋದರಿ ಫುವಾಂಗ್ ನ್ಗುಯೆನ್ ಅವರ ಪ್ರಕಾರ, ಈ ಮನೆಗೆ ಬರುವವರು ಕಷ್ಟಕರ ಪರಿಸ್ಥಿತಿಗಳನ್ನು ಎದುರಿಸುತ್ತಿರುವವರಾಗಿರುತ್ತಾರೆ ಅಥವಾ ಅವರ ಕುಟುಂಬಗಳಿಗೆ ಅವರನ್ನು ಆರೈಕೆ ಮಾಡಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ಕುಟುಂಬ ಸದಸ್ಯರು ತಮ್ಮ ಮಕ್ಕಳನ್ನು ಅಥವಾ ಸಂಬಂಧಿಕರನ್ನು ಧಾರ್ಮಿಕ ಸಹೋದರಿಯರ ಆರೈಕೆಗೆ ಒಪ್ಪಿಸುತ್ತಾರೆ.

ಇಲ್ಲಿ, ಸಾಧ್ಯವಾದಷ್ಟು ಮಟ್ಟಿಗೆ ತಮ್ಮನ್ನು ತಾವು ನೋಡಿಕೊಳ್ಳುವುದು ಹೇಗೆ ಎಂಬುದನ್ನು ಧಾರ್ಮಿಕ ಸಹೋದರಿಯರು ತಾಳ್ಮೆಯಿಂದ ಅವರಿಗೆ ಕಲಿಸುತ್ತಾರೆ. ಈ ಮನೆಯಲ್ಲಿ ವಾಸಿಸುವವರಲ್ಲಿ ಚಲನವಲನ ಮಾಡಲು ಸಾಧ್ಯವಿರುವವರನ್ನು, ದೈನಂದಿನ ಪವಿತ್ರ ಬಲಿಪೂಜೆಯಲ್ಲಿ ಭಾಗವಹಿಸುವುದು, ಊಟ ತಯಾರಿಸುವುದು, ಕೈಯಿಂದ ತಯಾರಿಸಿದ ವಸ್ತುಗಳು ಹಾಗೂ ಮನೆಯಲ್ಲಿ ತಯಾರಿಸಿದ ತಿಂಡಿಗಳನ್ನು ಮಾರಾಟಕ್ಕಾಗಿ ಸಿದ್ಧಪಡಿಸುವಂತಹ ಗೃಹಕಾರ್ಯಗಳಲ್ಲಿ ಭಾಗವಹಿಸಲು ಅವರು ಪ್ರೋತ್ಸಾಹಿಸುತ್ತಾರೆ.

ಈ ಚಟುವಟಿಕೆಗಳು ಮಕ್ಕಳಿಗೆ ಆಧ್ಯಾತ್ಮಿಕ ಬೆಳವಣಿಗೆಯನ್ನು ನೀಡುವುದಷ್ಟೇ ಅಲ್ಲ, ಅವರನ್ನು ಸಮುದಾಯದ ಜೀವನದಲ್ಲಿ ಒಳಗೊಳ್ಳುವಂತೆ ಸಹ ಮಾಡುತ್ತವೆ. ದೇವರ ಪ್ರೀತಿಯನ್ನು ಅನುಭವಿಸುವುದರ ಜೊತೆಗೆ, ಅವರು ಈ ಸಮುದಾಯಕ್ಕೂ ಮತ್ತು ಈ ಮನೆಯಲ್ಲಿ ವಾಸಿಸುವ ಇತರರಿಗೂ ಇನ್ನೂ ಉಪಯುಕ್ತರಾಗಿದ್ದಾರೆ ಎಂಬ ಅರಿವನ್ನೂ ಪಡೆಯುತ್ತಾರೆ.

ಇದಲ್ಲದೆ, ಪ್ರೇಮದ ಮನೆಯಲ್ಲಿ ವಾಸಿಸುವವರ ನಡುವೆ ಐಕ್ಯತೆಯನ್ನು ಬೆಳೆಸಲು ಮತ್ತು ಪ್ರೀತಿ ಹಾಗೂ ಪರಸ್ಪರ ಕಾಳಜಿಯ ಸಂಸ್ಕೃತಿಯನ್ನು ಅಭಿವೃದ್ಧಿಪಡಿಸಲು, ಧಾರ್ಮಿಕ ಸಹೋದರಿಯರು ಅವರನ್ನು ಇತರರಿಗೆ ಸಹಾಯ ಮಾಡಲು ಉತ್ತೇಜಿಸುತ್ತಾರೆ. ಉದಾಹರಣೆಗೆ, ಕನಿಷ್ಠ ಒಂದು ಕೈ ಚೆನ್ನಾಗಿ ಕಾರ್ಯನಿರ್ವಹಿಸುವವರು ಪಾರ್ಶ್ವವಾಯು ಪೀಡಿತರಿಗೆ ಸಹಾಯ ಮಾಡಬಹುದು. ನಡೆಯಲು ಸಾಧ್ಯವಿರುವವರು ಗಾಲಿಕುರ್ಚಿಗೆ ಸೀಮಿತರಾಗಿರುವ ತಮ್ಮ ಸ್ನೇಹಿತರಿಗೆ ನೆರವಾಗಬಹುದು.

ಈ ಸಣ್ಣ ಸಣ್ಣ ಪ್ರೀತಿಯ ಕಾರ್ಯಗಳ ಮೂಲಕ, ಪ್ರೇಮದ ಮನೆಯಲ್ಲಿರುವ ಜನರು ತಾವು ಪ್ರೀತಿಸಲ್ಪಡುತ್ತಿದ್ದಾರೆ, ಆರೈಕೆ ಪಡೆಯುತ್ತಿದ್ದಾರೆ ಮತ್ತು ತಮ್ಮ ಈ ಚಿಕ್ಕ ಸಮುದಾಯದಲ್ಲಿ ಉಪಯುಕ್ತ ವ್ಯಕ್ತಿಗಳೆಂದು ಗುರುತಿಸಲ್ಪಡುತ್ತಿದ್ದಾರೆ ಎಂಬ ಭರವಸೆಯನ್ನು ಪಡೆಯುತ್ತಾರೆ.

ಬಡವರಿಗೆ ಬೆಂಬಲ

ಹನೋಯಿಯ ಪವಿತ್ರ ಶಿಲುಬೆಯ ಪ್ರೇಮಿಗಳ ಧಾರ್ಮಿಕ ಸಹೋದರಿಯರು ಬಡವರಿಗೆ ಆರೋಗ್ಯ ಸೇವೆಯನ್ನೂ ಒದಗಿಸುತ್ತಿದ್ದಾರೆ. ಚಿ ಲಾಂಗ್ ಸಮುದಾಯವು ಹನೋಯಿಯ ಪವಿತ್ರ ಶಿಲುಬೆಯ ಪ್ರೇಮಿಗಳ ಸಭೆಯ ಬೆಂಬಲವನ್ನು ಪಡೆಯುತ್ತಿರುವ ಶಾಖೆಗಳಲ್ಲಿ ಒಂದಾಗಿದೆ. ಇಲ್ಲಿ, ಧಾರ್ಮಿಕ ಸಹೋದರಿಯರು ಆರೋಗ್ಯ ತಪಾಸಣಾ ದಿನಗಳನ್ನು ಆಯೋಜಿಸುತ್ತಾರೆ ಮತ್ತು ಸ್ಥಳೀಯ ರೋಗಿಗಳಿಗೆ ಕಥೋಲಿಕರು ಅಥವಾ ಕಥೋಲಿಕರಲ್ಲದವರು ಎಂಬ ಭೇದವಿಲ್ಲದೆ ಉಚಿತ ಔಷಧಿಗಳನ್ನು ವಿತರಿಸುತ್ತಾರೆ.

ಈ ಕಾರ್ಯದಲ್ಲಿ ಸ್ಥಳೀಯ ವೈದ್ಯರು ಅವರೊಂದಿಗೆ ಕೈಜೋಡಿಸುತ್ತಾರೆ. ತಮ್ಮ ಸಂಪನ್ಮೂಲಗಳು ಮತ್ತು ಸಮಯವನ್ನು ಉದಾರವಾಗಿ ನೀಡುವ ಹಿತೈಷಿಗಳ ಬೆಂಬಲವೂ ಅವರಿಗೆ ದೊರೆಯುತ್ತದೆ. ಇದಲ್ಲದೆ, ಪ್ರತಿ ಶನಿವಾರ, ತಮ್ಮನ್ನು ನೋಡಿಕೊಳ್ಳಲು ಸಂಬಂಧಿಕರಿಲ್ಲದ ವೃದ್ಧರು ಮತ್ತು ಅಂಗವಿಕಲರನ್ನು ಧಾರ್ಮಿಕ ಸಹೋದರಿಯರು ಸ್ವಾಗತಿಸುತ್ತಾರೆ. ಅವರು ಯಾರು ಎಂಬ ಭೇದವಿಲ್ಲದೆ ಉಚಿತ ಆರೋಗ್ಯ ತಪಾಸಣೆ ಮತ್ತು ಔಷಧಿಗಳನ್ನು ಪಡೆಯುತ್ತಾರೆ.

ಈ ಸೇವೆಯು ಕೇವಲ ವೈದ್ಯಕೀಯ ನೆರವಿಗೆ ಸೀಮಿತವಾಗಿಲ್ಲ. ಧಾರ್ಮಿಕ ಸಹೋದರಿಯರು ಬಡಿಸುವ ಮಧ್ಯಾಹ್ನದ ಊಟದಲ್ಲಿ ಭಾಗವಹಿಸಲು ಅವರನ್ನೂ ಆಹ್ವಾನಿಸುತ್ತಾರೆ. ಜೊತೆಗೆ, ಧಾರ್ಮಿಕ ಸಹೋದರಿಯರು ಹಳ್ಳಿಯಲ್ಲಿರುವ ಹಾಗೂ ಸಮೀಪದ ಪ್ರದೇಶಗಳಲ್ಲಿರುವ ವೃದ್ಧರನ್ನು ಭೇಟಿ ಮಾಡುತ್ತಾರೆ. ಈ ಕಾರ್ಯಕ್ರಮಗಳು ಅನೇಕ ಬಡ ಜನರಿಗೆ ಅತ್ಯಂತ ಮಹತ್ವದ್ದಾಗಿವೆ. ಏಕೆಂದರೆ ಈ ಕಾರ್ಯಕ್ರಮಗಳಿಲ್ಲದಿದ್ದರೆ, ಈ ಪ್ರದೇಶಗಳಲ್ಲಿನ ಅನೇಕ ಜನರು “ಅನಾರೋಗ್ಯಕ್ಕೆ ಒಳಗಾಗುವುದಕ್ಕೂ ಧೈರ್ಯ ಮಾಡುತ್ತಿರಲಿಲ್ಲ.”

ಯೇಸುವಿನ ಪವಿತ್ರ ಹೃದಯದ ವಿಸ್ತೃತ ರೂಪ

ಪ್ರಭು ಯೇಸು ಕ್ರಿಸ್ತರ ಹೆಜ್ಜೆಗಳನ್ನು ಅನುಸರಿಸುತ್ತಿರುವ LHC ಧಾರ್ಮಿಕ ಸಹೋದರಿಯರು, ಅವರ ರಕ್ಷಣೆಯ ಧ್ಯೇಯವನ್ನು ಮುಂದುವರಿಸಲು ಯೇಸುವಿನ ಚಾಚಿದ ಕೈಗಳು, ಹೃದಯ, ಮನಸ್ಸು, ನುಡಿ ಮತ್ತು ಪಾದಗಳಾಗುವ ಜವಾಬ್ದಾರಿಯನ್ನು ಹೊತ್ತಿದ್ದಾರೆ.

ಈ ಸೇವೆಗಳು ಬಡವರಿಗಾಗಿ ವಿಶೇಷ ಕಾಳಜಿ, ಹಂಚಿಕೆ, ಪ್ರೀತಿ, ದಾನಶೀಲತೆ ಮತ್ತು ವಿಶೇಷವಾಗಿ ಮಾನವ ಘನತೆಯ ಗೌರವದ ಅಭಿವ್ಯಕ್ತಿಯಾಗಿವೆ. ಪ್ರತಿಯೊಬ್ಬ ವ್ಯಕ್ತಿಯ ಸಹಜ ಘನತೆಯನ್ನು ಧಾರ್ಮಿಕ ಸಹೋದರಿಯರು ಗುರುತಿಸುವುದು, ಅವರು ತಮ್ಮ ಸಹೋದರ-ಸಹೋದರಿಯರ ನೋವನ್ನು ನಿವಾರಿಸಲು ಮತ್ತು ಅವರಿಗೆ ಬೆಂಬಲ ನೀಡಲು ನಡೆಸುವ ಅರ್ಥಪೂರ್ಣ ಸೇವೆಗಳ ಅಡಿಪಾಯವಾಗಿದೆ.

ಸಮಾಜದಲ್ಲಿಯೂ ಮತ್ತು ಧರ್ಮಸಭೆಯಲ್ಲಿಯೂ ದುರ್ಬಲರ ಘನತೆಯನ್ನು ಉನ್ನತಿಗೇರಿಸುವುದೇ ಧಾರ್ಮಿಕ ಸಹೋದರಿಯರ ಧ್ಯೇಯವಾಗಿದೆ. ಜೊತೆಗೆ, ಅವರ ಸಭೆಯ ಸ್ಥಾಪಕರಾದ ಧರ್ಮಾಧ್ಯಕ್ಷ ಲ್ಯಾಂಬರ್ಟ್ ಡೆ ಲಾ ಮೊಟ್ ಅವರ ಬೋಧನೆಯನ್ನು ಅವರು ನೆರವೇರಿಸುತ್ತಿದ್ದಾರೆ: “ಪವಿತ್ರ ಶಿಲುಬೆಯ ಪ್ರೇಮಿಗಳ ಧಾರ್ಮಿಕ ಸಹೋದರಿಯರು ಕರುಣಾಮಯ ಹೃದಯವನ್ನು ಹೊಂದಿ, ಶಿಲುಬೆಗೆ ಹಾಕಲ್ಪಟ್ಟ ಪ್ರಭು ಕ್ರಿಸ್ತರ ಗೋಚರಿಸುವ ಕೈಗಳಾಗಬೇಕು... ತಮ್ಮ ಜನರ ದುಃಖದಲ್ಲಿ ಪಾಲುಗೊಂಡು ಅವರಿಗೆ ಸಾಂತ್ವನ ನೀಡಬೇಕು.”

ಆದಾಗ್ಯೂ, ವಿಯೆಟ್ನಾಂ ಮತ್ತು ವಿದೇಶಗಳಲ್ಲಿರುವ ಅನೇಕ ಹಿತೈಷಿಗಳ ಸಹಕಾರವಿಲ್ಲದೆ ಧಾರ್ಮಿಕ ಸಹೋದರಿಯರು ಈ ಸೇವೆಗಳನ್ನು ನಡೆಸಲು ಸಾಧ್ಯವಿಲ್ಲ.

ಈ ಸೇವೆಗಳು, ಪರಸ್ಪರ ಪ್ರೀತಿಸಬೇಕು ಎಂಬ ಪ್ರಭು ಯೇಸು ಕ್ರಿಸ್ತರ ಆಜ್ಞೆಗೆ ಧಾರ್ಮಿಕ ಸಹೋದರಿಯರು ನೀಡುವ ಪ್ರತಿಕ್ರಿಯೆಯಾಗಿದೆ. ಪ್ರತಿಯೊಬ್ಬ ವ್ಯಕ್ತಿಯಲ್ಲಿಯೂ ದೇವರ ಸಾನ್ನಿಧ್ಯವನ್ನು ಗುರುತಿಸುವ ಹಾಗೂ ಪ್ರಭು ಕ್ರಿಸ್ತರೊಂದಿಗೆ ತಮ್ಮ ಸಂಬಂಧವನ್ನು ಇನ್ನಷ್ಟು ಗಾಢಗೊಳಿಸುವ ಮಾರ್ಗವೂ ಆಗಿದೆ. ಏಕೆಂದರೆ, “ನೀವು ಈ ಅತೀ ಚಿಕ್ಕವರಲ್ಲಿ ಒಬ್ಬನಿಗೆ ಮಾಡಿದ್ದನ್ನು ನನಗೇ ಮಾಡಿದ್ದೀರಿ” ಎಂದು ಪ್ರಭು ಯೇಸು ಕ್ರಿಸ್ತರು ನಮಗೆ ನೆನಪಿಸುತ್ತಾರೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).