‘ಸಿಸ್ಟರ್ಸ್ ಬ್ಲೆಂಡೆಡ್ ವ್ಯಾಲ್ಯೂ ಪ್ರಾಜೆಕ್ಟ್’: ಆಫ್ರಿಕಾದ ಧಾರ್ಮಿಕ ಸಹೋದರಿಯರ ಸೇವಾಕಾರ್ಯಗಳಲ್ಲಿ ಪರಿವರ್ತನೆ

ಲೇಖಕರು: ಸಹೋದರಿ ಕ್ರಿಸ್ಟಿನ್ ಮಸಿವೋ, CPS 

ಸಿಸ್ಟರ್ಸ್ ಬ್ಲೆಂಡೆಡ್ ವ್ಯಾಲ್ಯೂ ಪ್ರಾಜೆಕ್ಟ್ ಧಾರ್ಮಿಕ ಸಹೋದರಿಯರಿಗೆ ಸುಸ್ಥಿರತೆಯ ಬಗ್ಗೆ ಹೊಸದಾಗಿ ಚಿಂತಿಸಲು ಮತ್ತು ತಮ್ಮ ಸಂಸ್ಥೆಗಳನ್ನು ಬಲಪಡಿಸಿಕೊಳ್ಳಲು ಸಹಾಯ ಮಾಡುವ ಉದ್ದೇಶದಿಂದ ಆರಂಭಿಸಲಾಯಿತು. ಈ ಯೋಜನೆಯ ಮುಖ್ಯಸ್ಥೆಯಾಗಿರುವ ಸ್ಟ್ರಾಥ್‌ಮೋರ್ ವಿಶ್ವವಿದ್ಯಾಲಯದ ಬಿಸಿನೆಸ್ ಸ್ಕೂಲ್‌ನ ಡಾ. ಏಂಜೆಲಾ ಎಂಡುಂಗೆ ಅವರು, ಈ ಯೋಜನೆಯು ಕಳೆದ ಆರು ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿದ್ದು, ಕಾನ್ರಾಡ್ ಎನ್. ಹಿಲ್ಟನ್ ಫೌಂಡೇಶನ್ ಹಾಗೂ ಪೂರ್ವ ಮತ್ತು ಮಧ್ಯ ಆಫ್ರಿಕಾದ ಸಮರ್ಪಿತ ಮಹಿಳೆಯರ ಸಂಘ (ACWECA) ಸಹಯೋಗದಲ್ಲಿ ನಡೆಯುತ್ತಿದೆ ಎಂದು ವಿವರಿಸುತ್ತಾರೆ. ಇದು ಮೊದಲು ಕೀನ್ಯಾ, ಉಗಾಂಡಾ, ತಾಂಜಾನಿಯಾ ಮತ್ತು ಜಾಂಬಿಯಾದಲ್ಲಿ ಆರಂಭವಾಗಿ, ಈಗ ಮಲಾವಿವರೆಗೂ ವಿಸ್ತರಿಸಿದೆ.

ವ್ಯಾಟಿಕನ್ ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿದ ಡಾ. ಎಂಡುಂಗೆ ಅವರು, “ಧಾರ್ಮಿಕ ಮಹಿಳೆಯರು ಅನೇಕರಿಗೆ ಆಶಾಕಿರಣವಾಗಿದ್ದಾರೆ. ಅವರು ಶಿಕ್ಷಣ, ಆರೋಗ್ಯ ಸೇವೆ ಮತ್ತು ಸಾಮಾಜಿಕ ಸೇವಾ ಕ್ಷೇತ್ರಗಳಲ್ಲಿ, ವಿಶೇಷವಾಗಿ ಸಮಾಜದ ಅಂಚಿನಲ್ಲಿರುವ ಸಮುದಾಯಗಳ ನಡುವೆ ಸೇವೆ ಸಲ್ಲಿಸುತ್ತಿದ್ದಾರೆ” ಎಂದು ಹೇಳಿದರು. ಕೋವಿಡ್-19 ಮಹಾಮಾರಿ ತೀವ್ರ ಪರಿಣಾಮ ಬೀರಿದ್ದು, ಅವರ ಅನೇಕ ಸೇವಾ ಕಾರ್ಯಗಳ ದುರ್ಬಲತೆಯನ್ನು ಬಹಿರಂಗಪಡಿಸಿತು. ಈ ಯೋಜನೆಯು ಮುಖ್ಯವಾಗಿ ಧಾರ್ಮಿಕ ಸಹೋದರಿಯರು ತಮ್ಮ ಸಾಮಾಜಿಕ ಸೇವಾ ಕಾರ್ಯಗಳನ್ನು ಸುಸ್ಥಿರ ಸಾಮಾಜಿಕ ಉದ್ಯಮಗಳಾಗಿ ಪರಿವರ್ತಿಸಿಕೊಳ್ಳಲು ಬೆಂಬಲ ನೀಡುವ ಉದ್ದೇಶವನ್ನು ಹೊಂದಿದೆ.

ಎಚ್ಚರಿಕೆಯ ಕರೆಗಂಟೆಯಾದ ಕೋವಿಡ್ ಮಹಾಮಾರಿ

ಕೋವಿಡ್-19 ಮಹಾಮಾರಿ ಧಾರ್ಮಿಕ ಸಭೆಗಳಿಗೆ ಒಂದು ಮಹತ್ವದ ತಿರುವಿನ ಘಟ್ಟವಾಯಿತು. ಶಾಲೆಗಳು ಮತ್ತು ಆಸ್ಪತ್ರೆಗಳ ಆದಾಯವನ್ನು ಅವಲಂಬಿಸಿದ್ದ ಅನೇಕ ಸಂಸ್ಥೆಗಳು ತಮ್ಮ ಕಾರ್ಯಾಚರಣೆಗಳನ್ನು ಸ್ಥಗಿತಗೊಳಿಸಲು ಅಥವಾ ಕಡಿತಗೊಳಿಸಬೇಕಾಯಿತು.

“ಈ ಅವಧಿಯಲ್ಲಿ ಅನೇಕ ಧಾರ್ಮಿಕ ಸಹೋದರಿಯರು ತೀವ್ರ ಹಣಕಾಸಿನ ಕೊರತೆಗೆ ಒಳಗಾದರು,” ಎಂದು ಡಾ. ಎಂಡುಂಗೆ ವಿವರಿಸಿದರು. “ಇದು ಸಹೋದರಿಯರು ಸೇವೆ ಸಲ್ಲಿಸುವ ದುರ್ಬಲ ಸಮುದಾಯಗಳ ಮೇಲೆಯೂ ಪರಿಣಾಮ ಬೀರಿತು ಮತ್ತು ದೀರ್ಘಕಾಲೀನ ಸುಸ್ಥಿರತೆ ಹಾಗೂ ಭವಿಷ್ಯದ ಬಿಕ್ಕಟ್ಟುಗಳಿಗೆ ಉತ್ತಮ ಸಿದ್ಧತೆಯ ಅಗತ್ಯವನ್ನು ಎತ್ತಿ ತೋರಿಸಿತು.” ಇದರಿಂದ ಈ ವಿವಿಧ ಉಪಕ್ರಮಗಳು ಮತ್ತು ಸಾಮಾಜಿಕ ಸೇವಾ ಕಾರ್ಯಗಳ ಸುಸ್ಥಿರತೆಯ ಕುರಿತು ಮಹತ್ವದ ಪ್ರಶ್ನೆಗಳು ಉದ್ಭವಿಸಿದವು.

ಧಾರ್ಮಿಕ ಸಹೋದರಿಯರಿಗೆ ಕೌಶಲ್ಯಗಳನ್ನು ಒದಗಿಸುವ ಸಾಮರ್ಥ್ಯ ವೃದ್ಧಿ 

ಈ ಯೋಜನೆಯು ಸಾಮರ್ಥ್ಯ ವೃದ್ಧಿಯನ್ನು ಗುರಿಯಾಗಿಸಿಕೊಂಡಿದೆ. ಅನೇಕ ಧಾರ್ಮಿಕ ಸಹೋದರಿಯರು ಆಡಳಿತಾತ್ಮಕ ಜವಾಬ್ದಾರಿಗಳನ್ನು ವಹಿಸಿಕೊಳ್ಳಲು ಕರೆಯಲ್ಪಡುತ್ತಾರೆ, ಆದರೆ “ತಮ್ಮ ಸೇವಾ ಕಾರ್ಯಗಳಿಗಾಗಿ ಅಗತ್ಯವಾದ ತಾಂತ್ರಿಕ ಕೌಶಲ್ಯಗಳು ಅಥವಾ ದೀರ್ಘಕಾಲೀನ ಕಾರ್ಯತಂತ್ರದ ದೃಷ್ಟಿಕೋನವು ಅವರಲ್ಲಿ ಯಾವಾಗಲೂ ಇರುವುದಿಲ್ಲ” ಎಂದು ಡಾ. ಎಂಡುಂಗೆ ಗಮನಿಸಿದರು.

ತರಬೇತಿಯ ಮೂಲಕ, ಧಾರ್ಮಿಕ ಸಹೋದರಿಯರು ಬಜೆಟ್ ನಿರ್ವಹಣೆ, ದಾಖಲೆ ನಿರ್ವಹಣೆ, ನಾಯಕತ್ವ ಮತ್ತು ಕಾರ್ಯತಂತ್ರದ ಯೋಜನೆಗಳ ಬಗ್ಗೆ ಕಲಿಯುತ್ತಿದ್ದಾರೆ. ಈ ಕೌಶಲ್ಯಗಳು ಅವರಿಗೆ ಸಾಂಪ್ರದಾಯಿಕ ದಾನಧರ್ಮದ ಮಾದರಿಯಿಂದ ಸಾಮಾಜಿಕ ಉದ್ಯಮಶೀಲತೆಯ ಕಡೆಗೆ ಸಾಗಲು ನೆರವಾಗುತ್ತವೆ.

“ಹಿಂದೆ ಧಾರ್ಮಿಕ ಸಹೋದರಿಯರು ಮುಖ್ಯವಾಗಿ ದಾನಧರ್ಮದ ಮಾದರಿಯ ಮೇಲೆ ಕೇಂದ್ರೀಕರಿಸಿದ್ದರು,” ಎಂದು ಅವರು ವಿವರಿಸಿದರು. “ನಾವು ಅವರಿಗೆ ಸಾಮಾಜಿಕ ಉದ್ಯಮಶೀಲತೆಯ ಬಗ್ಗೆ ಚಿಂತಿಸಲು ಸಹಾಯ ಮಾಡುತ್ತಿದ್ದೇವೆ, ಅಂದರೆ ಈ ಸಾಮಾಜಿಕ ಸೇವಾ ಕಾರ್ಯಗಳನ್ನು ನಿರಂತರವಾಗಿ ಬೆಂಬಲಿಸಲು ಸಾಕಾಗುವ ಆದಾಯದ ಮೂಲಗಳನ್ನು ಸೃಷ್ಟಿಸುವ ದಾರಿಯ ಬಗ್ಗೆ ಯೋಚಿಸಲು ನೆರವಾಗುತ್ತಿದ್ದೇವೆ.”

ಹಣಕಾಸು ಮತ್ತು ಮಾರುಕಟ್ಟೆಗಳಿಗೆ ಪ್ರವೇಶ

“ಧಾರ್ಮಿಕ ಸಹೋದರಿಯರು ಹಣಕಾಸು ನೆರವು ಪಡೆಯುವಲ್ಲಿ ಅತ್ಯಂತ ಗಂಭೀರ ಸವಾಲುಗಳನ್ನು ಎದುರಿಸಿದ್ದಾರೆ,” ಎಂದು ಡಾ. ಎಂಡುಂಗೆ ಹೇಳಿದರು. ಹಣಕಾಸಿನ ಬೆಂಬಲವನ್ನು ಪಡೆಯಲು ಅನೇಕ ಧಾರ್ಮಿಕ ಸಭೆಗಳು ಹೋರಾಡುತ್ತಿರುವುದರಿಂದ, ಮತ್ತು ಕೆಲವು ಸಂದರ್ಭಗಳಲ್ಲಿ ಸಾಲಗಾರರಿಂದ ದುರುಪಯೋಗಕ್ಕೊಳಗಾಗಿರುವುದರಿಂದ, ಇದು ಭಯ ಮತ್ತು ಹಿಂಜರಿಕೆಯನ್ನು ಉಂಟುಮಾಡಿದೆ ಎಂದು ಅವರು ಗಮನಿಸಿದರು.

ಈ ಯೋಜನೆಯು ಧಾರ್ಮಿಕ ಸಹೋದರಿಯರಿಗೆ ನೈತಿಕ ಮತ್ತು ನವೀನ ಹಣಕಾಸಿನ ಆಯ್ಕೆಗಳನ್ನು ಗುರುತಿಸಲು ಸಹಾಯ ಮಾಡುತ್ತಿದೆ. ಜೊತೆಗೆ ಅವರ ಹಣಕಾಸು ಜ್ಞಾನವನ್ನು ಸುಧಾರಿಸಲು ಸಹ ಬೆಂಬಲ ನೀಡುತ್ತಿದೆ. ತಮ್ಮ ಸೇವೆಗಳು ಮತ್ತು ಉತ್ಪನ್ನಗಳಿಗಾಗಿ ಮಾರುಕಟ್ಟೆಗಳನ್ನು ತಲುಪುವಲ್ಲಿಯೂ ಅವರಿಗೆ ನೆರವು ಒದಗಿಸಲಾಗುತ್ತಿದೆ.

ಅನೇಕ ಧಾರ್ಮಿಕ ಸಭೆಗಳು ಕೃಷಿ ತೋಟಗಳು, ಶಾಲೆಗಳು ಮತ್ತು ಆರೋಗ್ಯ ಕೇಂದ್ರಗಳನ್ನು ನಡೆಸುತ್ತಿವೆ. ಆದರೆ ಅವುಗಳ ಆರ್ಥಿಕ ಸಾಮರ್ಥ್ಯವನ್ನು ಗರಿಷ್ಠ ಮಟ್ಟದಲ್ಲಿ ಬಳಸಿಕೊಳ್ಳಲು ಅಗತ್ಯವಾದ ಕಾರ್ಯತಂತ್ರಗಳು ಬಹುತೇಕ ಕಡೆಗಳಲ್ಲಿ ಇಲ್ಲ.

ಯಶಸ್ಸಿನ ಕಥೆ

ಕೀನ್ಯಾದ ಕಿಟುಯಿಯಲ್ಲಿ ಧಾರ್ಮಿಕ ಸಹೋದರಿಯರು ನಡೆಸುತ್ತಿದ್ದ ಹೊಲಿಗೆ ಸೇವಾ ಕಾರ್ಯವನ್ನು ಸಿಸ್ಟರ್ಸ್ ಬ್ಲೆಂಡೆಡ್ ವ್ಯಾಲ್ಯೂ ಪ್ರಾಜೆಕ್ಟ್ ಗಮನಾರ್ಹವಾಗಿ ಪರಿವರ್ತಿಸಿದೆ. ಆರಂಭದಲ್ಲಿ ಶಾಲಾ ಸಮವಸ್ತ್ರಗಳನ್ನು ಹೊಲಿಯುವ ಒಂದು ಸಣ್ಣ ಆದಾಯೋತ್ಪಾದಕ ಚಟುವಟಿಕೆಯಾಗಿದ್ದ ಈ ಕಾರ್ಯಕ್ಕೆ, ಧಾರ್ಮಿಕ ಸಹೋದರಿಯರು ಗುಣಮಟ್ಟ ಸುಧಾರಣೆ, ವ್ಯವಹಾರ ನಿರ್ವಹಣೆ ಮತ್ತು ಕಾರ್ಯತಂತ್ರದ ಬೆಳವಣಿಗೆಯ ಕುರಿತು ತರಬೇತಿ ಪಡೆದರು. ಇದರಿಂದ ಅವರ ಕಾರ್ಯವೈಖರಿ ಮತ್ತು ಸ್ಪರ್ಧಾತ್ಮಕ ಸಾಮರ್ಥ್ಯವು ಬಲಗೊಂಡಿತು. ಪರಿಣಾಮವಾಗಿ, ಉನ್ನತ ಗುಣಮಟ್ಟದ ಮಾನದಂಡಗಳನ್ನು ಪೂರೈಸಿದ ನಂತರ, ಪದವಿ ಪ್ರದಾನ ಸಮಾರಂಭಗಳ ಉಡುಪುಗಳನ್ನು ಪೂರೈಸಲು ಒಂದು ವಿಶ್ವವಿದ್ಯಾಲಯದಿಂದ ಗುತ್ತಿಗೆಯನ್ನು ಪಡೆಯುವಲ್ಲಿ ಅವರು ಯಶಸ್ವಿಯಾದರು.

ಈ ಸಾಧನೆಯು ಒಂದು ಮಹತ್ವದ ತಿರುವಿನ ಘಟ್ಟವಾಗಿದ್ದು, ಅವರ ಆಂತರಿಕ ಯೋಜನೆಯನ್ನು ಸ್ಪರ್ಧಾತ್ಮಕ ಸಾಮಾಜಿಕ ಉದ್ಯಮವನ್ನಾಗಿ ಪರಿವರ್ತಿಸಿತು. ಹಣಕಾಸಿನ ಸುಸ್ಥಿರತೆಯನ್ನು ಹೆಚ್ಚಿಸುವುದರ ಜೊತೆಗೆ, ಈ ಯಶಸ್ಸು ದೊಡ್ಡ ಮಾರುಕಟ್ಟೆಗಳೊಂದಿಗೆ ತೊಡಗಿಸಿಕೊಳ್ಳುವ ಆತ್ಮವಿಶ್ವಾಸವನ್ನೂ ಅವರಿಗೆ ನೀಡಿತು. ಉದ್ದೇಶಿತ ಸಾಮರ್ಥ್ಯ ವೃದ್ಧಿಯು ಧಾರ್ಮಿಕ ಸಹೋದರಿಯರು ತಮ್ಮ ಧ್ಯೇಯಕ್ಕೆ ನಿಷ್ಠರಾಗಿ ಉಳಿಯುತ್ತಲೇ ತಮ್ಮ ಸೇವಾ ಕಾರ್ಯಗಳನ್ನು ವಿಸ್ತರಿಸಲು ಹೇಗೆ ನೆರವಾಗುತ್ತದೆ ಎಂಬುದನ್ನು ಇದು ತೋರಿಸುತ್ತದೆ.

ಸಹಯೋಗ ಮತ್ತು ಪ್ರೇರಣೆ

ಡಾ. ಎಂಡುಂಗೆ ಅವರು, ಧಾರ್ಮಿಕ ಸಹೋದರಿಯರು ವಿವಿಧ ಧಾರ್ಮಿಕ ಸಭೆಗಳ ನಡುವೆ ಸಹಯೋಗ ಬೆಳೆಸುವಂತೆ ಉತ್ತೇಜಿಸಲ್ಪಡುತ್ತಿದ್ದಾರೆ ಎಂದು ಒತ್ತಿಹೇಳಿದರು. ಪರಸ್ಪರ ಕಲಿಕೆಯ ಮೂಲಕ ಮತ್ತು ಒಬ್ಬರ ಸೇವೆಗಳನ್ನು ಮತ್ತೊಬ್ಬರು ಬಳಸಿಕೊಳ್ಳುವ ಮೂಲಕ — ಉದಾಹರಣೆಗೆ ಕೃಷಿ ಉತ್ಪನ್ನಗಳನ್ನು ಖರೀದಿಸುವುದು ಅಥವಾ ಧಾರ್ಮಿಕ ಸಹೋದರಿಯರು ನಡೆಸುವ ಆರೋಗ್ಯ ಸಂಸ್ಥೆಗಳಿಂದ ಸೇವೆ ಪಡೆಯುವ ಮೂಲಕ ಅವರು ಪರಸ್ಪರ ಬೆಂಬಲಿಸುತ್ತಿದ್ದಾರೆ.

ಈ ಸಹಕಾರವು ಅವರ ಧ್ಯೇಯ ಕಾರ್ಯವನ್ನೂ ಹಾಗೂ ದೀರ್ಘಕಾಲೀನ ಸುಸ್ಥಿರತೆಯನ್ನೂ ಬಲಪಡಿಸುತ್ತದೆ. ದೂರದ ಸಮಸ್ಯೆ, ಸೀಮಿತ ಅಂತರ್ಜಾಲ ಸೌಲಭ್ಯ ಮತ್ತು ವಿಶ್ವಾಸಾರ್ಹವಲ್ಲದ ವಿದ್ಯುತ್ ಪೂರೈಕೆಯಂತಹ ಸವಾಲುಗಳಿದ್ದರೂ, ಅನೇಕ ಧಾರ್ಮಿಕ ಸಹೋದರಿಯರು ಕಲಿಯಲು ಮತ್ತು ಸುಸ್ಥಿರತೆಯ ಹೊಸ ವಿಧಾನಗಳನ್ನು ಅಳವಡಿಸಿಕೊಳ್ಳಲು ಉತ್ಸುಕರಾಗಿದ್ದಾರೆ. ಜೊತೆಗೆ ತಮ್ಮ ಸಮುದಾಯಗಳನ್ನು ಸಬಲಗೊಳಿಸುವ ಕಾರ್ಯದಲ್ಲಿಯೂ ನಿರಂತರವಾಗಿ ತೊಡಗಿಸಿಕೊಂಡಿದ್ದಾರೆ.

ಭವಿಷ್ಯ ಮತ್ತು ಬೆಳೆಯುತ್ತಿರುವ ಧ್ಯೇಯ

ಡಾ. ಎಂಡುಂಗೆ ಅವರು, ಈ ಯೋಜನೆಯು ಧಾರ್ಮಿಕ ಸಹೋದರಿಯರ ಸೇವಾ ಕಾರ್ಯಗಳನ್ನು ಮತ್ತಷ್ಟು ಬಲಪಡಿಸುವುದನ್ನು ಮುಂದುವರಿಸಲಿ ಎಂಬ ಆಶಯವನ್ನು ವ್ಯಕ್ತಪಡಿಸಿದರು, ಇದರಿಂದ ಅವರು ಶುಭಸಂದೇಶ ಪ್ರಸಾರದ ಕಾರ್ಯಕ್ಕೆ ಇನ್ನಷ್ಟು ಸಜ್ಜಾಗಲು ಸಾಧ್ಯವಾಗುತ್ತದೆ. “ತಾವು ಮಾಡುವ ಕಾರ್ಯವು ಚಿಕ್ಕದಾಗಿರಲಿ ಅಥವಾ ದೊಡ್ಡದಾಗಿರಲಿ, ತಮ್ಮ ಕರೆಯನ್ನೂ ಮತ್ತು ವರಪ್ರಸಾದವನ್ನೂ ಅವರು ಯಾವಾಗಲೂ ನೆನಪಿನಲ್ಲಿಟ್ಟುಕೊಳ್ಳಬೇಕು” ಎಂದು ಅವರು ಒತ್ತಿಹೇಳಿದರು.

ಅವರು ತಮ್ಮ ಧ್ಯೇಯ ಕಾರ್ಯ ಮತ್ತು ವೈಯಕ್ತಿಕ ಯೋಗಕ್ಷೇಮದ ನಡುವೆ ಸಮತೋಲನ ಕಾಪಾಡಿಕೊಳ್ಳುವ ಮಹತ್ವವನ್ನೂ ಒತ್ತಿ ಹೇಳಿದರು. ಜೊತೆಗೆ ಮೂಲಭೂತ ಅಗತ್ಯಗಳ ಬಗ್ಗೆ ಕಾಳಜಿ ವಹಿಸಬೇಕೆಂದು ತಿಳಿಸುತ್ತಾ, ಸಹಭಾಗಿತ್ವ ಸಂಸ್ಥೆಗಳಿಂದ ಹೆಚ್ಚಿನ ಬೆಂಬಲ ದೊರೆಯುವ ನಿರೀಕ್ಷೆಯನ್ನೂ ವ್ಯಕ್ತಪಡಿಸಿದರು.

ಸಿಸ್ಟರ್ಸ್ ಬ್ಲೆಂಡೆಡ್ ವ್ಯಾಲ್ಯೂ ಪ್ರಾಜೆಕ್ಟ್ ಆತ್ಮವಿಶ್ವಾಸವನ್ನು ನವೀಕರಿಸುತ್ತಿದ್ದು, ಕೌಶಲ್ಯಗಳು, ಸಹಯೋಗದ ಜಾಲಗಳು ಹಾಗೂ ನಾಯಕತ್ವ ಸಾಮರ್ಥ್ಯವನ್ನು ಬೆಳೆಸುವ ಮೂಲಕ ಸುಸ್ಥಿರ ಸೇವೆ ಮತ್ತು ಸುವಾರ್ತಾ ಪ್ರಸಾರವನ್ನು ಖಚಿತಪಡಿಸುತ್ತಿದೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).