ಲೈಬೀರಿಯಾ: ಸಮುದಾಯದ ನಡುವೆ ಕಥೋಲಿಕ ಧಾರ್ಮಿಕ ಸಹೋದರಿಯ ಸೇವಾ ಧ್ಯೇಯ

ಲೇಖಕರು:ಸಹೋದರಿ ಅರ್ನೆಸ್ಟಿನಾ ಪ್ಯಾಟ್ರಿಕ್ ಲಾಸ್ವೇ, ಎಸ್‌ಎಸಿ ಮತ್ತು ಸಹೋದರಿ ಫಿಲೋಮಿನಾ W ಜಪ್ಪಾ, SHF

ಲೈಬೀರಿಯಾದಲ್ಲಿ, ವಿಶೇಷವಾಗಿ ಗ್ರಾಮೀಣ ಮತ್ತು ಹಿಂದುಳಿದ ಸಮುದಾಯಗಳಲ್ಲಿ ಶಿಕ್ಷಣದ ಬೆಳವಣಿಗೆಯಲ್ಲಿ ಕಥೋಲಿಕ ಧರ್ಮಸಭೆಯು ದೀರ್ಘಕಾಲದಿಂದ ನಿರ್ಣಾಯಕ ಪಾತ್ರ ವಹಿಸಿದೆ. ಸಂಘರ್ಷ, ಸ್ಥಳಾಂತರ ಮತ್ತು ಅನಿಶ್ಚಿತತೆಯ ಸಮಯಗಳಲ್ಲಿಯೂ ಕಥೋಲಿಕ ಶಾಲೆಗಳು ಸ್ಥಿರತೆಯ ಕೇಂದ್ರಗಳಾಗಿ ಕಾರ್ಯನಿರ್ವಹಿಸಿವೆ. ಶಿಕ್ಷಣ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿದ್ದ ಕುಟುಂಬದಲ್ಲಿ ಬೆಳೆದ ಅನುಭವ ಹಾಗೂ ಧಾರ್ಮಿಕ ಜೀವನದ ರೂಪುಗೊಳಿಸುವಿಕೆಯ ಪ್ರೇರಣೆಯಿಂದ  ಸಹೋದರಿ ಫಿಲೋಮಿನಾ ಶಿಕ್ಷಣವನ್ನು ಒಂದು ವೃತ್ತಿಯಷ್ಟೇ ಅಲ್ಲ, ದೇವರಿಂದ ಬಂದ ಕರೆಯಾಗಿ ಹಾಗೂ ಧ್ಯೇಯವಾಗಿ ಕಾಣಲು ಆರಂಭಿಸಿದರು.

ನಂಬಿಕೆ ಮತ್ತು ಇತಿಹಾಸದಲ್ಲಿ ಬೇರೂರಿದ ಸೇವೆ

ಶಿಕ್ಷಣ ಹಾಗೂ ಮಕ್ಕಳ ಆಧ್ಯಾತ್ಮಿಕ ತರಬೇತಿಯ ಮೂಲಕ ಕುಟುಂಬ ಸೇವೆಯನ್ನು ತನ್ನ ಪ್ರಮುಖ ಧರ್ಮಸೇವೆಯಾಗಿ ಹೊಂದಿರುವ ಪವಿತ್ರ ಕುಟುಂಬ ಸಭೆಗೆ ಸಹೋದರಿ ಫಿಲೋಮಿನಾ ಸೇರಿದರು. ನಜರೇತಿನ ಪವಿತ್ರ ಕುಟುಂಬವಾದ ಯೇಸು, ಮರಿಯ ಮತ್ತು ಜೋಸೆಫರ ಮಾದರಿಯಿಂದ ಪ್ರೇರಿತರಾದ ಧಾರ್ಮಿಕ ಸಹೋದರಿಯರು ಕ್ರೈಸ್ತ ಕುಟುಂಬ ಜೀವನವನ್ನು ಬೆಳೆಸಲು, ಮಾನವ ಘನತೆಯನ್ನು ಉತ್ತೇಜಿಸಲು ಹಾಗೂ ಸಮಾಜದಲ್ಲಿನ ಅತ್ಯಂತ ದುರ್ಬಲರ ಸೇವೆ ಮಾಡಲು ತಮ್ಮನ್ನು ಸಮರ್ಪಿಸಿಕೊಂಡಿದ್ದಾರೆ. ಪ್ರಾರ್ಥನೆ, ಸಮುದಾಯ ಜೀವನ ಹಾಗೂ ಧರ್ಮಪ್ರಚಾರದ ಉತ್ಸಾಹದಲ್ಲಿ ಬೇರೂರಿರುವ ಈ ಧಾರ್ಮಿಕ ಸಭೆಯು ಮನೆಗಳು, ಶಾಲೆಗಳು, ಧರ್ಮಕೇಂದ್ರಗಳು ಹಾಗೂ ಸಮುದಾಯಗಳಲ್ಲಿ ಕ್ರಿಸ್ತನ ಪ್ರೀತಿಯನ್ನು ತಲುಪಿಸುವ ಗುರಿ ಹೊಂದಿದೆ.

ಈ ಧಾರ್ಮಿಕ ಸಭೆಯು ಆರೋಗ್ಯ ಸೇವೆ ಹಾಗೂ ಪಾಲನಾ ಸೇವೆಗಳಲ್ಲಿಯೂ ತೊಡಗಿಸಿಕೊಂಡಿದೆ. "ಶೈಕ್ಷಣಿಕವಾಗಿ ಗುಣಮಟ್ಟ ಹೊಂದಿರುವ, ಆಧ್ಯಾತ್ಮಿಕವಾಗಿ ದೃಢವಾದ ಹಾಗೂ ಸಾಮಾಜಿಕವಾಗಿ ಸ್ಪಂದಿಸುವ ಶಾಲೆಗಳನ್ನು ನಿರ್ಮಿಸುವ ನನ್ನ ಬದ್ಧತೆಗೆ ಈ ಧಾರ್ಮಿಕ ಸಭೆಯ ಧ್ಯೇಯವೇ ನಿರಂತರ ಮಾರ್ಗದರ್ಶನ ನೀಡುತ್ತಿದೆ" ಎಂದು ಸಹೋದರಿ ಫಿಲೋಮಿನಾ ಹೇಳಿದರು.

ದೇಶಾದ್ಯಂತ ಕಥೋಲಿಕ ಶಿಕ್ಷಣದ ಬಲವರ್ಧನೆ

"ಕೇಪ್ ಪಾಲ್ಮಾಸ್ ಧರ್ಮಕ್ಷೇತ್ರದ ಶಿಕ್ಷಣ ಕಾರ್ಯದರ್ಶಿಯಾಗಿ ನನ್ನ ಜವಾಬ್ದಾರಿಗಳಲ್ಲಿ ಧರ್ಮಪ್ರಾಂತ್ಯದ ಎಲ್ಲಾ ಕಥೋಲಿಕ ಶಾಲೆಗಳ ಮೇಲ್ವಿಚಾರಣೆ, ಮುಖ್ಯೋಪಾಧ್ಯಾಯರು ಮತ್ತು ಶಿಕ್ಷಕರಿಗೆ ಬೆಂಬಲ ನೀಡುವುದು ಹಾಗೂ ನಮ್ಮ ಶಾಲೆಗಳು ಧರ್ಮಸಭೆಯ ಮತ್ತು ರಾಷ್ಟ್ರೀಯ ಶಿಕ್ಷಣದ ಮಾನದಂಡಗಳನ್ನು ಪೂರೈಸುವುದನ್ನು ಖಚಿತಪಡಿಸಿಕೊಳ್ಳುವುದು ಸೇರಿದೆ. ಈ ಕಾರ್ಯದಲ್ಲಿ ಶಾಲಾ ಪರಿಶೀಲನೆ, ಶಿಕ್ಷಕರ ತರಬೇತಿ, ಪಠ್ಯಕ್ರಮದ ಬೆಂಬಲ ಹಾಗೂ ಶಿಕ್ಷಣ ಸಚಿವಾಲಯ ಮತ್ತು ಇತರ ಸಹಭಾಗಿಗಳೊಂದಿಗೆ ಸಹಯೋಗವೂ ಸೇರಿದೆ," ಎಂದು ಅವರು ವಿವರಿಸಿದರು.

"ರಾಷ್ಟ್ರೀಯ ಸಂಯೋಜಕಿಯಾಗಿ ದೇಶದ ಇತರ ಧರ್ಮಪ್ರಾಂತ್ಯಗಳ ಶಿಕ್ಷಣ ಕಾರ್ಯದರ್ಶಿಗಳೊಂದಿಗೆ ನಿಕಟವಾಗಿ ಕಾರ್ಯನಿರ್ವಹಿಸುತ್ತೇನೆ. ಕಥೋಲಿಕ ಶಿಕ್ಷಣಕ್ಕೆ ಏಕೀಕೃತ ದೃಷ್ಟಿಕೋನವನ್ನು ರೂಪಿಸಲು ನಾವು ಒಟ್ಟಾಗಿ ಕೆಲಸ ಮಾಡುತ್ತೇವೆ. ಆಡಳಿತ ವ್ಯವಸ್ಥೆಯನ್ನು ಬಲಪಡಿಸುವುದು, ಶಿಕ್ಷಕರ ಗುಣಮಟ್ಟವನ್ನು ಸುಧಾರಿಸುವುದು, ಮಕ್ಕಳ ಸುರಕ್ಷತೆಯನ್ನು ಖಚಿತಪಡಿಸುವುದು ಹಾಗೂ ಸೀಮಿತ ಆರ್ಥಿಕ ಸಾಮರ್ಥ್ಯ ಹೊಂದಿರುವ ಕುಟುಂಬಗಳಿಗೂ ಕಥೋಲಿಕ ಶಿಕ್ಷಣವನ್ನು ಸುಲಭವಾಗಿ ಲಭ್ಯವಾಗುವಂತೆ ಮಾಡುವುದರ ಮೇಲೆ ನಾವು ವಿಶೇಷ ಗಮನ ಹರಿಸಿದ್ದೇವೆ," ಎಂದು ಅವರು ಹೇಳಿದರು.

ಸವಾಲುಗಳ ನಡುವಿನ ಶಿಕ್ಷಣ

ವರ್ಷಗಳ ಕಾಲ ನಡೆದ ಅಂತರ್ಯುದ್ಧ, ಆರ್ಥಿಕ ಸಂಕಷ್ಟ ಮತ್ತು ಮೂಲಸೌಕರ್ಯದ ಕೊರತೆಯಿಂದಾಗಿ ಲೈಬೀರಿಯಾದ ಶಿಕ್ಷಣ ಕ್ಷೇತ್ರವು ಇನ್ನೂ ಅನೇಕ ಸವಾಲುಗಳನ್ನು ಎದುರಿಸುತ್ತಿದೆ. ಅನೇಕ ಶಾಲೆಗಳು ಸಮರ್ಪಕ ಕಟ್ಟಡಗಳ ಕೊರತೆ, ತರಬೇತಿ ಪಡೆದ ಶಿಕ್ಷಕರ ಅಭಾವ ಹಾಗೂ ಕಲಿಕಾ ಸಾಮಗ್ರಿಗಳ ಕೊರತೆಯನ್ನು ಎದುರಿಸುತ್ತಿವೆ. ನನ್ನ ಮೂಲ ಧರ್ಮಪ್ರಾಂತ್ಯವಾದ ಕೇಪ್ ಪಾಲ್ಮಾಸ್‌ನಂತಹ ಗ್ರಾಮೀಣ ಪ್ರದೇಶಗಳಲ್ಲಿ ಈ ಸಮಸ್ಯೆಗಳು ಇನ್ನಷ್ಟು ಗಂಭೀರವಾಗಿವೆ.

ಈ ಎಲ್ಲ ಪರಿಸ್ಥಿತಿಗಳ ನಡುವೆಯೂ ಕಥೋಲಿಕ ಶಾಲೆಗಳು ಸ್ಥೈರ್ಯದ ಸಂಕೇತಗಳಾಗಿ ಉಳಿದಿವೆ. ದೂರದ ಗ್ರಾಮಗಳಲ್ಲಿ ಅನೇಕ ಮಕ್ಕಳಿಗೆ ಲಭ್ಯವಿರುವ ಏಕೈಕ ಸಂಘಟಿತ ಕಲಿಕಾ ಕೇಂದ್ರಗಳೇ ಇವು. ಶಾಲಾ ಆಡಳಿತದ ನಿರಂತರ ಮಾರ್ಗದರ್ಶನ, ಶಿಕ್ಷಕರ ಸಾಮರ್ಥ್ಯ ವೃದ್ಧಿ ಹಾಗೂ ವಿದ್ಯಾರ್ಥಿ ಕೇಂದ್ರಿತ ಮತ್ತು ಮೌಲ್ಯಾಧಾರಿತ ಶಿಕ್ಷಣದ ಮೂಲಕ ಗುಣಮಟ್ಟದ ಶಿಕ್ಷಣವು ಕೆಲವರ ಸವಲತ್ತು ಮಾತ್ರವಲ್ಲ, ಎಲ್ಲರ ಹಕ್ಕಾಗಬೇಕು ಎಂಬ ಗುರಿಯೊಂದಿಗೆ ನಾವು ಕಾರ್ಯನಿರ್ವಹಿಸುತ್ತಿದ್ದೇವೆ.

ಕಲಿಯುವವರ ಘನತೆ ಮೊದಲ ಆದ್ಯತೆ

"ಕಥೋಲಿಕ ಶಿಕ್ಷಣವು ಯಾವಾಗಲೂ ಮಾನವ ವ್ಯಕ್ತಿಯ ಘನತೆಯನ್ನು ಎತ್ತಿಹಿಡಿಯಬೇಕು" ಎಂದು ಧಾರ್ಮಿಕ ಸಹೋದರಿ ಫಿಲೋಮಿನಾ ಹೇಳಿದರು. ಮಕ್ಕಳ ಸುರಕ್ಷತೆಗೆ ಬಲವಾದ ನೀತಿಗಳನ್ನು ರೂಪಿಸುವುದು, ಶಿಕ್ಷಕರಲ್ಲಿ ನೈತಿಕತೆ ಮತ್ತು ವೃತ್ತಿಪರತೆಯ ಬೆಳವಣಿಗೆಯನ್ನು ಉತ್ತೇಜಿಸುವುದು ಹಾಗೂ ಬಾಲಕಿಯರು ಮತ್ತು ದುರ್ಬಲ ಮಕ್ಕಳ ಶಿಕ್ಷಣಕ್ಕೆ ವಿಶೇಷ ಆದ್ಯತೆ ನೀಡುವುದು ಅತ್ಯಂತ ಮಹತ್ವದ್ದಾಗಿದೆ ಎಂದು ಅವರು ವಿವರಿಸಿದರು.

ತರಗತಿಯ ಹೊರತಾಗಿಯೂ ಅವರು ಧರ್ಮಕೇಂದ್ರಗಳು ಮತ್ತು ಉಪಕೇಂದ್ರಗಳಲ್ಲಿ ಮಹಿಳೆಯರು ಹಾಗೂ ಮಕ್ಕಳೊಂದಿಗೆ ಕಾರ್ಯನಿರ್ವಹಿಸುತ್ತಿದ್ದು, ಕುಟುಂಬಗಳ ಜೀವನೋಪಾಯವನ್ನು ಬಲಪಡಿಸುವ ವಿವಿಧ ಕಾರ್ಯಕ್ರಮಗಳಿಗೆ ಬೆಂಬಲ ನೀಡುತ್ತಿದ್ದಾರೆ. ಕುಟುಂಬಗಳು ಸಬಲವಾದಾಗ ಮಕ್ಕಳು ಶಾಲೆಯಲ್ಲಿ ಮುಂದುವರಿಯುವ ಸಾಧ್ಯತೆ ಹೆಚ್ಚುತ್ತದೆ ಹಾಗೂ ಶೈಕ್ಷಣಿಕ ಮತ್ತು ಭಾವನಾತ್ಮಕವಾಗಿ ಉತ್ತಮವಾಗಿ ಬೆಳೆಯುತ್ತಾರೆ.

ಭರವಸೆಯ ಭವಿಷ್ಯ

ಶಿಕ್ಷಣ ವ್ಯವಸ್ಥೆ ಬಲಿಷ್ಠವಾಗಿದ್ದರೆ ಮತ್ತು ಮಕ್ಕಳು ಉತ್ತಮ ಶಿಕ್ಷಣ ಪಡೆದರೆ ಲೈಬೀರಿಯಾದ ಭವಿಷ್ಯ ಉಜ್ವಲವಾಗಲಿದೆ. ಶೈಕ್ಷಣಿಕ ಸಾಮರ್ಥ್ಯದ ಜೊತೆಗೆ ನೈತಿಕ ಮೌಲ್ಯಗಳಲ್ಲಿ ದೃಢವಾಗಿರುವ ಹಾಗೂ ಸಾರ್ವಜನಿಕ ಹಿತಕ್ಕಾಗಿ ಬದ್ಧರಾಗಿರುವ ವಿದ್ಯಾರ್ಥಿಗಳನ್ನು ರೂಪಿಸುವ ವಿಶಿಷ್ಟ ಸಾಮರ್ಥ್ಯ ಕಥೋಲಿಕ ಶಾಲೆಗಳಿಗಿದೆ.

ಸವಾಲುಗಳ ನಡುವೆಯೂ, "ಕೈಯಲ್ಲಿರುವ ಸೀಮಿತ ಸಂಪನ್ಮೂಲಗಳಲ್ಲೇ ಅತ್ಯುತ್ತಮ ಸೇವೆ ಸಲ್ಲಿಸಲು ಶ್ರಮಿಸುತ್ತಿರುವ ಶಿಕ್ಷಕರ ಸಮರ್ಪಣೆಯನ್ನು ನಾನು ಕಾಣುತ್ತಿದ್ದೇನೆ. ಆದ್ದರಿಂದ ಉತ್ತಮ ನಾಳೆಯ ಬಗ್ಗೆ ನನಗೆ ಭರವಸೆ ಇದೆ" ಎಂದು ಸಹೋದರಿ ಫಿಲೋಮಿನಾ ಹೇಳಿದರು.

ಸಮುದಾಯದ ಸೇವೆ ಮಾಡಲು ಯುವಜನರು ತೋರಿಸುತ್ತಿರುವ ಉತ್ಸಾಹ, ಶಿಕ್ಷಣ ಮತ್ತು ಶುಭಸಂದೇಶ ಪ್ರಸಾರದತ್ತ ಧರ್ಮಸಭೆಯ ಬದ್ಧತೆ ಕೂಡ ಅವರಿಗೆ ಹೊಸ ಭರವಸೆ ನೀಡುತ್ತಿದೆ. ಧರ್ಮಸಭೆ ಮತ್ತು ಸರ್ಕಾರ, ಧಾರ್ಮಿಕ ವ್ಯಕ್ತಿಗಳು ಮತ್ತು ಭಕ್ತವಿಶ್ವಾಸಿಗಳು, ಸ್ಥಳೀಯ ಸಮುದಾಯಗಳು ಮತ್ತು ಅಂತರರಾಷ್ಟ್ರೀಯ ಸಹಭಾಗಿಗಳು ಹಾಗೂ ನಮ್ಮ ಸೇವೆಯನ್ನು ಬೆಂಬಲಿಸುವ ಎಲ್ಲರ ಸಹಕಾರದೊಂದಿಗೆ ದೇವರ ಕೃಪೆಯಲ್ಲಿ ನಾವು ವಿಶ್ವಾಸವಿಟ್ಟಿದ್ದೇವೆ. ಈ ಸಹಯೋಗದಿಂದ ಲೈಬೀರಿಯಾದ ಕಥೋಲಿಕ ಶಿಕ್ಷಣವು ಇನ್ನಷ್ಟು ಪ್ರಕಾಶಮಾನವಾಗಿ ಬೆಳಗಿ ಉತ್ತಮ ನಾಳೆಯನ್ನು ನಿರ್ಮಿಸಲಿದೆ.

ಪವಿತ್ರ ಕುಟುಂಬ ಸಭೆ ತನ್ನ ವಿವಿಧ ಸೇವಾ ಕ್ಷೇತ್ರಗಳ ಮೂಲಕ ವಿಶ್ವಾಸ, ಶಿಕ್ಷಣ ಮತ್ತು ಕರುಣಾಮಯ ಸೇವೆಯ ಪರಿವರ್ತನಾತ್ಮಕ ಧ್ಯೇಯವನ್ನು ಮೌನವಾಗಿ ಮುಂದುವರಿಸುತ್ತಿದೆ. ಕಾಲದ ಸಂಕೇತಗಳನ್ನು ಅರಿತು, ಪ್ರೀತಿಯಿಂದ ಪ್ರತಿಕ್ರಿಯಿಸುತ್ತಾ ತನ್ನ ಸೇವೆಯನ್ನು ನಿರಂತರವಾಗಿ ವಿಸ್ತರಿಸುತ್ತಿದೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).