ಯುದ್ಧದಲ್ಲಿ ಕೃತಕ ಬುದ್ಧಿಮತ್ತೆಯ ಬಳಕೆಯ ವಿರುದ್ಧ ಜಿನೀವಾದಲ್ಲಿ ಜಂಟಿ ಘೋಷಣೆಗೆ ಸಹಿ

ಲೇಖಕರು: ವಲೇರಿಯೊ ಪಾಲೊಂಬಾರೊ

ಕೃತಕ ಬುದ್ಧಿಮತ್ತೆಯಿಂದ “ವೇಗಗೊಳಿಸಲ್ಪಟ್ಟ” ಯುದ್ಧವು, ವೇಗವಾಗಿ ಮತ್ತು ವ್ಯಾಪಕ ಪ್ರಮಾಣದಲ್ಲಿ ಹತ್ಯೆ ನಡೆಸಲು ನೆರವಾಗುವ ಸಾಧನವಾಗಿ ರೂಪುಗೊಳ್ಳುತ್ತಿದೆ. ಇದೇ ವೇಳೆ, ಇಂತಹ ಬೆಳವಣಿಗೆಗಳು ಅಂತರರಾಷ್ಟ್ರೀಯ ಕಾನೂನಿಗೆ ಒಡ್ಡುವ ಸವಾಲುಗಳಿಂದ ಉಂಟಾಗುವ ಮಾರಕ ಮತ್ತು ವಿನಾಶಕಾರಿ ಪರಿಣಾಮಗಳನ್ನು ತಡೆಯಲು ಸಮರ್ಥವಾದ “ತಾಂತ್ರಿಕ ಅಥವಾ ಕಾರ್ಯವಿಧಾನಾತ್ಮಕ ಪರಿಹಾರಗಳು” ಪ್ರಸ್ತುತ ಲಭ್ಯವಿಲ್ಲ.

ಈ ಕಳವಳಕಾರಿ ಹಿನ್ನೆಲೆಯ ನಡುವೆ, ವಿಶ್ವ ಧರ್ಮಸಭೆಗಳ ಮಂಡಳಿ (WCC) ಸೇರಿದಂತೆ 225 ಇತರ ಸಹಿದಾರರು—ಸರ್ಕಾರೇತರ ಸಂಸ್ಥೆಗಳು, ಸಂಘಟನೆಗಳು, ತಜ್ಞರು ಹಾಗೂ ತಂತ್ರಜ್ಞಾನ ಕಂಪನಿಗಳ ಪ್ರತಿನಿಧಿಗಳು—ಯುದ್ಧದಲ್ಲಿ ಕೃತಕ ಬುದ್ಧಿಮತ್ತೆಯ ಬಳಕೆಯನ್ನು ವಿರೋಧಿಸುವ ಜಂಟಿ ಘೋಷಣೆಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ.

ಜಿನೀವಾದಲ್ಲಿ ವಿಶ್ವಸಂಸ್ಥೆಯ ಸಭೆ

ಈ ಘೋಷಣೆಯು, “ಸೇನಾ ಹತ್ಯಾ ಸರಪಳಿ”ಯಲ್ಲಿ ಬಳಸಲು ಉದ್ದೇಶಿತವಾದ ಕೃತಕ ಬುದ್ಧಿಮತ್ತೆ ವ್ಯವಸ್ಥೆಗಳ ಪೂರೈಕೆಯನ್ನು ನಿಲ್ಲಿಸುವಂತೆ ತಂತ್ರಜ್ಞಾನ ಅಭಿವೃದ್ಧಿಪಡಿಸುವ ಕಂಪನಿಗಳು ಮತ್ತು ಸರ್ಕಾರಗಳಿಗೆ ಸ್ಪಷ್ಟವಾಗಿ ಕರೆ ನೀಡುತ್ತದೆ. ಅಲ್ಲದೆ, ತಾವು ಒದಗಿಸುವ ಯಾವುದೇ ಇತರ AI ವ್ಯವಸ್ಥೆಗಳು ಅಂತರರಾಷ್ಟ್ರೀಯ ಮಾನವೀಯ ಕಾನೂನು ಮತ್ತು ಅಂತರರಾಷ್ಟ್ರೀಯ ಮಾನವ ಹಕ್ಕುಗಳ ಕಾನೂನುಗಳ ಉಲ್ಲಂಘನೆಗೆ ಕಾರಣವಾಗದಂತೆ ಅಥವಾ ಅದಕ್ಕೆ ಕೊಡುಗೆ ನೀಡದಂತೆ ನೋಡಿಕೊಳ್ಳಲು ಅಗತ್ಯವಿರುವ ಎಲ್ಲ ಕ್ರಮಗಳನ್ನು ಕೈಗೊಳ್ಳುವಂತೆ ಒತ್ತಾಯಿಸುತ್ತದೆ. ಈ ಘೋಷಣೆಗೆ ಜೂನ್ 15ರಿಂದ 17ರವರೆಗೆ ಜಿನೀವಾದಲ್ಲಿ ನಡೆದ ಸಭೆಯ ಸಂದರ್ಭದಲ್ಲಿ ಸಹಿ ಹಾಕಲಾಯಿತು. ಈ ಸಭೆಯನ್ನು ವಿಶ್ವಸಂಸ್ಥೆಯ ನಿರಸ್ತ್ರೀಕರಣ ವ್ಯವಹಾರಗಳ ಕಚೇರಿ ಆಯೋಜಿಸಿತ್ತು. ಇದರ ವಿಷಯವಾಗಿದ್ದು, ಸೇನಾ ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆಯ ಬಳಕೆ ಮತ್ತು ಅದು ಅಂತರರಾಷ್ಟ್ರೀಯ ಶಾಂತಿ ಹಾಗೂ ಭದ್ರತೆಯ ಮೇಲೆ ಬೀರುವ ಪರಿಣಾಮಗಳು.

ಈ ಸಭೆಯು, ಕೆಲವು ವಾರಗಳ ಹಿಂದೆಯಷ್ಟೇ ಪೂಜ್ಯ ಜಗದ್ಗುರುಗಳಾದ 14ನೆ ಲಿಯೋ ತಮ್ಮ Magnifica Humanitas ಎಂಬ ವಿಶ್ವಪತ್ರಿಕೆಯಲ್ಲಿ ಜಗತ್ತನ್ನು “AI ಅನ್ನು ನಿರಸ್ತ್ರೀಕರಿಸಲು” ಕರೆದಿದ್ದ ಹಿನ್ನೆಲೆಯಲ್ಲೇ ನಡೆಯಿತು.

ಮಾನವ ಹೊಣೆಗಾರಿಕೆಯನ್ನು “ದುರ್ಬಲಗೊಳಿಸುವ” ಅಪಾಯ

ಘೋಷಣೆಯ ಪ್ರಕಾರ, ಸರ್ಕಾರದ ಸೇನಾ ಸಂಸ್ಥೆಗಳೊಂದಿಗೆ ಒಪ್ಪಂದ ಮಾಡಿಕೊಂಡಿರುವ ಸಂಸ್ಥೆಗಳು ಸೇರಿದಂತೆ ಎಲ್ಲಾ ಕಂಪನಿಗಳು, ತಮ್ಮ ಉತ್ಪನ್ನಗಳು ಮತ್ತು ಸೇವೆಗಳು ಮಾನವ ಹಕ್ಕುಗಳ ಉಲ್ಲಂಘನೆಗಳಿಗೆ ಅಥವಾ ಅಂತರರಾಷ್ಟ್ರೀಯ ಅಪರಾಧಗಳಿಗೆ ಕಾರಣವಾಗದಂತೆ, ಅವಕ್ಕೆ ಕೊಡುಗೆ ನೀಡದಂತೆ ಅಥವಾ ಅವುಗಳಿಗೆ ನೇರವಾಗಿ ಸಂಬಂಧಿಸದಂತೆ ಖಚಿತಪಡಿಸಿಕೊಳ್ಳಲು ಸಾಧ್ಯವಿರುವ ಎಲ್ಲ ಕ್ರಮಗಳನ್ನು ಕೈಗೊಳ್ಳಬೇಕು. ಇದಲ್ಲದೆ, ಇಂತಹ ಅಪಾಯಗಳನ್ನು ತಡೆಯಲು ಅಥವಾ ಅರ್ಥಪೂರ್ಣವಾಗಿ ಕಡಿಮೆ ಮಾಡಲು ಸಾಧ್ಯವಾಗದಿದ್ದರೆ, ಕಂಪನಿಗಳು ಇಂತಹ ಒಪ್ಪಂದಗಳಿಗೆ ಪ್ರವೇಶಿಸಬಾರದು ಅಥವಾ ಅವುಗಳನ್ನು ಜಾರಿಗೊಳಿಸಬಾರದು ಎಂದು ಘೋಷಣೆ ತಿಳಿಸುತ್ತದೆ.

ಮಾಧ್ಯಮ ವರದಿಗಳು ಮತ್ತು ಅಮೆರಿಕದ ಪೆಂಟಗನ್ ನೀಡಿರುವ ಅಧಿಕೃತ ಹೇಳಿಕೆಗಳನ್ನು ಉಲ್ಲೇಖಿಸಿರುವ ಈ ಘೋಷಣೆಯು, “AI ಸಾಧನಗಳ ಮೂಲಕ ಗುರಿಗಳನ್ನು ವೇಗವಾಗಿ ಗುರುತಿಸುವ ಸಾಮರ್ಥ್ಯವು ಇರಾನ್ ವಿರುದ್ಧದ ಅಮೆರಿಕದ ದಾಳಿಗಳ ವೇಗ, ಪ್ರಮಾಣ, ತೀವ್ರತೆ ಮತ್ತು ವಿನಾಶಕಾರಿ ಶಕ್ತಿಯನ್ನು ಹೆಚ್ಚಿಸಲು ನೆರವಾಗಿದೆ” ಎಂದು ಹೇಳುತ್ತದೆ. ಇದೇ ರೀತಿಯ ಮೌಲ್ಯಮಾಪನವನ್ನು ಇಸ್ರಾಯೇಲಿ ಸೇನೆಯು ಬಳಸುತ್ತಿರುವ ವ್ಯವಸ್ಥೆಗಳಿಗೂ ಅನ್ವಯಿಸಬಹುದು ಎಂದು ಅದು ಸೇರಿಸುತ್ತದೆ.

ಇಂತಹ ತಂತ್ರಜ್ಞಾನಗಳು ಜೀವ–ಮರಣದ ನಿರ್ಧಾರಗಳಲ್ಲಿ “ಮಾನವ ಹೊಣೆಗಾರಿಕೆಯನ್ನು ದುರ್ಬಲಗೊಳಿಸುತ್ತವೆ” ಹಾಗೂ “ಕ್ರಮಾವಳಿಗಳ ವಸ್ತುನಿಷ್ಠತೆಯ ಮುಖವಾಡದ ಹಿಂದೆ ಅಂತರರಾಷ್ಟ್ರೀಯ ಅಪರಾಧಗಳನ್ನು ಮರೆಮಾಚಲು ನೆರವಾಗಬಹುದು; ಜೊತೆಗೆ ಹೊಣೆಗಾರಿಕೆಯಿಂದ ತಪ್ಪಿಸಿಕೊಳ್ಳಲು ಸಹ ಸಹಾಯ ಮಾಡಬಹುದು” ಎಂದು ಘೋಷಣೆ ವಾದಿಸುತ್ತದೆ.

ಅಮಾನವೀಯ ದಿಕ್ಕಿನತ್ತ ಸಾಗುವಿಕೆ

“AIಯ ನೈಜ ಬಳಕೆಯು, ಅದು ವಾಸ್ತವವಾಗಿ ಇನ್ನಷ್ಟು ಹಿಂಸಾತ್ಮಕ, ಅಮಾನವೀಯ ಮತ್ತು ವಿನಾಶಕಾರಿ ಯುದ್ಧ ವಿಧಾನಗಳನ್ನು ಉತ್ತೇಜಿಸುತ್ತಿದೆ ಎಂಬುದನ್ನು ತೋರಿಸುತ್ತದೆ,” ಎಂದು 226 ಮಂದಿ ಸಹಿದಾರರು ತಿಳಿಸಿದ್ದಾರೆ. ಇವರಲ್ಲಿ ಅಮ್ನೆಸ್ಟಿ ಇಂಟರ್‌ನ್ಯಾಷನಲ್ ಸೇರಿದಂತೆ ಅನೇಕ ಅಂತರರಾಷ್ಟ್ರೀಯ ಮತ್ತು ಸ್ಥಳೀಯ ಸಂಸ್ಥೆಗಳೂ ಸೇರಿವೆ.

“ವಿಶೇಷವಾಗಿ, ಗುರಿ ಗುರುತಿಸುವಿಕೆ ಮತ್ತು ಆದ್ಯತೆ ನಿಗದಿಪಡಿಸುವಲ್ಲಿ ದೊಡ್ಡ ಭಾಷಾ ಮಾದರಿಗಳ (LLMs) ಬಳಕೆಯು ಸೇನಾ ಶಕ್ತಿಗಳನ್ನು ಅಂತಹ ಯುದ್ಧದತ್ತ ತಳ್ಳುತ್ತಿದೆ; ಅಲ್ಲಿ ಅಂತರರಾಷ್ಟ್ರೀಯ ಮಾನವೀಯ ಕಾನೂನಿನ ಮೂಲಭೂತ ತತ್ವಗಳಾದ ವ್ಯತ್ಯಾಸ, ಪ್ರಮಾಣಬದ್ಧತೆ ಮತ್ತು ಮುನ್ನೆಚ್ಚರಿಕೆಗಳನ್ನು ಸಮರ್ಪಕವಾಗಿ ಪಾಲಿಸುವುದು ಸಾಧ್ಯವಾಗದೇ ಇರಬಹುದು.”

ಈ ತಂತ್ರಜ್ಞಾನಗಳ ವೇಗ ಮತ್ತು ವ್ಯಾಪ್ತಿ, ಜೊತೆಗೆ ಅವು ಬಳಸುವ ಮಾಹಿತಿಯ ವಿಶ್ವಾಸಾರ್ಹತೆಯ ಕೊರತೆ, ಪಕ್ಷಪಾತ ಮತ್ತು ಅನೇಕ ಸಂದರ್ಭಗಳಲ್ಲಿ ಕಾನೂನುಬಾಹಿರ ಮೂಲಗಳಿಂದ ಸಂಗ್ರಹಿಸಲ್ಪಟ್ಟಿರುವುದು, ಮಾನವ ಹಕ್ಕುಗಳ ಉಲ್ಲಂಘನೆಗಳು, ಮಾನವತೆಯ ವಿರುದ್ಧದ ಅಪರಾಧಗಳು ಮತ್ತು ಯುದ್ಧಾಪರಾಧಗಳಿಗೆ ಕಾರಣವಾಗುವ ಅಪಾಯವನ್ನು ಉಂಟುಮಾಡುತ್ತದೆ ಎಂದು ಸಹಿದಾರರು ಎಚ್ಚರಿಸಿದ್ದಾರೆ. ಇದಲ್ಲದೆ, ಇವುಗಳ ಬಳಕೆಯ ಸುತ್ತಲಿನ ಪಾರದರ್ಶಕತೆಯ ಕೊರತೆಯು ತಪ್ಪುಗಳು ಸಂಭವಿಸಿದಾಗ ನೈತಿಕ ಅಥವಾ ಕಾನೂನುಬದ್ಧ ಹೊಣೆಗಾರಿಕೆಯನ್ನು ನಿಗದಿಪಡಿಸುವ ಸಾಧ್ಯತೆಯನ್ನು ಗಂಭೀರವಾಗಿ ದುರ್ಬಲಗೊಳಿಸುತ್ತದೆ.

ಅರ್ಥಪೂರ್ಣ ಮಾನವ ನಿಯಂತ್ರಣ

ಗುರಿ ಗುರುತಿಸುವಿಕೆಯಲ್ಲಿ ಬಳಸುವ AI ವ್ಯವಸ್ಥೆಗಳು ಕೊಲ್ಲುವ ಅಂತಿಮ ನಿರ್ಧಾರವನ್ನು ತೆಗೆದುಕೊಳ್ಳದಿದ್ದರೂ ಸಹ, ಅವು ದೊಡ್ಡ ಪ್ರಮಾಣದ ಹತ್ಯೆಗಳಿಗೆ ಸ್ವಯಂಚಾಲಿತ ಅನುಮೋದನೆ ನೀಡುವ ವ್ಯವಸ್ಥೆಗಳಾಗಿ ಪರಿಣಮಿಸುವ ಅಪಾಯವಿದೆ ಎಂದು ಘೋಷಣೆ ತಿಳಿಸುತ್ತದೆ. ಏಕೆಂದರೆ ಅವು ಸುಳ್ಳು ವಸ್ತುನಿಷ್ಠತೆಯ ಭಾವನೆಯ ಮೇಲೆ ಅವಲಂಬಿತವಾಗಿದ್ದು, ಮಾನವ ಹೊಣೆಗಾರಿಕೆ ಮತ್ತು ಸೂಕ್ತ ಪರಿಶೀಲನೆಯನ್ನು ಹಿಮ್ಮೆಟ್ಟಿಸಬಹುದು. ಇದರ ಪರಿಣಾಮವಾಗಿ, ಅವು ಸಾಮೂಹಿಕ ಹತ್ಯೆಗಳನ್ನು ಇನ್ನಷ್ಟು ವೇಗಗೊಳಿಸಲು ಮತ್ತು ಸುಲಭಗೊಳಿಸಲು ನೆರವಾಗಬಹುದು.

ಈ ವ್ಯವಸ್ಥೆಗಳು “ಜೀವ ಮತ್ತು ಮರಣದ ಪ್ರಶ್ನೆಗಳನ್ನು ಕೇವಲ ಒಂದು ಸರಳ ಚಾಟ್ ಸೂಚನೆಗೆ ಇಳಿಸುವ ಮೂಲಕ” ಅಮಾನವೀಕರಣವನ್ನು ಸ್ವಯಂಚಾಲಿತಗೊಳಿಸುತ್ತವೆ. ಒಬ್ಬ ಮಾನವನ ಜೀವವನ್ನು ಕಸಿದುಕೊಳ್ಳುವ ನಿರ್ಧಾರವು ಆಳವಾದ ನೈತಿಕ ಮತ್ತು ಕಾನೂನುಬದ್ಧ ಹೊಣೆಗಾರಿಕೆಯನ್ನು ಒಳಗೊಂಡಿರುತ್ತದೆ; ಅದನ್ನು ಎಂದಿಗೂ AI ವ್ಯವಸ್ಥೆಗಳು ನೀಡುವ ಶಿಫಾರಸುಗಳನ್ನು ಒಪ್ಪಿಕೊಳ್ಳುವುದಕ್ಕೆ ಅಥವಾ ತಿರಸ್ಕರಿಸುವುದಕ್ಕೆ ಮಾತ್ರ ಸೀಮಿತಗೊಳಿಸಬಾರದು ಎಂದು ಸಹಿದಾರರು ಒತ್ತಿಹೇಳುತ್ತಾರೆ.

ಗುರಿಗಳನ್ನು ಗುರುತಿಸಲು ಸೇನೆಗಳು AI ಮೇಲೆ ಅಷ್ಟು ವೇಗ ಮತ್ತು ವ್ಯಾಪ್ತಿಯಲ್ಲಿ ಅವಲಂಬಿತವಾದಾಗ, ಮಾನವ ಪರಿಶೀಲನೆಯು ಕೇವಲ ಔಪಚಾರಿಕತೆಯಾಗಿ ಉಳಿಯುತ್ತದೆ. ಆಗ “ಸಾಮೂಹಿಕ ದೌರ್ಜನ್ಯಗಳು ಸಂಭವಿಸಬಹುದು, ಮತ್ತು ಅನೇಕ ಬಾರಿ ಸಂಭವಿಸುತ್ತವೆ,” ಇದು ಅಂತರರಾಷ್ಟ್ರೀಯ ಮಾನವೀಯ ಕಾನೂನಿನಲ್ಲಿ ಅಡಕವಾಗಿರುವ ಮುನ್ನೆಚ್ಚರಿಕೆಯ ತತ್ವಕ್ಕೆ ನೇರ ಉಲ್ಲಂಘನೆಯಾಗಿದೆ.

ಹೆಚ್ಚಿನ ಹೊಣೆಗಾರಿಕೆ ಮತ್ತು ಪಾರದರ್ಶಕತೆ

ಜಿನೀವಾದಲ್ಲಿ ಸಹಿ ಹಾಕಲಾದ ಈ ಘೋಷಣೆಯು, ಮಾನವ ಹಕ್ಕುಗಳ ಉಲ್ಲಂಘನೆಗಳು ಮತ್ತು ಕ್ರೂರ ಅಪರಾಧಗಳು ಸೇರಿದಂತೆ ಅಂತರರಾಷ್ಟ್ರೀಯ ಕಾನೂನಿನ ಉಲ್ಲಂಘನೆಗಳಲ್ಲಿ ಭಾಗಿಯಾಗಿರುವ ಸೇನಾ ಸಂಸ್ಥೆಗಳು ಅಥವಾ ಸಶಸ್ತ್ರ ಗುಂಪುಗಳೊಂದಿಗೆ ಒಪ್ಪಂದಗಳಿಗೆ ಪ್ರವೇಶಿಸುವುದನ್ನು ಅಥವಾ ಅವುಗಳನ್ನು ಜಾರಿಗೊಳಿಸುವುದನ್ನು ತಂತ್ರಜ್ಞಾನ ಕಂಪನಿಗಳು ತಪ್ಪಿಸಬೇಕು ಎಂದು ಕರೆ ನೀಡುತ್ತದೆ.

ಇನ್ನೊಂದೆಡೆ, ಸರ್ಕಾರಗಳು “ಗುರಿ ಗುರುತಿಸುವ ಸೇನಾ ಕಾರ್ಯಾಚರಣೆಗಳಲ್ಲಿ ದೊಡ್ಡ ಭಾಷಾ ಮಾದರಿಗಳು ಸೇರಿದಂತೆ AI ಸಾಧನಗಳ ಬಳಕೆಯನ್ನು ನಿಲ್ಲಿಸಬೇಕು ಮತ್ತು ಅಂತರರಾಷ್ಟ್ರೀಯ ಮಾನವೀಯ ಕಾನೂನು ಹಾಗೂ ಅಂತರರಾಷ್ಟ್ರೀಯ ಮಾನವ ಹಕ್ಕುಗಳ ಕಾನೂನುಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು” ಎಂದು ಒತ್ತಾಯಿಸಲಾಗಿದೆ. ಅಲ್ಲದೆ, “ಯುದ್ಧ ಕಾರ್ಯಾಚರಣೆಗಳಲ್ಲಿ ಪ್ರಸ್ತುತ AI ಬಳಕೆಯ ಕುರಿತು ಸಂಪೂರ್ಣ ಪಾರದರ್ಶಕತೆಯನ್ನು ಖಚಿತಪಡಿಸಬೇಕು” ಎಂಬ ಕರೆಯನ್ನೂ ಈ ಘೋಷಣೆ ನೀಡಿದೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).