ಸೋಲೊಮನ್ ದ್ವೀಪಗಳ ಮಹಾಧರ್ಮಾಧ್ಯಕ್ಷರ ಸಭೆ:ಗುರುದೀಕ್ಷಾಭ್ಯರ್ಥಿಗಳಿಗೆ ಪ್ರೋತ್ಸಾಹ

ಲೇಖಕರು:ವಂ. ಗುರು ಮಾರ್ಕ್ ರಾಬಿನ್ ದೆಸ್ತುರಾ, RCJ

ಹೋಲಿ ನೇಮ್ ಆಫ್ ಮೇರಿ ಸೆಮಿನರಿಯಲ್ಲಿ ಮಹಾಧರ್ಮಾಧ್ಯಕ್ಷರ ಸಭೆ

ಸೋಲೊಮನ್ ದ್ವೀಪಗಳ ಮೂರು ಮಹಾಧರ್ಮಾಧ್ಯಕ್ಷರು — ಹೋನಿಯಾರಾದ ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಕ್ರಿಸ್ಟೋಫರ್ ಕಾರ್ಡೋನ್, ಗಿಜೊದ ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಪೀಟರ್ ಹೌಹೌ, ಮತ್ತು ಔಕಿಯ ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಜೇಕಬ್ ಅಬಾ — ಮಾರ್ಚ್ 10ರಂದು ಹೋಲಿ ನೇಮ್ ಆಫ್ ಮೇರಿ ಸೆಮಿನರಿಯಲ್ಲಿ 2026ರ ತಮ್ಮ ಮೊದಲ ಸಭೆಯನ್ನು ನಡೆಸಿದರು.

ಈ ಸಭೆಯಲ್ಲಿ ಮಹಾಧರ್ಮಾಧ್ಯಕ್ಷರು ಕೂಡಿ ಮುಂದಿನ ವರ್ಷದ ಧಾರ್ಮಿಕ ಸೇವೆಯ ಆದ್ಯತೆಗಳ ಕುರಿತು ಚರ್ಚಿಸಿದರು. ಜೊತೆಗೆ ಸೆಮಿನಾರಿಯ ಉಪನ್ಯಾಸಕರು, ರೆಕ್ಟರ್ ಹಾಗೂ ಮೂರು ಧರ್ಮಪ್ರಾಂತ್ಯಗಳ ಗುರುದೀಕ್ಷಾಭ್ಯರ್ಥಿಗಳನ್ನು  ಭೇಟಿಯಾದರು. ಈ ಭೇಟಿಯು ಬಲಿಪೂಜೆಯ ಆಚರಣೆಯೊಂದಿಗೆ ಅಂತ್ಯಗೊಂಡಿತು. ಈ ಸಂದರ್ಭದಲ್ಲಿ ಆಧ್ಯಾತ್ಮಿಕ ತರಬೇತಿಯ ವರ್ಷದಲ್ಲಿದ್ದ ಐದು ಗುರುದೀಕ್ಷಾಭ್ಯರ್ಥಿಗಳಿಗೆ  ನಿಲುವಂಗಿ ನೀಡಲಾಯಿತು. ಇದು ಅವರ ಗುರುತ್ವದ ಮಾರ್ಗದತ್ತ ಸಾಗುವ ಪಯಣದಲ್ಲಿ ಮಹತ್ವದ ಹಂತವಾಗಿತ್ತು.

ನಿಜವಾದ ಗುರುತ್ವದ ಕರೆ

ಈ ಬಲಿಪೂಜೆಯನ್ನು ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಜೇಕಬ್ ಅಬಾ ಆಚರಿಸಿದರು. ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಕ್ರಿಸ್ಟೋಫರ್ ಕಾರ್ಡೋನ್ ಮತ್ತು ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಪೀಟರ್ ಹೌಹೌ ಸೆಮಿನರಿ ಗುರುಗಳೊಂದಿಗೆ ಸಹಆಚರಣೆ ಮಾಡಿದರು.

ತಮ್ಮ ಉಪದೇಶದಲ್ಲಿ ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಅಬಾ ಗುರುದೀಕ್ಷಾಭ್ಯರ್ಥಿಗಳನ್ನು ತಮ್ಮ ಕರೆಯ ಬಗ್ಗೆ ಆಳವಾಗಿ ಚಿಂತಿಸಲು ಪ್ರೇರೇಪಿಸಿದರು.“ನೀವು ಅಧಿಕಾರ ಅಥವಾ ಪ್ರಭಾವಕ್ಕಾಗಿ ಗುರುವಾಗಲು ಬಯಸಿದರೆ, ಅದು ತಪ್ಪಾಗಿದೆ,” ಎಂದು ಅವರು ಹೇಳಿದರು.

“ನಿಜವಾದ ಗುರುತ್ವವೆಂದರೆ ನಿಮ್ಮ ಜೀವನವನ್ನು ಸ್ವರ್ಗದತ್ತ ರೂಪಿಸುವುದು ಮತ್ತು ದೇವರ ಜನರ ರಕ್ಷಣೆಗೆ ಸೇವೆ ಸಲ್ಲಿಸುವುದು. ಧರ್ಮಸಭೆಗೆ ನೀವು ಕ್ರಿಸ್ತನನ್ನು ಇತರರ ಬಳಿಗೆ ತರುವವರಾಗಬೇಕು.” ಗುರು ತರಬೇತಿ ಎಂದರೆ ಕೇವಲ ಒಂದು ಪದವಿಯನ್ನು ಪಡೆಯುವುದು ಅಲ್ಲ; ಅದು ಪರಿಶುದ್ಧತೆಯಲ್ಲಿ ಬೆಳೆಯುವುದು ಮತ್ತು ದೇವರ ಪ್ರೀತಿಯಲ್ಲಿ ನೆಲೆಯೂರಿದ ಜೀವನವನ್ನು ನಡೆಸುವುದಾಗಿದೆ ಎಂದು ಅವರು ನೆನಪಿಸಿದರು.

ನಿಲುವಂಗಿಯ ಅರ್ಥ

ನಿಲುವಂಗಿ ಪಡೆದ ಗುರುದೀಕ್ಷಾಭ್ಯರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದ ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಜೇಕಬ್ ಅಬಾ, ಈ ವಸ್ತ್ರವು ಅವರ ಕರೆಯಂತೆ ನಿಷ್ಠೆಯಿಂದ ಬದುಕುವ ಬದ್ಧತೆಯನ್ನು ಸೂಚಿಸುತ್ತದೆ ಎಂದು ಹೇಳಿದರು.

“ನೀವು ದೇವರ ಕ್ಷಮೆಯನ್ನು ಅನುಭವಿಸಿದ್ದೀರಾ?” ಎಂದು ಅವರು ಪ್ರಶ್ನಿಸಿದರು.

“ನಿಮ್ಮ ತರಬೇತಿ ಕೇವಲ ‘ಗುರು’ ಎಂಬ ಪದವಿಯನ್ನು ಪಡೆಯಲು ಅಲ್ಲ; ಅದು ಪರಿಶುದ್ಧ ಜೀವನವನ್ನು ನಡೆಸಲು. ನಿಮ್ಮ ನಿಲುವಂಗಿ ದೇವರಿಗೆ ಮಾಡಿದ ಬದ್ಧತೆಯ ಸಂಕೇತವಾಗಿರಲಿ — ಪ್ರದರ್ಶನಕ್ಕಾಗಿ ಅಲ್ಲ.”

ಸೇವೆಗಾಗಿ ರೂಪುಗೊಳ್ಳುವ ತರಬೇತಿ

ಮಹಾಧರ್ಮಾಧ್ಯಕ್ಷರಾದ ಪೂಜ್ಯ ಜೇಕಬ್ ಅಬಾ ಗುರುದೀಕ್ಷಾಭ್ಯರ್ಥಿಗಳನ್ನು ತಮ್ಮ ತರಬೇತಿಯ ಸವಾಲುಗಳನ್ನು ಮಿಷನರಿ ಸೇವೆಗೆ ಸಿದ್ಧತೆಯಾಗಿ ಸ್ವೀಕರಿಸಲು ಪ್ರೋತ್ಸಾಹಿಸಿದರು. ಅವರ ಜೀವನದ ಮೂಲಕವೇ ಅವರು ಸೇವೆ ಸಲ್ಲಿಸಲು ಕರೆಯಲ್ಪಟ್ಟ ಭಕ್ತರ ನಡುವೆ ಪ್ರಭು ಕ್ರಿಸ್ತರು ಸಾಕ್ಷಾತ್ಕರಿಸಲ್ಪಡುತ್ತಾರೆ ಎಂದು ಅವರು ಹೇಳಿದರು.

ಸೆಮಿನಾರಿ ತರಬೇತಿಯಲ್ಲಿ ಮಹತ್ವದ ಹಂತವಾದ ನಿಲುವಂಗಿ ಧಾರಣೆ ಸಮಾರಂಭವು,  ಗುರುದೀಕ್ಷಾಭ್ಯರ್ಥಿಗಳು ದೇವರಿಗೂ ಮತ್ತು ಧರ್ಮಸಭೆಯ ಸೇವೆಗೆ ತಮ್ಮನ್ನು ಸಮರ್ಪಿಸುವ ಬದ್ಧತೆಯನ್ನು ಸೂಚಿಸುತ್ತದೆ.

2026ರತ್ತ ಮುಂದಿನ ದೃಷ್ಟಿ

ಮಹಾಧರ್ಮಾಧ್ಯಕ್ಷರ ಈ ಸಭೆಯಲ್ಲಿ ಮುಂದಿನ ವರ್ಷದ ಕಾರ್ಯಕ್ರಮಗಳ ಕುರಿತು ಚರ್ಚಿಸಲಾಯಿತು. ಇದರಲ್ಲಿ ಗುರು ತರಬೇತಿಯನ್ನು ಬಲಪಡಿಸುವುದು, ತಮ್ಮ ಧರ್ಮಪ್ರಾಂತ್ಯಗಳ ಧಾರ್ಮಿಕ ಸೇವೆಯ ಅಗತ್ಯಗಳಿಗೆ ಸ್ಪಂದಿಸುವುದು ಮತ್ತು ಸೋಲೊಮನ್ ದ್ವೀಪಗಳಾದ್ಯಂತ ಧರ್ಮಸಭೆಯ ಸೇವೆಯನ್ನು ಮುಂದುವರಿಸುವುದು ಸೇರಿವೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).