ಕಾಂಬೋಡಿಯಾದಲ್ಲಿ 21 ವರ್ಷಗಳ ಬಳಿಕ ಮುಚ್ಚಿದ ಕೊರಿಯನ್ ಕಾರ್ಮೆಲ್ ಮಠ:ದೈವ ಕರೆಯ ಕೊರತೆ

ಲೇಖಕರು: ಚೈನರೋಂಗ್ ಮಂತಿಯೆನ್‌ವಿಚಿಯೆಂಚೈ, LiCAS ವರದಿ

2004ರಲ್ಲಿ ಸೋಲ್ ಕಾರ್ಮೆಲೈಟ್ ಮಠದ ಸನ್ಯಾಸಿನಿಯರಿಂದ ಸ್ಥಾಪಿಸಲ್ಪಟ್ಟ ಫ್ನೋಂ ಪೆನ್‌ನ ಡಿಸ್ಕಾಲ್ಸ್ಡ್ ಕಾರ್ಮೆಲೈಟ್ ಮಠವು, ದಕ್ಷಿಣ ಕೊರಿಯಾದಿಂದ ಕಾಂಬೋಡಿಯಾದಲ್ಲಿ ಧರ್ಮಪ್ರಚಾರ ಕಾರ್ಯಕ್ಕೆ ಮುಂದಾದ ಮೊದಲ ಧ್ಯಾನಮಯ ಧಾರ್ಮಿಕ ಸಮುದಾಯ ಎಂಬ ವಿಶೇಷ ಸ್ಥಾನವನ್ನು ಹೊಂದಿತ್ತು.

ವರ್ಷಗಳ ಸೇವೆಯ ನಂತರ, ಅಲ್ಲಿ ಉಳಿದಿದ್ದ ಸನ್ಯಾಸಿನಿಯರು ಇದೀಗ ತಮ್ಮ ಸ್ವದೇಶಕ್ಕೆ ಮರಳುತ್ತಿದ್ದಾರೆ.

ಮಠದ ಮುಕ್ತಾಯ ಸಮಾರಂಭವು ಪವಿತ್ರ ಬಲಿಪೂಜೆಯ ಆಚರಣೆಯೊಂದಿಗೆ ನೆರವೇರಿತು. ಫ್ನೋಂ ಪೆನ್ ಪ್ರೇಷಿತ ಧರ್ಮಪ್ರಾಂತ್ಯದ ವಂ. ಗುರು ಒಲಿವಿಯರ್ ಶ್ಮಿತ್ತಹಾಯ್ಸ್ಲರ್ ಅವರು ಅಧ್ಯಕ್ಷತೆ ವಹಿಸಿದರು. ಫ್ನೋಂ ಪೆನ್‌ನ ಸಹಾಯಕ ಪ್ರೇಷಿತ ಧರ್ಮಪ್ರಾಂತ್ಯದ ವಂ. ಗುರು ಪಿಯರ್ ಹಾಂಗ್ಲಿ ಸುವೋನ್ ಹಾಗೂ ಅನೇಕ ಗುರುಗಳು ಸಹ ಆಚರಣೆಯಲ್ಲಿ ಭಾಗವಹಿಸಿದರು.

ಸ್ಥಳೀಯ ಕಥೋಲಿಕ ಸಮುದಾಯದ ಸುಮಾರು 100 ಮಂದಿ ಈ ಸಂದರ್ಭದಲ್ಲಿ ಸೇರಿ, ಸನ್ಯಾಸಿನಿಯರ ಶಾಂತ ಆಳವಾದ ಸಾಕ್ಷ್ಯ ಜೀವನಕ್ಕಾಗಿ ತಮ್ಮ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.

ತಮ್ಮ ಉಪದೇಶದಲ್ಲಿ, ವಂ. ಗುರು ಶ್ಮಿತ್ತಹಾಯ್ಸ್ಲರ್ ಅವರು ಮಠದ ಅಂತ್ಯವಾಗುತ್ತಿರುವುದರ ಕುರಿತು ಆಳವಾದ ವಿಷಾದ ವ್ಯಕ್ತಪಡಿಸಿ, ಕಾರ್ಮೆಲೈಟ್ ಸನ್ಯಾಸಿನಿಯರ ಉಪಸ್ಥಿತಿಯಿಂದ ಸ್ಥಳೀಯ ಧರ್ಮಸಭೆಗೆ ದೊರೆತ ಆತ್ಮಿಕ ಶ್ರೀಮಂತಿಕೆಯನ್ನು ಸ್ಮರಿಸಿದರು.

ಇದರ ಜೊತೆಗೆ, ಪ್ರಾರ್ಥನೆಯಲ್ಲಿ ಒಂದಾಗಿರುವುದರ ಮೂಲಕ ವಿಶ್ವಾಸಿಗಳು ಭರವಸೆಯನ್ನು ಕಳೆದುಕೊಳ್ಳಬಾರದು ಎಂದು ಅವರು ಉತ್ತೇಜಿಸಿದರು. ಧ್ಯಾನಮಯ ಜೀವನವು ಭೌತಿಕವಾಗಿ ಕಾಣಿಸದಿದ್ದರೂ ಅದರ ಮೌಲ್ಯ ಎಂದಿಗೂ ಕಡಿಮೆಯಾಗುವುದಿಲ್ಲ ಎಂದು ಅವರು ಒತ್ತಿಹೇಳಿದರು.

ಡಿಸ್ಕಾಲ್ಸ್ಡ್ ಕಾರ್ಮೆಲೈಟ್ ಸನ್ಯಾಸಿನಿಯರ ಸಂಘದ (OCD) ಸದಸ್ಯರಾಗಿರುವ ಈ ಸನ್ಯಾಸಿನಿಯರು ಮೊದಲ ಬಾರಿಗೆ 2004ರಲ್ಲಿ ಕಾಂಬೋಡಿಯಾಕ್ಕೆ ಬಂದರು. ಮೊದಲಿಗೆ ಅವರು ಫ್ನೋಂ ಪೆನ್‌ನಲ್ಲಿರುವ ಒಂದು ಮನೆಯಲ್ಲಿ ವಾಸವಾಗಿದ್ದು, ನಂತರ 2010ರಲ್ಲಿ ರಾಜಧಾನಿಯ ಹೊರವಲಯದಲ್ಲಿರುವ ಕಂದಾಲ್ ಪ್ರಾಂತ್ಯದ ಅಂಗ್ ಸ್ನುಯೋಲ್ ಜಿಲ್ಲೆಯಲ್ಲಿ ನಿರ್ಮಿಸಲ್ಪಟ್ಟ ಮಠಕ್ಕೆ ಸ್ಥಳಾಂತರಗೊಂಡರು. ಅತ್ಯುನ್ನತ ಅವಧಿಯಲ್ಲಿ, ಈ ಸಮುದಾಯದಲ್ಲಿ ಏಳು ಕೊರಿಯನ್ ಸನ್ಯಾಸಿನಿಯರು ಇದ್ದರು. ಸ್ಥಳೀಯ ಧರ್ಮಸಭೆಯೊಂದಿಗೆ ಹೆಚ್ಚು ಸಂಪರ್ಕ ಸಾಧಿಸಲು ಅವರು ಖ್ಮೇರ್ ಭಾಷೆಯ ಜೊತೆಗೆ ಕೆಲವರು ಇಂಗ್ಲಿಷನ್ನೂ ಕಲಿತುಕೊಂಡಿದ್ದರು.

ತಮ್ಮ ಧ್ಯೇಯಕ್ಕೆ ನಿಷ್ಠರಾಗಿರುವ ಈ ಸನ್ಯಾಸಿನಿಯರು, ಪ್ರಾರ್ಥನೆ, ಮೌನ, ತಪಸ್ಸು ಮತ್ತು ಕೈಕೆಲಸದೊಂದಿಗೆ ಕೂಡಿದ ಮಠ ಜೀವನವನ್ನು ನಡೆಸಿದರು. ಅವರ ಮಠವು ಕಾಂಬೋಡಿಯಾದಲ್ಲಿ ವೇಗವಾಗಿ ನಡೆಯುತ್ತಿರುವ ಅಭಿವೃದ್ಧಿ ಮತ್ತು ಸಾಮಾಜಿಕ ಬದಲಾವಣೆಗಳ ನಡುವೆ ಶಾಂತಿ ಮತ್ತು ಆತ್ಮಿಕ ನೆಮ್ಮದಿಯ ಸ್ಥಳವೆಂದು ಪರಿಗಣಿಸಲ್ಪಟ್ಟಿತ್ತು.

ಅಲ್ಲಿ ಭೇಟಿ ನೀಡಿದವರು, ಮಠದೊಳಗೆ ಕಾಲಿಟ್ಟ ಕ್ಷಣದಿಂದಲೇ ವಿಶಿಷ್ಟವಾದ ಶಾಂತಿಯ ಅನುಭವವನ್ನು ಹೊಂದುತ್ತಿದ್ದೆವು ಎಂದು ಹೇಳುತ್ತಿದ್ದರು. ಪ್ರಾರ್ಥನೆಯ ಲಯವೇ ದೈನಂದಿನ ಜೀವನವನ್ನು ರೂಪಿಸುತ್ತಿದ್ದು, ಹೊರಜಗತ್ತಿನ ಚಿಂತನೆಗಳು ಮಠದ ಗೋಡೆಗಳ ಹೊರಗೇ ಉಳಿಯುತ್ತಿದ್ದವು ಎಂಬ ಅನುಭವ ಅವರಿಗೆ ಉಂಟಾಗುತ್ತಿತ್ತು. ಬಾಹ್ಯ ಚಟುವಟಿಕೆಗಳು ಕಡಿಮೆ ಇದ್ದರೂ, ಈ ಸನ್ಯಾಸಿನಿಯರ ಉಪಸ್ಥಿತಿಯು ವಿಶ್ವವ್ಯಾಪಕವಾದ ಧರ್ಮಪ್ರಚಾರದ ಅರ್ಥವನ್ನು ಹೊತ್ತಿತ್ತು.

ಕಾರ್ಮೆಲೈಟ್ ಪರಂಪರೆಯಲ್ಲಿ ನೆಲೆಗೊಂಡಿರುವ ಅವರ ಮುಖ್ಯ “ಕಾರ್ಯ” ಪ್ರಾರ್ಥನೆಯೇ ಆಗಿತ್ತು—ಧರ್ಮಸಭೆಗಾಗಿ, ಸಮಾಜಕ್ಕಾಗಿ, ಮತ್ತು ನೋವು ಹಾಗೂ ವಿಭಜನೆಯಿಂದ ಕೂಡಿದ ಜಗತ್ತಿಗಾಗಿ. ಅವರ ಮೌನ ತ್ಯಾಗಗಳು ಮಾನವಕುಲದೊಂದಿಗೆ ಆಧ್ಯಾತ್ಮಿಕ ಐಕ್ಯತೆಯ ರೂಪವಾಗಿ ಸಲ್ಲಿಸಲ್ಪಟ್ಟವು.

ಮಠ ಮುಚ್ಚುತ್ತಿರುವುದು ಪ್ರಾದೇಶಿಕ ಮಟ್ಟದಲ್ಲಿಯೂ ಚಿಂತೆಯನ್ನು ಉಂಟುಮಾಡಿದೆ. ಪಕ್ಕದ ದೇಶವಾದ ಥೈಲ್ಯಾಂಡ್‌ನಲ್ಲಿಯೂ ಇದೇ ರೀತಿಯ ಪರಿಸ್ಥಿತಿಯನ್ನು ಧರ್ಮಸಭೆಯ ನಾಯಕರು ಗಮನಿಸುತ್ತಿದ್ದಾರೆ.

“ಥೈಲ್ಯಾಂಡ್‌ನಲ್ಲಿಯೂ ಇದೇ ಪರಿಸ್ಥಿತಿ ಕಾಣುತ್ತಿದೆ,” ಎಂದು ಅಲ್ಲಿನ Serra ಸಭೆಯ ಮಾಜಿ ಮಂಡಳಿ ಅಧ್ಯಕ್ಷ ನಿಫೋನ್ ಸ್ಯಾಂಗ್‌ಪ್ರಡಾಬ್ ಹೇಳಿದರು. ಈ ಸಭೆಯು ಯಾಜಕತ್ವ ಮತ್ತು ಸಮರ್ಪಿತ ಧಾರ್ಮಿಕ ಜೀವನಕ್ಕೆ ದೈವ ಕರೆಯನ್ನು ಉತ್ತೇಜಿಸುವ ಕಾರ್ಯದಲ್ಲಿ ತೊಡಗಿದೆ.

“ದೈವ ಕರೆಯ ಕೊರತೆಗೆ ಧರ್ಮನಿರಪೇಕ್ಷತೆ, ಕುಟುಂಬಗಳಲ್ಲಿ ನಂಬಿಕೆಯ ಕುಸಿತ ಮತ್ತು ಸಮರ್ಪಕ ಧಾರ್ಮಿಕ ಬೋಧನೆಯ ಕೊರತೆ ಕಾರಣವಾಗಿವೆ,” ಎಂದು ಅವರು LiCAS ವರದಿಗೆ ತಿಳಿಸಿದ್ದಾರೆ.

ಮಾರ್ಚ್ 20–21ರಂದು ದೇಶದ ಪೂರ್ವ ಭಾಗದಲ್ಲಿ Serra ಸದಸ್ಯರಿಗಾಗಿ ನಡೆದ ಕಾರ್ಯಾಗಾರದಲ್ಲಿ ಅವರು ಮಾತನಾಡುತ್ತಾ, ಈ ಕುಸಿತವನ್ನು ತಡೆಯಲು ಹೆಚ್ಚು ಸಕ್ರಿಯ ಪ್ರಯತ್ನ ಅಗತ್ಯವೆಂದು ಒತ್ತಿ ಹೇಳಿದರು.

“ಧರ್ಮಸಭೆಯೊಳಗೆ ದೈವ ಕರೆಯ ಸಂಸ್ಕೃತಿಯನ್ನು ಬೆಳೆಸಲು ಹೊಸ ಮತ್ತು ಉದ್ದೇಶಪೂರ್ಣ ಪ್ರಯತ್ನ ಅಗತ್ಯ. ನಾವು ಕೇವಲ ನಿರೀಕ್ಷಿಸುವ ಮನೋಭಾವದಿಂದ ಹೊರಬಂದು, ಸಕ್ರಿಯವಾಗಿ ಪ್ರಾರ್ಥನೆಯೊಂದಿಗೆ ಉತ್ತೇಜಿಸಬೇಕು” ಎಂದು ಅವರು ಹೇಳಿದರು.

ಈ ಧರ್ಮಪ್ರಚಾರದ ಆರಂಭವನ್ನು ಸ್ಮರಿಸುತ್ತಾ, ಮಠದ ಮುಖ್ಯಸ್ಥೆಯಾದ ಸಿಸಹೋದರಿ ಮೇರಿ (OCD) ಅವರು, ಕಾಂಬೋಡಿಯಾದಲ್ಲಿ ಸ್ಥಾಪನೆ ಕೊರಿಯನ್ ಧರ್ಮಸಭೆಗೆ ಐತಿಹಾಸಿಕ ಹೆಜ್ಜೆಯಾಗಿತ್ತು ಎಂದು ಹಿಂದೆ ವಿವರಿಸಿದ್ದರು.

1940ರಲ್ಲಿ ಫ್ರಾನ್ಸ್‌ನೊಂದಿಗೆ ಸಂಬಂಧ ಹೊಂದಿರುವ ಮೂಲಗಳಿಂದ ಸ್ಥಾಪನೆಯಾದ ಸೋಲ್ ಕಾರ್ಮೆಲೈಟ್ ಸಮುದಾಯವು ವರ್ಷಗಳೊಂದಿಗೆ ವಿಸ್ತರಿಸಿಕೊಂಡು, ದಕ್ಷಿಣ ಕೊರಿಯಾದಾದ್ಯಂತ ಹಲವು ಮಠಗಳನ್ನು ಸ್ಥಾಪಿಸಿತು.

ಕಾಂಬೋಡಿಯಾಕ್ಕೆ ಕೈಗೊಂಡ ಈ ಧರ್ಮಪ್ರಚಾರ ಕಾರ್ಯವು, ಕೊರಿಯಾದ ಹೊರಗೆ ನಡೆದ ಮೊದಲ ಧ್ಯಾನಮಯ ಸೇವೆಯಾಗಿ ಐತಿಹಾಸಿಕ ಮೈಲಿಗಲ್ಲಾಯಿತು.

ಮಠ ಮುಚ್ಚುತ್ತಿರುವುದು ಕಾಂಬೋಡಿಯಾದಲ್ಲಿನ ಅವರ ಭೌತಿಕ ಉಪಸ್ಥಿತಿ ಅಂತ್ಯಗೊಂಡಿದ್ದರೂ, ಸ್ಥಳೀಯ ಧರ್ಮಸಭೆಯ ಅನೇಕರು ಕಾರ್ಮೆಲೈಟ್ ಸನ್ಯಾಸಿನಿಯರನ್ನು ಮೌನದಲ್ಲಿದ್ದರೂ ಶಕ್ತಿಯುತವಾದ ಸಾಕ್ಷಿಯಾಗಿ ನೆನಪಿಸಿಕೊಂಡಿದ್ದಾರೆ. ಅವರ ಪ್ರಾರ್ಥನೆಯ ಪರಂಪರೆ ಅವರ ನಿರ್ಗಮನದ ಬಳಿಕವೂ ಮುಂದುವರಿಯುತ್ತದೆ ಎಂಬ ನಂಬಿಕೆ ಉಳಿದಿದೆ.

ಈ ಲೇಖನವು ಮೂಲತಃ https://www.licas.news  ನಲ್ಲಿ ಪ್ರಕಟಗೊಂಡಿದೆ. ಎಲ್ಲಾ ಹಕ್ಕುಗಳು ಸಂರಕ್ಷಿತ. ತೃತೀಯ ವ್ಯಕ್ತಿಗಳಿಂದ ಅನುಮತಿಯಿಲ್ಲದೆ ಮರುಪ್ರಕಟಣೆ ಮಾಡಲು ಅವಕಾಶವಿಲ್ಲ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).