ನಿಧನದ 30 ವರ್ಷಗಳ ಬಳಿಕವೂ ಟಿಬಿರಿನ್ ಸಂನ್ಯಾಸಿಗಳ ಜೀವಂತ ಸ್ಮರಣೆ

ಲೇಖಕರು:ಒಲಿವಿರ್ ಬೊನ್ನೆಲ್

1996ರ ಮಾರ್ಚ್ 26–27ರ ರಾತ್ರಿ, ಅಲ್ಜೀರಿಯಾದ ಟಿಬಿರಿನ್ ಮಠದ ಏಳು ಟ್ರಾಪಿಸ್ಟ್ ಸಂನ್ಯಾಸಿಗಳನ್ನು ಶಸ್ತ್ರಸಜ್ಜಿತ ವ್ಯಕ್ತಿಗಳು ಅಪಹರಿಸಿದರು. ಅವರ ತಲೆಗಳನ್ನು ಮೇ 30ರಂದು ಪತ್ತೆ ಹಚ್ಚಲಾಯಿತು. ಇದಕ್ಕೆ ಕೆಲ ದಿನಗಳ ಮೊದಲು, “ಆರ್ಮ್ಡ್ ಇಸ್ಲಾಮಿಕ್ ಗ್ರೂಪ್” (GIA) ಎಂಬ ಸಂಘಟನೆ ಅವರನ್ನು ಶಿರಚ್ಚೇದ ಮಾಡಲಾಗಿದೆ ಎಂದು ಘೋಷಿಸಿತ್ತು. ನೋಟ್ರ್-ಡೇಮ್ ದೆ ಲ್’ಆಟ್ಲಾಸ್ ಮಠದ ಸಿಸ್ಟರ್ಷಿಯನ್ ಸಂನ್ಯಾಸಿಗಳ ಹತ್ಯೆ ದೇಶದೊಳಗೂ ಹೊರಗೂ ಆಘಾತ ಉಂಟುಮಾಡಿತು. 2010ರಲ್ಲಿ ಜೇವಿಯರ್ ಬೋವ್ವಾಯ್ ನಿರ್ದೇಶಿಸಿದ “Of Gods and Men” ಚಲನಚಿತ್ರವು ಕಾನ್ ಚಲನಚಿತ್ರೋತ್ಸವದಲ್ಲಿ ಗ್ರಾಂಡ್ ಜ್ಯೂರಿ ಪ್ರಶಸ್ತಿಯನ್ನು ಪಡೆದು, ಈ ಸಂನ್ಯಾಸಿಗಳ ಜೀವನ ಮತ್ತು ಸಾವಿನ ಘಟನೆಗೆ ಜಾಗತಿಕ ಮಟ್ಟದಲ್ಲಿ ಹೆಚ್ಚಿನ ಗಮನ ಸೆಳೆಯಿತು.

“ಕಪ್ಪು ದಶಕ”ದ ಹಿನ್ನೆಲೆ

1996ರಲ್ಲಿ ಅಲ್ಜೀರಿಯಾ “ಕಪ್ಪು ದಶಕ”ವೆಂದು ಕರೆಯಲ್ಪಡುವ ಹಿಂಸಾಚಾರದ ಅವಧಿಯ ಮಧ್ಯದಲ್ಲಿತ್ತು. ಈ ಅವಧಿಯಲ್ಲಿ ವಿವಿಧ ಇಸ್ಲಾಮಿಕ್ ಉಗ್ರ ಸಂಘಟನೆಗಳು ನಡೆಸಿದ ದಾಳಿಗಳು ಹಾಗೂ ಸರ್ಕಾರದ ಸಶಸ್ತ್ರ ಪ್ರತಿಕ್ರಿಯೆಗಳು ದೇಶವನ್ನು ಕಂಗೆಡಿಸಿವೆ. ಈ ಹಿಂಸಾಚಾರವು ಸಾವಿರಾರು ಜನರ ಜೀವವನ್ನು ಕಸಿದುಕೊಂಡಿದ್ದು, ಅಲ್ಜೀರಿಯಾದ ಇತಿಹಾಸದಲ್ಲಿ ಅತ್ಯಂತ ಕತ್ತಲೆಯ ಅಧ್ಯಾಯಗಳಲ್ಲಿ ಒಂದಾಗಿ ಪರಿಗಣಿಸಲಾಗಿದೆ. ಭೀತಿಯ ನಡುವೆಯೂ ತೆಗೆದುಕೊಂಡ ನಿರ್ಧಾರ ಎಲ್ಲಾ ರೀತಿಯ ಅಪಾಯಗಳು ಎದುರಾಗುತ್ತಿದ್ದರೂ, ಟಿಬಿರಿನ್ ಸಂನ್ಯಾಸಿಗಳು ಮಠವನ್ನು ತೊರೆಯದೇ ಉಳಿಯುವ ನಿರ್ಧಾರದಲ್ಲಿ ಸ್ಥಿರರಾಗಿದ್ದರು. ಮುಸ್ಲಿಂ ಪ್ರಾಬಲ್ಯದ ಭೂಮಿಯಲ್ಲಿ ತಮ್ಮ ಶಾಂತ ಮತ್ತು ಪ್ರಾರ್ಥನಾಮಯ ಸಾನ್ನಿಧ್ಯವೇ ದೇವರು ಅವರಿಗೆ ನೀಡಿದ ಕರೆಯಾಗಿದೆ ಎಂಬ ನಂಬಿಕೆಯಲ್ಲಿ ಅವರು ಬದುಕಿದರು.

ಮಠದ ಮುಖ್ಯಸ್ಥರಾಗಿದ್ದ ಕ್ರಿಸ್ಟಿಯನ್ ದೆ ಶೇರ್ಗೆ ಅವರು ಬರೆದಿದ್ದ ಒಂದು ಪತ್ರದಲ್ಲಿ, ತಮ್ಮ ಜೀವ ದೇವರಿಗೆ ಮತ್ತು ಈ ದೇಶಕ್ಕೆ ಅರ್ಪಿತವಾಗಿತ್ತು ಎಂದು ಉಲ್ಲೇಖಿಸಿದ್ದಾರೆ. ಈ ಪತ್ರವನ್ನು ಅವರ ಸಾವಿನ ನಂತರ ಪತ್ತೆ ಹಚ್ಚಲಾಗಿದೆ.

ಅಲ್ಜೀರಿಯಾದ ನೆಲದಲ್ಲಿ ಬೆಳೆದ ಸಂಬಂಧಗಳು

ಸಹೋದರ ಕ್ರಿಸ್ಟಿಯನ್ ಅವರೊಂದಿಗೆ, ಸ್ಥಳೀಯ ಜನರಿಗೆ ಚಿಕಿತ್ಸೆ ನೀಡುತ್ತಿದ್ದ ಸಹೋದರ ಲ್ಯೂಕ್, ಸಮುದಾಯದ ಅಡುಗೆಗಾರ ಮತ್ತು ತೋಟಗಾರರಾಗಿದ್ದ ಸಹೋದರ ಮೈಕಲ್, ಗಾಯಕರಾಗಿದ್ದ ಸಹೋದರ ಸೆಲೆಸ್ಟಿನ್, ಜೊತೆಗೆ ಸಹೋದರ ಕ್ರಿಸ್ಟೋಫ್, ಬ್ರೂನೋ ಮತ್ತು ಪಾಲ್—ಸೇರಿ ಶಾಂತಿಯಲ್ಲೂ ಸೇವೆಯಲ್ಲೂ ಬದುಕಿದ ಸಮುದಾಯವನ್ನು ರೂಪಿಸಿದ್ದರು.

ಹಿಂಸಾಚಾರವು ಸುತ್ತಮುತ್ತ ಉಗ್ರವಾಗುತ್ತಿದ್ದ ಸಂದರ್ಭದಲ್ಲೂ, ಅವರ ಮೃದುವಾದ ಮತ್ತು ನಿರಾಳ ಸಾನ್ನಿಧ್ಯವು ವಿಶೇಷವಾಗಿ ಗಮನ ಸೆಳೆಯಿತು. ಕಾಲಕ್ರಮೇಣ ಅವರು ಅಲ್ಜೀರಿಯಾದ ನೆಲದಲ್ಲಿ ಬೇರುಬಿಟ್ಟು, ಸ್ಥಳೀಯ ಜನರೊಂದಿಗೆ ಗಾಢ ಸಂಬಂಧಗಳನ್ನು ಬೆಳೆಸಿಕೊಂಡರು. ಇದು ಇಸ್ಲಾಮ್ ಧರ್ಮದೊಂದಿಗೆ ಸಂವಾದದ ಇತಿಹಾಸದಲ್ಲಿಯೂ ಗಮನಾರ್ಹ ಅಧ್ಯಾಯವಾಯಿತು. ಅಲ್ಜೀರಿಯಾದಲ್ಲಿ ಜನಿಸಿ ಹಲವು ವರ್ಷ ಅಲ್ಲಿ ವಾಸಿಸಿದ್ದ ಪತ್ರಕರ್ತ ಫ್ರಾಂಸ್ವಾ ವೇನ್ ಅವರು,

“ಗೇಟನ್ನು ತೆರೆಯುವಾಗ ಸಹೋದರ ಕ್ರಿಸ್ಟಿಯನ್ ಅವರ ಸರಳ ಚಪ್ಪಲಿಗಳನ್ನು ನಾನು ನೆನಪಿಸಿಕೊಳ್ಳುತ್ತೇನೆ; ಆ ಸರಳತೆಯಲ್ಲೇ ಅವರ ಜೀವನದ ಅರ್ಪಣೆ ಸ್ಪಷ್ಟವಾಗಿತ್ತು” ಎಂದು ಹೇಳಿದ್ದಾರೆ.

ಅವರ ತ್ಯಾಗದ ಜಾಗತಿಕ ಗುರುತು

ಈ ಏಳು ಟ್ರಾಪಿಸ್ಟ್ ಸಂನ್ಯಾಸಿಗಳ ಪರಂಪರೆ ಅತ್ಯಂತ ವಿಶಾಲವಾಗಿದೆ. ಒರಾನ್‌ನ ಧರ್ಮಾಧ್ಯಕ್ಷ ಪಿಯರ್ ಕ್ಲಾವೇರಿ ಸೇರಿದಂತೆ ಇನ್ನೂ ಹನ್ನೆರಡು ರಕ್ತಸಾಕ್ಷಿಗಳೊಂದಿಗೆ, ಇವರನ್ನು 2018ರ ಡಿಸೆಂಬರ್ 8ರಂದು ಪೂಜ್ಯ ಜಗದ್ಗುರು ಫ್ರಾನ್ಸಿಸ್ ಅವರು ಧನ್ಯರಾಗಿ ಘೋಷಿಸಿದರು. ಸಂನ್ಯಾಸಿಗಳ ದೇಹಗಳು ಪತ್ತೆಯಾಗದಿದ್ದರೂ, ಮಠದ ಸಮೀಪದ ತೋಟದಲ್ಲಿ ಏಳು ಸ್ಮಾರಕ ಶಿಲೆಗಳು ನಿರ್ಮಾಣಗೊಂಡಿವೆ. ನಾರ್ವೆಯಿಂದ ಅಮೆರಿಕದವರೆಗೆ, ಕಾಂಗೋದಿಂದ ಕ್ಯಾಮರೂನ್ ತನಕ, ವಿಶ್ವದ ವಿವಿಧ ಭಾಗಗಳಲ್ಲಿ ಅವರ ಸ್ಮರಣಾರ್ಥ ಸ್ಮಾರಕಗಳು ನಿರ್ಮಾಣಗೊಂಡಿವೆ.

ಮಠದ ಮುಂದುವರಿದ ಚಟುವಟಿಕೆಗಳು

ನೋಟ್ರ್-ಡೇಮ್ ದೆ ಲ್’ಆಟ್ಲಾಸ್ ಮಠದ ಸಿಸ್ಟರ್ಷಿಯನ್ ಸಮುದಾಯವು ಮೊರಾಕ್ಕೊಗೆ ಸ್ಥಳಾಂತರಗೊಂಡಿದ್ದರೂ, ಟಿಬಿರಿನ್ ಸ್ಥಳವನ್ನು ನಿರ್ಲಕ್ಷ್ಯಗೊಳಿಸಲಾಗಿಲ್ಲ. 2001ರಲ್ಲಿ ಫ್ರಾನ್ಸ್ ಮಿಷನ್‌ನ ಗುರು ಜೀನ್-ಮಾರಿ ಲಸ್ಸೋಸ್ ಅವರು ಪೊಲೀಸ್ ಭದ್ರತೆಯೊಂದಿಗೆ ಅಲ್ಲಿ ಸೇವೆ ಆರಂಭಿಸಿದರು.

ಮಠದ ತೋಟ ಮತ್ತು ಬೆಳೆ ಪ್ರದೇಶವನ್ನು ಸಹೋದರ ಕ್ರಿಸ್ಟೋಫ್ ಅವರ ಸ್ನೇಹಿತರಾದ ಸಮೀರ್ ಮತ್ತು ಯೂಸೆಫ್ ಅವರ ಸಹಾಯದಿಂದ ನಿರ್ವಹಿಸಲಾಗಿದೆ. 2016ರಲ್ಲಿ ಅಲ್ಜಿಯರ್ಸ್ ಮಹಾಧರ್ಮಾಧ್ಯಕ್ಷರು ಈ ಸ್ಥಳದ ಜವಾಬ್ದಾರಿಯನ್ನು ಚೆಮಿನ್ ನ್ಯೂಫ್ ಸಮುದಾಯಕ್ಕೆ ಒಪ್ಪಿಸಿದರು.

ಇಂದಿನ ಸ್ಥಿತಿ

ಇಂದು ಟಿಬಿರಿನ್ ಸ್ಥಳಕ್ಕೆ ಅನೇಕ ಯಾತ್ರಿಕರು ಭೇಟಿ ನೀಡುತ್ತಿದ್ದಾರೆ. ಅವರಲ್ಲಿ ಬಹುಪಾಲು ಅಲ್ಜೀರಿಯಾದವರೇ ಆಗಿದ್ದಾರೆ. ಈ ಸ್ಥಳದಲ್ಲಿ ಮೌನ, ಶಾಂತಿ ಮತ್ತು ಸಹಜೀವನದ ವಾತಾವರಣ ಮುಂದುವರಿದಿದೆ. ಸ್ಥಳದ ಜವಾಬ್ದಾರಿಯನ್ನು ನೋಡಿಕೊಳ್ಳುತ್ತಿರುವ ಧಾರ್ಮಿಕ ಪ್ರತಿನಿಧಿಗಳು ಹೇಳುವಂತೆ, ಸಂನ್ಯಾಸಿಗಳ ಆತ್ಮೀಯ ಪರಂಪರೆ ಈ ಸ್ಥಳದಲ್ಲಿ ಇನ್ನೂ ಸ್ಪಷ್ಟವಾಗಿ ಅನುಭವವಾಗುತ್ತದೆ.

ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ)