ತಪಸ್ಸು ಕಾಲದಲ್ಲಿ ಶಾಂತಿ ಮತ್ತು ಗುಣಮುಖತೆಗೆ ದಕ್ಷಿಣ ಸುಡಾನ್ ಧರ್ಮಾಧ್ಯಕ್ಷರ ಕರೆ

ಲೇಖಕರು: ಸಹೋದರಿ ಕ್ರಿಸ್ಟಿನ್ ಮಸಿವೋ,CPS

ಪ್ರಪಂಚದ ಅತಿ ಕಿರಿಯ ರಾಷ್ಟ್ರವಾಗಿರುವ ದಕ್ಷಿಣ ಸುಡಾನ್, ದಶಕಗಳ ಕಾಲ ಮುಂದುವರಿದ ಸಂಘರ್ಷ, ಅಸ್ಥಿರತೆ, ಶಸ್ತ್ರಸಜ್ಜಿತ ಹಿಂಸಾಚಾರ ಹಾಗೂ ಗಂಭೀರ ಮಾನವೀಯ ಸಂಕಷ್ಟಗಳಿಂದ ಇನ್ನೂ ಸಂಕಷ್ಟವನ್ನು ಅನುಭವಿಸುತ್ತಿದೆ.

1955ರಲ್ಲಿ ಆರಂಭವಾಗಿ 2005ರವರೆಗೆ ಮುಂದುವರಿದ ಕ್ರೂರ ಅಂತರ್ಯುದ್ಧವು, 2011ರಲ್ಲಿ ಸುಡಾನ್‌ನಿಂದ ಸ್ವಾತಂತ್ರ್ಯ ಪಡೆದ ನಂತರವೂ ಹೊಸ ಆಂತರಿಕ ಸಂಘರ್ಷಗಳಿಗೆ ರೂಪಾಂತರಗೊಂಡಿತು. 2013ರಿಂದ 2018ರವರೆಗೆ ಪ್ರಮುಖ ನಾಯಕರ ನಡುವಿನ ಘರ್ಷಣೆಗಳಿಂದ ಈ ಅಶಾಂತಿ ಮತ್ತಷ್ಟು ತೀವ್ರಗೊಂಡು, ನಂತರ ‘ಸಂಘರ್ಷ ಪರಿಹಾರದ ಕುರಿತು ನವೀಕರಿಸಿದ ಒಪ್ಪಂದ (R-ARCSS)’ ಸಹಿ ಮಾಡಲಾಯಿತು.

ಸ್ವಾತಂತ್ರ್ಯ ನಂತರ ಸ್ವಯಂನಿರ್ಣಯದತ್ತ ಇತಿಹಾಸಾತ್ಮಕ ಹೆಜ್ಜೆ ಇಡಲಾಗಿದ್ದರೂ, ಸುಮಾರು 1 ಕೋಟಿ 20 ಲಕ್ಷ ಜನಸಂಖ್ಯೆ ಹೊಂದಿರುವ ದೇಶದ ಜನರಿಗೆ ನಿರಂತರ ಸಂಘರ್ಷಗಳು, ರಾಜಕೀಯ ಅಸ್ಥಿರತೆ ಮತ್ತು ವ್ಯಾಪಕ ಸಂಕಷ್ಟಗಳು ನೆರಳಾಗಿ ಉಳಿದಿವೆ. 

ಮಾನವೀಯ ಪರಿಸ್ಥಿತಿ ಮತ್ತಷ್ಟು ಗಂಭೀರ

ವ್ಯಾಟಿಕನ್‌ ಫಿಡೆಸ್ ಸುದ್ದಿ ಸಂಸ್ಥೆಯ ವರದಿ ಪ್ರಕಾರ, 2025ರ ಡಿಸೆಂಬರ್ ಅಂತ್ಯದ ಬಳಿಕ ದೇಶದ ಉತ್ತರ ಮತ್ತು ಮಧ್ಯ ಭಾಗಗಳಲ್ಲಿ ಸರ್ಕಾರ ಹಾಗೂ ವಿರೋಧಿ ಗುಂಪುಗಳ ನಡುವಿನ ಘರ್ಷಣೆಗಳು ತೀವ್ರಗೊಂಡಿವೆ.

ವಿಶ್ವಸಂಸ್ಥೆಯ ಮಕ್ಕಳ ನಿಧಿಯ(UNICEF) ವರದಿ ಜಾಂಗ್ಲೇ ರಾಜ್ಯದಲ್ಲಿ ಮಾತ್ರವೇ ಭಾರೀ ಪರಿಣಾಮವನ್ನು ಸೂಚಿಸುತ್ತಿದ್ದು, ಕನಿಷ್ಠ 2 ಲಕ್ಷ 80 ಸಾವಿರ ಜನರು—ಮುಖ್ಯವಾಗಿ ಮಹಿಳೆಯರು ಮತ್ತು ಮಕ್ಕಳು—ತಮ್ಮ ಮನೆಗಳಿಂದ ಪಲಾಯನಗೊಂಡಿದ್ದಾರೆ. ಅವರು ಸಾವಿನ ಅಪಾಯ, ಗಾಯಗಳು ಹಾಗೂ ಶಸ್ತ್ರಸಜ್ಜಿತ ಗುಂಪುಗಳ ಬಲವಂತದ ಸೇರ್ಪಡೆಗೆ ಒಳಗಾಗುವ ಭೀತಿಯನ್ನು ಎದುರಿಸುತ್ತಿದ್ದಾರೆ.

ದುರ್ಬಲ ಸಮುದಾಯಗಳಲ್ಲಿ ಆಹಾರ ಸಂಕಷ್ಟ ತೀವ್ರಗೊಳ್ಳುತ್ತಿದ್ದರೆ, ಅತಿಭಾರಿತ ಶಿಬಿರಗಳು, ಶುದ್ಧ ನೀರಿನ ಕೊರತೆ ಮತ್ತು ವೈದ್ಯಕೀಯ ಸೇವೆಗಳ ಅಲಭ್ಯತೆ ಕಾರಣವಾಗಿ ಕಾಲರಾ ಮತ್ತು ಮಲೇರಿಯಾ ಹರಡುವಿಕೆಗೆ ಆರೋಗ್ಯ ವ್ಯವಸ್ಥೆಗಳು ಸಮರ್ಪಕವಾಗಿ ಪ್ರತಿಕ್ರಿಯಿಸಲು ಹೋರಾಟ ನಡೆಸುತ್ತಿವೆ.

ರಾಜಕೀಯ ಸ್ಥಿರತೆ ನಿರಂತರವಾಗದೆ ಹಾಗೂ ಅಂತರರಾಷ್ಟ್ರೀಯ ನೆರವು ಹೆಚ್ಚಾಗದೆ ಇದ್ದರೆ, ಮುಂದಿನ ತಿಂಗಳಲ್ಲಿ ಪರಿಸ್ಥಿತಿ ಇನ್ನಷ್ಟು ಹದಗೆಡಬಹುದೆಂದು ಮಾನವೀಯ ಸಂಸ್ಥೆಗಳು ಎಚ್ಚರಿಕೆ ನೀಡಿವೆ. 

ಪೂಜ್ಯ ಧರ್ಮಾಧ್ಯಕ್ಷ ಕುಸ್ಸಾಲಾ ಅವರ ತಪಸ್ಸು ಕಾಲದ ಭರವಸೆ ಮತ್ತು ಕಾರ್ಯತತ್ಪರತೆಗೆ ಕರೆ

ಟೊಂಬುರಾ–ಯಾಂಬಿಯೋ ಧರ್ಮಪ್ರಾಂತ್ಯದ ಪೂಜ್ಯ ಧರ್ಮಾಧ್ಯಕ್ಷ ಬರಾನಿ ಎಡುಆರ್ಡೋ ಹೀಬೊರೊ ಕುಸ್ಸಾಲಾ ಅವರು ಫೆಬ್ರವರಿ 16ರಂದು ತಮ್ಮ ತಪಸ್ಸು ಕಾಲದ ಸಂದೇಶವನ್ನು ಪ್ರಕಟಿಸಿ, ಶಾಂತಿ, ಗುಣಮುಖತೆ ಹಾಗೂ ನೈತಿಕ ಜವಾಬ್ದಾರಿಯ ಪುನರುಜ್ಜೀವನಕ್ಕೆ ಕರೆ ನೀಡಿದ್ದಾರೆ.

“ನಮ್ಮ ಧರ್ಮಕ್ಷೇತ್ರವು ದ್ವೇಷ, ಜನಾಂಗೀಯ ವಿಭಜನೆ, ಯುವಕರ ದುರುಪಯೋಗ, ದ್ರೋಹ, ಉದ್ದೇಶಿತ  ಹಿಂಸಾಚಾರ, ಬಲವಂತದ ವಿಚ್ಛೇದನಗಳು, ದಾರಿದ್ರ್ಯ ಮತ್ತು ಸಮುದಾಯಗಳನ್ನು ಬಾಧಿಸುವ ರೋಗಗಳು ಎಂಬ ಹಲವು ಸವಾಲುಗಳನ್ನು ಎದುರಿಸುತ್ತಿದೆ” ಎಂದು ಪೂಜ್ಯ ಧರ್ಮಾಧ್ಯಕ್ಷರು ತಿಳಿಸಿದ್ದಾರೆ.

ಪೂಜ್ಯ ಧರ್ಮಾಧ್ಯಕ್ಷ ಹೀಬೊರೊ ವಿಶ್ವಾಸಿಗಳನ್ನು ಸೌಹಾರ್ದ ಮತ್ತು ಐಕ್ಯತೆಯ ಮಾರ್ಗದಲ್ಲಿ ತೊಡಗಿಕೊಳ್ಳಲು ಪ್ರೇರೇಪಿಸಿ, ಸಮುದಾಯಗಳು ವಿಭಜನೆ ಮತ್ತು ಹಿಂಸಾಚಾರವನ್ನು ತಿರಸ್ಕರಿಸಿ, ಮುರಿದ ಸಂಬಂಧಗಳನ್ನು ಮರುಸ್ಥಾಪಿಸಿ ಹಾಗೂ ದುರ್ಬಲರಿಗೆ ಸ್ಪಷ್ಟ ಮತ್ತು ನೈಜ ಬೆಂಬಲವನ್ನು ನೀಡುವಂತೆ ಮನವಿ ಮಾಡಿದ್ದಾರೆ.

ಈ ಸಂದೇಶವು ದಕ್ಷಿಣ ಸುಡಾನ್ ಶಾಶ್ವತ ಶಾಂತಿಯನ್ನು ಹುಡುಕುತ್ತಿರುವ ಸಂದರ್ಭದಲ್ಲಿ ಸಂವಾದವನ್ನು ಉತ್ತೇಜಿಸಿ ಭರವಸೆಯನ್ನು ಬೆಳೆಸುವಲ್ಲಿ ನಂಬಿಕೆಯ ನಾಯಕತ್ವದ ಮಹತ್ವವನ್ನು ಸ್ಪಷ್ಟಪಡಿಸುತ್ತದೆ. 

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).