ಭದ್ರತಾ ಕ್ರಮಗಳೊಂದಿಗೆ ಪಾಕಿಸ್ತಾನದಲ್ಲಿ ಕ್ರಿಸ್ತಜಯಂತಿ ಆಚರಣೆ

ವ್ಯಾಟಿಕನ್ ಸುದ್ದಿ ಸಂಸ್ಥೆಯ ಫಿಡೆಸ್ ಸುದ್ದಿ ಸಂಸ್ಥೆಯ ವರದಿ ಪ್ರಕಾರ, ಈ ಭದ್ರತಾ ವ್ಯವಸ್ಥೆಗಳನ್ನು ಅನೇಕ ಜಿಲ್ಲೆಗಳಲ್ಲಿ ಅಳವಡಿಸಲಾಗಿದ್ದು, ಅವುಗಳನ್ನು ಕ್ರೈಸ್ತ ಸಮುದಾಯಗಳ ಹಾಗೂ ಧರ್ಮಸಭೆಯ ನಾಯಕರುಗಳ ಸಲಹೆ ಮತ್ತು ಸಹಕಾರದೊಂದಿಗೆ ರೂಪಿಸಲಾಗಿದೆ.

ಈ ಕ್ರಮ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸುವುದು, ವಾಹನ ಸಂಚಾರ ನಿಯಂತ್ರಣ, ರಸ್ತೆ ಬೆಳಕು ವ್ಯವಸ್ಥೆ, ಹಾಗೂ ಪರಿಸರ ಸ್ವಚ್ಛತೆಯ ವ್ಯವಸ್ಥೆಗಳನ್ನು ಒಳಗೊಂಡಿವೆ.

ಜನರ ರಕ್ಷಣೆ ಅತ್ಯಂತ ಪ್ರಥಮ ಆದ್ಯತೆ

ಲಾಹೋರಿನ ಧರ್ಮಕೇಂದ್ರದ ಗುರು ಹಾಗೂ ಪಾಕಿಸ್ತಾನ ಧರ್ಮಾಧ್ಯಕ್ಷರ ಸಭೆಯ (Pakistan Bishops’ Conference) ಸಂವಹನಾಧಿಕಾರಿಯಾದ ವಂದನೀಯ ಗುರು ಕೈಸರ್ ಫಿರೋಜ್ ಅವರು, ಈ ಭದ್ರತಾ ಕ್ರಮಗಳ ಅಗತ್ಯತೆಯನ್ನು ವಿವರಿಸಿದರು.

ಪಾಕಿಸ್ತಾನದಲ್ಲಿ ನಡೆದಿರುವ ಹಿಂದಿನ ದಾಳಿಗಳು ಹಾಗೂ ಇತ್ತೀಚಿನ ಆಫ್ಘಾನಿಸ್ತಾನ ಸಂಬಂಧಿತ ಸಂಘರ್ಷಗಳ ಹಿನ್ನೆಲೆಯಲ್ಲಿ, ಉಗ್ರ ದಾಳಿಗಳ ಭೀತಿ ಪಾಕಿಸ್ತಾನಿ ಸಮಾಜದಲ್ಲಿ ವ್ಯಾಪಕವಾಗಿದೆ ಎಂದು ಅವರು ಹೇಳಿದರು. ಇದೇ ಕಾರಣಕ್ಕೆ, ಸರ್ಕಾರದ ರಕ್ಷಣಾ ಯೋಜನೆಗಳಲ್ಲಿ ವಿಶೇಷವಾಗಿ ಕ್ರಿಸ್ತಜಯಂತಿಯ ಸಮಯದಲ್ಲಿ ದೇವಾಲಯಗಳಿಗೂ ಹೆಚ್ಚಿನ ಗಮನ ನೀಡಲಾಗುತ್ತಿದೆ.

ದೇವಾಲಯಗಳ ಪ್ರವೇಶದ್ವಾರಗಳಲ್ಲಿ ತಪಾಸಣೆ ವ್ಯವಸ್ಥೆ ಇರಲಿದೆ. ಈ ಭದ್ರತಾ ಕ್ರಮಗಳ ಕುರಿತು ಕ್ರೈಸ್ತ ಪ್ರತಿನಿಧಿಗಳು ಹಾಗೂ ಪೊಲೀಸ್ ಅಧಿಕಾರಿಗಳು ಸಭೆಗಳನ್ನು ನಡೆಸಿದ್ದಾರೆ. ಕೆಲ ದೇವಾಲಯಗಳಿಗೆ ಪೊಲೀಸ್ ಅಧಿಕಾರಿಗಳು ಭೇಟಿ ನೀಡಿ, ಕಟ್ಟಡದ ರಚನೆಯ ಆಧಾರದ ಮೇಲೆ ವಿಶೇಷ ಯೋಜನೆಗಳನ್ನು ರೂಪಿಸಿದ್ದಾರೆ.

ಸರ್ಕಾರಿ ಅಧಿಕಾರಿಗಳು, ಅಲ್ಪಸಂಖ್ಯಾತರ ಜೀವ, ಆಸ್ತಿ ಮತ್ತು ಮಾನಸಿಕ ಶಾಂತಿಯನ್ನು ರಕ್ಷಿಸುವುದು ಸರ್ಕಾರದ ಅತ್ಯಂತ ಮುಖ್ಯ ಆದ್ಯತೆ ಎಂದು ಸ್ಪಷ್ಟಪಡಿಸಿರುವುದನ್ನು ಗುರು ಫಿರೋಜ್ ಉಲ್ಲೇಖಿಸಿದರು. ಜೊತೆಗೆ, ಇಸ್ಲಾಮಾಬಾದ್ ಪೊಲೀಸ್ ಇಲಾಖೆ ಯಾವುದೇ ಅನುಮಾನಾಸ್ಪದ ಚಟುವಟಿಕೆ ಕಂಡುಬಂದರೆ ತಕ್ಷಣ ಮಾಹಿತಿ ನೀಡುವಂತೆ ನಾಗರಿಕರಿಗೆ ಮನವಿ ಮಾಡಿದೆ.

ಕ್ರಿಸ್ತಜಯಂತಿಯ ಸಂಭ್ರಮ ಮುಂದುವರಿಯುತ್ತದೆ

ಈ ಎಲ್ಲಾ ಭದ್ರತಾ ಕ್ರಮಗಳ ನಡುವೆಯೂ, ಪಾಕಿಸ್ತಾನದ ಕ್ರೈಸ್ತರು ಕ್ರಿಸ್ತಜಯಂತಿಯ ಆಸಂಭ್ರಮಾಚರಣೆಗಳಿಂದ ಹಿಂದೆ ಸರಿಯುತ್ತಿಲ್ಲ ಎಂದು ಗುರು ಫಿರೋಜ್ ತಿಳಿಸಿದರು. ಅವರು ಕ್ರಿಸ್ತಜಯಂತಿಯನ್ನು ಎಲ್ಲಾ ಪಾಕಿಸ್ತಾನಿಗಳಿಗೆ — ಎಲ್ಲ ಧರ್ಮಗಳ ಜನರಿಗೆ — ಸಹೋದರತ್ವ ಮತ್ತು ಶಾಂತಿಯ ಸಹವಾಸದ ಅವಕಾಶವೆಂದು ಪರಿಚಯಿಸಲು ಬದ್ಧರಾಗಿದ್ದಾರೆ.

ಲಾಹೋರಿನಲ್ಲಿ ಇತ್ತೀಚೆಗೆ ಎರಡು ಸಾರ್ವಜನಿಕ ಕಾರ್ಯಕ್ರಮಗಳು ನಡೆದಿವೆ — ಒಂದನ್ನು ಸರ್ಕಾರ ಆಯೋಜಿಸಿದ್ದು, ಮತ್ತೊಂದನ್ನು ಕಥೋಲಿಕ ಸಮುದಾಯ ಆಯೋಜಿಸಿದೆ. ಈ ಎರಡೂ ಕಾರ್ಯಕ್ರಮಗಳಲ್ಲಿ ಕ್ರಿಸ್ತಜಯಂತಿ ಶಾಂತಿಯ ಸಂದೇಶವನ್ನು ಹೊತ್ತಿರುವ ಹಬ್ಬ ಎಂಬುದನ್ನು ಸ್ಪಷ್ಟಪಡಿಸಲಾಯಿತು ಎಂದು ಗುರು ಫಿರೋಜ್ ಹೇಳಿದರು.

ನಾಗರಿಕ ಆಡಳಿತದ ಸಹಯೋಗದಲ್ಲಿ ನಡೆದ ಮೆರವಣಿಗೆಯನ್ನು ಅವರು ಅಂತರ್ ಧರ್ಮೀಯ ಏಕತೆ ಮತ್ತು ಸೌಹಾರ್ದತೆಯ ಸಾರ್ಥಕ ಉದಾಹರಣೆಯಾಗಿ ವರ್ಣಿಸಿದರು. ವಿವಿಧ ಧರ್ಮಗಳ ಜನರು ಒಂದಾಗಿ ಸೇರಿ ಶಾಂತಿ ಮತ್ತು ಆನಂದದ ಸಂದೇಶಗಳನ್ನು ಹಂಚಿಕೊಂಡರು. ಈ ಕಾರ್ಯಕ್ರಮವು ಪಾಕಿಸ್ತಾನಿ ಕ್ರೈಸ್ತರಿಗೆ ಕ್ರಿಸ್ತಜಯಂತಿಯ ನಿಜವಾದ ಆತ್ಮವಾದ ಪ್ರೀತಿ, ಆಶೆ ಮತ್ತು ಏಕತೆಯನ್ನು ದೃಢಪಡಿಸುವ ಅವಕಾಶವಾಯಿತು.

ಸಂಘರ್ಷದ ನಡುವೆ ಶಾಂತಿಯ ದೂತರಾಗಿ ಕ್ರೈಸ್ತರು

ಸಂಘರ್ಷ ಮತ್ತು ಹಿಂಸೆಯಿಂದ ಕೂಡಿದ ಈ ಕಾಲಘಟ್ಟದಲ್ಲಿ, ಕ್ರೈಸ್ತರು ತಮ್ಮನ್ನು ಶಾಂತಿಯ ದೂತರಾಗಿ ಸಮಾಜದ ಮುಂದೆ ಪ್ರಸ್ತುತಪಡಿಸುತ್ತಿದ್ದಾರೆ ಎಂದು ಗುರು ಫಿರೋಜ್ ವಿವರಿಸಿದರು. ಕ್ರಿಸ್ತಜಯಂತಿಯಲ್ಲಿ ಯೇಸು ಕ್ರಿಸ್ತರು ಸಮಾಧಾನ ಮತ್ತು ಶಾಂತಿಯ ಆತ್ಮವನ್ನು ನೀಡುತ್ತಾರೆ. ಈ ಆತ್ಮವನ್ನು ಕ್ರೈಸ್ತ ಸಮುದಾಯವು ಮುಸ್ಲಿಂ ವಿಶ್ವಾಸಿಗಳು, ಇತರ ಧಾರ್ಮಿಕ ಸಮುದಾಯಗಳು, ಸರ್ಕಾರದ ಪ್ರತಿನಿಧಿಗಳು, ಹಾಗು ಇಂದಿನ ಉದ್ವಿಗ್ನತೆಯಿಂದ ಬಳಲುತ್ತಿರುವ ಭಾರತ ಮತ್ತು ಆಫ್ಘಾನಿಸ್ತಾನದ ನೆರೆಹೊರೆಯ ಜನರಿಗೆ ಸಹ ಹಂಚಲು ಬಯಸುತ್ತಿದೆ.

ಡಿಸೆಂಬರ್ 21ರಂದು ಕರಾಚಿಯಲ್ಲಿ, ಸ್ಥಳೀಯ ಕ್ರೈಸ್ತ ಸಮುದಾಯವು ನಾಗರಿಕ ಮತ್ತು ಧಾರ್ಮಿಕ ನಾಯಕರೊಂದಿಗೆ ಸೇರಿ ಶಾಂತಿಯ ಪರ ಸಾರ್ವಜನಿಕ ಪ್ರದರ್ಶನವನ್ನು ಆಯೋಜಿಸಿದೆ. ಪಾಕಿಸ್ತಾನದ ವಿವಿಧ ನಗರಗಳಲ್ಲಿ, ಧರ್ಮಕೇಂದ್ರಗಳು, ಸಂಘಗಳು, ಧರ್ಮಕ್ಷೇತ್ರಗಳು ಮತ್ತು ಅಧ್ಯಯನ ಕೇಂದ್ರಗಳ ಮೂಲಕ ಅಂತರ್ ಧರ್ಮೀಯ ಸಭೆಗಳು ನಡೆಯಲಿವೆ.

ಇವುಗಳೆಲ್ಲರ ಉದ್ದೇಶ ಒಂದೇ — ಶಾಂತಿ ಮತ್ತು ಏಕತೆಗೆ ನಾವೆಲ್ಲರೂ ಬದ್ಧರಾಗಿರುವುದನ್ನು ಸಮಾಜದಲ್ಲಿ ಪ್ರತಿಬಿಂಬಿಸುವುದು.