Պեսենթ. Միացեալ Նահանգներ կը պատրաստուին Իրանի դէմ մեծածաւալ ելեւմտական յարձակման

Միացեալ Նահանգներու ելեւմուտքի նախարար Սքաթ Պեսենթ յայտարարած է, որ Ուաշինկթըն կը պատրաստուի Իրանի դէմ իր տեսակին մէջ «բացարձակապէս մեծագոյն» ելեւմտական յարձակումը սկսելու։ Նպատակը Իրանի վարչակարգը պահպանող տնտեսական կապերը կտրելն ու Թեհրանը միջազգային ելեւմտական համակարգէն աւելի մեկուսացնելն է։

Պեսենթ զգուշացուցած է այն երկիրները, որոնք տնտեսական կամ ելեւմտական աջակցութիւն կը տրամադրեն Իրանին, նշելով, որ անոնք կրնան իրենք եւս պատժամիջոցներու ու մեկուսացման ենթարկուիլ։ Միաժամանակ, փոխնախագահ Ճէյ. Տի. Վանս ընդգծած է, որ Ուաշինկթընի հիմնական նպատակներէն մէկը Իրանին միջուկային զէնք ձեռք ձգելէ արգիլելն է։ Ան նաեւ նշած է, որ Միացեալ Նահանգներ կրնան ճնշում գործադրել Իրանի նաւթային եւ կազային արտածումներուն վրայ։

Չինաստան յայտնած է, թէ ուշադիր պիտի հետեւի ամերիկեան պատժամիջոցներու սպառնալիքներուն եւ անհրաժեշտ քայլեր պիտի ձեռնարկէ իր իրաւունքներն ու շահերը պաշտպանելու համար։

Թեհրան, իր հերթին, խստօրէն քննադատած է ամերիկեան քայլերը։ Նախագահ Մեսուտ Փեզեշքիան յայտնած է, որ երկիրը կը դիմագրաւէ տնտեսական, զինուորական եւ ապահովական ծանր ճնշումներ, մինչ կառավարութիւնը կը փորձէ նուազեցնել սղաճը եւ լուծել ջուրի, ելեկտրականութեան, կազի, վառելիքի եւ դրամատնային ոլորտներու խնդիրները։

Իրանի արտաքին գործոց նախարարութեան բանբեր Իսմայիլ Պաղայի ամերիկեան տնտեսական ճնշումը որակած է «տնտեսական ահաբեկչութիւն» եւ զգուշացուցած է այն երկիրները, որոնք իրենց տարածքն ու ռազմակայանները կը տրամադրեն Իրանի դէմ գործող ուժերուն։

Լարուածութեան կարեւոր կէտ կը մնայ նաեւ Հորմուզի նեղուցը, որ ռազմավարական նշանակութիւն ունի միջազգային նաւթային փոխադրումներուն համար։ Իրանի եւ Օմանի միջեւ նախատեսուած են նոր խորհրդակցութիւններ՝ նեղուցի անվտանգութեան եւ ծովային նաւարկութեան վերաբերեալ։

Այսպիսով, Ուաշինկթընի եւ Թեհրանի միջեւ հակամարտութիւնը կը խորանայ միաժամանակ տնտեսական, քաղաքական եւ անվտանգային ճակատներու վրայ, մինչ դիւանագիտական շփումները կը շարունակուին։

Աղբիւրը` Ազդակ