Թայլանտի դպրոցի մէջ հրաձգութիւն․ Առնուազն եօթը զոհ
Վատիկան Նիուզ - Հայկական Բաժանմունք
Թայլանտի մայրաքաղաք Պանքոքի արուարձան Նոնթապուրիի «Տեպսիրին» դպրոցին մէջ 7 Օգոստոսին տեղի ունեցած հրաձգութեան հետեւանքով առնուազն եօթը հոգի զոհուեցան, իսկ 15 ուրիշներ վիրաւորուեցան։ Վիրաւորներէն երկուքին առողջական վիճակը ծայրայեղ ծանր կը գնահատուի։
Ոստիկանութեան համաձայն՝ կրակոցները արձակած է նոյն դպրոցին 14-ամեայ աշակերտ մը, որ յետոյ ինքնասպան եղած է։ Զոհերուն մէջ կան երեք ուսուցիչ եւ երեք աշակերտ, իսկ եօթներորդ զոհը հրաձիգն է։
Դէպքի վայր հասած փրկարար Կիատիքըն Վերափոնկփրատիթ յայտնած է, թէ իրենց ժամանումին ատեն հրաձգութիւնը տակաւին կը շարունակուէր։ Անոր խումբը առաջին օգնութիւն ցուցաբերած է մէջքի, կրծքավանդակի եւ բազուկներու հրազէնային վիրաւորումներ ստացած աշակերտներուն։ Շէնքին վերին յարկին մէջ անոնք գտած են զոհուած ուսուցիչ մը, մինչ այլ դասարանի մը մէջ ծանր վիրաւոր ուսուցչուհի մը վերակենդանացնելու փորձեր կատարած են շուրջ երեսուն վայրկեան՝ նախքան հիւանդանոց տեղափոխելը։
Այս դէպքը տարեսկիզբէն ի վեր Թայլանտի դպրոցներուն մէջ արձանագրուած երկրորդ հրաձգութիւնն է։ Փետրուարին երկրի հարաւային շրջանին մէջ տեղի ունեցած նմանատիպ յարձակման մը ընթացքին ուսուցչուհի մը սպաննուած էր, իսկ աշակերտ մը վիրաւորուած։
Շրջանային կրթական իշխանութիւններու համաձայն՝ 2025 ուսումնական տարեշրջանին դպրոցը ունեցած է շուրջ 3,100 աշակերտ եւ 147 ուսուցիչ։ Կրթութեան փոխնախարար Աքքարանան Քաննաքիթթինան յայտնած է, թէ կը համակարգէ անհրաժեշտ միջոցառումները՝ տուժածներուն եւ անոնց ընտանիքներուն աջակցութիւն ապահովելու համար։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
