Ռայի Պատրիարք. «Նախագահի դիրքորոշումները պատուական ու հայրենասիրական են, անոնք վստահութիւն ու հանգստութիւն կը հաղորդեն բոլոր Լիբանանցիներուն»

Մարոնիներու Ռայի պատրիարքը երէկ կէսօրէ առաջ այցելեց Պաապտայի պալատ, ուր հանրապետութեան նախագահ Ժոզեֆ Աունի հետ իր հանդիպումէն ետք յայտնեց, որ հանդիպումի ընթացքին անդրադարձ կատարուած է Հռոմի մէջ բանակցութիւններու արդիւնքներուն, ինչպէս նաեւ ազգային գլխաւոր հարցերուն եւ ընդհանուր հարցերու:

«Վատիկանը Լիբանանի կողքին կը կանգնի եւ նախանձախնդիր է անոր աջակցելու, եւ պէտք է այս հետաքրքրութեան ու վստահութեան մակարդակին վրայ ըլլանք», ըսաւ ան:

Պատրիարքը նշեց, որ հանրապետութեան նախագահի դիրքորոշումները պատուական ու հայրենասիրական են, եւ վստահութիւն ու հանգստութիւն կը հաղորդեն բոլոր լիբանանցիներուն` շեշտելով, որ ներկայ փուլը կը պահանջէ «դիրքորոշումները միաւորել եւ հաւաքուիլ պետութեան ու անոր հաստատութիւններուն շուրջ` դիմակայելու համար մարտահրաւէրները եւ պաշտպանելու համար Լիբանանը»:

Ան նախագահ Աունին շնորհակալութիւն յայտնեց Էլիաս Հուայէք պատրիարքի երանացման հանդիսութեան մասնակցութեան համար` նշելով. «1965 թուականէն մինչեւ այսօր, այսինքն` Սուրբ Շարպելի երանացումէն ի վեր, 15 սուրբեր ու երանելիներ ունեցանք: Ասիկա կը նշանակէ, թէ երկինքը բաց է եւ լիբանանցիներուն հետ կը խօսի, որ իրենք իրենց, իրենց հայրենիքին ու իրենց պետութեան վստահին»:

Ինչ կը վերաբերի հարաւային Լիբանանին, Ռայի պատրիարքը նշեց, թէ կաթողիկէ դպրոցները տակաւին բաց են եւ աշխատանք կը տանին կրթաթոշակներու հարցը լուծելու` շեշտելով. «Մենք հարաւային Լիբանանի ժողովուրդին հետ ենք, եւ անոնց տունդարձը եւ վերաշինութիւնը կը պահանջենք»:

Աղբիւրը՝ Ազդակ