Նիկերիա. Կիրակնօրեայ Սուրբ Պատարագի ընթացքին զինեալներ յարձակեցան եկեղեցւոյ վրայ. երկու պատանդներ տակաւին գերեվարուած են
Վատիկան Նիուզ - Հայկական Բաժանմունք
Նիկերիոյ Էնուկու նահանգի Ուտի շրջանին մէջ գտնուող Աֆֆայի Սուրբ Յովսէփ եկեղեցին Օգոստոս 2-ի կիրակնօրեայ Սուրբ Պատարագի ընթացքին ենթարկուեցաւ զինեալ յարձակման։ Առնուազն եօթ զինեալներ առաւօտեան շուրջ ժամը 8։30-ին ներխուժեցին եկեղեցի, ընդհատեցին պաշտամունքը եւ առեւանգեցին երեք անձ՝ նորընծայ մը, դասախօս մը եւ հաւատացեալ մը, ապա փախուստ տուին մօտակայ անտառ։
Յարձակումը տեղի ունեցաւ տեղատարափ անձրեւի ընթացքին՝ համայնքին մէջ առաջացնելով խուճապ։ Հաւատացեալները սարսափահար փախուստի դիմեցին, իսկ քանի մը ծխականներ փորձեցին հետապնդել յարձակողները, սակայն հրաժարեցան, որովհետեւ անոնք ծանր զինուած էին եւ պատանդներուն կեանքը վտանգելու վտանգ կար։
Ոստիկանութիւնը որոնողական լայն գործողութիւն սկսաւ եւ յայտարարեց, որ պատանդներէն մէկը՝ դասախօսը, յաջողած է փախչիլ ու ապահով վերադառնալ տուն։
Դէպքը կը վկայէ Նիկերիոյ մէջ եկեղեցիներու եւ քրիստոնէական համայնքներու դէմ շարունակուող բռնութիւններուն մասին, որոնք վերջին տարիներուն զգալիօրէն աճ արձանագրած են։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
