Միջերկրական. նաւակին մէջ՝ եօթը մահացած, 50 գաղթական փրկուած

Վատիկան Նիուզ - Հայկական Բաժանմունք

Կեդրոնական Միջերկրականի մէջ «Life Support» փրկարար նաւը Լիպիական SAR գօտիի միջազգային ջուրերուն մէջ փրկած է 50 գաղթականներ, որոնց մէջ՝ 29 անչափահասներ առանց ընկերակցողի։ Փրկուածներուն մէջ կան նաեւ հինգ կին, մինչդեռ նաւակին մէջ յայտնաբերուած են եօթը մահացած անձերու մարմինները։

Երկու փրկուածներու վիճակը ծանր է. անոնք, ըստ «Emergency»-ի, շնչահեղձութեան հետեւանքներ կը կրեն՝ ամբողջ ճանապարհորդութիւնը նաւակին ներքնամասի մէջ անցուցած ըլլալով։ Փրկուածները, որոնք Սոմալիայէն եւ Եգիպտոսէն են, պատմած են, թէ Լիպիոյ Զուվարա քաղաքէն ճամբայ ելած էին Կիրակի՝ 16 Օգոստոսին։

«Emergency»-ի փրկարարական նաւը փրկութեան գործողութիւնը կատարած է լուսաբացին՝ Լիպիական առափնեայ պահակախումբի նաւակի մը ներկայութեամբ։ Փրկութենէն ետք «Emergency» խնդրած է մօտիկ նաւահանգիստ մը՝ նկատի ունենալով փրկուածներու ծանր վիճակը։ Իտալական իշխանութիւնները իբրեւ իջեցման նաւահանգիստ նշանակած են Պարիի նաւահանգիստը։