4 օգոստոսի պայթումի 6-ամեակին առիթով` Աուն. «Ամբաստանութեան հրապարակումը անհրաժեշտութիւն մըն է, որ յաւելեալ սպասում չի հանդուրժեր»

Հանրապետութեան նախագահ Ժոզեֆ Աուն Պէյրութի նաւահանգիստի պայթումի 6-ամեակին առիթով շեշտեց, թէ ամբաստանութեան հրապարակումը անհրաժեշտութիւն մըն է, որ յաւելեալ սպասում չի հանդուրժեր:

«Ամէն տարի այս օրը ամբողջ Լիբանանը կը կանգնի չբուժուած վէրքի եւ չմարած յիշողութեան առջեւ: Մենք կը յիշենք այն պահու սարսափը, երբ Պէյրութը մինչեւ խորքը ցնցուեցաւ, երբ նաւահանգիստը` տնտեսութեան կենսական կարեւորութիւն ունեցող աղբիւրը, վերածուեցաւ ժամանակակից պատմութեան մէջ աննախադէպ ողբերգութեան թատերաբեմի: Ատիկա պայթում էր, որ փոխեց մայրաքաղաքի դէմքը, խլեց անմեղ կեանքեր, հարիւրաւոր վիրաւորներ ձգեց եւ պատճառեց աւերներ, որոնք նախքան սրտերուն դպնալը` քարերուն դպան», ըսաւ ան:

«Այսօր մենք կը յիշենք անարդարօրէն ինկած իւրաքանչիւր նահատակը եւ իւրաքանչիւր ընտանիքը, որ տարիներ շարունակ սպասած է իր կատարած զոհողութեան արժանի պատասխանի: Մենք կը յիշենք այն երեխաները, որոնք զրկուած են իրենց հայրերու եւ մայրերու գրկախառնութենէն, եւ այն մայրերը, որոնք տակաւին արդարութեան կը սպասեն աւելի քան ցաւը ջնջելու համար ժամանակին», աւելցուց հանրապետութեան նախագահը:

Նախագահ Աուն շեշտեց, որ այս տարելիցը միայն սուգի պահ չէ, այլ աւելի շատ մնայուն յիշեցում պարտականութեան մը, որ ենթակայ չէ վաղեմութեան ժամկէտի. ճշմարտութեան, արդարութեան եւ հաշուետուողականութեան պարտականութիւնը:

Ան ընդգծեց, որ վէրքը պիտի չսպիանայ, եւ ժողովուրդը պիտի չվերականգնէ իր հաստատութիւններուն նկատմամբ վստահութիւնը, քանի տակաւին արդարադատութեան հոլովոյթը չէ աւարտած:

Աղբիւրը՝ Ազդակ