Ամենայն Հայոց Կաթողիկոսը ընդունեց Արժանթինի հայ վարժարաններու շրջանաւարտները
Օգոստոս 6-ին, Մայր Աթոռ Սուրբ Էջմիածինի մէջ, Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսը ընդունեց Արժանթինի հայոց թեմի «Սուրբ Գրիգոր Լուսաւորիչ», «Դերձակեան» երկրորդական վարժարաններու, «Արծրունի» եւ ՀԲԸՄ «Մարի Մանուկեան» ազգային վարժարաններու շրջանաւարտները։
Իր հայրական օրհնութիւնն ու սէրը փոխանցելով երիտասարդներուն՝ Վեհափառ Հայրապետը շնորհաւորեց զանոնք ուսման կարեւոր հանգրուանի աւարտին առիթով՝ ընդգծելով, որ ազգային կրթական հաստատութիւնները հիմնարար դեր կը կատարեն սփիւռքահայ ինքնութեան պահպանման, ինչպէս նաեւ նոր սերունդին ազգային եւ հոգեւոր արժէքներով դաստիարակութեան մէջ։
Ամենայն Հայոց Կաթողիկոսը նաեւ շեշտեց, թէ գեղեցիկ աւանդոյթ դարձած է սփիւռքահայ երիտասարդներուն հայրենիք այցելութիւնը, որ անոնց հնարաւորութիւն կու տայ մօտէն ծանօթանալու Հայաստանի իրականութեան, պատմական անցեալին եւ հարուստ մշակութային ու հոգեւոր ժառանգութեան։ Անդրադառնալով Սուրբ Էջմիածինի առաքելութեան՝ Նորին Սրբութիւնը յիշեցուց, որ աշխարհասփիւռ հայութիւնը դարեր շարունակ իր ուժն ու հոգեւոր զօրութիւնը ստացած է Մայր Աթոռէն եւ հայրենի հողէն։
Հանդիպման ընթացքին Վեհափառ Հայրապետը իր գնահատանքը յայտնեց նաեւ վարժարաններու հոգաբարձուներուն, տնօրէններուն եւ ուսուցիչներուն՝ հայեցի կրթութեան ու դաստիարակութեան գործին մէջ իրենց նուիրեալ ծառայութեան համար։
Հանդիպման աւարտին Ամենայն Հայոց Կաթողիկոսը կոչ ուղղեց շրջանաւարտներուն՝ հայրենիքէն ներշնչուած եւ հոգեպէս զօրացած վերադառնալու իրենց համայնքներ, նախնիներու օրինակով մնալու ազգասէր ու Եկեղեցւոյ նուիրեալ, եւ շարունակելու ամրապնդել Արժանթինի հայ համայնքի ազգային ու հոգեւոր կեանքը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
