Ֆութպոլը երեխաներուն կը սորվեցնէ ընդունիլ պարտութիւնը
Ֆութպոլը եւ ընդհանրապէս մարզական խաղերը երեխաներուն միայն մրցակցութիւն եւ յաղթանակ չեն սորվեցներ, այլ նաեւ կարեւոր կեանքի դասեր՝ պարտութիւնը ընդունիլ, հիասթափութիւնը յաղթահարել եւ կրկին փորձել։
Երեխաները պէտք է հասկնան, որ միշտ կարելի չէ առաջինը ըլլալ։ Երբեմն ուրիշ մը կրնայ աւելի լաւ խաղալ, արագ վազել կամ աւելի մեծ կարողութիւն ցուցաբերել։ Պարտութիւնը, սակայն, չի նշանակեր անձնական ձախողութիւն։ Կարեւորը՝ ջանք գործադրելն ու սխալներէն սորվիլն է։
Մարզական մրցումները նաեւ երեխաներուն կը սորվեցնեն կարգապահութիւն, խմբային աշխատանք, դիմացկունութիւն եւ խոնարհութիւն։ Անոնք պէտք է սորվին շնորհաւորել յաղթողը եւ ուրախանալ անոր յաջողութեամբ՝ առանց իրենց արժէքը արդիւնքին հետ կապելու։
Միաժամանակ, երեխաներուն պարտութեան դիմաց միայն «աւելի լաւ փորձէ՛» ըսելը բաւարար չէ։ Անոնք կարիք ունին նաեւ կարեկցանքի եւ հասկցուելու զգացումին։ Ծնողը կրնայ ընդունիլ երեխային յուսախաբութիւնը՝ ըսելով. «Կը հասկնամ, որ յուսախաբ ես» կամ «Գիտեմ, որ կ՚ուզէիր յաղթել»։ Այսպիսի վերաբերմունքը չի թուլացներ դիմադրողականութիւնը, այլ կը նպաստէ առողջ յուզական զարգացման։
Ֆութպոլը այդ դասերը սորվելու համար ապահով միջավայր մը կը ստեղծէ։ Երեխաները կը սորվին կառավարել իրենց զգացումները, պատասխանատուութիւն ստանձնել, աշխատիլ իրենց թերութիւններուն վրայ եւ նոր ուժով վերադառնալ մրցակցութեան։
Ի վերջոյ, պարտութեան կարեւորագոյն դասը այն է, որ երկրորդ կամ նոյնիսկ վերջին ըլլալը մարդը չի դարձներ նուազ արժէքաւոր։ Իրական դիմադրողականութիւնը այն է, երբ երեխան կը կարողանայ պարտուիլ, առանց ինքզինք անյաջող համարելու, յարգել յաղթողը եւ վճռականութեամբ փորձել կրկին։
Աղբիւրը` Ազդակ եւ Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
