Ֆրանսա. Թեզէի համայնքի հիմնադրութեան տարեդարձը
Վազգէն Աբարդեան - Վատիկան
20 Օգոստոս 1940-ին ծնունդ առաւ Թեզէն. պուրկունտեան փոքրիկ գիւղը, որ դարձաւ համաքրիստոնէական համաշխարհային փարոս։
Այսօր՝ Ֆրանսայի մէջ կը նշուի Թեզէի Տիեզերական Համայնքի հիմնադրութեան տարեդարձը։ Համայնքը հիմնուած է 1940-ին՝ շուէտցի բողոքական հովիւ Ռոժէ Շուցի նախաձեռնութեամբ, որ յետագային ճանչցուեցաւ «եղբայր Ռոժէ» անունով։ Պուրկոնիայի Թեզէ փոքր գիւղին մէջ հիմնուած այս համայնքը տարիներու ընթացքին դարձած է քրիստոնէական տարբեր յարանուանութիւններու միջեւ աղօթքի, համամիութենական, երկխօսութեան եւ հանդիպման կարեւոր կեդրոն մը։
Իր հիմնադրութենէն ի վեր Թեզէն նպաստած է քրիստոնեաներու հաշտութեան՝ պարզութեան, աղօթքի եւ հիւրընկալութեան վրայ հիմնուած համայնքային կեանքի միջոցով։ Առանձնայատուկ տեղ կը գրաւեն կարճ ու խորհրդածական շարականներով արարողութիւնները, լռութիւնը եւ Աստուծոյ Խօսքի ունկնդրութիւնը։
Տասնամեակներու ընթացքին հազարաւոր երիտասարդներ այցելած են Թեզէ՝ մասնակցելու միջազգային հանդիպումներու եւ ապրելու եղբայրութեան ու համակեցութեան փորձառութիւն մը։ Համայնքը մինչեւ այսօր կը շարունակէ իր առաքելութիւնը՝ երիտասարդները քաջալերելով կառուցելու երկխօսութեան, խաղաղութեան եւ համերաշխութեան կամուրջներ՝ բաժանումներով ու հակամարտութիւններով յատկանշուող աշխարհի մը մէջ։
Իր հիմնադրութենէն տասնամեակներ ետք, Թեզէի համայնքը կը շարունակէ ներկայացնել հաշտութեան իրական մարգարէութիւն մը՝ ապացուցանելով, թէ ինչպէս հոգեւոր փնտռտուքն ու ընկերային յանձնառութիւնը կրնան միաձուլուիլ յոյսի համամարդկային պատգամի մը մէջ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
