Նեթանիահու կը մերժէ Կազայի խաղաղութեան ծրագիրը՝ պահանջելով Համասի ամբողջական զինաթափումը
Իսրայէլի վարչապետ Պենիամին Նեթանիահու յայտարարեց, որ Իսրայէլ չի ընդունիր Կազայի Խաղաղութեան խորհուրդին ներկայացուցած 15 կէտերէ բաղկացած ծրագիրը եւ Կազայէն պիտի չհեռանայ այնքան ատեն, որ Համասի «իրական եւ ամբողջական» զինաթափումը չէ իրականացուած։
Նեթանիահու շեշտեց, որ զինաթափումը պէտք է ներառէ Համասի բոլոր զէնքերը՝ ծանր թէ թեթեւ, եւ ընդգծեց, որ իր վարչապետութեան ընթացքին պաղեստինեան պետութեան ստեղծում պիտի չըլլայ ոչ Կազայի, ոչ ալ Արեւմտեան ափի մէջ։
Միաժամանակ, ան նշեց, որ Իսրայէլը Ուաշինկթընի հետ կը բանակցի խաղաղութեան ծրագիրին շուրջ։ Ան բարձր գնահատեց ԱՄՆ նախագահ Տանըլտ Թրամփի հետ համագործակցութիւնը, սակայն ընդգծեց, որ անհրաժեշտութեան պարագային պատրաստ է պաշտպանելու իր դիրքորոշումները նաեւ դաշնակիցներու հետ տարակարծութեան պայմաններուն մէջ։
Նեթանիահու նաեւ անդրադարձաւ Լիբանանի մէջ իսրայէլեան բանակի վերջին գործողութիւններուն եւ յայտնեց, որ երկիրը կը շարունակէ աշխատիլ անվտանգութեան սպառնալիքները վերացնելու ուղղութեամբ։ Ան կրկնեց նաեւ իր դիրքորոշումը, թէ Իրան պէտք չէ ունենայ հիւլէական զէնք։
Մինչդեռ Համասը յայտարարեց, որ կը շարունակէ յանձնառու մնալ Գահիրէի մէջ միջնորդներուն եւ Խաղաղութեան խորհուրդի ներկայացուցիչներուն հետ ձեռք բերուած համաձայնութեան։ Շարժումը կոչ ուղղեց միջնորդներուն եւ ԱՄՆ-ին՝ ճնշում բանեցնելու Իսրայէլի վրայ՝ ճամբու քարտէսը յարգելու եւ խաղաղութեան գործընթացը չխոչընդոտելու համար։
Այսպիսով, Կազայի պատերազմի դադրեցման շուրջ բանակցութիւնները կը մնան անորոշ վիճակի մէջ, քանի որ Իսրայէլն ու Համասը կը պահպանեն էապէս տարբեր դիրքորոշումներ՝ յատկապէս զինաթափման եւ իսրայէլեան ուժերու հեռացման հարցերուն շուրջ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
