Հոգեւոր Առաջնորդի Վաստակը. Գերշ. Տ. Խաժակ Արք. Պարսամեան՝ 75-ամեակի շեմին
Կան անձնաւորութիւններ , որոնց կեանքը կը դառնայ ծառայութեան, հաւատքի եւ նուիրումի կենդանի վկայութիւն։ Անոնք իրենց կոչումը չեն սահմանափակեր եկեղեցական պաշտօնով, այլ իրենց ամբողջ էութեամբ կը ծառայեն Աստուծոյ, ազգին եւ Հայ Եկեղեցւոյ՝ սերունդներուն փոխանցելով հոգեւոր արժէքներ, ազգային գիտակցութիւն եւ միասնութեան ոգի։ Տասնամեակներու հաւատարիմ ու արգասաբեր վաստակով անոնք կը դառնան կամուրջներ ժողովուրդներու, եկեղեցիներու եւ համայնքներու միջեւ՝ իրենց օրինակով ներշնչելով նոր սերունդները։
Այդպիսի արժանաւոր եկեղեցականներէն եւ ազգային դէմքերէն մէկն է Գերաշնորհ Տ. Խաժակ Արքեպիսկոպոս Պարսամեանը, որուն անունը արդէն վաղուց իր արժանի տեղը գրաւած է Հայ Առաքելական Սուրբ Եկեղեցւոյ նորագոյն պատմութեան մէջ։ Անոր հոգեւոր, ազգային, կրթական եւ եկեղեցադիւանագիտական բազմամեայ ծառայութիւնը խոր հետք ձգած է թէ՛ հայրենիքի, թէ՛ սփիւռքի եկեղեցական ու ազգային կեանքին մէջ՝ վաստկելով համընդհանուր յարգանք եւ գնահատանք։
Գերշ. Տ. Խաժակ Արքեպիսկոպոս Պարսամեան իր ծննդեան 75-ամեակը նշեց՝ շուրջ կէս դար շարունակ Հայ Առաքելական Սուրբ Եկեղեցւոյ եւ հայ ժողովուրդին մատուցած իր նուիրեալ ծառայութեամբ արժանանալով համընդհանուր յարգանքի։
1951 թուականին Արաբկիրի մէջ ծնած Սրբազան Հայրը վաղ տարիքէն ընտրեց հոգեւոր ուղին։ Ան ուսանեցաւ Պոլսոյ Սուրբ Խաչ Ճեմարանին եւ Երուսաղէմի Սրբոց Յակոբեանց Միաբանութեան Ժառանգաւորաց Ճեմարանին մէջ, ապա իր աստուածաբանական կրթութիւնը շարունակեց արտասահմանի բարձրագոյն կրթական կեդրոններու մէջ։ 1971-ին ձեռնադրուեցաւ կուսակրօն քահանայ, իսկ 1973-ին ստացաւ վարդապետական աստիճանը։
Իր եկեղեցական ծառայութեան ամենէն նշանակալի հանգրուաններէն մէկը եղաւ Ամերիկայի Հայոց Արեւելեան Թեմի առաջնորդութիւնը, ուր շուրջ երեք տասնամեակ առաջնորդեց թեմը՝ զօրացնելով եկեղեցական, կրթական, մշակութային եւ բարեսիրական կեանքը, ինչպէս նաեւ ամրապնդելով հայ համայնքի միասնականութիւնը։
2018-էն ի վեր Գերշ. Տ. Խաժակ Արքեպիսկոպոս Պարսամեան կը ծառայէ որպէս Արեւմտեան Եւրոպայի Հայրապետական Պատուիրակ եւ Հայ Առաքելական Սուրբ Եկեղեցւոյ ներկայացուցիչ Սուրբ Աթոռին մօտ։ Իր առաքելութիւնը կը շարունակէ նպաստել միջեկեղեցական երկխօսութեան, խաղաղութեան, քրիստոնէական արժէքներու պահպանման եւ աշխարհասփիւռ հայութեան համախմբման։
Անոր 75-ամեայ յոբելեանը առիթ է արժեւորելու այն հարուստ հոգեւոր, ազգային եւ եկեղեցադիւանագիտական վաստակը, որ տասնամեակներ շարունակ ծառայած է Հայ Եկեղեցւոյ եւ հայ ժողովուրդին։
Այս առիթով կը յղուին ջերմ շնորհաւորութիւններ եւ բարեմաղթանքներ Գերշ. Տ. Խաժակ Արքեպիսկոպոս Պարսամեանին՝ մաղթելով քաջառողջութիւն, երկարամեայ ծառայութիւն եւ Աստուծոյ առատ օրհնութիւնը, որպէսզի շարունակէ իր լուսաւոր առաքելութիւնը՝ ի փառս Հայ Առաքելական Սուրբ Եկեղեցւոյ եւ ի բարօրութիւն հայ ժողովուրդին։
Աղբիւրը Արեւելք
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
