Էնտի Պըռնհամ ստանձնեց Բրիտանիոյ Վարչապետի պաշտօնը

Բրիտանիոյ Չարլզ Գ. թագաւորը Պաքինկհամ պալատին մէջ ընդունեց Աշխատաւորական կուսակցութեան նոր ղեկավար Էնտի Պըռնհամը,  զինք նշանակեց Բրիտանիոյ վարչապետ եւ անոր պարտականութիւն տուաւ Բրիտանիոյ կառավարութիւնը կազմել:

Էնտի Պըռնհամ ստանձնեց Բրիտանիոյ վարչապետի պաշտօնը` խոստանալով սկսիլ «10-ամեայ ծրագիր», որ պիտի լուծէ Բրիտանիոյ յառաջընթացը խոչընդոտող հիմնարար խնդիրները:

«Ատիկա չի նշանակեր, որ ես կը պատրաստուիմ 10 տարի այստեղ ըլլալ: Խօսքը կառուցուածքային փոփոխութիւններու մասին է», յայտարարեց ան Տաունինք Սթրիթի մէջ իր արտասանած առաջին խօսքին մէջ` խոստանալով բրիտանացիներու կարիքները դնել կառավարութեան ուշադրութեան կեդրոնը:

Արձանագրելով, որ ինք վերջին տասը տարուան մէջ արդէն Բրիտանիոյ եօթներորդ վարչապետն է, Պըռնհամ յայտարարեց. «Մենք պէտք է ընդունինք, որ բաւականաչափ արդիւնաւէտ չենք եղած»:

Ան նշեց, որ օտարերկրեայ առաջին ղեկավարները, որոնց հետ ան հեռաձայնային հաղորդակցութիւն պիտի ունենայ, պիտի ըլլան Միացեալ Նահանգներու եւ Ուքրանիոյ նախագահները:

Ան ամբողջութեամբ շրջանցեց Ուքրանիոյ աջակցութեան եւ արտաքին քաղաքականութեան հարցերը, սակայն խոստացաւ շարունակել նախորդ կառավարութեան դէպի ռազմականացում ընթացքը:

Բրիտանիոյ նոր վարչապետը, սակայն, «Սքայ Նիուզ» պատկերասփիւռի կայանին հետ հարցազրոյցի ընթացքին յայտնեց. «Ես Ուքրանիոյ պիտի աջակցիմ հարիւր տոկոսով, ճիշդ ինչպէս Քիր Սթարմըրը կ՛ընէր»:

Աղբիւրը` Ազդակ