Թրամփ. «Ուաշինկթըն Իրանի հետ շատ լաւ գործարքի կը մօտենայ»
Միացեալ Նահանգներու նախագահ Տանըլտ Թրամփ յայտարարեց, որ Ուաշինկթըն Իրանի հետ «շատ լաւ գործարքի» կը մօտենայ, սակայն ընդգծեց, որ բանակցութիւններու տապալման պարագային զինուորական գործողութիւններու տարբերակը սեղանին վրայ կը մնայ: Ան այս մասին յայտնեց «Ֆոքս Նիուզ»-ին:
«Ասիկա արդէն իսկ յաղթանակ է: Մենք անոնց բանակը պարտութեան մատնած ենք, անոնց բանակը ըստ էութեան պարտութեան մատնած ենք», ըսաւ Թրամփ իր հարսին` «Ֆոքս Նիուզ»-ի մեկնաբան Լարա Թրամփի հետ հարցազրոյցի ընթացքին` աւելցնելով. «Ես պիտի նախընտրէի գործարք կնքել, որովհետեւ մենք կրնանք (Հորմուզի) նեղուցը բանալ` անմիջապէս ստորագրելէ ետք»:
Սպիտակ տան ղեկավարը վերստին շեշտած է, որ Իրան երբեք չի կրնար հիւլէական զէնք ունենալ, եւ ատիկա բանակցութիւններու ենթակայ հարց չէ:
«Ես երաշխիք պէտք է ունենամ, թէ հիւլէական զէնք երբեւէ պիտի չըլլայ», ըսաւ ան` մանրամասնելով, որ իրանցի բանակցողները յանձնառութիւն յայտնած են ոչ միայն չստեղծելու, այլ նաեւ չգնելու հիւլէական զէնքեր:
«Ատիկա մեծ տարբերութիւն է… այսինքն` մենք դանդաղօրէն մեր ուզածը կը ստանանք», նշած է Թրամփ:
Միացեալ Նահանգներու նախագահը իրանցի պաշտօնատարները «շատ տոկուն բանակցողներ» կոչելով յայտնած է, որ պիտի արտօնէ, որ բանակցութիւնները ներկայ հունով ընթանան:
«Ես չեմ շտապեր… Կ՛ուզէի ըսել, թէ կը շտապեմ, որովհետեւ վառելանիւթի գիները անմիջապէս պիտի նուազին, սակայն եթէ շտապես, լաւ գործարք չես կնքեր», ըսաւ ան:
«Դանդաղօրէն, սակայն հաստատակամութեամբ մենք կը ստանանք, կը կարծեմ, այն, ինչ որ կ՛ուզենք… Իսկ եթէ չստանանք այն, ինչ որ կ՛ուզենք, ասիկա այլ կերպ պիտի աւարտենք», աւելցուց Թրամփ:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
