Արհեստական Բանականութիւնը կրնա՞յ մանուկներուն բոլոր հարցերը լուծել
Լիբանանի Ազդակ օրաթերթը հրատարակած է «Արհեստական Բանականութիւնը կրնա՞յ մանուկներուն բոլոր հարցերը լուծել» վերնագիրով Նարէ Գալեմքէրեանի ստորագրութիւնը կրող յօդուած մը որուն մէջ քննարկուած է դեռահասներուն կողմէ արհեստական բանականութեան (ԱԲ) ուղեկիցներու եւ «չեթփոթներու» աճող օգտագործումը։
«Վերջերս շատ տարածուած երեւոյթ մըն է դեռահասներու կախուածութիւնը արհեստական բանականութենէն (ԱԲ) եւ անոր ուղեկցողներէն: Բայց անպատեհութիւնը եւ վտանգաւորը այն է, որ մանուկներուն բոլոր հարցերը այդ ձեւով չեն լուծուիր, որովհետեւ արհեստագիտութիւնը չի կրնար փոխարինել մարդիկը» կը կարդանք յօդուածին սկիզբը ու յղում կը կատարուի նաեւ «Common Sense Media» կայքին նոյն բնաբանով հրապարակած յօդուածին։
Ըստ 2025-ի հարցախոյզին, 13-17 տարեկան դեռահասներուն 72%-ը օգտուած է նման գործիքներէ, իսկ շատեր անոնց կը դիմեն ընկերային կամ անձնական խնդիրներ քննարկելու համար։
Հետազօտողները կը զգուշացնեն, որ ԱԲ-ն չի կրնար փոխարինել իրական մարդկային յարաբերութիւնները։ «Չեթփոթերը» յաճախ կը համաձայնին օգտատէրերուն հետ, կը հաճոյանան անոնց եւ չեն ներկայացներ այն բնական դժուարութիւններն ու տարբեր կարծիքները, որոնք անհրաժեշտ են ընկերային եւ յուզական զարգացման համար։ Արդիւնքին, երեխաները կրնան աւելի դժուար սորվիլ իրական մարդոց հետ հաղորդակցիլ, հասկնալ մարմնի լեզուն եւ առողջ յարաբերութիւններ կառուցել։
Յօդուածը նաեւ կը մատնանշէ գաղտնիութեան վտանգները. շատ դեռահասներ անձնական տեղեկութիւններ կը բաժնեն ԱԲ հետ՝ առանց գիտակցելու, որ այդ տեղեկութիւնները կը պահպանուին եւ կրնան օգտագործուիլ ընկերութիւններու կողմէ։
Մասնագէտները խորհուրդ կու տան, որ ծնողները բաց եւ առանց դատապարտելու խօսին իրենց զաւակներուն հետ ԱԲ օգտագործման մասին, խրախուսեն դէմ-յանդիման ընկերական հանդիպումները եւ սահմանափակեն կամ վերահսկեն ԱԲ ուղեկիցներու օգտագործումը։ Անոնք նաեւ պէտք է իրենց օրինակով ցուցադրեն արհեստագիտութեան առողջ եւ հաւասարակշռուած գործածութիւն։
Յօդուածին հիմնական պատգամն է, որ թէեւ արհեստական բանականութիւնը կրնայ օգտակար գործիք ըլլալ, ան չի կրնար փոխարինել իրական ընկերները, ընտանիքը եւ մարդկային յարաբերութիւնները, որոնք անհրաժեշտ են մանուկներուն եւ դեռահասներուն առողջ զարգացման համար։
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
