Իրան-Իսրայէլ փոխադարձ յարձակումները դադրեցան
Երէկ Իսրայէլը եւ Իրանը փոխադարձ յարձակումներ կատարեցին, ինչ որ շրջանին մէջ յայտարարուած զինադադարը կը վտանգէ եւ կը սպառնայ ականահարել Միջին Արեւելքի մէջ պատերազմին վերջ տուող համաձայնութեան մը գոյացման յոյսերը:
Իրան Իսրայէլը հրթիռակոծեց` հակադարձելով Իսրայէլի կողմէ Պէյրութի Հարաւային արուարձաններուն վրայ կատարուած յարձակումին, իսկ Իսրայէլ Միացեալ Նահանգներու նախագահ Տանըլտ Թրամփի Թեհրանին չհակադարձելու կոչը անտեսելով յարձակումներ շղթայազերծեց Իրանի դէմ:
Իրանի Յեղափոխական պահակագունդը թիրախաւորեց Իսրայէլի հարաւը գտնուող Նեւաթիմ եւ կեդրոնը գտնուող Թել Նոֆ ռազմակայանները` հակադարձելով Իրանի մէջ երեք տարբեր վայրերու մէջ ռատարներու դիրքերու վրայ իսրայէլեան օդուժի յարձակումին:
Իսրայէլեան բանակը յայտարարեց, թէ Իրանի մէջ հարուածած է զինուորական թիրախներ եւ նաւթարդիւնաբերութեան համալիր մը:
Իսրայէլեան պատկերասփիւռի 13-րդ կայանին համաձայն, իսրայէլեան օդուժը Իրանի մէջ 20 թիրախներ ռմբակոծած է:
«Արապիա» հաղորդեց, որ իսրայէլացի պաշտօնատար մը երէկ յայտնած է, որ Իրանի վրայ յարձակումը կատարուած է Միացեալ Նահանգներու հետ համակարգաբար:
«Մենք իրանցիներուն եւ անոնց գործակատարներուն հետ քանի մը օր կռիւի շեմին ենք», նշած է ան:
Իսրայէլեան բանակի ձայնասփիւռի կայանը հաղորդեց. «Իսրայէլի մէջ ապահովական համակարգի գնահատումը այն է, որ քանի մը օրուան վրայ երկարող զինուորական դիմակայման սկիզբը կը գտնուինք»:
Իրանեան զինուորական աղբիւր մը իրանեան «Թասնիմ» լրատու գործակալութեան յայտնեց, որ Թեհրան երկարատեւ պատերազմի պատրաստ է` նշելով. «Ուաշինկթըն չի կրնար Իսրայէլի ոճիրներէն ձեռքերը լուալ»:
Միացեալ Նահանգներու նախագահ Տանըլտ Թրամփ յայտարարեց. «Նեթանիահու Իրանի հետ Միացեալ Նահանգներու գործարքը ընդունելէն բացի այլընտրանք չունի: Բոլոր որոշումները ես կու տամ, Նեթանիահուն որոշումները չի տար»: Այս մասին հաղորդեց «Ֆայնենշըլ Թայմզ» օրաթերթը:
Թրամփ «Ֆոքս Նիուզ» պատկերասփիւռի կայանին ալ յայտնեց. «Իրանին կ՛ըսեմ` ձեր հրթիռները արձակեցիք, եւ ատիկա բաւ է. բանակցութիւններու սեղան վերադարձէ՛ք եւ գործարք կնքեցէ՛ք»:
«Ուրախ չեմ այսօր Պէյրութին հասցուած իսրայէլեան հարուածէն», շեշտեց Սպիտակ տան ղեկավարը:
«Իրանի հետ գործարքի հասնելուն մօտ ենք», աւելցուց Թրամփ:
Միացեալ Նահանգներու նախագահը աւելի ուշ նշեց. «Իսրայէլն Ու Իրանը պէտք է անմիջապէս կրակոցը դադրեցնեն»:
Իրանի արտաքին գործոց նախարարութեան բանբեր Իսմայիլ Պաղայի յայտարարեց. «Միացեալ Նահանգները ուղղակի պատասխանատուութիւն կը կրեն զինադադարի վերջին խախտումներուն համար, եւ Իսրայէլի արարքները կարելի չէ անջատել Ուաշինկթընի քաղաքականութենէն»:
«Ոչ ոք կը հաւատայ, թէ սիոնական գոյացութիւնը կրնայ շրջանին մէջ գործել առանց Ամերիկայի հետ ամբողջական համակարգումի», ըսաւ ան` աւելցնելով. «Ամբողջ տեղի ունեցողին ետին Ամերիկան կը կանգնի, եւ ատիկա լարուածութեան վերանորոգման կը յանգեցնէ»:
«Մենք զինադադարին յանձնառու էինք, եւ իրենք զայն կը խախտեն: Մենք պատրաստ ենք երկրին ապահովութիւնն ու շահերը պաշտպանելու», նշեց Պաղայի:
Իրանի արտաքին գործոց նախարարութեան բանբերը նաեւ աւելցուց. «Դիւանագիտութիւնն ու պատերազմի դաշտը միաժամանակ կ՛ընթանան եւ երկրի գերագոյն շահերը կ՛ապահովեն»:
«Լիբանանի դէմ պատերազմին վերջ տալը զինադադարի համաձայնութեան մաս կը կազմէ, եւ երբ այս կէտը խախտուի, դիւանագիտական հոլովոյթը եւս կ՛ազդուի», նշեց Պաղայի:
Չինաստանի արտաքին գործոց նախարարութիւնը յայտնեց. «Միջին Արեւելքի մէջ տիրող կացութեան նկատմամբ խոր մտահոգութիւն կը զգանք»:
«Թշնամական արարքներու վերսկսումը որեւէ կողմի շահերուն չի ծառայեր», նշեց նախարարութիւնը:
Իրանի գերագոյն հոգեւոր պետի միջազգային հարցերու խորհրդատու Ալի Աքպար Վելայեթի յայտարարեց. «Թշնամիին դիմաց երկու ընտրանք կայ` կա՛մ իր անմտութիւնները դադրեցնել, կա՛մ ալ մուտք գործել Հորմուզի նեղուցով եւ Պապ Մանտեպով վերահսկուած հաւասարակշռութիւն»:
«Դիմադրութիւնը կարողութիւնը ունի Հորմուզի նեղուցն ու Պապ Մանտեպ նեղուցը փակելու», նշեց ան:
«Պապ Մանտեպի այսօր վայելած ապահովութիւնը պէտք չէ թշնամին սխալ հաշուարկի մղէ», շեշտեց Վելայեթի:
«Սիոնական գոյացութեան Պէյրութի մէջ անմտութիւնն ու զինադադարը խախտելը կեանքի կոչեց մեր հակադարձութեան առաջին փուլը», յայտնեց Իրանի գերագոյն հոգեւոր պետի խորհրդականը:
Ռուսիոյ մէջ Իրանի դեսպան Քազեմ Ժալիլի ռուսական «Իզվեսթիա» օրաթերթին հետ հարցազրոյցի ընթացքին նշեց. «Հորմուզի նեղուցը պիտի բացուի, սակայն իրանեան եւ օմանեան իշխանութիւններուն կողմէ ճշդելի նոր պայմաններու հիմամբ»:
«Մենք գիտենք, թէ Իրանն ու Օմանը այս նեղուցին առնչուած կարգ մը ծառայութիւններ պիտի մատուցեն, եւ այդ ծառայութիւններուն դիմաց տուրքեր պիտի հաստատուին», աւելցուց ան:
Եմէնի Անսարուլլա շարժումի բանբեր Եահիա Սարիհ Կարմիր ծովուն մէջ Իսրայէլի նաւարկութեան ամբողջական արգիլումը յայտարարեց` աւելցնելով. «Անոր շարժումները մեր ուժերուն թիրախներ կը նկատենք»:
«Բռնագրաւեալ Եաֆայի շրջանին մէջ գտնուող զգայուն թիրախներու վրայ արձակեցինք հրթիռներ, որոնք իրենց թիրախները հարուածեցին», ըսաւ ան:
«Մագլցումը մագլցումով պիտի դիմակայենք, եւ մեր գործողութիւնները պիտի ըլլան մագլցողական` դէպքերուն հետ քայլ պահող եւ դիմադրութեան առանցքին հետ գործընկերութեամբ», յայտնեց Սարիհ:
Միացեալ Նահանգներու նախագահ Տանըլտ Թրամփ աւելի ուշ յայտնեց, որ Իսրայէլն ու Իրանը անմիջական զինադադարի կը ձգտին` աւելցնելով. «Խաղաղութեան վերաբերեալ վերջնական բանակցութիւնները ընթացքի մէջ են` տգիտութեան եւ անմտութեան պատճառով զանոնք խոչընդոտելու հաւանականութեան հետ մէկտեղ»:
Աղբիւրներ իսրայէլեան «Իսրայէլ Հայոմ» օրաթերթին յայտնեցին, որ Իսրայէլ եւ Միացեալ Նահանգներ Իրանին փոխանցած են պատգամ մը, թէ յաւելեալ յարձակումներ պիտի չըլլան, եթէ Իրան անգամ մը եւս չկրակէ:
Իրանի զինեալ ուժերու «Խաթեմ Անպիա» կեդրոնը յայտարարեց զինուորական գործողութիւններու դադրեցումը` աւելցնելով. «Կ՛ընդգծենք, որ մասնաւորաբար հարաւային Լիբանանի մէջ յարձակումներու շարունակման պարագային մեր հակադարձութիւնը աւելի ուժեղ պիտի ըլլայ»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ.
